الحلقة الرابعة والثلاثون

” كونوا كل يوم في انتظار الفرح وابتسموا مهما صادفتكم أشياء بائسة “

 

_______________________

___________________

 

عدي ( مقهور ) : ليه ما حكيتي انك بتعرفيه ؟ شو فيها لو لمحتي او بعثتي خبر مع وحدة من نسوانا او امك ؟

عمر : لانه الست بيان اقنعنتك بلاها صح ؟ مو هيك حكيتي يومها

غنى : انا كنت خايفة امشي ورا صوت قلبي ويصير فيي متل ما صار مع بيان وامجد

ام عدي ( واقفة على الباب وسمعت ) : شوووو ؟؟

هيثم : صحيح يعني صراحة انتي ظلمتي حالك بايدك واهلك ما عليهم لوم

أبو عدي ( مقهور ) : سامحيني يابا انا كان لازم اسمعك واهتم فيكي اكثر، الله يلعن الشيطان ضلت سهى تزن فوق راسي

عمر ( معصب ) : لا تحطها بظهر عمتي، من الأول قلتلك ما توافق انت سمعت كلام عدي ومشيت وراه .. ما اختلفنا قصي كويس وما بتعوض بس بنتك ما بدها إياه

غنى ( بتبكي بحرقة ) : ولا هو بده اياني، وطلب مني ارفض ووافقت بس مشان بابا وعدي

أبو عدي : كلام ما في منه فايدة اللي فات مات وتزوجتوا وصار عندكم عيلة وواجبكم تحافظوا عليها، كل البنات اليوم بتلموهم عندي بدي اسمعهم وحدة وحدة واشوف شو آخرة هالعيشة

هيثم : ما بدنا نلم حدا، لميناهم كثير وصارحناهم وعلاء عمل تسجيل وجمعهم وكله بدون فايدة للأسف

ام عدي : تسجيل شو ؟

عدي : … قصة طويلة عشان آيات وياسمين ونشوف شو اصل المشكلة بينهم

أبو عدي : وشو طلع ؟

عمر : سوء فهم وآيات عرفت غلطها ومن يومها هي وياسمين سمنة على عسل

غنى : كزابة مرتك بتكره ياسمين وكل خواتها وهمة كمان بكرهوها

ام عدي ( بهمس ) : في حدا فيه عقل بحب آيات

عمر ( بغضب ) : احترمي حالك لاقص لسانك مو كذابة آيات، زودتيها عاد اجينا نوقف معك لا محترمة حالك ولا محترمة حدا انقلعي من وجهي .. امشي عدي فخار يكسر بعضه خسارة فيها هالساعة اللي طلعتها مغادرة

عدي : … راجعلك اشوف اخرة مخك، اكثر اشي مبسوط عليه اني مجوزك لزلمة ومتاكد مليون بالمية لو ما شافك غلطانة وسديتي كل الطرق للتفاهم معه؛ ما بتكوني هون هسة

غنى : خليك مبسوط حبيبي، استوعب مشان الله استوعبوا كلكم انا هون لاني ما بحبه ولا بحبني، عملت كل اشي ممكن يحافظ على زواجنا حتى اني كزبت عليه وقلتله كنت احبه من لما كنت صغيرة وصدق الكزبة وعايش عليها، بس لما توصل معه يحكيلي مطولة لتصيري متل خواتي ويحكي لبابا بنتك ما بتلزمني انا بطلت تفرق معي ويضرب هالزواج واللي بده يضل فيه، لو وراي مية ولد ما برجعله فاهمين !!

عدي ( مطنشها ) : الكلام هاد ما يطلع من بيناتنا، ما بدنا نكون باشي نصير باشياء ويلاقيله حجة يطلق .. انتي هسة معصبة ومو عارفة شو بتحكي خليكي عند اهلك لحتى تقدري تستوعبي المحيط حواليكي وتعرفي مين الكويس ومين العاطل ووقتها لحالك رح تطلبي يرجعك

غنى : …

أبو عدي : الله يرضى عليك يابا طول عمرك فهمان وكلامك موزون

هيثم : ههههههه يلا تفرقوا يا شباب .. انا راجع على بيتي برضو ( مسك غنى من اكتافها ) روقي عمي عشمنا فيكي بنت فهمانة وواعية وماشاءالله طول عمرك عاقلة خليكي قد الثقة ورح تشوفي نتائج ترضيكي انا متأكد ( حضنها وباس راسها ) يلا بشوفكم

 

////

 

سهى ( منهارة ) : هاي آخرتها ؟ ليه كل ما نحاول ننبسط بتصير بحياتنا مصيبة ؟ شو هالذنب اللي موقف بوجه سعادتنا وربنا بعاقبنا عليه

نهى : استغفر الله العظيم الذي لا اله الا هو الحي القيوم واتوب اليه .. استغفر الله العظيم من كل ذنب عظيم .. لا اله الا انت سبحانك اني كنت من الظالمين يا حي يا قيوم برحمتك استغيث

سهى ( بتبكي ) : …

منى ( بالم ) : طولي بالك سهى والله بتنحل وقصي ما بهونله ابنه واكيد هية كمان وبتحب زوجها رح ترجعله

سهى ( بتبكي )  : …

مها : حسبنا الله ونعم الوكيل، اللي قاهرني انه ياسمين سبب المشكلة ليه يا ربي دايما بنتي السبب ؟ والله هالمسكينة ما كان قصدها اشي

منى ( بحقد ) : ياسمين شو دخلها ؟ بنقلك غنى وآيات مخبصين الدنيا .. ولسان بيان انا بعرف كيف اقصه واعلمها تاني مرة تفتح الواتس اب وتحكي كل ما بخطر ببالها

نهى : غنى ما الها شخصية بوجود بيان .. من لما اتطلقت ورجعت حسيت انه غنى متغيرة وحتى بطلت صحبة مع الباقي

سهى : اه طبعا شو لازمتهم بوجود بنت عمها، خليها هي خربت بيتها وهديك تزوجت حبيبها وحاربت الدنيا مشانه

مها : والله قولتك حاربت وبقوة، شو راي امجد صحيح عرف ؟

منى ( بغضب ) : لا يا عمري نايم بالعسل تركناه، بتعرفي كانوا محتفلين والباقي عندك

نهى / مها : هههههههه خلص فهمنا

سهى : مسكين شو ذنبه خليه ينبسط شوي، الله يعين ابني كيف قضى هالليلة ( رجعت تبكي ) بكون اشتاق لوليد روحه معلقة فيه يا حبيبي

 

تقطعت قلوبنا على اختي، ويلها ابنها اللي انخرب بيته وويلها حفيدها اللي ما صدقت تشوفه واحنا أيدينا تربطت ومو عارفين شو نعمل وكيف نتصرف ..

كل وحدة من بناتنا عندها همها اللي بكفيها، ولما ينسوا همومهم او يتناسوها بتطلعهم قصة لا على البال ولا على الخاطر ..

 

////

 

سيرين : ان شاءالله عمرينها ما ترجع

ديمة : تخيلي طلبت من عدي يوديني عند اهلي وما قبل، حمدت ربي اني ما ركبت راسي

سيرين : على شو يا هبلة عشان آيات تطلع العاقلة ؟ اسمعي ديمة غنى بدها فركة اذن من زوجها مشان يصير عندها شخصية وتطلع عن حكم بيان وسيطرتها، ما بننكر انها كويسة بس التأثير الخارجي اله نتائج

ديمة : قولتك خليه يربي فيها النسوان .. أصلا عدي وعلاء كتير مبسوطين من قصي

سيرين : يييييييي ما في مقارنة مو متل الهمجي عمر كل ما يجي يكحلها بعميها، ولا امجد اللي راكض ورى ريحة الباربي ومو مصدق حاله

ديمة : دخيلك ينقعها ويشرب ميتها، اوعي تجيبي سيرة لحدا انه حكيت معك خلينا قدامهم ما بنتواصل

سيرين : لا اتطمني ما بحكي، حتى لاولادي ما بينتلهم وسلمي على ريم وخالتو وخليها تهدى مو مستاهلة دمعة منها

ديمة ( غصيت ) : ما حارق قلبي غيرها .. الله يهدي بالها

 

////

 

حنين ( مستغربة ) : انتي وين ماما ؟

مها : عند خالتك سهى، اجينا عندها انا وخالاتك نواسيها شوي

حنين : تواسوها بشو ؟ شو عم بصير ؟

مها ( تنهدت ) : قصة طويلة وما الها قيمة كله كلام فاضي وقصص نسوان تافهة

حنين ( معصبة ) : عادي وضعنا كل كم سنة مشكلة ؟

هدول النسوان ما بكبروا ؟ ما بتغيروا ؟

مها : طولي بالك كيف لو تعرفي شو اللي صار بتطلعيلي من السماعة هههههه خلص برجع بحكي معك بوقت تاني، انتبهي لحالك

 

منى : الله يرضى عليها حنين العاقلة والله اشتهيت  حدا يفكر متلها

نهى : اه والله معها حق، يعني المفروض أشياء يتجاوزوها بدون ردح ومشاكل وكله بسبب الغيرة

مها : … تسلموا الحمدلله تربايتي فيهم ما راحت على الفاضي

 

////

 

امجد ( بعصبية ) : مين انت لتملي عليي شو احكي لمرتي وشو ما احكي ؟ مفكرني مثلك بكسر بخاطر الانسانة اللي اختارتني شريك حياتها ؟ حبيبي شو رايك تقص لسان اختك اول اللي ما بتخلي واحد يعيش مبسوط بعدين تعال تشاطر على مرتي

احمد ( ضحكة صفراء ) : ماشي مثل ما بدك .. بس لا تزعل لما ما تشوف حدا حواليك

 

