الحلقة السادسة

ستنهضين وحدكِ، وستخرجين من هذا الضيق وحدكِ، أنتِ وحدكِ من تساعدين نفسك، وأنتِ فقط ..

 

_______________

____________

 

انتهت الحفلة، ومع نهايتها تغيرت كتير أشياء ..

في اشياء ما كنا متوقعينها تصير، بس بنرجع نحكي انه كله لخير ..

 

احمد ( عيوني ببعيونها ) : يا عيني شو هالجمال هاد ؟ ( قربت منها ) يا خسارة كل هالوقت واحنا بعاد عن بعض

ياسمين ( مو على بعضها ) : … انا تعبانة احمد اسمحلي اغير وانام تاخرت وعندي بكرا جامعة

احمد ( مستغرب ) : تمام، بس كانه صاير اشي معك ؟

ياسمين : …

احمد : احكيلي حبيبتي شو مدايقك ؟ هيئتك زعلانة او في اشي غلط بمزاجك

ياسمين ( بحيرة من امرها ) : ما بعرف احمد، بس فجاة سيرين بطلت تحكي معي ولا ترد عليي، شو اللي تغير فجاة ؟

احمد ( بفضول ) : صار بينكم اي كلام يعني ؟

ياسمين ( بتهز راسها بالنفي ) : ابدا، هاد اللي مجنني انه كنا كتييير مناح فجاة اختلفت

احمد ( ضميتها ) : تمام، رح تعرفي اول على آخر، بس هسة لا تفكري الا براحتك، طيب كيف كانت ديمة ؟

ياسمين : ما عجبتني، في اشي متغير فيها هي وريم وخالتو، الله يستر ما يكون صاير معهم اشي

احمد ( كاتم ضحكتي ) : اي شو هالحاسة العاشرة اللي عندك ؟

 

وقبل ما تجاوبني بأي حرف، رن موبايلها ..

 

احمد : مين برن بهالوقت ؟

ياسمين ( عيونها عالاسم ) : احم، هاد .. قُ قصي

احمد : نعم !

ياسمين : الو ؟

 

خيبت أملي وردت على المكالمة، مع اني كنت متاكد انه ياسمين تغيرت بعد الزواج، بس للاسف تأكيدي ما طلع بمكانه ..

 

__________________________________

 

رانيا ( بعصبية ) : شو هالمسخرة رزان ؟ ما بعرف كيف ضليت ساكتة طول الوقت ما صدقت وتخلص الحفلة

رزان ( ببرود ) : مو فاهمة عن شو بتحكي ؟ وليه هيك معصبة ؟

رانيا : اخص عليكي، ولك ما استحيتي من منظرك لما وقفتي قدام المراية ؟ شو تهيألك لما قررتي تلبسي هيك اشي ؟ ومن متى احنا هيك بنلبس اصلا

رزان : اي لا على مهلك لا تجمعي حالك معي بلا ما ينزل من مستواكي، وين انتي ووين احنا

رانيا ( مصدومة ) : شو شو ؟ يا خسارة كل اشي توقعته الا اسمع منك هيك اتهامات عني، بس الظاهر صاير لعلقك اشي

رزان ( بعدم اهتمام ) : اسمعي مو جاي على بالي اتناقش معك هلا، يلا بدي انام

 

هيثم ( اجا فجاة ) : رانيا !

رانيا ( نقزت ) : نعم

هيثم : مال صوتك طالع مع مين كنتي تحكي بهالوقت ؟

رانيا ( بارتباك ) : مع رزان، ازعجتك بصوتي ؟ بعتزر

هيثم : لا ما انزعجت بس انتي كيفك ؟ مبين مو منيحة ؟

رانيا ( تنهدت ) : لا منيحة حبيبي ما تقلق، يلا عالنوم ما فيي حيل حتى احكي

هيثم ( ما اقتنع ) : تمام

 

كلام رزان اثر فيي، وما تخيلت بيوم اختي تصير تحكي معي بهالاسلوب ..

كان هيثم بحاول معي حتى يعرف ليه ساكتة ومو طالع معي كلام، وحتى ملامح وجهي تغيرت وكانه حدا ضربني كف قوي ..

بس ما قدرت اتجاوب معه ولا حتى اتطلع بعيونه، اكتفيت بالصمت ومحاولة للنوم ..

