#مشاعر_مجهولة
#بقلم #وعد_السعيد
الجزء الاول :

 

سنين بتمرق علينا ، و كأنها لحظات قليلة ..
بنوقف قدام المرايا ، بندقق بالخطوط اللي بتظهر على وجوهنا ، و الخيوط اللي صار لونها رمادي ، كترت بشعرنا ..
و بين كل خط و خيط ، في حكاية ..
و الحكايا ما بتنتهي ، و حتى بعد ما نندفن تحت التراب ، رح تبقى الناس تحكي علينا ..
هالحكايا نحن ابطالها ، و انا اليوم رح احكيلكم الحكاية اللي عشتها لحد هاي االحظة ..

__________________
_____________

الاسم : صهيب ..
المواصفات : طويل القامة ، و نحيل البُنية ، بشرتي فاتحة و شعري و عيوني باللون البني الفاتح ..
العمر : ٤٧ سنة
الحالة الاجتماعية : متزوج

مرقت بمحطات كثيرة ، و انتهى فيي المطاف اني اجمع حروفي ، و ارويهم ، و اتمنى ان يلمسوا مشاعر الناس ، لعلهم يلتمسوا عبرة منها ..

حكايتي ابتدأت من لما كنت بالصف الرابع ..
كانت امي موظفة ، و تتعب كتير بشغلها ، و ترجع عالبيت ، و تركض بايديها و رجليها حتى تقدر تأمن طلباتي و طلبات ابوي اللي ما بتخلص ..
انا كنت وحيد اهلي ، لانه امي بعد ما ولدتني ، اخذت ادوية علاج لمرض صابها ، و سببلها عقم ..
والدي ما كان عنده شهادة يشتغل فيه ، و مزهق امي بعطالته ، اصلا تزوجها لتصرف عليه ..
اهله ما كانوا يحبوه ، و نشوفهم بالمناسبات ، عكس اهل امي اللي كنت احبهم كثر و متعلق فيهم ، مع اني بشوفهم مرة بالاسبوع ..
اهلها اللي ندموا بعد ما وافقوا و زوجوها الشخص اللي حبته بالغلط ، و تحدتهم حتى تتزوجه ..

امي كانت شخصيتها محبوبة من كل الناس ، ما بتذكر اني سمعت او عرفت حدا جاب سيرتها بالعاطل ..
حتى جاراتنا كانوا يموتوا عليها ، و يستنوها تفضى حتى يجتمعوا معها ، و انا كنت متل ابنهم ..
بس ما في اشي بضل على حاله ، و نظرتي تغيرت للناس بهداك اليوم اللي رجعت فيه من المدرسة بوقت بكير ؛ لاني كنت مريض ، و المدير سمحلي اروح قبل نهاية الدوام ..

كنت لسا بدي اطلع عالدرج اللي بوصل لبيتنا ، و بطلع شوي شوي عالدرج ، بس سمعت صوت باب انفتح ، و طلع منه شخص ، مديت راسي اشوف مين اللي واقف ، و هون كانت صدمتي ..
نزلت بسرعة و قبل ما حدا يكشفني ، و تخبيت عند باب العمارة لحد ما تأكدت انه ما في حدا ، و رجعت طلعت على بيتنا ، فتحته بالمفتاح اللي معي ، و دخلت ..

ابوي كان يومها ، و مثل اكثر الأيام ، موجود بالبيت ..
بس شافني ، ملامح وجهه انقلبت ، و سالني عن سبب رجعتي ، و ذكرته بإني مريض ..
طلب مني انام عشان ارتاح ، هزيتله براسي ، عملت حالي نمت ، و هو فات عالحمام ، و طلع بعد كم دقيقة كان ببرنس الحمام ..
انا كنت لسا صغير ، و ما بعرف اشي ، غير انه امي و ابوي بفوتوا غرفة النوم بسكروا عحالهم الباب ، و بس يطلعوا ، كل واحد بتحمم ..
فكنت اربط أي حدا بتحمم ، يعني كان مع حدا بغرفة النوم ، و فعلا بقي هاد التفكير ملازمني ، و خصوصا اني بهاليوم بالذات
شفت وحدة من جاراتنا ، الاكثرهم صحبة مع امي طالعة من بيتنا ..
و استنتجت انه ابوي و جارتنا كانوا مع بعض بغرفة النوم ، متل ما بكونوا امي و ابوي ، رغم اني وقتها ما كنت بعرف لسا شو بصير ..
بعد ما رجعت امي من شغلها ، و حكالها ابوي اني مريض ،
اجت عندي مشان تطمن ، بس انا عملت حالي نايم ..

ما قدرت احط عيني بعينها ، كنت خايف عليها ، او خايف تصير مشكلة بينها و بين ابوي ..
بسبب اللي شفته اليوم كبرت كتير ، و حملت مسؤولية اكبر من طاقتي ..
مرقت علينا شهور ، و انا اكتم بهالسر اللي شفته ، و كل ما امي تقلي روح عند الجارة نفسها ، ارفض ، و احاول اتحجج باي شغلة ، و اكثر اشي كان يقهرني انه كل ما اشوف امي و ابوي بوضع رومنسي ، يخطر ببالي اسأل ابوي اذا كان عمل هيك مع جارتنا اللي شفتها طلعت من بيتنا بهداك اليوم ..
ما كنت متقبل اني اشوف امي مبسوطة بنفس الحركات ، و صوت ضحكات ابوي و دلعه الها ، اللي احتمال طلعوا لوحدة غيرها ..
انا هون حسيت امي عايشة بكذبة كبيرة ، و صابرة على زوجها ، و بتتعب و بتشقى ، تحت اسم الحب من طرفها ، لكن للاسف هو استغلال من طرفه ..