انس ( مقهور ) : احمد صدقني ما بستاهل لا هو ولا اللي متجوزها لتزعل حالك هالقد، خليها تنفعه عديم الفهم فكرناه صار دكتور وبفهم  للأسف عمره ما بتغير طول ما اكبر همه الباربي

احمد ( بهز راسه ) : صح كلامك عمره ما بتغير، الله يبعتلك بنت حلال تستاهلك وتكون مثل ما بتتمنى واحسن

انس : تسلم .. امين، ويهدي بال قصي اللي ضيع من عمره سنين مع وحدة فكرها بتفهم

احمد ( بمسح وجهه وشعره بكفوف ايديه ) : ما قاهرني غير هالمسكينة اللي ما حدا تاركها بحالها، اكبر امنية عندها تخلص من غيرة آيات وقال حالفة يمين ما تعمل مشاكل معها وما تزعل منها

انس : كله مشانك والله، هاي هية شريكة الحياة اللي اكبر همها تشوف زوجها بنفسية مرتاحة ومو عايش بصراع، اختصرت قد ما تقدر وأول اشي مشكلتها مع امك

احمد ( مبتسم ) : الله يرضى عليها ويسامحني على كل اشي عملته فيها لو بدون وعي او قصد، فعلا مبادرتها بتمحي أي خطأ

 

////

 

كنت كتير متوترة بعد الاحداث اللي صارت مبارح، وطول اليوم ما تواصل معي امجد وقربت رجعته على البيت وخايفة يكون حدا حاكي عني بسبب غنى وغبائها ..

شو اعمل بهالبنت اللي مو كاينة تصير بني آدمة قد ما حاولت معها، طول عمرها خوتة وعقلها متل الأطفال ..

 

امجد ( فتح الباب بعصبية ) : منيح اللي لقيتك

بيان ( متوترة ) : وين بدي أكون حبيبي ( قربت منه بدلع متصنع ) كنت استناك طبعا

امجد ( بعد حاله عني ) : شو اللي سمعته اليوم ؟ عاملة غنى لعبة عندك وبتمثلي على الكل انك مثل اختها بس لا تخافي انا كاشفك

بيان ( مصدومة ) : هاد الي الحكي امجد ؟ يا خسارة توقعت اسمعه من أي حدا الا منك

امجد ( بعصبية ) : ما حدا بحكيلك إياه لانه ما هدفهم يوعوكي هدفهم يحكوا من وراكي، انا هون عشان افهمك كلمتين حطيهم حلق باذانك .. اتركي غنى لا تتواصلي معها واثبتي للناس انك مو مأثرة عليها وقتها كل مين ببين على حقيقته واللي بغلط بحق الثاني واجبه يعتذر

بيان ( بخبث ) : حاليا همي ابنّا وكيف اهتم بحملي وكيف اهتم فيه بعد الولادة واربيه احسن ترباية، يا دوب اتزكر امسك الموبايل

 

////

 

بعد ما حشرتها بالزاوية وكشفت نيتها توقعت عالاقل تعمل حساب لعشرتها مع بنت عمها واتدافع شوي عن علاقتها فيها، بس فرصة واجت لعندها واكيد هسة بطلت تفرق معها وحدة خربت بيتها بايدها من قلة فهمها وعشوائيتها ..

 

امجد (  بجفاصة ) : فوتي حطيلي لقمة اكلها، لولا الجوع ما حدا اله نفس ياكل

بيان ( بخوف ) : حاضر شوي وبكون قدامك بس روق ما في اشي مستاهل

امجد ( بصوت عالي عشان تسمع من المطبخ ) : اه طبعا مهو مو بيتك المخروب ولا زوجك اللي رماكي بوجه ابوكي انتي وابنك صح ؟

بيان ( بترد بنفس النبرة ) : اللي بحكي متل الببغاء بدون ما يشغل عقله اكيد هيك بده يصير فيه

 

قمتلها بكل قوتي ولحقتها على المطبخ ، ضربت عالباب بكف ايدي ..

 

امجد ( بنبرة حادة ) : مين اللي موصللها الحكي ؟ شو دخل آيات وغنى ليعرفوا اسيل شو اكلت وشو حكت ومتى اجت على بيت اختها ومتى روحت ؟ يعني لو آيات اللي حكت بنقول امي حاكيلتها بس غنى ؟!

بيان ( مقهورة ) : انت زعلان على اسيل ولا غنى ؟

امجد ( نرفزت من سؤالها ) : زعلان على حالي .. اتركي من ايدك بطلت اتسمم

 

ايوا ايوا هسة وضحت الرؤيا، قاهرتك اسيل وخايفة تصير سلفتك وعارفة انه اهلي بفضلوا بنات خالتي مها على بنات العيلة كلها ..

 

////

 

شو اللي عملته بحالي وكيف وصلت لهون؟ لكم يوم بده يستمر الوضع هيك وشو ممكن يكون الحل ؟ ..

 

قصي ( مخنوق ) : مسا الخير

ياسمين ( بلهفة ) : قصي !! مسا النور كيفك ؟

قصي : ياسمين كيف بدي أكون احكيلي انتي ؟ شو الحظ اللي عندي لما حبيت بنت تركتني وتزوجت غيري ولما تقبلت زواجي المغصوب عليه بتطلع مرتي قليلة فهم وعايشة مثل الروبوت لغيرها ؟

ياسمين ( مقهورة ) : قصي والله ما بعرف شو احكيلك، قلبي من جوا بتقطع عليك وبنفس الوقت اسفة لانه كل اشي صار بسبب اتصالي الغبي اللي ما استفدت منه غير وجعة الراس والمشاكل

قصي ( بصرخ ) : منيح اللي اتصلتي ياسمين .. منيح اللي اتصلتي مشان نعرف شو عم بصير بدل ما احنا نايمين على اذانّا

ياسمين ( بحزن ) : معك حق، اللي صار صدمة وبيان رح تخذلها لغنى وما تسال فيها انا متاكدة من هالاشي

قصي : وقفنا معها وسندناها ولما وصلت لامجد دارت ظهرها وصرنا بس للتسلاية عندها

ياسمين : حنين اكتشفت هالاشي متأخر برضو، كانت مفكرتها صاحبة يعتمد عليها بس بعدين اكتشفت انه لمصلحة، خلص تعودت تعيش وحدانية واللي حواليها منظر ليخدموا مصالحها

قصي : … حسبنا الله ونعم الوكيل، زعلان على امجد اللي كان همه الشكل ونسي الجوهر

 

////

 

رجع احمد على البيت وكنت بحكي مع قصي، تلبكت وما عرفت اكمل ..

 

ياسمين : لا تخاف عليه انت وامجد رجال وبتعرفوا منيح كيف تتصرفوا ……

قصي : الو ؟ ياسمين انتي معي

ياسمين : اه اه معك .. بعتزر فات احمد على البيت هلا

قصي : اوك سلمي عليه .. وانتي شكرا الك ارتحت بالحكي معك

ياسمين : الله يسلمك

 

احمد ( قاعد جنبي ) : مين ؟

ياسمين ( مرتبكة ) : قصي

احمد ( باهتمام ) : كيف وضعه ؟ حكالك اشي

ياسمين ( متوترة ومو عارفة شو احكي ) : انا اسفة احمد رن عليي وما حبيت اكسر خاطره

احمد ( مبتسم ) : على شو اسفة ؟ مو زعلان بالعكس والله ارتحت انه فضفضلك شوي، عالاقل خليه يلاقي حدا بفهم يحكي معه، صحيح خواته بفهموا بس اكيد ما بكون قادر يحكي كل اشي الهم

ياسمين ( بغصة ) : كان صوته ببكي احمد ( نزلوا دموعي ) حرام قصي ما بستاهل

احمد ( مسح دموعي وضمني لصدره ) : اهدي حبيبتي كل اشي بتصلح شوية وقت بس والدنيا كلها بتنقلب والاقنعة المزيفة بتنزل، صحيح ابغض الحلال الطلاق لكن اله أسبابه

ياسمين : من غير شر، خلينا نقول بلكي الله يهديها وينور بصيرتها وتكشف انه قصي ما في منه وترجعله

احمد ( تنهد ) : ان شاءالله تكون نظريتك صحيحة، مع انه الموضوع اكبر من هيك والله ياسمين

ياسمين ( نهضت حالي ) : شو قصدك ؟

احمد : … والله يا حبيبتي مو قصدي اشي بس بتعرفي قصة زواجهم وكيف مشاعرهم تجاه بعض عالاقل مشاعر قصي، فأكيد ما بحس جواته اشي يرجعه الها

ياسمين : ممكن يكونوا بفكروا هيك وممكن يتغيروا مشان ابنهم عالاقل

احمد : هينا بنشوف شو رح يصير

 

__________________________________________________________________

 

ام عدي ( بتطبخ ) : هي بيان طلع فيها ولد كمان

غنى ( بجلي ووقع الصحن من ايدي وانكسر ) : شو ؟ بيان حامل !!!

ام عدي ( مستغربة ) : ما بتعرفي ؟ من يوم المشكلة حبيبتي وهي حامل بعيد زواجهم فحصت

غنى ( بغصة ورح ابكي من القهر ) : لا ما بعتتلي اشي من يومها أصلا .. بس .. بس أمها لما حكت معي وقالتلي انه امجد منعها تتواصل معي ما خبرتني

ام عدي ( عصبت ) : حلو كتير .. شفتي ؟

غنى ( مقهورة ) : وبتحكيلي لوعي قصي على ابنه ولا تفرجيه إياه، وقالتلي يومين وبرجعلك وهيني الي خمس شهور

ام عدي ( بتضرب على راسها ) : شو شو قالت ؟ ( هجمت عليي ) ولك يعدمني اياكي يعدمني هبلك يا قليلة الفهم، لوعتي قلب الزلمة وأهله وفضحتينا وكله من تحت راس هديك العقربة، الله لا يعطيكي العافية فوق تعبك

 

كان وليد بلعب لبسته اواعي الطلعة وعبتله شنتة واخدته، وتركتني اتفرج عليها واندب حالي ..