 

__________________________________

 

ريم : انا تعبانة مو قادرة احكي ولا اسمع اشي

علاء ( بترجي ) : مشان الله ريم بس اسمعيني ما تحكي انا موافق

ريم : ما بظن انك اخدت وقتك بالتفكير، شو اللي غير رايك وبسرعة حكيت معي ؟

علاء ( تنهد ) : طلعتك من البيت كانت صعبة عليي، ما بتتخيلي شو ندمان، انا ندمااان كثير حبيبتي سامحيني ارجوكي ارجعي وبوعدك كل اشي يتصلح

ريم ( باستغراب ) : معقول ؟

علاء : ليه مو معقول ؟ نسيتي حبي الك، او .. او حبنا الكبير اللي جمعنا، وايامنا الحلوة اللي عشناها وزيدي على كل هاد انتي ام بنتي الغالية

ريم : …

 

ضل يحكي اكتر من ساعتين وانا اسمع، كنت محتاجة كتير لكلامه ورومنسيته اللي شبه اختفت بعد ولادتي ..

صحيح ما الي زمان، بس عملت فجوة كبيرة بيناتنا مع تراكمات قديمة ..

__________________________________

 

سيرين : بس فهميني شو حكتلك بالزبط ؟

آيات : انه عمر عنده مشاعر تجاهي، او فيكي تقولي بحبني

سيرين : من متى ؟ يعني متى فتح معها الموضوع ؟

آيات : امممم صدقيني ما سالتها ! صحيح ما خطرلي

سيرين : تمام، وشو رح يصير هلا ؟ بدك ياسمين تروح توصله مشاعرك متل ما وصلتلك مشاعره ؟

آيات : ما بعرف ؟ انتي شو بتنصحيني

سيرين : قبل ما انصحك بدي اتفاهم مع العميلة السرية بعدين لكل حادث حديث

آيات ( مو عاجبها ) : وانتي ليه مقهورة كل هالقد منها ؟ فوق ما البنت حست فيي وخبرتني، اصلا لولا انا بينت قدامها ما كانت رح تحكيلي اشي، وحكتلي ما رح تحكيلي اكتر من هيك معلومات

سيرين : اتطمني حبيبتي لا مقهورة ولا عبالي، خلص انتي اتركي الموضوع عليي وبنشوف شو بنقدر نعمل

 

__________________________________

 

قصي : اسف عالازعاج بهالوقت

ياسمين : بسيطة، في اشي ؟

قصي : صراحة ياسمين بدي تحكيلي كيف سعاد كانت اليوم ؟ يعني شكلها بدون حجاب وهيك

ياسمين ( مصدومة ) : اها، ومين قلك انه بصير احكيلك كيف شكلها مثلا ؟ بعدين بترن عليي بهيك وقت بس عشان تسال هيك سؤال، ولك قطعت خلفي من الخوف انا حكيت ابصر شو صاير

قصي ( بخجل ) : سامحيني مو قصدي بس ما بسترجي اسال هيك سؤال لامي وخواتي بتعرفي يا دوب امي مقتنعة فيها و ديمة بتقلبني مسخرة وريم اول مرة بتشوفها وحاسسها مو متقبلتها من الاساس

ياسمين ( بنشافة ) : بغض النظر عن كل الاسباب اللي ذكرتهم اعلاه، ما بطلعلك ترن، عكل حال ماشي حالها المخلوقة، والله يعينها عليك

قصي ( مبتسم ) : هاد اللي طلع معك ؟ طيب ياستي كثر الله خيرك وسامحينا جلالتك

ياسمين : انقشع

 

سكرت الخط، ورميت موبايلي ورميت راسي عالمخدة وغمضت عيوني ..

والمشكلة احمد من لحظة ما فتحت الخط تركني وطلع برا الغرفة، وانا نمت ونسيت حالي ونسيت احمد معي ..

 

الساعة ٨ صباحاً :

 

احمد ( بنبرة حادة ) : ياسمين ! يااااسمين

ياسمين ( فتحت عيوني وقمت مفزوعة من الصوت ) :  احمد ؟

احمد : الساعة ٨ يا ست، وليه هيك نايمة باواعي الحفلة وحالتك حالة

 

انصدمت من المعلومات اللي حكالي اياها، وما عرفت اعيط ولا اصرخ ولا شو اعمل ..