هالوضع ما استمر كثير ، لانه ارادة ربنا بكشف الحقيقة ، كانت سريعة ، أو يمكن متاخرة ، ما بعرف ، اللي بعرفه انه اجا الوقت المناسب لكشف القناع الكاذب ..
اجت امي عالمدرسة و اخدتني ، و فهمتني انه رح ننتقل من كل المنطقة ..
زعلت منها و بكيت ، عشان رح اترك صحابي و مدرستي ..
بس حكتلي انها رح تسجلي بمدرسة احسن ، و انه ابوك سافر عشان يشتغل ..
بس سمعت هيك تبدلت دمعاتي لضحكات ، و سألتها بلهفة انه جد بابا رح يشتغل ؟ يعني خلص أي حدا بسالني شو بشتغل ابوك شو رح اجاوبه ؟ ..

شفت دمعتها نزلت ، بس ما لحقت توصل لنص خدها ، لانها على طول مسحتها و بطرف ايدها ، رفعت راسها ، و شدت على ايدي اللي كانت ماسكتها ، و قالتلي : من اليوم رح نعيش انا و اياك لحالنا ، و انت صرت رجال البيت ، و لازم تحمي امك من كل شي بزعلها ..
ضميتها بقوة ، لاني فعلا كنت بحاجة لحضنها ..
حضنها اللي كل ما اكبر ، بحتاجه اكثر ..
رحنا على دار جدي ، و كانوا مستغربين من زيارتها المفاجأة بوسط الاسبوع ..

طلبت مني اقعد بغرفة ادرس ، و هي استأنفت جلستها مع جدتي و خوالي ، اللي كانت تستناهم يجتمعوا واحد واحد ، حتى تخبرهم بقرارها الحاسم ، رغم معارضتهم الها ، و انه بيوتهم مفتوحة الها و لابنها ..
الكلام اللي سمعته ، بسبب فضولي ما صدمني كتير ، بس وقتها ، و مثل ما كنت احكي عنها دايما ، اليوم اثبتت انه كلامي صحيح و انه عندي ام عن مية زلمة ، و الحمدلله ..
ما عرفت كيف او مين اللي كشفهم ، بس المهم انه امي اجت على البيت فجاة ، و شافتهم بوضع مخزي بغرفة نومها ، و على سريرها ..
صدمة امي كانت كبيرة ، يمكن هون صحبة الجارة ، او المحبة الكاذبة مش مهمة ..
الاهم انه الرجل اللي حاربت كتير عشانه ، و بتعمل كل شي لأرضائه ، لدرجة كلمة دورعلى شغل ما بتطلع منها ، حتى ما تجرح مشاعره ، و تحسسه بالنقص ..
ما رفلها جفن هالموقف ، و وجهت كلامها لابوي و قالتله : بدي اخد كم غرض الي و لابني ، و بعدها ما رح تشوف وجهي ..
جارتنا لملمت حالها ، و طلعت من البيت ، و ابوي كان بحاول مع امي انه تفهمه ، و بحلفلها انه ما دخله ..
و انه هي السبب لانها كانت تتركه وقت طويل لحاله ، و الجارة ما قصرت فيه ، لانه امي كانت تحكي عن كل شي بحبه ابوي خلال قعدتها مع جاراتها ، من كثر ما كانت تحبه ، المسكينة كان محور حديثها ..

صدمة اهلها كانت كبيرة ، و ما حدا لامها الا على سكوتها اللي زاد عن حده ..
و كبر اصرارهم ، على انها ما تعيش معي لحالنا ببيت منفصل بعد ما تحصل على الطلاق ، اللي كان أول خطوة اتخذتها ..
ليلتها امي نامت جنبي ، انا تجنبت اني اسألها عن اي اشي ..
يمكن من خوفي انه يزلق لساني و احكيلها عن اللي شفته قبل فترة قصيرة ، أو يمكن ما حبيت ازيدها عليها ..
حسستها اني غفيت ، و بعدها سمعت صوتها و هي بتشهق ، و بتكتم صوت انينها ..
دموعها اللي خبتهم عني و عن اهلها ، ما قدرت تحبسهم اكثر من هيك ..
صرت اشوفها بتبكي ، باي وقت بتكون قاعدة لحالها فيه ، و اول ما تلمح حدا بتمسح دموعها و كأنه ما كان اشي ..
شعور الخيانة اكثر شعور قاتل ممكن الانسان يتعرضله بكل حياته ..
كثير مواقف بنمرق فيها ، حدا يزعلنا ، او يؤذينا ، لكن الخيانة غير ..
رفض الوالد منح الطلاق ل أمي ، و حاول بشتى الطرق و الجاهات لارجاعها ، و حلف أيمان عظيمة بعدم تكرار خيانته ، و ندمه الشديد على اللي عمله فيها ..
لكن امي زاد اصرارها على الانفصال ، و هددته اذا ماطلقها ، تفضحه بين الجيران ، و توكل زوج الجارة بأخذ حقها ، و انه عندها شهود من نفس العمارة ، يعني ما رح يقدر يكذبها ..