 

////

 

سهى ( مستغربة ) : مين جاييني بهالوقت ( فتحت الباب ) آمال ؟

وليد ( ركض عليي ) : تيتا انا اجيت

 

ما صدقت عيوني لما شفته وسمعت صوته، حضنته بقوة وحملته بعد ما دخلت مرت اخوي ..

 

ام عدي ( مرتبكة ) : جبتلك وليد

سهى ( بمسح دموعي ) : يكتر خيرك

ام عدي ( متمالكة حالها ) : سامحينا يا ام قصي .. حقك علينا

سهى ( هزيت راسي ) : … الله يسامحكم

وليد : تيتا وين بابا ؟

سهى : يا روحي هلا بيجي من الشغل وبشوفك وبنبسط كتير ( بتامل فيه ) كبران وحليان وصرت تحكي منيح يا عمري شو اشتقنالك

ام عدي ( بتبكي ) : اتاريها وازة براسها وقال لوعيه على ابنه برجعلك بسرعة

سهى ( رجفت من كلامها ) : مين ؟

ام عدي ( مسكتني بترجي ) : ليلى .. بس حلفتك بالله ما تجيبي سيرة لحدا مو ناقصنا خراب بيوت

سهى ( بنبرة حادة ومقهورة ) : الله لا يسامحها .. الله لا يسامحها شو عملنالها احنا ؟ هيك بتحرق قلب ابني وقلبنا على هالولد ؟ بتعرفي كيف حالة قصي انتي ؟

ام عدي ( منهارة ) : حسبنا الله ونعم الوكيل .. والله بس قالتلي دبحتها بكل عزمي طيرت دماغي بهالكلام اللي حكتلي إياه والها خمس شهور ساكتة ما بعرف شو خلاني احكي انه بيان فيها ولد وانكسر الصحن من ايدها بس عرفت انها حامل

سهى ( كاتمة ضحكتي ) : الله لا يردها بنتك ( بجدية ) صدقيني ما الي نفس لا احكي ولا اتناقش معها، بيتها بتعرف عنوانه ازا ما رجعت لحالها ما بنرجعها وازا كملت السنة وحياتك الا اجوزه ست ستها وروحي وصليلها الحكي

ام عدي ( بنفس متسارع ) : بطلعلك .. ابنك بنرفع فيه الراس

سهى ( بثقة ) : الله يرضى عليه وعلى ابنه

 

////

 

مها : فهميني شو بدك تشتري عشان ما الف السوق على الفاضي

فرح : ماما افهمي عليي ما في اشي معين براسي بس تمشاية عشان خلصت امتحانات وناكل كنافة طبعا

اسيل : شهيتيني إياها خلص جاية معكم هههههه

مها ( مبتسمة ) : اه والله زمان ما طلعنا طشينا، وبالمرة بتاخدينا بسيارتك

فرح : وامير وريان معنا صح ؟

مها : وين اتركهم يعني ؟

اسيل : صاروا كبار بننبسط سوا يلا بسرعة عشان اقدر ارجع وادرس شوي قبل دوامي

امير : وانا جاي على بالي اشتري أشياء ماما ممكن ؟ رح اخد تحويشتي معي

مها : يا حبيبي عقبال ما تكبر وتصير تشتغل وتشتري اللي بنفسك

 

////

 

نهى ( محتارة ) : والله اشتقت لخواتي زمان ما التمينا، بنشوف بعض خطف

سيرين : معك حق، الله يجمعكم ويبعد عنكم الهموم

نهى : بما انك عندي خليني اعمل لمة بسيطة شو رايك ؟

سيرين : بس بدون آيات

نهى : لمة لخواتي بدون بناتهم

سيرين : لا كلهم ما عدا آيات

نهى ( عصبت ) : بتقهريني يعني ولا شو ؟

سيرين ( ببرود ) : لا بحاول اخليكي ما تندمي متل ما ندم ابنك وانا بضمنلك اختك ما تزعل

نهى : خلص بطلت اعمل اشي، طلبك مو منطقي

سيرين : عندي فكرة، شو رايك تروحي تزوريهم وحدة وحدة وهيك ما حدا بعتب عليكي

نهى :  احسن فكرة .. خليني ابدا بخالتك منى اكتر وحدة بتكون فاضية لزيارات الفجائية، قومي البسي انتي واولادك

 

////

 

منى : الف مبارك ماما فرحتلك

امجد : يبارك فيكي عقبال ما تحممي أولاد انس يا رب

منى : لما نلاقيله عروس ( بحسرة ) يا رب يبعتله بنت حلال تسر خاطره

امجد ( بمسخرة ) : امين وتتحمل مناخيره اللي رافعها للسما

انس ( فاهم عليه ) : وما تتركني من ورا زناخة اخوي

منى ( بحب ) : اقعد احكيلي شو بدك مواصفاتها ؟ يعني بتشبه مين من البنات اللي بنعرفهم ما عمري حسيتك بتحكي عن وحدة حلوة

امجد :  عشان نحصر الدائرة اسرع

انس ( بفكر ) : اهم اشي ما تكون تشبهني، يعني كل المواصفات اللي عندي جيبي عكسها

منى ( مستغربة ) : يعني بدك تكون لونها اغمق ؟

انس ( كاتم ضحكته ) : لا افتح

منى : وشعرها ؟

امجد : خروبي عكس الكستنائي

انس ( ضربته بقرنة الكنباية ) : خليك ساكت انت تجوزت وما حدا اتدخل فيك

منى : صحيح انت ليه قاعد روح اطلع على بيتك خلص باركنالك واخدت دورك

امجد ( رافع جواجبه ) : هسة هيك صارت الدنيا ؟ ماشي يمة بكرا بتصيري تنادي عليي انزلك محمود تشميه وتبوسيه

انس ( قاطعته ) : بتنزله وانت تضحك وتلعب حبيبي ضايل تشوف حالك على امك

امجد ( عصب ) : طيب خليني اكمل يا…

 

وهجم عليي مثل الأسد على فريسته ..

 

منى ( انحمقت ) : خلص خلص خليك بس مشان الله اتركه

انس ( بضحك ) : هههههه خليه يفش غله عادي

نهى ( بتدق عالباب ) : السلام عليكم .. خير خير شو مال اولادك ؟

منى ( مبسوطة ) : يا مية اهلا وسهلا منيح اللي اجيتي فوتي افزعي معي

سيرين ( بمسخرة ) : يا ويلي عليه هالمسكين مو كاين يخلص منه، جوزناه وقلنا خلص كف شره عن الناس بس عبث اللي فيه طبع ما بتغير

امجد : هيهيهيهي شو بتسوي هون انتي ؟

سيرين ( بتسبل عيونها ) : جاي ازور خالتي انا واولادي .. فوتوا ماما سلموا عتيتا منى

امجد ( بمسخرة ) : يا عمري انا فوتوا يا تؤبروني

منى / نهى : هههههههههه يخزي شيطانك

سيرين : بس فهموني شو سبب الهجوم عشان اعرف احللكم المشكلة

انس : غيران مني كالعادة شو بدك فيه ما اله حل والله يا بنت خالتي

امجد : اه يا بنت خالته غيران منه بده يتجوز وحدة احلى من مرتي

نهى ( بفرح ) : حبيبي الف مبارك لقيتيله عروس خلص ؟

امجد / انس / سيرين : ههههههههههه

امجد : انا بقول فوت ادرس احسن ما يجوزوك وانت ما معك خبر

منى : لسا عمالي بساله شو المواصفات وهداك نط يحكي عنه، ودقوا ببعض

عمرو : تيتا وين يحيى ؟

منى : ببيته والله يا حبيبي روح دق عليهم واحكي لخالتو ياسمين تيجي تشرب قهوة

نهى : ايوا شو مواصفاته طيب خليني اشوف ازا في حواليي

سيرين : مبارح اجا عريس لاسيل طويل كتيييير نزل راسه من باب البيت عشان يقدر يفوت متنا ضحك هههههه

انس ( بلعت ريقي ) : وبعدين ؟

سيرين : ولا شي حلقتله متله متل غيره

نهى : يوووه بعدين معها هالبنت التانية شكلها مواصفاتها صعبة

امجد ( بجدية ) : يعني بيجيها عرسان ؟

سيرين ( بهدوء ) : انا ما بعرف كل اشي بس مبارح بالصدفة حكولي عشان اضحك

منى : هاد ابني بده وحدة عكس مواصفاته بس افتح من لون بشرته مو اغمق

نهى ( صافنة ) : هي اسيل افتح ولا نفس الدرجة ؟

انس : شو جاب سيرتها ؟

منى ( مركزة مع خالتي ) : لا لا افتح طبعا

سيرين ( مستغربة ) : عنجد شو جاب سيرتها ؟ انت حاطها ببالك احد الخيارات يعني ؟

امجد : عندك مانع يعني ؟

سيرين ( مرتبكة ) : لا لا مو هيك قصدي

منى : والله ما بنلاقي لا احلى ولا احسن ( تنهدت ) ياريت يوافقوا

انس : لسا شعرها طويل ؟

سيرين : اه لسا ههههه

انس ( بلا مبالاة ) : لا ما بدي شعرها طويل بتدايق منه

سيرين : على فكرة مو اختلاف الشعر لانه الطويل بنقصه والقصير بطول يعني حتى اللون برضو مو اختلاف، انت شو اللي بريحك بالزواج تكون دارسة طب متلك وموظفة ؟ او بدك وظيفة تانية مثلا لانه اكيد الطبيبة وضعها صعب بكون مع بيت وأطفال .. كيف تفكيرها مين أهلها شو عيلتها ؟