 

ياسمين ( متلبكة وبدي ابكي ) : يا ربي رح تروح عليي المحاضرة شو اعمل ؟ من وين ابدا احسن اشي ما اروح

احمد ( قعد عالتخت يراقب فيي ومكتف ايديه ) : روقي، هيك هيك ما رح تلحقيها، غيري وفوتي تحممي والبسي وبوصلك بسرعة بتلحقي المحاضرات اللي ضلت احسن ما تروحي كل النهار عليكي

ياسمين ( خافية فرحتي ) : رح توصلني ؟!

احمد ( رفع حواجبه ) : اذا حابة تروحي لحالك روحي

ياسمين ( ابتسمت ) : لا بالعكس ما فيي حيل اسوق ورح انعجق بالمصفات

احمد ( عينه على ساعته وبحكي بجمود ) : نص ساعة وبلاقيكي بالسيارة مزروعة، يلا انطلقي

ياسمين ( هزيت براسي مع ضحكة من الدان للدان ) : انطلقت

 

////

 

بيان : بابا امجد عازمني عالغدا اليوم، رح اتاخر بعد الجامعة

ابو بيان : الله يسعدكم، بس ما اتطولي كثير

بيان : تمام، يلا بشوفك

 

////

 

امجد : يمة انا طالع، ما تحسبوا حسابي عالغدا اليوم

منى : ليه ؟ وين بدك تتغدى

امجد : عازم بيان زمان ما طلعنا انا واياها

منى : الله يهنيكم ويتمملكم على خير

امجد : امين، يلا سلام

 

////

 

ام عدي : بدك تروحي عالجامعة اليوم ؟

غنى ( بلبس وعيني عالمراية ) : والله ضروري اروح يا امي عندي مختبر مهم

ام عدي : اه منا بقول ما في داعي للغياب لسا العرس بكرا

غنى : يلا لازم اطلع ( اعطيتها بوسة على خدها ) ادعيلي

 

كنت نازلة مستعجلة عالدرج، وبنفس الوقت صادفت احمد طالع من بيت سيدي ..

 

غنى : صباح الخير

احمد : اهلا، مالك بتركضي متاخرة انتي كمان ؟

غنى : هيك اشي، ليه مين متاخر متلي ؟

احمد : مرتي، اطلعي خلينا انوصلك

غنى : والله بتكسبوا فيي اجر

ياسمين ( اجت فجأة ) : احمد لساتك هون ؟ انا حكيت بتكون شغلت السيارة

احمد : اه يلا هي غنى جاية معنا كمان متاخرة من ورا سهراتكم

غنى : من بعد ازنكم طبعا

ياسمين : اه اكيد، اصلا السيارة الي انا بقرر مين يطلع فيها ومين ما يطلع

احمد : قصدك ما بطلعلي اعزم حدا من شور راسي ؟

غنى ( بلطف الجو ) : لا اكيد مو هيك قصدها

ياسمين ( قاطعتني ) : كل واحد بفهم حسب مدى تفكيره

احمد ( بسوق بعصبية واضحة ) : خلصصص، سكري عالسيرة

ياسمين ( بطرف عينها ) : سكرنا، ما في سيرة اصلا كلمة وانحكت

احمد ( دعس بريك ) : حكيت سكري عالسيرة

غنى : طولوا بالكم يا جماعة مو مستاهلة

ياسمين ( مزعوجة منه ) : …

 

صراحة ندمت اشد الندم اني طلعت معهم، شو هاد بدهم نكشة يتخانقوا هدول الجوز ..

يا فرحتي انا هيك بده يصير فيي لو تزوجت عن حب ؟، ولا مو كل الناس هيك ؟ ..

 

ياسمين : وصلني انا قبلها طبعا

غنى : …

احمد : انزلي يلا

ياسمين ( اتطلعت عليه بقهر ) : نزلت

 

غنى : احمد انا بعتزر كنت سبب…

احمد ( قاطعني ) : ما في اشي تعتذري عليه، متعود على ياسمين انا بس انتوا شكلكم مابتعرفوها منيح، يلا تفضلي هي في باصات

غنى : اه الموقف هاد كل الوقت في باصات، يلا يسلم ايديك

 

لما نزلت كان واقف مع اصحابه، واجت عيني في عينه ..