بعد ٦ شهور ، كانت امي حاصلة على وظيفة بمدينة ثانية ، و اخذتني معها ..
كانت مدينة حلوة ، و ما فيها حدا بنعرفه ، سجلتني بمدرسة خاصة ، و منعتني اصاحب أي حدا و اوثق فيه ثقة عمياء ،
كان خوفها واضح ، رغم محاولاتها باخفاؤه ..
ما بنسى كلمات التوصية من دار جدي ، و تهديدها من اي فضيحة بعد ما صار اسمها ( مطلقة ) ..
اللقب هاد كان بزمان امي ، اشبه بالعار ..
بس كان سببه انها منحت واحد حجم اكبر من حجمه اللي بستاهله ..
و امي قدرت انها تتحمل هالكلمة ، و لا انه يجمعها سقف مع واحد مثل ابوي ..
اللي كانت عيشتها معه سلب لكرامتها ، و بدلت انوثتها ، و لبست ثوب التضحية و الكفاح ، تحت مسمى الحب ..

مرقت الايام و السنين ، اخبار ابي بتبعد كل يوم اكثر و اكثر ..
كان يبعتلي نفقة ، و طلب من امي المشاهدة ، بس امي من أول ما حصلت عالطلاق خبرته اني بعرف عن سبب الطلاق ف باي عين رح تقابل ابنك ؟

هاد الحكي كله عرفته بعد ما صار عمري ١٥ سنة ، و امي شافت فيي الرجل اللي رح يرفع راسها بين الناس ..
ما قدرت تخبي عني الحقيقة اكثر من هيك ، و خيرتني باذا حابب اشوف والدي أو لاء ..
وقتها قررت اني اخبر امي باللي شفته ، و اني خفت اخبرها زمان و تزعل مني لاني خبيت عليها ..
و وصلتلها فكرة اني مش حابب التقي فيه ، عشان ما يشعر بالخجل من ابنه ..
ضحك وجهها من بين ملامح الزمن اللي ظهرت عليه ، و ضمتني و صارت تلعب في شعري ، و قالتلي انه كانت تعرف ، بس بتستنى باللحظة المناسبة حتى تكشفهم ..

بهداك الوقت صدقت كلامها ، و اتفقت معها انه ما نفتح هالموضوع ابدا ، و انه والدي بالنسبة الي سافر و ما رح يرجع ..
و وعدتها اني احقق طموحي اللي بحلم فيه ، و بفضل الله و رضى مي كنت من المتفوقين دراسياً ..
اخلاقي مضرب للمثل ؛ لكل اللي بعرفوني ، و تربيتي اللي تعبت عليها امي ، و ثقتها المزروعة بشخصيتي ، جعلت مني شب متميز ..
لما وصلت للمرحلة الثانوية ، ما كان في اشي بوقف بوجه طموحي ، امي كانت تخبي القرش فوق القرش حتى توفر لدراستي ..
و انا كنت كل عطلة اشتغل اللي بقدر عليه حتى اساعد امي ، و اثبتلها اني رجل يعتمد عليه ..
لكن صار اللي ما كان في الحسبان ، و تدخلات الناس بحياتنا ما توقفت ، رغم بعدنا عن الجميع ، الا انه النصيب بلحقنا وين ما نكون ، و القدر لازم ياخذ مجراه ..

رجعت من مدرستي ، و تفاجأت بوجود خالي الكبيرو جدي عنا ، من فرحتي رميت كتبي و شنتتي و ركضت عليهم بلهفة ، و نسيت اني كبرت على هالتصرفات ، ضميتهم بقوة ..
ما كنا نشوفهم الا بالاعياد او العطل الطويلة ..
كان شوقي كبير بقدر ملامح الحزن على وجه امي ، بعد ما سلمت عليها متل ما بعمل بكل مرة بكون غايب عنها حتى لو ساعة ..

انتهت زيارتهم بنتيجة كانت فوق كل تخيلاتي ، طموحي كله انهد ، و تعبي و تعب امي ضاع و كأنه هباءا منثورا ..
رغم رجاءات امي و دموعها ، الا انهم كانوا مصرين على قرارهم ، و كل هالشي لمصلحتي ان و اياها سوا ..
و العرس تحدد بدون حتى ما تشوف العريس ، او تتفاهم معه ..
و انا تحولت لنكرة ، ما بعرف شو مصيري ..
اعطونا مهلة اسبوع حتى نجمع اشيائنا ، و نلحقهم عالمدينة اللي ساكنين فيها ..
كانت بتنظرنا حياة جديدة ، و مجهولة المعالم ..
امي ما كانت عارفة شو تحكيلي حتى تبرر موقف اهلها ، و انا اكتفيت بالصمت لانه انتهى الكلام بالنسبة الي ..