امجد ( بمسخرة ) : بنقدملك اخصائية الزواج والحياة الاسرية، بكالوريس من جامعة مها

ياسمين ( اجت فجاة ) / الجميع : ههههههههههههههه

نهى : اهلا اهلا، هي اجت بنت مها بتكمل معها

ياسمين ( بتسلم عليهم ) : انا شهادتي مزعتها من ورا ابنك حاليا بطلع وحدة جديدة

امجد : مو نافع معه اشي لا تحاولي

ياسمين ( مطنشة ) : شو هالزيارة الفجائية والله فرحتوني انا وحماتي ههههه

امجد ( بلع ريقه ) : …

منى : فعلا زيارة حلوة متلهم

يحيى : كيفك تيتا كيف صحتك ؟

نهى ( بتبوس فيه ) : مشتاقتلك كتير والله، كيفك انت وكيف دروسك ؟

يحيى : كل اشي تمام، عمتو سيرين نورتي

سيرين ( ضمته ) : يا بي روح عمتك انت والله ما في نور من بعدك

يحيى ( بفضول ) : وخالتو ديمة كمان جاي ؟

انس : يا ريت والله زمان ما ضحكنا صراحة

سيرين : كل هالضحك وزمان ما ضحكنا ؟

امجد : صراحة ديمة الضحك معها اله نكهة أخرى، المسكينة ما بكون قصدها بس عمايلها نهفة

سيرين : بعد كل اللي مرقنا فيه ديمة تحولت للنكد عنوان

ياسمين ( بحزن ) : واخوها رماد ماشي على الارض

امجد / انس ( بحسرة ) : اه والله قصي رماد

نهى : خلينا نحكي لسهى تجيب ريم وتيجي تغير جو بما انه اليوم السبت ومعطلين المدارس

يحيى : وتجيب خالتو ديمة يا تيتا احكيلهم

منى ( كاتمة ضحكتها ) : ساكنة بعيد عنهم ما بتقدر تيجي معهم

يحيى ( بذكاء ) : بروح انا وعمو انس نجيبهم

سيرين : ماما لو سمحتي قلتلك بلاها الاجتماعات بعدنا ما طلعنا من مصيبتنا

منى : يا لطيف فاولتي علينا بمصيبة .. اسكتي خليها تحكي معها

ياسمين / سيرين ( بتطلعوا ببعض ) : …

 

////

 

ريم ( ضامة وليد بقوة ) : دخيل قلبك شو اشتقتلك واشتقت لريحتك الحلوة

سهى : الحمدلله .. ما قدرت ما اجيكي لو حكيتلك بتتلبكي باولادك قلت انا اخف

ريم : خير ما عملتي ماما ربي يهدي بالك واشوفك بتضحكي دايما

سهى : جميعا يا امي، ما بضحك غير لما اشوفكم باحسن حال خبيت عن قصي قلت بعمله مفاجاة

ريم : سالك عنه ؟

سهى : اه صار يعرف يحكي يا حبيبي اسم الله عليه

مهند : ماما معلش أطول القطار نلعب انا ووليد ؟

ريم : اه ماما طول والعب متل ما بدكم

سلمى : انا كتير مبسوطة تيتا، اشتقناله لوليد

سهى : الله يبسطك ويبعد عنك كل هم

مصطفى : تيتا تيتا موبايلك برن .. تيتا ام علاء الو ؟

ريم : هههههه ريسبشن

نهى : اهلا حبيبي وين تيتا انتوا عندها ؟

سهى ( اخدت منه الموبايل ) : في ناس ترد عني حبيبتي شو مفكرة انتي هههههه

نهى : حبايبي هاتيهم وتعالي انتي وريم انا عند منى ومعي سيرين كمان

ريم : يا عيني يا عيني بدها لمة والله

سيرين : اه بدها والله بتعرفي النا بخت باللمات وهيكا هههههه

ريم : خلص هينا جايين بس اعطوني عشر ساعات اجهز واجي

منى : عشر دقايق بعدين بروح عليكي الأشياء الزاكية

سهى : ههههه انا ماسكة التلفون عالفاضي الكل حكى ما عداي، يمكن صعب نيجي والله خلوها لغير مرة

انس : امانة تيجي خالتي فرصة اني معطل اليوم وتشوفيني

سهى : اشتقتلك والله خلص هيني جاي

منى / نهى : يوووه ما حدا قده

يحيى : واحكي لخالتو ديمة تيجي كمان

عمرو : اه اه بدنا ماهر ومراد وتكمل الشلة مع مصطفى واحلى مباراة

سهى : يا فرحتي .. خلص بنحكيلها وبنشوف

 

////

 

ريان : ماما نفسي بهاي اللعبة كل اصحابي عندهم متلها

مها : طيب بشتريلك إياها بعيد ميلادك

امير : يعني عندك احسن واحلى منها لشو الفزلكة اشتري اشي مهم اكثر

اسيل : يسعدلي اللي ما بحب الفزلكة متل ابن خالته

فرح ( كاتمة ضحكتها ) : أي واحد ؟

اسيل ( بهمس ) : اللي بالي بالك

مها : حكتيله انه اجاكي عريس مبارح ؟

اسيل : اكيد لا .. بعدين ما بنتواصل

فرح : على سيرة العرسان صاحبتي حاكية عني لاخوها ماما احكيلهم يتفضلوا

مها ( رافعة راسها للسما ) : يا رب يا كريم .. اه اه ابعتي قصدي خليهم يجوا

اسيل : ههههههههههه

فرح ( قلبت شفايفها ) : خلص ما بدي

امير : ماما بدها تخلص منك فروحة عاد والله رح ازعل لو تزوجتي، بس اسيل عن مين قصدك ؟

اسيل ( مرتبكة ) : ولا عن حدا حبيبي امشي انت وريان يلا هينا وراكم

مها : ياسمين بترن .. الو ؟

 

////

 

امجد : كممممملت الشلة .. هلا وغلا

سيرين : وين مرته هاد ؟

منى : عند أهلها يا حبيبتي راحت عالدكتور تفحص مبارح مع أمها وبشرونا وخلوها عندهم نقاهة كم يوم

امجد ( فاهم عليها ) : بتعرفي حفيدهم على الطريق ولازمه دلال

نهى ( مستغربة ) : مبارح الجمعة في فحوصات ؟

منى : لا اليوم فحصت بس من مبارح وداها

ياسمين : هي ماما جاي كمان طالعين على السوق

نهى : مين ومين ؟

ياسمين : هي وخواتي واخواني، شمة هوا احتفالا بانتهاء امتحانات فرح

انس ( بضحك ) : الله اكبر ! عمره ما مرق عليي امتحانات بالطب بتخلص الا عند فرح

امجد : حلو لقينا موضوع ننكش مخنا عليه اليوم

سيرين : انا مروحة باي

الجميع : ههههههههه

منى : شو يا سيرين يلا شدي حيلك واحملي طولتي خالتو

سيرين : ….

نهى ( بلعت ريقها ) : زوجها ما بده ولسا صغيرة لقدام شوي ان شاءالله

ياسمين : الله كريم

انس : اولادك بجننوا ربنا يحفظلك إياهم، وان شاءالله اسيل تتخصص نسائية وتوليد مثل ما بدها وبتحملي مشان تتدرب عليكي هههههه

منى / نهى ( مع بعض ) : يارب

سيرين ( مبتسمة ) : ويحفظك يارب عقبال ما نشوفلك

 

////

 

ما صدقت اللي حكتلي إياه امي، بركان وولع براسي ركبت سيارتي وطرت عندها ..

 

عمر ( فتحت الباب بغضب عليها ) : صحيتي على حالك يا …

 

لقيتها منكمشة على حالها وغرقانة بدموعها، عيونها مو مبينات من كثر العياط ..

رفعت راسها لما نقزت من دخلتي عليها، سحبت نفس غميق وغمضت عيونها ورجعت دفنت راسها بين ركبها ..

 

عمر : ليه يا غنى ؟ ليه تعملي هيك فينا وفي حالك .. حتى لو حدا حكالك تعملي اشي ما بسمع وبنفذ بدون تفكير .. درسناكي وعلمناكي حتى يكون الك شخصية وكيان حتى تقدري تواجهي مشاكلك وتحليهم بفطنة وعقلانية وان صعب عليكي امر احنا حواليكي

غنى ( منهارة ) : …

عمر : كنت جاي ادفنك بسابع ارض على اللي عملتيه، حرقتي قلب قصي وأهله على شوفة ابنهم اللي ما اله ذنب، والله لو انه زوجك مو ابن حلال الا خلاكي تنامي على عتبات المحاكم، ضيعتي من عمرك شهور على موقف كان لازم تكتبيه وتعلقيه على مراية تسريحتك وتتعلمي منه مو تتركيه يمرق مرور الكرام

غنى ( ضمتني بقوة وبتبكي ) : عمممممررررر شو اعمل هلا ؟ بحياتي ما تخيلت تصيبني هيك خيبة وخذلان من وحدة كانت اقرب الي من أي حدا تاني

عمر : لا تخافي كله بتصلح برويّة وهدوء، والكلام اللي حكالك إياه عدي بهداك اليوم اجا وقت وتتحققي من صحته وتكشفي المحيط اللي حواليكي

غنى ( بقهر ) : خربت بيتي رسمياً .. خربت بيتي وضيعتني والكم يوم حلوين اللي عشتهم مع قصي نستّه إياهم وخلّت ما اله نفس يتطلع فيي

عمر ( بهز راسي بالنفي ) : أبداً، الزواج اكبر من هيك بكثير .. انا وآيات مرقنا بظروف صعبة بس اكيد تحديناها ونسينا كل اشي وقررنا نثبت للكل انه بنحب بعض وحياتنا من احلى ما يكون .. لو بدي اضل أتذكر عمايلها ما بعيش معها يوم

غنى : … لساتك زعلان مني ؟

 

فكرت كثير بكلامنا وكل اشي صار بالفترة الأخيرة، ما حدا فينا كان غلطان لحاله الكل غلط وكان اله ايد لو بكلمة ..