وركبت في الباص اللي في وجهي، وعلى طول ركب فيه ..

 

__________________________________

 

سمة بدن صباحية من زوجتي العزيزة، اللي اصلا نيمتني وانا مزعوج من تصرفاتها وضليت كل الليل نايم عالكنباية بالصالون وما سألت فيي ولا عملت اعتبار انه احنا مو ببيت لحالنا ..

 

احمد : نعم ؟

ياسمين : الك عين تزعل كمان ؟ افهم شو هالعمايل اللي بتعملها فيي قدام الناس

احمد : انا ؟ اه حقك عليي صح لاني رديت عتلفون بنت خالتي لما رنت عليي الساعة ٢ بالليل، وتركتك زعلانة ونايمة عالكنباية ببيت مو بيتك، وقللت من قيمتك قدام بنت خالي واعطيتك حجمك الحقيقي

ياسمين : …

احمد ( مخنوق ) : شكرا ياسمين، جد شكرا من قلبي لانه اخر خمس ايام الي معك عم يصير معنا هيك، يا ترى بس نعيش لحالنا شو رح نعمل ببعض ؟

ياسمين : … خلصت ؟

احمد : اه خلصت وبدي اسكر الخط، سلام

 

ما قدرت اضل ساكت، وحكيت كل اللي بقلبي حتى تفهم حالها شو عاملة ..

بس اللي شاغل بالي كان هية غنى، والشباب اللي كانوا واقفين ولما نزلت من السيارة واحد فيهم على طول لحقها وركب في نفس الباص اللي ركبت فيه، واللي كانوا معه ضحكاتهم ملت الشارع ..

 

__________________________________

 

امجد : كيفك ؟

بيان : تمام، كيفك انت ؟

امجد : انا مبسوط كثير، بكفي انك معي هسة

بيان : …

امجد : خبرتي اهلك عن مشوارنا اليوم ؟

بيان : اه، بس بابا حكالي ما اتاخر

امجد : اكيد قبل المغرب باذن الله بكون وصلتك

بيان : اوك، يلا عن ازنك عندي محاضرة

 

ما قدرت انام مبارح الا لما اقنعتها نطلع سوا لانه النا زمان ما قعدنا على رواق، وبحمد الله وافقت ..

فكرت كثير بالكلام اللي بدي احكيلها اياه، وكيف بقدر احافظ على علاقتنا وامنعها تفكر بسوء فيي ..

بيان حبي الها كبير وما بقدر اعيش بلاها، ورح احافظ عليها قد ما اقدر ..

 

__________________________________

 

مها : الو ياسمين، كيفك ماما ؟

ياسمين ( بتبكي ) : ماما انا مو منيحة ابدا

مها ( بخوف ) : خير يا عمري صاير معك اشي؟ انتي واحمد مناح ؟

ياسمين ( بقهر ) : لا مو صاير اشي، بس باقيله خمس ايام وبتركني، انا تعبانة من هلا تعباااانة كتير

مها : اوعي تضعفي، خلي الامل والاشياء الحلوة تعطيكي قوة انه رح تكون اخر مرة بتفترقوا فيها، وصدقيني رح تكوني من احسن ما يكون

ياسمين ( بحزن ) : وسيرين زعلانة مني

مها : اوف، شو مالها ؟

ياسمين : ما بعرف، مبارح فجأة بطلت تحكي معي

مها : لا اكيد سوء تفاهم، طولي بالك ما خربت الدنيا

ياسمين : ماشي ماما حبيبتي، شكرا لانك سمعتيني وجعتلك راسك من الصبح

مها ( بحنية ) : لا يا روح ماما شو هالحكي، انتي بنتي ازا ما سمعتك لمين بدي اسمع

 

تعبت من كلام ياسمين، والله قلبي مو متحمل اشوفها مرة جديدة مريضة ..