_________________

دراسة تراكمت عليي ، و مشاعر مسجونة بروحي اللي بحسها بتطلع بكل لحظة بتمرق ، و بتقرب امي من الحياة الجديدة اللي بتستناها و بتبعدني عنها بنفس الوقت ..
حاولوا كتير معي دار جدي اني اتعرف عالشخص اللي رح ياخد امي مني فجاة و بدون سابق انذار ، لكني كنت ارفض ..
لحد ما حسيت فعلا انه امي السعادة بدات تنتشرعلى شفاهها ، و الكحلة ارتسمت على عيونها من جديد ..
كان كلامها عكس اللي كنا متخيلينه ، و انه هالانسان اكثر من رائع ، و معه رح تصير حياتنا حلوة ، و نحقق كل احلامنا ..
ما بنكر مشاعر الغيرة اللي سيطرت عليي وقتها ، انا بطبعي غيور و اناني خصوصا لمشاعري تجاه امي ، شي طبيعي و الكل متقبله ، لكن هالشخص كانت ردة فعله غير لما قابلته لأول مرة ، و بعد الحاح امي الشديد جدا ..
ما بنسى أول كلماته الي لما قال : انت واحد من اولادي ، و مثل ما عملت حدود بين فيروز ( امي ) ، و اولادي انت كمان بدك تلتزم حدودك ..

كلماته لليوم ما نسيتها ، كانت لهجته قاسية ، رغم حنية ملامحه ..
كان وجهه بشوش ، و ضحكته عالية ..
ما كان بشبه ابوي بأي ناحية ..
كل الفشل اللي شافته امي من والدي ، شافت عكسه تماما مع هاد الشخص اللي اسمه ( عبد القادر ) ..
عبد القادر ، تاجر و رجل اعمال ، ارمل من سنة و نصف ، عنده ثلاث اولاد و ثلاث بنات ، و كلهم اكبر مني ، و حياتهم مكللة بالنجاح ..

تزوجت امي ، و كان طلبي اني ابقى عند دار جدي حتى كمل اللي بقي من هالسنة ، و ادخل الجامعة ..
وافقتني على مضض ، و زياراتها ما انقطعت عني ، و كانها عايشة معي ، و مع ذلك كان في اشي ناقص بحياتنا بعد زواجها ..
ايامي صارت معجوقة كثير بالدراسة ، و يادوب انام الليل ، قدام عيوني هدف و بدي احققه ، ما رح اسمح لاي حدا يشبهني بوالدي الفاشل ، أو اي صفة بتشبهه ..
بيني وبين حالي ما كنت اكرهه ، بس كان جواتي صراع قوي بينشأ كل ما أشوف حالة امي ، و اللي صار فيها ..
ما عرفت احدد مشاعري تجاه والدي ، بس اللي كنت محدده هو كرهي لجنس النساء ، الا امي ..

وسط كل هالافكار ، و اللحظات الصعبة اللي بمرق فيها بسبب بعد امي عني ..
بتفاجأ بزيارة خاصة من ( عبد القادر ) شخصياً ، و بتناديني جدتي حتى اقعد معه ..

صهيب : اهلا وسهلا ، بس وين امي ؟
عبد القادر : بانتظارك بالبيت ، جيب الاشياء اللي بتلزمك اليوم عشان ما نتأخر عليها و بكرا بنجيب كل شي
صهيب : ما فهمت ، ليش اليوم و بكرا ؟
عبد القادر : جيب اللي حكتلك عنه و بفهمك بالطريق

كل جوارحي كانت رافضة هالتصرف ، و اصراري على موقفي بإني ابقى ببيت جدي ما تنازلت عنه ..
و بقيت طول الطريق ملتزم الصمت ، و عبد القادر يحكي و يسكت ..
وصلت على بيته ، و استقبلتني امي بشوق كبير ؛ لأنه كان الي كم يوم ما شفتها ..
كانت ساكنة بنفس البيت مع اولاده الوسط و الصغير ، اما الكبير و بناته كلهم كانوا متزوجين ..

اخدت امي على مكان لحالنا مشان افهمها اني رافض فكرة اعيش معهم بنفس البيت ، لكنها كانت هالمرة مش امي اللي بعرفها ، أو انا هيك شفتها ، مسلوبة الارادة ، و مش قادرة تقنع زوجها ، و انه الامر لازم يتنفذ بدون معارضة ..
ما كنت فاهم شو سبب هالاصرار ، المفروض ك زوج ام يكون مبسوط انه ابن مرته ما رح يعيش معه ..
سبحان الله كيف الانسان ما بعرف وين ربه كاتبله الخير ، و بعاند في قدره ، و برفض النعمة تحت مسمى الكبرياء ..

شفت فيه الاب الحنون ، و العادل ..
شمعة للعطاء ، و مصباح للنجاح ..
مكان للكبرياء ، و عنوان للكرامة ..
كل هالكلام ما بوصف شعوري قدام مشهد اب و ابناء مجتمعين حوالين والدهم ، بتكلموا عن نجاحاتهم و مخططاتهم المستقبلية ..
كانت حياتهم نفس الحياة اللي بحلم فيها طول عمري ، بس ما عمري حلمت اني اكون اب ، او يكون عندي اسرة ..
فاقد الشيء لايعطيه ، و صعب انه يكون عندي هيك مشاعر تطغى على الكره اللي كبر معي بكل خلية بتكبر في جسمي ..

شعور رائع ، كنت فاقده ، موضوع انه يكون عندي اخ او اخت كان بعيد عن حياتي ..
اسمع من اصحابي انه عندهم اخوة و اخوات ، و بعض الحسد لاني وحيد اهلي ، و نيالي ..