 

عمر : ما في اخ بحب اخته وبزعل منها، يمكن احنا علينا خطا من البداية كنا نخاف عليكي ونفكر انه اتضلي حوالينا وقدام عيونا احسن ما تشوفي ناس برا وضليتي مرتبطة ببيان لانه برضو أهلها خايفين عليها اكثر بس الفرق كان انه انتي ما في حدا بشجعك على الغلط ولما تغلطي ما كانت تنبهك لانها بكل بساطة ما بدها حدا احسن منها

غنى : صح، بس برضو كل بنات العيلة كنا صاحبات، ليه طلعنا مختلفات ؟ قصدي فجاة صحبتنا ومحبتنا تغيرت

عمر : الشخصية الحقيقية لكل وحدة فيكم بانت مع الظروف اللي عاشتها، والحياة بتغيّر يختي ما حدا بضل مثل ما هو الا ربنا

غنى ( برضا ) : الله يهدينا ويشغلنا باللي فيه منفعة النا ويبعدنا عن طريق الضياع، لازم اتواصل مع قصي واعتزر منه وهيك بكون عملت اللي عليي

عمر : مو غلط، حاولي معه وان شاءالله بتوصلي لنتيجة ومتأكد انه ما رح يخذلك

غنى : اكتر من اللي انا فيه ما اتخيل أوصل، شو ما يعمل بكون معه حق

 

////

 

علاء ( مستغرب ) : ما فهمت وين رايحين ؟ بعدني ما لحقت اطلع مشواري

ريم ( بتضحك ) : صارت أشياء ومفاجآت حلوة بهالكم دقيقة، الحقنا على بيت خالتو منى امك وسيرين هناك كمان

علاء ( بحك شعري ) : انا اللي بلحق، خلص الله يسهل عليكي ديري بالك حبيبتي

ريم : هههه حاضر

علاء : نفسي افهم ليه بتضحكي ؟

ريم : هههههههه سلامتك باي

 

حدا يلحقني بقاموس النسوان قبل ما انجن، شو بصير فجأة ؟ ..

 

////

 

عدي ( بأسف ) : لا حول ولا قوة الا بالله .. حسبنا الله ونعم الوكيل

عمر : … معك حق خلص الحكي

عدي ( مقهور ) : حرام عليهم والله حرام خراب البيت صار لهالدرجة سهل عند الناس ؟ شو عملنالهم احنا ؟

عمر : ما لازم تمرق على خير عدي، ليه دايما بنسكت احنا ؟ وقال امي موصية عمتك ما تجيب سيرة خايفة تخرب بيت سلفتها

عدي : بدون ما تخرب بيتها بس لازم تاخد جزاتها ونفرجيها انه الغلط معنا اله حسابه

عمر : يا عيني عليك .. بنتواصل ان شاءالله اليوم بدي اشوف قصي من زمان ما شفته

عدي : ايييييه شو بصير فينا ؟ .. ماشي عمورة الله معك ديمة بترن عليي

ديمة : مشغول ؟

عدي : كان عمر عالخط .. كيفك ؟

ديمة : والله ما بعرف شو احكيلك قال ماما وريم محضرينلي مفاجئة ورايحات عند خالتو منى كل خالاتي متجمعات بالصدفة وسيرين وياسمين حابين اجي

عدي ( مبتسم ) : تمام وخديلك كم شغلة بطريقك، واهم اشي حصنوا حالكم ههههه

ديمة ( بفرح ) : اه والله لازمنا تحصينة، اوك بيبي يعطيك العافية

عدي ( برومنسية قبل ما تسكر الخط ) : ديمة

ديمة : نعم ؟

عدي : بحبك

ديمة ( بخجل ) : وانا كمان بعشقك وبموت فيك

 

////

 

اسيل ( متوترة ) : بوصلك وبروح انا وفرح بلاها جيتنا

مها ( بحزم ) : اليوم بدنا نروح وبدنا ننبسط وبدي اقلع عيون أي حدا بحكي عن بناتي مشكلجيات، فرجوني كيف بتكونوا متل ما ربيتكم

امير : وانا هيك رأيي خلص بنضل ساكتين وما بنتدخل بحدا

فرح ( كاتمة ضحكتها ) : من ناحيتي رح اضل ساكتة امير وانت اقعد جنبي

امير : انا ما بقعد حبيبتي بكون مع الشباب بس انه بضل ساكت يعني ما بحكي كلام ما اله داعي وانتوا هيك كمان

مها ( مبسوطة ) : الهي يرضى عليك ويسعدك متل ما اسعدتني بكلامك، امشوا يلا

ريان ( بدعي ) : يا رب ما تيجي آيات

مها / اسيل / فرح : هههههههه امين

 

////

 

امجد : يمة شو اطبخلك بما اني قاعد وما على قلبي هم

الجميع : هههههههه

منى : بدنا اكلة مرتبة لهالضيوف الحلوين

نهى : والله مو جاية على غدا، اطبخي طبختك واحنا ما رح نطول أصلا

ياسمين : انا لسا ما طبخت كمان .. سيرين اخوكي اليوم طالب اكلة صعبة تفضلي قدامي

منى : صار عندي فضول اعرف شو طابخة ؟

ياسمين : من زمان ما اكل جاج محشي

نهى : والله زاكية واحمد بحبها فعلا، هاتي خلينا نساعدك

سيرين ( بتضحك ) : ماما تحمست طبعا عشان اكلة ابنها المفضلة، خليكي قاعدة حبيبتي مرته بتعملها

امجد ( بنفض بايديه وعامل حاله خايف) : يمة يمة بدها تاكلها

ياسمين : شو رايكم نعملها اكلة للجميع ؟

منى : قوم يا امجد اشتريلنا بنكون بدينا بالتحضير

سيرين : انا برايي بلاش أشياء بدها تتبيل وبتاخد وقت، نفس الجاجات قطعيهم واعمليهم ملوخية

امجد : استغفر الله العظيم، بنحكيلك جوزها بده جاج محشي انتي شو دخلك ؟

سيرين : انت ليه مقهور ؟ روح عند دار حماك ريحنا منك

نهى ( عصبت ) : سيرين !! ولا كلمة بدي اسمع خلص مو أطفال احنا كيف بتحكي معه هيك ؟

منى : انتي التانية اتركيهم طول عمرهم هيك، سهى ومها اكيد قربوا يوصلوا .. رتبلي هالصالون يا انس

ياسمين : هيني برتب خالتو خلص خلي امجد وانس يروحوا على غرفتهم

انس ( بخبث ) : خالتي سهى جاي عشاني ها

ياسمين : … طيب

امجد : معقول ديمة جاي ؟ لو رحت اجيبها احسن

سيرين ( بثقة ) : ما بتركب معك ويفضل انك تختفي بس يجوا ديمة وريم

منى : شو دخله ؟

امجد : نسيتي مين مرتي ؟ عدوة العيلة اللدودة اللي ما خلت واحد مرتاح

نهى ( بحسرة ) : يا خسارة كل ما نشوف حالنا انبسطنا شوي بنحسد حالنا

 

////

 

صفيت السيارة على مضض وانا بدعي يمضي هاليوم على خير، ومن كتر ما حظي بفلق الصخر لقيته كمان معطل ..

ما لحقنا ننزل الا تكسي بتطلع منه خالتو سهى وريم وأولادها، التقينا فيهم وسلمنا على بعض قبل ما ندق بيت خالتو منى ..

 

مها ( نزلوا دموعها ) : يا عمري يا روحي دخيل قلبه شو هالمفاجاة يا سهى وين قصي عنكم ؟

ريم : ههههه خالتو يسعدك والله لسا ما خبرناه مخلينه مفاجأة

سهى : يا حبيبي سال عن ابوه اول ما وصلني

ريان : اشتقنالك وليد حبيبي

امير : كيفك خالتو ؟ مبارك رجعة وليد عندك فرحتلك انتي وقصي

سهى : مشتاقة والله يرضى عليك ويفرحنا فيك انت واخوك يا حبيب خالاتك انت

مها : يلا رنوا يا بنات

ريم : ديمة بتكون بتركض جوا التكسي عشان تلحق توصل هههههه برضو ما حكينالها

فرح : أصلا اليوم من الصبح كان بجنن

سلمى : وانتي بتجنني فرح

فرح ( قرصت خدودها ) : يسعدهاااا سوسو ولك ما حدا بجنن قدك هون دخيل هالشعرات والعيون والتم والانف وكل اشي يا ناس يممممة نياااااله

ريم / اسيل : هههههههه خلص اسكتي

 

نهى ( دمعوا عيونها ) : للللللللللييييييش

امجد / انس / ياسمين / سيرين ( اتطلعوا ببعض ) : وليد !!!!

 

ركض عليه امجد وحمله وضمه بقوة كانه ابنه، كان ببوس فيه بلهفة ..

 

ريم ( سحبته بقوة ) : اعطيني إياه لو سمحت

امجد ( برجف ) : ليه ؟

ريم ( زورته ) : ما دخلك ما بدي احكيلك

منى ( بتلطف الجو ) : يا مية اهلا وسهلا بخواتي وبناتهم وكنانينهم واولادهم نورتوا نورتوا يا حبايبي

الجميع : اهلين فيكي

انس : منورة طالبة الطب الوحيدة بالعالم اللي امتحاناتها بتخلص

اسيل ( كاتمة ضحكتي ) : ….