 

__________________________________

 

سهى : صباح الخير

ريم : صباح النور، ليه صحيتي بكير خليكي مرتاحة ما علينا اشي اليوم

سهى : لا كيف ما علينا ؟ بدها تروح تعمل آخر بروفا للبدلة وتجيبها معها وتعمل جلسة بشرة بالصالون

ريم : ااخ من الاعراس وقصصهم، يلا يوم وبمضى

سهى : باينتك منيحة اليوم، سوسو ضلت نايمة بالليل ؟

ريم ( ضحكت ) : يعني هيك وهيك بس مبسوطة عشان ديمة، وعقبال عند قصي يارب

سهى : صحيح كيف لقيتيها ؟ عجبتك

ريم : اممم يعني ماشي حالها بس بتبين اكبر منه صراحة

سهى : لا حرام عليكي مو لهالدرجة

ريم : لنشوف شو رح يصير معهم، المهم هو موافق والعمر مو حاجز مدام الامور التانية كلها تمام

سهى : عين العقل، يلا خليني احضر فطور واصحي ديمة

 

علاء : صباحو حبي

ريم : صباح النور

علاء : كيفك ؟ صحيتك ليكون

ريم : لا ابدا صاحية كنت، انت داومت ؟

علاء : اه والله رحت اليوم بكفي مبارح عطلت

ريم : يلا دير بالك، بس ترجع تعال تغدى عنا

علاء : لا بلاش ادايق عليكم بس بمرق اشوفك شوي

ريم : براحتك، لاني ما بضمنلك يكونوا فاضيين هههه

علاء : ههههه منا عارف، يلا الاسبوع الجاي عجقة سيرين، الله يعديها على خير

ريم : امين يارب، صحيح احمد متى سفره ؟

علاء ( تنهد ) : بنفس يوم عرس سيرين، حجز الفجر

ريم : الله يسهل عليه ويهون على ياسمين

علاء : امين، ويهون علينا كلنا

 

ديمة : مع مين صبحتي تحكي ؟

ريم : مع علاء رن عليي

ديمة ( باستغراب ) : حكيتي معه ؟

ريم : اه، مبارح ضل وراي لحتى احكي واعتزر كتير وندمان

ديمة ( بمسخرة ) : اه يا حرام الشغالة اللي كانت عنده فجأة راحت فاكيد رح يندم انه زعلها

ريم : يا ستي شغالة ولا مو شغالة هيك مصيرك بكرا

ديمة : لا حبيبتي انا مو هيك مصيري

ريم : …

ديمة : يلا الفطور جاهز

 

__________________________________

 

رجعت على اساس اكمل نومتي، بس اي نوم اللي بده يجيني بعد اللي صار بيناتنا ..

ما بعرف شو رح تعمل ؟ او كيف رح تواجهني لما ترجع ؟ ..

حتى انا محتار كيف انهي هالخلاف، وامضي آخر ايامي بالاجازة معها واحنا مبسوطين؟ ..

نقزت على رنات متواصلة لرسائل بتوصل عالواتس، نهضت حالي وفتحت اشوف من مين ..

 

ياسمين : انا لازم افهمك كل اشي حتى تعرف اني مظلومة .. ما رح اسمحلك تسافر وانت مو متأكد اني قد مسؤولية زواجنا .. وبالنسبة لموضوع السيارة كانت مزحة بايخة مني بس ما تخيلت تصدقها، وبعتزر لانها ما كانت بوقت مناسب بس اكيد انا وانت واحد احموودتي .. بحبك

احمد : …

ياسمين : طيب بما انك قرات الكلام بقدر اسكر هلا لاني بالمحاضرة

احمد : بتقبلي عزومتي عالغدا اليوم ؟

ياسمين ( مبسوطة ) : اكيد حياتي

احمد : تمام، خلصي دوام وابعثيلي عشان آجي اخدك

 

حبيت كلامها اللي وصل بنفس اللحظة اللي كنت افكر فيها، وحبيت اكثر اعتذارها لانه كبر كثير من شأنها عندي واعطاها قوة مثل دايما ..

الاعتذار مو ضعف مثل ما الكل بعتقد، لانه بعبر عن قوة شخصية وقدرة على الاعتراف بالاخطاء في الحين اللي غيرنا ما بقدر يعترف فيهم ..