استسلمت للأمر الواقع ، و اعطوني غرفة خاصة من بيتهم الكبير ، حتى يكون عندي جو دراسي مناسب ..
ما قدرت اعبر لحدا عن سرحاني في هالغرفة ، و جماليتها اللي شتت افكاري ..
لكن سرعان ما تلاشى تشتتي ، و رجعت لوعيي ، و اصراري على هدفي كان بكبر مع كل امتحان بقدمه ، و فرحي بعلامته اللي بحسبها بعد ما اتناقش انا و ابن عبد القادر الصغير ( غيث ) اللي كان اقربهم الي من حيث العمر و الشخصية ،
حتى انه تخصصه نفس التخصص اللي بحلم فيه ..

كانت السعادة غامرة امي من كل النواحي ، نجاحي بتفوق ، و وجودي معها ، و حياتها المستقرة بعد ما كانت متشائمة من هالزواج اللي اجبروها عليه اهلها ..
بس انا كان في اشي ناقصني ، كان نفسي اسمع كلمة مبروك من والدي ، اللي ما نسيت وجوده مع كل الظروف اللي مرقت فيها ..
بس انا وين ، و هالشخص اللي موجود بخانة الاب في هويتي ، وين ؟

سجلت بالجامعة ، و الحمدلله قدرت احصل على تخصص ( طب اسنان ) ، و بدات بالتحضير للدوام ..
كان غيث معي بكل خطوة ، رغم انه عنده اشغاله الخاصة ، لكن اوامر والده اللي ما بتنزل عالارض ، كانت فوق كل اشي ، و ما بقدر احكي اني شعرت باي استياء منه ، كان بكل صدر رحب يتعامل معي و كأني اخوه الحقيقي ..

_________________

مرقت سنوات الجامعة اسرع من كل الثماني عشرة سنة اللي عشتهم بحياتي ، خمس سنوات من الاجتهاد تكللت بالنجاح ، و بكل سنة عبد القادر و عيلته يكونوا اقرب الي من السنة اللي قبلها ..
تشجيعيهم ، و محبتهم ما كنت مصدق انها مشاعر حقيقية فعلا ، دايما هاجز الخوف و الشك مرافقيني ، بس ما كنت اظهر هالاشي ، الوحيدة اللي كانت فاهمة و حاسة بكل مشاعري هي امي أكيد لاني تربايتها ، و بتفهمني من دون ما احكي ..

كانت علاقتها بزوجها قوية ، مع اني توقعت انه امي قلبها توقف عن النبض بعد اللي عمله معها ابوي ، ما كنت مستوعب انه مشاعرنا يكون الها اكثر من شكل ..
لحد ما اجا اليوم الموعود ، و ابتدأت مشاعي بالتحرر من القيود اللي سجنتها فيها ..

يتبع ..

الجزء الثاني :

و فهمت شو صار معي امي زمان ، و شو تفسير علاقتها مع زوجها عبد القادر ..
بهاليوم عيوني شافت الانثى اللي قدرت بنظرة منها تحول كل الكره اللي بحمله تجاه اي بنت ، ل حب ..

كنت وقتها بسنة الامتياز ، يعني السنة اللي بعدها بقرر شو رح يكون اختصاصي ..
كانت العيادة معجوقة ، و انا مش مستوعب اشي من الدكتور اللي بتدرب عنده بهالفترة ، و بحاول جهدي اجمع تركيزي ..
بتنادي الممرضة على صبية ، لفت انتباهي اسمها ( حور ) ، و صار عندي فضول اشوف مين اللي اهلها مسمينها بوصف حور الجنة ..
و أول ما فاتت ، حطيت ايدي على صدري من جهة القلب لأنه كان رح يوقف من كثر ما نبض ، و انفاسي تسارعت ، و عيوني تعلقت في كل تفاصيلها اللي لليوم ما نسيتها ، و حكيت بيني و بين حالي ( فعلا انك من الحور ) ..

تقدمت من كرسي العلاج ، و بدا الدكتور بشغله اللازم لحالتها اللي كانت بسيطة كثير ، طلب مني اني اساعده ، و وافقت فورا ..
قعدت مكانه عالكرسي ، و طلبت منها تشرحلي شو صار معها بالتفصيل ..
كان لابد اني اسمع صوتها ، حتى اسجله بذاكرتي مع صورتها ..
قربت منها ، و بدات بالشغل ، كنت حريص اني اتقنه حتى ارضي الدكتور ، و يثني عليي قدامها ، و الفت انتباهها ..
بس للاسف صار العكس ، جمال الحور في عيونها اخذني لعالم بعيد عن العالم اللي كنا فيه ، و ريحتها سيطرت على حواسي ، و كانت السبب في رجفة ايدي ، و تراجعي عن اكمال المهمة ..

انصدم الدكتور مني ، و خصوصا اني اول مرة بتصرف يهالشكل ، بس الحمدلله مرقت على خير و ما حكى معي اشي ..
اما حور فكان الها ردة فعل ثانية ، طلبت مني اني اكمل شغلي عادي بدون ما تبدي اي انزعاج منها ..
تبسمتلها و هزيت راسي ، و رجعت اكمل الشغل ، لكن هالمرة غير ..
كانت نظراتها بتحكيلي اشي ، و حسيت انها مبادلتني الاعجاب ، و لما انهيت ، شكرتني بابتسامة خجولة من عيونها ..