فرح : ليه الوحيدة ؟ عادي كل الناس بتخلص امتحانات بفترة معينة بس الدراسة ما بتخلص، وارحمني يا نيرد زمانك انت واختي ما حدا درس طب غيركم احفاد ابن سينا

الجميع : ههههههههههههههه

ياسمين ( بضحك ) : قولتك والله نيردات زمانهم .. المهم بشو احتفلتوا اليوم ؟ ليكون اكلتوا كنافة من غيري

ريم : الكنافة المزبوطة ان شاءالله بتخرجها، اليوم جبنالكم أشياء تانية نحتفل معكم

نهى : هاتي خبرينا شوصار ؟ مين جابه ومتى ؟

سهى : جابته أمها وقالت خلوه كم يوم عندكم

سيرين : شكلهم زهقوا منه ههههه

ريم : ماما قالتلها لو كملت السنة وما رجعت لحالها على بيتها بجوزه ست ستها وقد اعذر من انذر

 

قعدت على كرسي بعيد عن الجلسة، وكملوا احاديثهم وانا عملت حالي ملتهية بالصغار وبلعب تولين ووليد بما انهم بنفس العمر ..

 

مها : وين مرتك ؟

امجد : عند أهلها من مبارح .. باركيلي محمود على الطريق

مها ( قالبة وجهها ) : لابقلها بنت ليلى ولد من أولها وبتسميه على اسم ابوها

منى / نهى : هههههه

امجد : ههههه هاد اللي اجاكي معلش افرحي لابن منى حبيبتك سيبك من بنت ليلى

سهى : …

سيرين : خالتو سهى في جواهر بتمك انطقي اطربينا

ريم : محلفة يمين ما تنطق، بدي اشوف لمتى رح اتضل ساكتة قبل ما انفجر انا

نهى : اهدي خالتو صدقيني ما في غش بضل مخبى كله بنكشف بس بوقته المناسب

ياسمين : يسعدها حماتي اللي بدها تتبل الجاج اليوم وتحكي انه ياسمين تبلتها

ريم / سيرين / فرح : هههههههه نصابة

سهى : ومتى فحصت اليوم ؟ وبدونك ؟

امجد ( مستغرب ) : اه اليوم، انا ما بروح على فحوصاتها يمكن مرة وحدة رحت ليه ؟

سهى ( بحقد ) : وصدقت كلامهم ؟ بلكي بنت واستغلت انك مو سائل بس عشان اتدللها

امجد ( باستنكار ) : يعني لو فيها بنت بدي اموتها من الجوع ؟

منى : اكيد لا، بس همة هيك بفكروا ولقتها فرصة ترجع علاقتها معك بعد اللي صار

مها ( مستغربة ) : انت وبيان يعني مختلفين ؟

امجد : بدك اضل طبيعي بعد ما انخرب بيت اعز الناس عندي وبسبب مرتي ؟ شو رايك خالتي اضل نايم مثلا واتركها براحتها ( بجدية ومكشر ) اكيد بنفس اليوم اكلت اللي فيه النصيب مني ولليوم ما بتقدر ترفع عيونها بعيوني

سيرين / ياسمين ( بهمس ) : ياااي ! رجال تئبرها شو رجال

فرح ( بتضحك بهمس ) : ههههههه

 

يحيى ( جاي يركض من برا ) : اجت خالتو ديمة وهييييييييي

الجميع : هييييييي يا سلااااام

ياسمين : ابني شعوره متل شعور ابوه لما كانت تيجيهم خالته مها وهيييييي

منى : ههههههه

ديمة ( بتدق الباب ) : السلام عليكم

وليد ( ركض عليها ) : عمتي

ديمة ( مصدومة ونزلت لعنده ) : وليد !! ( ضمته بقوة ونزلوا دموعها ) حبيبي اهلا وسهلا اشتقتلك كتير

الجميع : ….

ديمة ( ركضت على أمها ) : حبيبتي ماما فرحتوني والله

سهى ( مسحت دموعها ) : …

 

سلمت عالكل وقعدت جنب ياسمين وسيرين وريم، وكانت لسا مو مستوعبة شوفة ابن اخوها ..

مين كان يتخيل بيوم من الأيام حدا فينا ينحرم من ابنه ومن زوجة من نفس العيلة، ديمة كانت تروح تترجى غنى بس تلمحه وتخبيه وما تبينلها شعرة منه ..

وعدي ما كان يقدر يمون على اخته وبعد عدة محاولات ملوا منها، والحمدلله ما طولت لحتى جابوه بايديهم ..

 

اسيل : كيفك دمدومة ؟

ديمة ( انتبهت عليي ) : حبيبتي اهلا ما تواخذيني ما شفتك

اسيل ( قمت اسلم عليها ) : بسيطة حبيبتي، شو اخبارك ان شاءالله تمام ؟

ديمة : الحمدلله … على كل حال

نهى ( مبتسمة ) : ماشاءالله طول اسيل لازمها عريس طويل متلها ههههه

مها ( كاتمة ضحكتها ) : لا تجيبلي سيرة العرسان هدول التنتين نويت اخللهم خلص

امجد : مع فلفل ولا بدون ؟

فرح : لا انا ما بحب الحار بليز خليني بدون

ياسمين : فاولتي عليهم، شو اخبار عريس مبارح ؟

مها ( غصت واتطلعت عليي ) : أي عريس ؟

ياسمين : شو مالك مو قلتي جايين جماعة ؟

اسيل ( بين اسنانها ) : اه اجوا وروحوا ياسمين .. اختصري

امجد ( ضحكة خبيثة ) : هاد الطويل كثير اللي كنتي تحكي عنه سيرين ؟

اسيل ( بتغير الموضوع ) : كيف دوامك كل متى بتعطل ؟

انس ( ابتسامة عريضة ) : والله حسب الجدول بعطل، بس اغلب الأيام بداوم ليلي

اسيل : الله يعطيك العافية، المهم مرتاح بالتخصص

انس : الحمدلله .. عقبالك

سيرين : الحمدلله تصالحوا اسيل وانس عشان تصيري تجتمعي معنا دكتورة

انس ( مستغرب ) : مين حكالك ؟

امجد ( بمسخرة ) : اكيد غنى

 ديمة ( بتضحك ) : لا آيات أمها قالتلها بعتت انس يلحقها عالسيارة وغنى قالت  شكله ما حدا بعرف لانه بيان ما خبرتني

البنات : هههههههع

اسيل : اه نسينا نخبرها، بس ما تصالحنا ولا بدي اتصالح مو شايفتيني قاعدة بعيد

ياسمين : ريحتونا من مناوشاتكم اللي ما الها طعمة

ريم ( غمزتنا ) : مع انها آيات مو مصدقة بتقول اكيد مسرحية لانه مستحيل انس يزعل اسيل او اسيل تزعل منه بعد كل اشي قدملها إياه

انس ( سحب نفس من سيجارته ) : والله ؟ مستمتعين كثير بالسهرة كاينين، الله يشغلكم باللي ينفعكم اكثر

امجد : شو دخلهم ؟ هدول مستمعات للحكواتي غنى عن لسان الصحفية بيان

منى ( بغضب ) : مكيف على حالك ؟

امجد ( بجدية ) : قلتلك اكلت اللي فيه النصيب وانقهرَت عشان بقلها شو دخل غنى تعرف عن اسيل متى اجت وشو عملت وشو اكلت بتقلي انت زعلان على غنى ولا اسيل ؟

البنات : هههههههه وشو حكتلها ؟

امجد ( مكشر ) : ما دخلكم

 

نهى ( بهمس ) : يا حوينتك يا انس كمان صار يدخن علني

منى ( بهمس ) : بعد ما كشفته ما ضل سبب للتخباية

سهى ( مقهورة ) : من لما أجيت لحد هلا دخن اكتر من امجد شو هاد ؟ شكله مولع فيه مو تسلاية

مها : تسلاية شو انتي التانية ؟

سهى ( بتوشوش ماما ) : عامل حاله مو فارق معه الكلام وقلبه بطقطق عليها

مها : الله يهدي بالهم، شفتيه كيف انحمق بس سالت ياسمين عن العريس واختها ما بدها تحكيله أصلا ولا بتجيبله سيرة وولع السيجارة على طول

سهى : اه لاحظت

 

////

 

علاء ( بمسخرة ) : انا سابقك بقرا التحصينة وبناديك

عدي ( بضحك ) : هههههههه لا تنسى البخور

علاء : اه اهم اشي، من يومها وانا حاطط بكيت بالسيارة أصلا

عدي : هههههه اخ قال بنضحك على شو ما بعرف، الله يهدي البال

علاء : منا هيني بدي اروح اشوف مال مرتي بتضحك

عدي : يمكن عشان وليد اكيد عرفت عنه

علاء : اه اه شكلهم مخبيينه مفاجاة، طيب انتبهوا لتخبروا قصي بالغلط وانا كمان رايح وما بدي احكي لاحمد خليه يشوفني ويتفاجأ

عدي : ماشي يلا اسبقنا واحنا لاحقينك

 

////

 

قصي ( بقرف ) : شو قصتك اليوم بترني كثير خير ؟

غنى ( متوترة ) : ببعتلك واتس ما بترد اسفة ازعجتك

قصي : ما بدي اسمع اعتذارات خير ليه بتبعتي ؟ مو فاضي اشوف

غنى ( بغصة ) : ماما اخدت وليد لبيت اهلك

قصي ( متفاجأ ) : شو بتحكي ؟ متى ؟ ما حدا خبرني

غنى : يمكن حابين يفاجئوك، لانه الموضوع صار بالصدفة

قصي ( تنهد ) : انتي وين ؟

 

حكتلي غنى كل اشي صار معها، وعبرت عن ندمها وأسفها واعترفت بانها انخذلت من اشخاص ما توقعتهم ..