 

__________________________________

 

عمر : اهلا

آيات : كيفو اخو العريس ؟

عمر : هههه والله هلكان لشوشتي، انتي كيفك يا بنت خالة العروس وبنت عمة العريس ؟

آيات : ههههه يعطيك العافية وحتى انا رجليي متكسرين من الرقص والكعب العالي

عمر : له له سلامتك، كان شلحتيه لهالكعب وخلعتي براحتك

آيات : لا ما بحب هيك، مو منظر حضاري، عكل حال حبيت اباركلك واسالك ازا محتاح اي مساعدة

عمر : الله يبااااارك فيكي و

آيات / عمر ( بنفس الوقت ) : عقبالك

عمر ( غمضت عيوني وتنهدت ) : …

آيات : …

عمر : احم، ماشي يلا عن اذنك خليني افطر واشوف شو اخبار العريس

آيات ( بخجل ) : يلا صحتين مقدماً، سلام

 

اااه منك آيات شو قصتك؟، شو بصير معك ؟، انا مو قدك صدقيني، حلفتك بربنا تتركيني بحالي، خليني احبك واموت فيكي بس لحالي بدون ما حدا يعرف، وبوعدك ما احب حدا الا انتي ..

كان نفسي احكيلك عقبالي انا واياكي، بس اي جراة اللي رح تخليني اتقدم لخطبتك وانا بهالوضع ..

ومو عمر اللي بتجوز على حساب حدا حتى لو كان ابوه، ولا بترك مجال للناس تحكي عنه كلمة او تنقص من شأنه ..

 

ام عدي : تعال حبيبي هي الفطور جاهز

عمر : … يسلمو

عدي : شو مالك ؟

عمر : ولا اشي، لا اتدقق فيي

عدي : براحتك

 

ما قدرت افطر منيح، اخذت كاسة الشاي وقعدت على كرسي ادخن، ووصلت لدنيا ثانية بعيدة عن هالدنيا الظالمة ..

ما بعرف كم سيجارة خلصت، قبل ما احس بايديه عم تسحب سيجارة مني بالغصب ..

 

عدي ( بعصبية ) : هاتها

عمر ( مصدوم ) : … خذ

عدي ( سحبني ) : امشي معي، هسة

عمر : …

 

اخذني لغرفتنا وسكر علينا الباب، وانا كاني مخدر وما بتطلع مني اي استجابة ..

 

عدي : وبعدين معك ؟ يا زلمة ارحمنا وارحم حالك، حس في اهلك اللي شايفينك بهالحالة ومو عارفين شو يعملوا مشان يفهموا شو صاير معك او شو اللي وصلك لهيك نفسية ؟!

عمر ( بلعت ريقي بغصة ) : … الاحسن ما حدا يعرف، لانه ما في حل الا عندي

عدي : طيب انا اخوك ولك من متى بتخبي عليي ؟ احكيلي فضفض، مو يمكن تلاقي حل عندي وانت مفكر انه ما في حل

عمر : لا تحاول، اللي عندي حكيتلك اياه اتركوني بحالي وكثر الله خيركم

عدي : هاد اللي طلع معك ؟

عمر : …

عدي : ماشي، بس يا ويلك اعرف انك حاكي لحدا غيري وقتها ما رح اسامحك يا عمر، وبتعرف عدي منيح

عمر : اتطمن انا اللي بعرفك، الله يسهل عليك وتذكرني بالخير دايما وانا بكون ممنونك

 

كانت نظراته حزينة، وانا مو قادر احط عيني بعينه اكثر من هيك ..

قمت من مكاني وبدي اترك الغرفة، سحبني لعنده بقوة وضمني، تحولنا لاطفال ونسينا حالنا ..

صدر الاخ الحنون ما بتعوض، وكل ظروفك الصعبة بتنساها بضمة حنونة منه ..

 

__________________________________

 

( لما تكوني فاضية رنيلي )

 

قرات الرسالة الف مرة، حتى اقدر استوعب انها منها ..

كانت محاضرتي على وشك تنتهي، وما صدقت اطلع حتى ارن ..

مسكت الموبايل وقبل ما ارن، رجفت ايدي وكاني ترددت للحظة ..

اول مرة بكون خايفة احكي او اواجه حدا، كان قلبي بدق بسرعة وبلهث كاني كنت بركض مع اني واقفة ..