اللي صار في حياتي بعد هاليوم ، كان بسببها ، يمكن لانها بثت فيي مشاعر ، لغاية الآن ما قدرت احددها ، او امنحها لأنثى غيرها ..
تاثرت حياتي بعدها ، و امي و كل اللي بحياتي لاحظوا تغيري ، و صار لقبي صهيب العشقان ..
بس حالتي ما طولت كثير ، سنتين زمن و كان عبد القادر مجهز اموري للزواج ، حتى قبل ما اكمل اختصاصي و افتح عيادة او اشتغل بمكان ..
كان صعب على امي تشوفني بهالوضع كل يوم ، و الاصعب من هيك كيف تقنعني بالزواج ؟
بعد الحالة اللي مرقت فيها ، و شعوري بانه رح استقر و يصير عندي عيلة ، زاد من قلقي ، غير عن اجابة سؤال ( وين والد العريس ) ؟ ..
فطلبت منها تصرف نظر عن كل الموضوع ، و اني لما اشوف البنت المناسبة رح اخبرها عن كل قصتي ، و هيك بكون اسهل علينا ..

استسلموا للأمر الواقع ، و انا عملت جهدي اتناسى هالشعور اللي بسموه عشق ، و مرقت كمان سنتين من عمري و وقدرت احصل على تخصص مميز في مجال طب الأسنان ، و اشتغلت في مركز طبي مشهور ، و لمع اسمي بفترة قصيرة
بفضل من الله ..

_________________

كان هالمركز بداياتي ، و ركيزتي في الشهرة ، حتى اقدر افتح عيادتي الخاصة فيما بعد ، او اتشارك مع غيث ، كونه عنده عيادة و لكن تخصصه غير عني ، و رحبت بالفكرة ، و فعلا بعد سنة صرنا زملاء بنفس المكان ..
و مع الوقت حققنا نجاح كبير ، و تميزنا باضافة تخصصات ثانية ، و تحولت العيادة لمركز ولله الحمد ..
هون انا بقدر احكي اني وصلت لحلمي ، و حققت مرادي ، و رفعت اسمي و راس امي بكل فخر و اعتزاز ..
حتى عبد القادر كان فخور فيي ، بس للأسف ما كان يكفيني ، لانه مو بحاجتي ، و عنده مين يفتخر فيهم ..

مرقت فيي الايام ، و بكل يوم احس انه حور بتبعد عني اكثر ، و امي بزيد نقها على تزويجي اكثر و اكثر ..
حجتها بالعمر اللي بمرق ، و نفسها تفرح فيي و تشوف اولادي مثلها مثل اي ام بالدنيا ، كانت سبب كافي اني ارضخ ، و اقبل اروح معها اليوم اشوف عروس ..
و هالعروس كانت من نصيبي ، بعد شهر من التفكير ، و الالحاح من الجميع ، و رايهم انها مناسبة الي من جميع النواحي ..
و بعد سنة من زواجنا صرت اب ، ما صدقت حالي لما حملته بين ايدي ، و كأني انا اللي انولدت ..
شفت من زوجتي بهالسنة اشياء ما كنت راسمها ببالي ، كان همها شغلها ، و تلبية احتياجات بيتها ، ثم زوجها اللي لما يطلبها بتكون منهكة من التعب ، و بكون بستنى بيوم الخميس عشان زوجته ما تحكيله بكرا عليي دوام من الصبح ..
غير عن حملها المتعب ، اللي شفت من خلاله شغلات ما عمري شفتها ، و شهوتها اللي بتقل بسبب الحمل نستني اني رجل ، و عندي حق شرعي من حلالي ..

و بعد الولادة ، ازداد البعد اكثر و اكثر ، و لما اقترحت عليها نجيب مربية للطفل ظناً مني اني رح اغير اشي في حياتنا ، كنت مخطئ للاسف ..
و فضلت ترجع لوظيفتها ، و تقطع الاجازة الطويلة اللي اخذتها حتى تهتم بابنا ..
كنت اروح عالعيادة ، و احاول اشغل حالي اكثر من اللزوم ، لعل و عسى لما ارجع عالبيت اشعرها بتعبي ، و حاجتي للراحة النفسية اللي المفروض ما تكون الا بحضنها ..
لكن علاقة غيث و زوجته مع بعضهم بالمركز ، و مشاعر الحب ، و تناغم علاقتهم ، كان يزيد من توتري ..
خصوصا انه عندهم بدل الولد ثلاثة ماشاءالله ، و شغلها معنا بالمركز دكتورة اسنان ، و مع ذلك ما عمري شعرت الا بازدياد قوة علاقتهم ..
ندمت على زواجي التقليدي ، اللي جعل من حياتي رتيبة و مملة اكثر من اللزوم ، و احنا ما زلنا بأول سنة ، فكيف بعد خمس او عشرة سنوات ؟؟
فقدت اعصابي ، و بعدت عن البيت يومين حتى اشعرها بغيابي ، و اختلق حجج عن بعدي ، و برضو ما في نتيجة ..
الوضع زاد عن حده ، و خبرت امها حتى تنصحها بكم كلمة ، لانها كانت شاعرة في تقصير بنتها ..
و فعلا تغيرت فترة منيحة ، خلالها سافرنا على بلد سياحي ، و عشنا اسبوع من العمر ..
وصلتلها كل اشي بحبه ، و شو اكثر شي بهمني يكون موجود بزوجتي ، أو بشكل عام بالانثى اللي بتغريني ..
اكتشفت انها بتعاني من الخجل ، و مش متخيلة حالها تلبس ، او تعمل اي اشي بخطر ببالها ..
فهمتها انه الرجل بحب يلاقي في زوجته كل انواع النساء ، مثل سلة الفواكه الي بنحب نجرب طعم كل شي فيها ..
و انه ما بنعمل اشي خارج نطاق الشرع ، و اللي امرنا فيه ربنا ..
كل كلامي و محاولاتي كانت في سبيل ابعاد صورة حور عن عيوني ، لانه زوجتي ما كانت بتشبهها و لا بأي شكل من الاشكال ، مش معناه انه ما عندها جمال ، لا بس جمالها مختلف عن حور ..
رجعنا من سفرنا ، و حاولت معها اني احافظ عالحياة اللي رسمناها ، و عملت استطاعتي ابعاد الروتين عن بيتنا ..