 

قصي ( بغضب ) : بعد شو ؟ مفكرة اللي عملتيه بروح بكلمة آسفة ؟  انا كرهتك هسة اكثر من قبل، كرهت كل العيلة بعد اللي عملتيه فيي وباهلي اللي ما اذنبوا معك باشي خلي مرت عمك تنفعك

غنى ( بألم ) : … كلامك كله صح بس ما حدا فينا معصوم عن الخطأ ليه ما نعطي حالنا فرصة ؟

قصي ( بحزم ) : انا حكيت كلمتي لابوكي يوم ما وديتك عندهم ولساتني عندها

غنى : بس امك قالت انه ازا ما رجعت رح تجوزك

قصي : هالمرة اختلف كل اشي، لا امي ولا أي حدا بالدنيا بجبرني على اشي .. خليني هيك ملك زماني يضرب الزواج عاللي بتزوج .. عن اذنك اجاني شغل

 

////

 

كل يوم سبت بكون شغلي خفيف وبرجع بدري على البيت، وبما انها مرتي عامليتلي جاجة محشية اليوم واكيد جنبها شغلات زاكية مثلها فلازم أوصل قبل ما تبرد ..

 

هيثم : مرحبا أبو يحيى

احمد ( بضحك ) : هلا والله شو هالاتصال الحلو

هيثم : ما حدا بسال عني حكيت خيركم من يبدا بالسلام

احمد : الله يسامحك مين كل يوم ببعثلك صباحو ؟

هيثم : يسعدلي صباحك والله نيالي .. المهم عاوزك بشغلة

احمد : بتؤمر سيد راسي

 

////

 

ريم : يا عيني ريحة التتبيلة خالتو وصلت لاخر الشارع

سيرين : الله يستر ما يلتموا علينا الجيران

امجد : احسن ما سيرين المفجوعة تموت من الجوع

ياسمين : الجاج المحشي من تحت ايدين ياسمين غير شكل .. احفظوا هالجملة منيح يستر عليكم

امير : ليه ؟

انس ( بضحك ) : عشان احمد ينبسط ويحكي عنها بتعرف تعمل جاج محشي زاكي

منى ( متدايقة ) : نفسي افهم مالكم ملتمين بالمطبخ مو عارفة اشتغل اشي

ديمة : احنا اليوم جايين نشتغل عنك انتي ارتاحي

امجد ( بمسخرة ) : يا عفو الله ! فوق ما همة عزموا حالهم خاوة كمان بتحملنا جميلة انها بدها تساعدنا

ياسمين ( عصبت ) : مين اللي عزم حاله ؟ امجد !

منى : والله نسيت احكي لآيات من عجقتي هلا بتزعل

سيرين ( تشردقت بالمي ) : كح كح كح

نهى : احكيلها .. بعد الاكل ما جهز أصلا

 

منى ( مقهورة ) : بعرف ما حدا بده إياها

انس ( بهمس ) : معهم حق خلص اليوم ضيوفك واجوا يشوفوكي بدون سمة بدن خليكي مبسوطة معهم

منى : بس بنتي أولى الناس تيجي بيت ابوها هاد

انس : ما اختلفنا بس بتعرفي قعدتها كلها سمة بدن، وفوق كل هاد اسيل موجودة ماما لو سمحتي ما بدنا آيات

منى ( تنهدت ) : عشانك وعشان اسيل ما رح احكي معها، خلص ماشي ماما تكرم عينك

انس ( مبتسم ) : يطولي عمرك يارب وما يحرمني اياكي

منى ( شدتني من ايدي ) : ليه مهتم باسيل ؟ يعني فارق معك كثير انه آيات ما تزعلها !

انس ( مرتبك ) : مو مهتم مثل ما بتفكري، بس ما حبيت كلمتها اللي حكتها للبنات انه بنمثل وكذابين .. حابب اتفاهم معها اول واوضحلها انه ما في اشي كذب

منى ( بلعت ريقها ) : بدي منك تفكر بشكل جدي بهالبنت، اختبرها وشوفها ازا بتناسبك مشان ابوك يحكي مع زوج خالتك

انس ( مصدوم ) : ما فهمت ؟

منى ( بحسرة ) : لو الف بيوت البلد ما بلاقي متلها ولا متل أهلها، بعرف انه غلطي صعب يمحوه من ذاكرتهم بس ابوك وعدني يحاول مشانك

انس ( دمعوا عيوني ) : شكرا لانكم بتفكروا فيي قبل ما تفكروا بحالكم .. ان شاءالله بصير خير

 

////

 

وصلت بيت خالتي وكانت الأصوات اعلى من أي جرس، واساسا ما في داعي للجرس والصغار ماشاءالله فايتين طالعين وبلعبوا وما حدا قدهم والباب ما بتسكر ..

الله يجمعهم دايما ويبعد عنهم الهموم، تذكرت كيف كنا زمان نجتمع ونلعب وما في حدا بقلبه ذرة حقد على الثاني واكبر همنا نفوز بالمباراة او باللعبة اللي شاغلتنا ..

 

علاء ( ابتسامة عريضة وماسك الورقة وبعلقها على الباب ) : تحصنت بالله الذي لا إله إلا هو، إلهي وإله كل شيء، واعتصمت بربي ورب كل شيء، وتوكلت على الحي الذي لا يموت، واستدفعت الشر بلا حول ولا قوة إلا بالله، حسبنا الله ونعم الوكيل .. وبنقول السلام عليكم

الجميع ( مبتسمين ) : امين .. وعليكم السلام

علاء ( اجت عيني على وليد اللي فكروني ما بعرف عنه ) : يسعده اللي جمعنا اليوم وفرجانا ضحكات الغوالي .. ( سلمت على خالتي سهى وضميتها بقوة ) يهنيكي بشوفته وان شالله ما بتنحرمي منه

سهى : حبيبي يرضى عليك

ريم ( فتح عيونها ) : انت بتعرف ؟

علاء : عدي خبرني

ديمة : وليه ما حكالي ؟

علاء : ما حب يخرب عليكي المفاجاة

ديمة : عشان هيك حكالي روحي وخدي معك اشي قصده حلوان

سيرين : ما قصرتي بنت خالتي انتي وزوجك يسعدهم الزوجين المثاليين

نهى : عيونها قلبوا قلوب حب هههههه

ديمة ( بخجل ) : اتركوني بحالي

ياسمين : ههههههه مع اقتراب أعياد زواجنا الرومنسية اعلى مستوياتها

سيرين : كان المفروض انزل على السوق اشتريله هدية اليوم وتفضلي حماتك شو عملت ؟ خربتلي كل مخططاتي

ريم : بعد الغدا بنوديكي وين ما بدك كله ولا الهدية

ديمة : انا وصيلته اون لاين اضمن لانه ما بصحلي انزل على السوق بدونه

علاء ( بهمس ) : فرجيني إياها اشوف قبل ما توصله وتتورطي

امجد / انس : هههههههههههه شفتي سيرين ليه الضحك مع ديمة غير

احمد ( بقرا بدعاء التحصين وبضحك ) : بتذكر الأردن كلها كانت تقراه أيام الكورونا، شو بتسووا هون انتوا ؟

الجميع ( لفوا وجههم على الصوت ) : هههههههه

ياسمين : يعطيك العافية

احمد ( حضنها من الجنب وباس خدها ) : يعافي عمرك يا عمري انتي .. هيني رجعتلك بكير احسن ما تحكيلي برد الاكل

منى : والله لسا الاكل بالفرن هلا بتاكله وهو سخن

احمد ( بسلم عليي بحرارة ) : شو هاليوم الحلو اهلا وسهلا منيح اللي روحت بدري ولحقتكم

علاء : هلا فيك ولا يهمك لو تاخرت بستناك ولو

احمد ( مستغرب ) : هاد وليد ؟ صح

سهى ( مبتسمة ) : صح

 

قرب منه وحمله وضمه بقوة، بوسه على خدوده ونزله وقرب من خالتي يسلم عليها ..

 

احمد ( بحنية ) : ما يحرمك منه ولا من ابوه، الحمدلله شفناكي بتضحكي من جديد

سهى ( نزلوا دموعها ) : حنيتكم ما الها وصف نسيتوني همي والله، امجد وانس وامير وعلاء واحمد كلهم متل قصي عندي

مها ( بتمسحلها دموعها ) : خلص من لما اجيتي وانتي تعيطي، حكينا بدنا ننبسط

ريان : وانا ؟

نهى ( ضمته ) : انت عمري يسعد هالوجه الحلو

علاء ( بغني ) : وسيبي شباكك مفتوح ليه تقفليه ههههههههه

سيرين : اه طبعا ريان وامير عنا غير شكل صح ريم ؟

ريم : اخ على هداك اليوم

علاء ( زورها ) : نعم ؟ أي يوم !