 

ياسمين ( بتردد ) : أ أ ألو

سيرين : كيفك ؟ فاضية

ياسمين : منيحة، هلا خلصت محاضرة

سيرين : تمام، ما بدي اطول عليكي بس حبيت اسألك سؤال وبتمنى تجاوبيني بصراحة

ياسمين ( بقلق ) : اكيد، تفضلي

سيرين ( تنهدت ) : ياسمين، عمر من متى حكالك انه بحبها لآيات ؟

ياسمين ( مستغربة ) : عمر ! انتي شو عرفك ؟

سيرين : كيف بدي اعرف يعني ؟ آيات خبرتني بكل شي حكتيلها اياه

ياسمين : سيرين هالحكي كله من عندي، مجرد فسحة امل صغيرة لبنت يأسانة من الحياة وبتعتقد انه الحب محرم عليها وما عم تلاقي شخص يحبها

سيرين (  بعصبية ) : انتي عارفة فسحة هالامل هاي شو ممكن تعمل فيها لو كانت غلط ؟ شو رايك نتخيل سوا

ياسمين ( مقاطعتها ) : قبل ما ترفعي صوتك وتتخيلي، خليني اوضحلك انه هالحكي صحيح حتى لو ما انحكالي بصريح العبارة

سيرين : يا ياسمين يا حبيبتي انتي ادرى الناس بعيلتها، شو رح يعملوا لو اكتشفوا انه بنتهم بتحب واحد، لك ما بتتزكري لما وقف معها محمد وكانوا رح يدبحوها لولا لطف ربنا فيها

ياسمين : طولي بالك لا بدبحوها ولا اشي، وعمر مو غريب متل محمد، بعدين ليه ما تتركيها تعيش مغامرة هي اختارت طريقها ؟، همة الاتنين بحبوا بعض يا سيرين وعمر مو من مبارح واليوم بحبها اله فترة منيحة بس ما كان يظهر لانه فاقد الامل انها تحبه

سيرين : بس فهميني من وين بتجيبي هالحكي ؟!

ياسمين : مو ضروري تفهمي، المهم انه كلامي صح وآيات رح اوقف معها واساعدها متل ما عملت معك ومع ديمة، بتوقع اجا الوقت المناسب

سيرين : ولك الله يعين احمد عليكي، تصطفلي اعملي اللي بريحك المهم انا مو مقتنعة بعلاقتهم، مو متخيلة اصلا يصير اشي رسمي بينهم لانه آيات رح تصحى على حالها بالآخر وتكتشف انه عمر ابدا مو مناسب الها

ياسمين : اوك بنشوف

 

ما بعرف ليه مصرة اني اوقف مع آيات وعمر واساعدهم، مع اني فاقدة الامل من موافقة اخوانها بعد اللي شفته من امجد هداك اليوم، وكيف بوز براس احمد عليها ..

يمكن شفقة او جكر او .. ما بعرف .. يمكن غلاوة عمر بقلبي ومكانته الخاصة ..

نفسي اشوفه مرتاح وعايش باستقرار، ومع بنت تكون متل آيات ..

 

__________________________________

 

بعد ٥ ساعات <<

 

امجد : شو حابة تاكلي ؟

بيان : على زوقك

امجد : تمام، رح اطلب بسرعة حتى ما نتاخر بالرجعة

 

////

 

احمد : عجبك المطعم ؟

ياسمين : اه حبيته، من زمان نفسي اجي عليه

احمد : صراحة من ايام خطبتنا الاولى كنت ناوي اجيبك عليه بس ما صار نصيب

ياسمين : خلص هي اجيت بلا ما ننكش الماضي، المهم انت مروق ؟

احمد : بس اسالك كم سؤال بعدها بقرر ازا رح اروق او لا

ياسمين : انا رح ابدا بالحكي بدون ما تسال

احمد ( شربت مي ) : لا لا اشياء غير اللي انتي بتفكري فيهم

ياسمين : اشياء متل شو ؟

 

////

 

بيان : امجد احنا لازم نتفاهم كتير منيح على كم شغلة عم تصير معنا و…

امجد : حبيبتي عمري وحياتي انتي، ارجوكي افهميني انا ما بدي اشي الا نكون سوا، يا بيان انا ( حط ايديه على وجهه ) ما كان قصدي اللي انتي فهمتيه وعملتي عليه مشاكل وزعل