كان في اشي حلو بحياتي ، انه ميس عكس امي ، ما كان الها علاقات مع اي حدا من الجيران ، و انا كنت اعرف بعضهم بالصدف ..
و حياتنا الاجتماعية مقتصرة على اهلي و اهلها و بعض الاصدقاء المقربين ..
________________

و بيوم ، رجعت عالبيت على غير موعدي ، و ما لقيت ميس ، اللي المفروض يكون الها ثلاث ساعات واصلة ..
كانت المربية مشغولة مع ابني ( ورد ) ، و لما سألتها وين المدام ، جاوبتني بأنها عند جارتنا اللي سكنت جديد في الطابق اللي تحتنا ..
خليتها تعيد الجواب اكثر من مرة حتى اتأكد اني سمعت منيح أو لاء ؟ و قبل ما القط نفس ، كانت ميس راجعة ، و عيونها فيهم حكي ..
بس كلامها تبخر لما شافت العصبية مسيطرة عليي ، و عرفت انه المربية خبرتني بمكانها ، لأنه كان احد الخطوط الحمرا بحياتنا اللي ممنوع تجاوزها ، الا و هو صحبة الجارات ..
سبقتها على غرفة النوم ، و طرقت الباب بعصبية ، و تسطحت على السرير و بحاول اهدي من حالي شوي ..
تراكمت ضغوطي من ميس ، و كان صعب اغفرلها اي تجاوز ، و عزمت النية اني احطلها حد ..
بس لما شفتها دخلت الغرفة بدلال ، و بكل هدوء ، و طنشتني ، و فتحت باب خزانتها ، و تفننت في انتقاء ملابسها لليلة ، و تعمل حركات دلع أول مرة بشوفهم عليها ..
بقيوا عيوني معلقين عليها ، و احاول ما ارمش حتى ، و نهضت حالي شوي شوي حتى ادقق في النظر ، و هي كانت عم تغير و تلبس اكثر من مرة ، حتى استقرت على قطعة كثير مميزة ، و من زمان بطلب منها تلبسها ، بس كانت خجلانة مني ..
هون كان بداية تغير علاقتي مع ميس ، و حياتنا صارت متل ما بحب و اكثر ، حتى وصلت لمرحلة ما اصدق ارجع عالبيت بس عشان اشوفها ، و كلي شوق اعرف شو محضريتلي عالسهرة ..
وصفات اكل ، افلام ، لبس و شموع و دلع ..
ورد كبر ، و المربية صرفتها لانها تركت شغلها ، مع اني ما توقعت ميس تعمل هيك ، بعد ما كان اشي مهم بحياتها ..

فعلا حياتنا تغيرت من كل النواحي ، و الجارة الجديدة كانت السر ، اللي ميس تغيرت بعد ما تعرفت عليها ، و كانت دليل اي زوجة للاهتمام في زوجها ..
هالمعلومات عرفتها من حديث ميس المتكرر عنها ، و اللي ما تركت اشي بتعلمها اياه ، او بتعمله هية لزوجها ، الا و حكتلي عنه ..
لا اراديا انا صرت لما ارجع من شغلي ، اطلع عالدرج بدل المصعد ، حتى امرق من باب بيتهم ..
كان نفسي المح هالجارة ، اللي ريحة عطرها سلبت كل تفكيري ، و ميس صارت وسيلة الي حتى احصل على معلومات عنها ..
ما راح من بالي اللي صار في امي ، و كنت اكره حالي اذا بعدت في مشاعري عن حدود زوجتي ، بس بقدر احكي اني فهمت شو بصير مع كل رجل بخون مرته غصبن عنه ..
مشاعر بتتولد فينا بدون ما يكون عنا سيطرة عليها ، و ما بنعرف هل هي حقيقية و ثابتة ، او وهمية و بتنتهي بانتهاء المؤثر ..
تعبت من هالحال ، و وصلت فيي الامور اني ارحل من بيتي اللي ما خطر ببالي ارحل منه بيوم من الايام لهالسبب ..
بس مش كل شي بخطر ببالنا بنقدر ننفذه ، و موضوع الرحيل بالنسبة لميس انرفض و بقوة ..

اغريتها بفيلا عجبتني و قررت اشتريها ، بس كل محاولاتي كانت فاشلة ، و استسلمت لرغبتها ..
و رجعت اركب المصعد ، و ابعد تفكيري قد ما اقدر عن الجارة المجهولة ، اللي لازالت زوجتي المصونة بتنقل اخبارها ، خاصة انه وضعها مع زوجها غير مستقر هالفترة ، و مقررة ترفع دعوى طلاق عليه ..
يومها ضحكت كثير ، و ميس اتدايقت مني قد ما ضحكت ، ما كان سبب ضحكي انه رح تتطلق ، لا ..
السبب اني كنت متوقع حياتها مع زوجها غير شكل ، و انه وحدة مثلها ما عندها مشاكل ، او بمفهوم اخر ، اي رجل عنده هيك زوجة بكون اسعد الناس ..
نمت انا و ميس و كانت زعلانة مني ، و بس صحيت راضيتها ، حتى ما استحقر حالي اكثر من هيك ..
و نزلت من بيتنا بس هالمرة مش بالمصعد ، الساعة كانت ثمانية صباحا ، سمعت صوت في بيتهم و عرفت انها صاحية ، و ما حدا معها ..
دقيت الجرس مرة وحدة ، ردت من ورا الباب و قالت مين ؟ ..
قلتلها انا جاركم اللي فوق زوج ميس ، شقت الباب شوي ، مديتلها كرت لصديق الي بشتغل محامي ، و بارع في قضايا الطلاق ، قلتلها هاد الشخص ممكن يفيدك ..
مدت طرف اصابعها و شكرتني ، كان صوتها هالمرة اوضح من لما سمعته قبل ما تفتح ..
صوتها رجفله جسمي كله ، كان تأثيره اقوى من ريحة عطرها اللي بمرق من باب بيتهم حتى اشمه ..
وعيت على حالي لما سكرت الباب ، و انا بعدني واقف متل اللي فات بغيبوبة ..
كملت طريقي و كنت مخدر عقليا ، و بعز شغلي تذكرت اني ما نبهت على الجارة ما تخبر ميس باللي صار الصبح ..

ما كنت عارف بأي وجه بدي اقابل ميس بعد هالتصرف ، و شو المبرر اللي بدي اشرحلها اياه ..
بس اتصال من المحامي ، رجعني للحياة من جديد ..
تركت كل اشي بايدي و رحت على مكتبه ، لانه خبرني عن اتصال جارتنا فيه ، و انها من طرفي ، و حكى معي ليتأكد ..
كان فضولي لمعرفة هالشخصية عن قرب اكثر ، هو سبب روحتي لمكتبه ..
مثلت الهدوء و الركازة قدام صاحبي ، لما شافني بمكتبه ، و تحججت انها خجولة و بحاجة مين يساندها ..
انتظرناها لحتى وصلت ، و أول ما لمحتها قمت و بصوت كله دهشة و تعجب حكيت ( حور !! )

حور ( مصدومة ) : بنعرف بعض ؟

سؤالها صحاني من غيبوبتي ، و نفض مشاعري المجهولة اللي كانت دفينة كل هالوقت الطويل ..

المحامي : اهلا وسهلا فيكي حضرتك اللي اتصلتي عليي من طرف صديقي اللي بكون جيرانكم ؟
حور : اه انا
صهيب : انا الدكتور صهيب ، اللي اعطيتك الكرت الصبح
حور : …

كان وجودي غير مرغوب فيه منها ، و طلبت تحكي مع المحامي على انفراد ..
انسحبت و تركت عقلي و قلبي معها ، بس هالمرة ما رح اسمح للماضي يتكرر ، و قررت احكي معها عالاقل اوقف جنبها بقضيتها ..

انتظرتها حتى انهت كلامها مع المحامي ، و بس شافتني بوجهها ، كملت طريقها و كأني مش موجود ..
ياااه انتظار ساعة ، و قبلها عشرة سنوات ، و الاقي ردة فعل مثل هيك ..
ما تحملت و لحقتها ، ناديت عليها بلهفة اكثر من مرة ، حتى قدرت اوقفها ..
لفت وجهها عليي ، و تقابلت عيونا ، نسيت عمري ، نسيت مركزي ، و حتى نسيت اني بالشارع ..

حور : نعم ؟ ممكن اعرف شو بدك مني ؟ و ليش عم تلحقني ؟
صهيب : حور انا ..
حور : مدام حور لو سمحت ، تفضل دكتور شو كنت بدك تقول ؟

كانت عم تحكي بكل كبرياء ، بس عيونها خانتها ، و اعطتني نفس النظرة اللي شفتها و انا بعالج فيها بأول مرة التقيت فيها ..

صهيب : تذكرتيني ؟

____________________

حياتي استمرت على نفس الروتين ، و حور اتطلقت من زوجها بعد معناة دامت اشهر ، و ميس تأثرت كثير بطلاقها و بعدها عنها ، بس تواصلهم مع بعض ما انقطع ..
كان هالتواصل عائق بوجهي ، و سبب لرفض حور من الزواج مني ، و محاولاتها بابعادي عنها ما توقفت ..
بس انا ما بدي امشي طريق والدي بالخيانة ، و الشرع حلل اربعة ، بدي اتزوج و ما بقصر بزوجاتي ..
و اول وحدة خبرتها بقراري كانت امي .. اكيد

ردة فعلها صفعتني ، و كرهت من بعدها الحياة ..

فيروز : انت خاين مثل ابوك ، روح تزوج بس مثل ما نسيتك  ابوك رح انسي ابنك مين ابوه