بيان ( مستغربة ) : ولا شو قصدك ؟

امجد : قصدي انه نستغل كل ثانية بعلاقتنا وحياتنا سوا ونخليها احلى ذكريات بعمرنا، انا وانتي انخلقنا لبعض وانا مستحيل اتمنالك الشر، بالعكس بداريكي بعيوني وانتي عارفة هالحكي منيح

بيان : بتداريني بعيونك ما الها علاقة بالطلبات اللي طلبتها امجد على مين بتتخوت ؟؟

 

////

 

احمد : ياسمين انا عارف ومتاكد انك قراتي كل الكلام اللي صار بيني وبين امجد يوم ما كنا مسافرين، وحتى ما تكوني فهمتيني غلط بدي تحكيلي رايك بكل صراحة ؟ عشان اقارن وجهة نظري مع وجهة نظرك

ياسمين ( متلبكة ) : اول اشي تصرفي ما كان صحيح، بس اللي خلاني افتح موبايلك اني شفتك وقتها كتير متدايق وحبيت اعرف شو صار فجاة معك، اما بالنسبة لوجهة نظري، فامجد زعلني منه يعني هو اقرب حدا لعمر والمفروض يكون مبسوط انه اخته مهتمة فيه على فرض انه اللي بتفكروا فيه صحيح

احمد : يعني لو فعلا عمر مهتم فيها وهية بتبادله الاهتمام، برايك مناسبين ؟

ياسمين : هاد الموضوع بالذات مو احنا اللي بنقرره، برجع ازكرك انه انا وانت مختلفين كتير عن بعض مع ذلك حبنا ما اله حدود والمستحيل اللي عملناه عشان نكون سوا فاق كل توقعات البشر، مشان هيك صعب نحكم على عمر وآيات ازا كانوا مناسبين او لا

احمد ( مبتسم ) : كلامك صحيح مليوون بالمية، فعلا علاقتنا اكبر مثال للتحدي، وانا متاكد انه انتي بتحبي مصلحة آيات واكيد ما بترضيلها الا كل خير

ياسمين : كتير مبسوطة انك متاكد، وبدي ااكدلك اكتر انه عمر بالنسبة الي اخ مو اكتر وحتى قصي

احمد : صحيح على سيرته، يلا احكيلي شو كان بده منك ؟

ياسمين ( تنهدت مع ابتسامة ) : كان بده يسالني عن وحدة حبيبته اجت على الحفلة، وانا سمعته اللي فيه النصيب اول شي لاني متزوجة وتاني شي حتى لو مو متزوجة كمان كان رح يسمع نفس الحكي مني، اما بالنسبة اني ما لحقتك لما طلعت صدقني ما كنت بوعيي واكبر دليل انك لقيتني نايمة باواعي الحفلة

احمد ( باستغراب ) : حبيبته ؟ خبر حلو، طيب شو رايك تشوفي مين هناك !

 

لفت وجهها حتى تشوف على مين كنت أأشر بعيوني، بس ما توقعنا بنفس اللحظة تصير هالشغلة ..

 

////

 

امجد ( برومنسية ) : عجبك الاكل ؟

بيان : اه يسلمو، فعلا زاكي ومميز

 

////

 

ياسمين ( مصدومة ) : احمد ! قوم روح لعنده

احمد ( مصدوم ) : اوعي يحس علينا انه احنا هون

 

////

 

بيان ( معصبة وعم تبكي ) : كل شي بينا انتهى من هاللحظة امجد، لا تلحقني

 

بيان تركته وطلعت وهي تركض ودموعها بللوا كل الناس اللي مرقت من جنبهم ..

 

////

 

ياسمين : سبحان الله لسا بدي احكيلك انت واخوك نفس الزوق، مين دله عالمطعم ؟

احمد ( بغضب ) : مو وقت هالحكي، لازم نعرف شو عم بصير معهم لانه كان من ضمن المواضيع اللي كنت بدي احكي معك فيهم

ياسمين : انا ما بعرف اشي صدقني، بس مبارح حنين بتحكيلي بيان وامجد احتمال ينفصلوا، وما فهمت تفاصيل

احمد : يعني حنين عندها تفاصيل ؟!

ياسمين : اكيد، بيان صاحبتها ودايما سوا