البنات : ههههههههه علقتي ريم

احمد ( بدور وجهه ) : وين ستي ؟ ما اجت

منى : ييييي علينا والله العظيم ما خططنا ولا وعينا على حالنا

نهى : ستك بنروحلها كلنا بيوم تاني

تولين ( شافت ابوها من بعيد وركضت عليه ) : بابا بابا

احمد ( فتحلها ايديه وحملها ) : يا روح بابا شو هاد مبسوطة بصحباتك وما شفتيني يا زعرة ؟

سلمى ( اجت من برا ) : عمو احمد متى إجيت ( ضمته ) اشتقتلك كوميات

ليليان ( هجمت على احمد ) : خالو حبيبي انا هون

احمد ( حضنهم التنتين ) : احلى بنوتات بالدنيا شو هالحلاوة ؟ اكلكم ولا اتغدى اول ؟

يحيى : ونايا بدها تسلم عليك بابا

ياسمين / ديمة : ههههههههه

احمد ( التفت حواليه وشافها وحملها مع تولين ) : يا اهلا وسهلا بنيوشة الحلوة

سلمى : زمان عنك عمو من لما روحت من عنا وانت زعلان وانا متدايقة مشانك وكل يوم قبل ما انام بدعيلك

ليليان : وانا كمان خالو بحبك كتير وبحب اشوفك مبسوط وبتضحك دايما

نهى / مها : منيح اللي سلمت على ياسمين اول وحدة كان ما اجاها دور

منى : ماشاءالله شو هاد ؟ غلبت خالك هيثم

علاء : بلا هيثم بلا بطيخ احمد غير خالتي، حتى انا كمان شوي بدي اهجم عليه من كثر ما اشتقتله، بقول لعدي رايح اعمله مفاجأة بدل هداك اليوم

ريم : كش برا وبعيد خلص ما حدا يتزكر

سيرين : فعلا خلينا رايقين

احمد : الله يسعدكم ويديم علينا الأيام الرايقة

 

////

 

احمد ( عيوني على خالتي نهى وبضحك ) : يسلم ايديكي بشهي

نهى ( غصت ) : وايديك

منى : جاجات ياسمين الزاكيات يسلم ايديها

علاء ( عيونه عليي ) : ياسمين !

احمد : لو كل الدنيا  تحلف ما بصدق، نكهة خالتي نهى مميزة وبفرقها عن دون النكهات كلهم

منى / سهى / مها : هههههههه ما اقواك

ياسمين : اه والله يسلم ايديها، يعني ما في مجال نغش حتى انا صعب اقتنع اني عملته

البنات : ههههههههه

علاء : يعطيكم العافية جميعا والله سفرة بتفتح النفس صراحة اليوم احمد بنقدر ننزل بوست انه حماواتنا بحبونا وبقوة

مها ( ضربته على رقبته ) : لسا ما تاكدتوا ؟

علاء ( غص من حم الكف ) : هداك نسيبك اتركيني لحماتي مشان الله

سهى : انا واياها واحد، بعدين صح كلامها

نهى : اتفقتي على ابني انتي واياها ؟

سيرين : دقيقة ارجع اقرا الدعاء شايفة ابليس بحوم بين الكراسي

الجميع : هههههههههه

 

هالسفرة والقعدة الحلوة، لازمها فنجان قهوة وسيجارة وقعدة رواق مع اختي اللي بتحمل كل معاني الاخوة بقلبها، واللي ما بمل من الحديث معها ..

 

احمد ( شديتها لعندي من خصرها وبستها على راسها ) : اشتقتلك يا بنت وين ما بتبيني ؟

سيرين ( خجلت وبعدت حالها شوي ) : والله ما بحب اتقل دمي كتير، بعدين شغل مدرسة وولاد والله مو صاحية على حالي

احمد : شو القصة كيف رجع وليد ؟

سيرين : ما رجع بس جابته مرت خالك

احمد ( تنهدت ) : اااخ اخوالي .. والله ما بعرف العيب فيهم ولا بنسوانهم ولا بحظهم المهم ولا واحد فيهم حياته مزبوطة

 

////

 

لمحتهم من بعيد ولفتت نظري قعدتهم، غمضت عيوني وغيرت قعدتي مشان ما اضل اشوفهم ..

بحاول اتعايش مع هالوضع من سنين، بس لسا بتصيبني غصة وبوصل مرحلة اني انفجر بس برجع اتمالك غيرتي واكبحها قد ما اقدر؛ لاني مؤمنة باخلاق احمد وصلاحه ومتاكد لو حس انه سيرين عندها خطا ما رح يسكتلها ..

 

اسيل ( بهمس ) : انا لازم اروح ياسمين

ياسمين ( نقزت ) : اوك حبيبتي الله معك بس خلي ماما ممكن ؟

اسيل ( بهمس ) : افهمي عليي انس بده يحكي معي بس مو ملاقيين مكان مناسب، بدي اتحجج بالترويحة مشان انتي تعزمي على ماما وتخليها ومعها فرح واخواني

ياسمين ( مستغربة ) : مو قلتي ما بتتواصلوا ؟

اسيل ( عصبت ) : مو حضرتك جبتي سيرة العريس معناها بدك تتحملي غيرته حضرتك

ياسمين : ههههه اوك بتؤمري يا عسل

 

////

 

يا فرحتي بهالمشهد اللي صار، قاعدة مقابيلنا وعيونها علينا واحمد مو منتبه، واكيد هلا بتكون بتتحلفلي..

 

سيرين ( قمت من جنبه ) : كلهم متل زينة بس بوجوه مختلفة، ولا وحدة فيهم قصرت ماشاءالله عمايل ما انزل الله بها من سلطان

احمد : صحيح .. ابتلاء من ربنا لسيدي وستي

سيرين : مساكين والله ساكتين مشان أولادهم، طول عمرهم حكيمين وما بحبوا المشاكل بس في ناس زادت عن حدها

احمد ( بهز راسه ) : قولتك طفح الكيل، بس عدي غصة بقلبي والله يا سيرين هالشب ما عليه العيب ربي يسعده وين ما لف وجهه

 

__________________________________________________________________

 

بعد عدة ساعات >>

 

قصي ( بلهفة ) : بابا انت وين ؟

أبو قصي ( متوتر ) : عند خالتك ام احمد بس هينا مروحين

قصي : لا تروحوا انا قريب

 

امجد : معقول عرف ؟

علاء : الله اعلم .. يمكن عمر حاكي معه

امجد : لا قصي ما برد عليه من زمان

انس : كل ما يحكوا بعلقوا، عمر مبدأه مو واضح للأسف والنقاش معه عقيم بالنسبة الي

امجد ( زوره ) : راجع اخصائي العقم بلكي بتلاقي حل لمشكلتك

احمد ( ببرود ) : برأيي انت واللي بتدافع عنه راجعوا اخصائي مسالك بلكي بتفتحوا الطريق لمخكم شوي عشان نقدر نوصللكم معلومة

علاء / انس : هههههههه قوية احمد

احمد : اشي بقهر

أبو احمد : والله عيب عليكم صار كل واحد زلمة قد الحيط ولسا كلمتين مو عارفين ندخلها بدماغكم، شوفيها لو استوعب زوج اخته واعترف بخطأها بدل ما يدافع عنها على الفاضي ؟

انس : بدافع مجاحشة الله وكيلك، انتحر قصي وهو يفهم فيه ويقنعه انها غلطانة بتخباية الولد

أبو قصي : في رب يا عمي شايف وعارف، واكيد المظلوم رح ينتصر

علاء : الله جبر خاطرهم على اهون الأسباب، والله ضحكة خالتي اليوم ما بتنوصف

احمد : اه والله قلبها وروحها ضحكوا

أبو علاء : خلونا نهدي ردة فعل قصي ونحاول نقنعه يعمق تفكيره اكثر، قرب يجي عدي وما بدنا تحتد بينهم يا شباب

أبو قصي : لا لا شو تحتد بينهم، عدي فهمان ومن يوم المشكلة ما اختلف مع قصي

أبو احمد : رن على عمك أبو امير شوف ماله تأخر

انس : يمكن ما يرجع بما انه اسيل روحت

أبو علاء ( مستغرب وعيونه على ابوي ) : جد ؟ اسيل اجت لهون زمان ما شفناها، خلصت امتيازها ؟

احمد : ضايلها شوي ان شاءالله وبتقدم الامتحان .. عن اذنكم اروح اتاكد من خالتي اذا جاي او لا

 

////

 

سهى : قلبي برجليي ليكون حدا مخبره

ريم : انتي ليه ساكتة هالقد ؟ اخوكي مو سائل لو عارف يربي ما ربى عقربة وحية ببيته، نسيتي شو اجت حكتلك امآل عن اسيل وانس قبل ما ترمي سمها يوم مفاجأة ياسمين ؟؟ .. خلي خواتك يعرفوا الحقيقة

مها ( مخنوقة ) : ما فهمت شو حكت عن بنتي ؟

ياسمين ( جنب أمها ) : طولي بالك قصة مرق عليها سنتين، ما بتهمنا لا هي ولا كلامها احنا بنتنا ما غلطت بس عيونها بقدحوا شرار من غيرتها

سيرين ( تنهدت ) : يعني الواحد ما بحب يحكي بس بيان اعوذ بالله نفسيتها محمضة بشكل لا يوصف، بيوم حفلتها بحكي لغنى اسم الله اسيل بتجنن قالت لا عادية ياسمين احلى منها

البنات : هههههههه مكيودة

منى : يا حسرتي على حظ هالولد

ديمة : يعني برضو كانت سيدرا بالحفلة فاكيد رح تكون مو طبيعية سيرين، خليكي احسن منها

سيرين : مهيني ساكتة من ست سنين لو بدي اعمل مشاكل واشبك كان بنفس اللحظة ناديتلها اسيل تدعس عليها

ريم ( بنبرة حادة ) : رجائي الوحيد انه توقفوا نسوان اخوانكم وبناتهم عند حدهم لانه الأمور زادت وتفاقمت وصار في أطفال بالنص، احكوا مع اخوانكم او خلوا سيدي يتصرف المهم تلاقوا حل

احمد ( اجا فجاة ) : عمي متى جاي ؟

ياسمين : ما بنعرف، احكي معه اساله لو سمحت

احمد ( بفضول ) : مالكم ؟

سيرين : خالتك مخبية اشي وما حدا قادر يقنعها تحكي، تعال بوسها بلكي نطق لسانها

ياسمين ( ضحكة صفراء ) : وين يبوسها ؟

سهى : هههههههه ضحكتوني انتي واياها زوجي جوا بناديلكم إياه هلا

احمد ( مكشر ) : لا تخبصي سيرين

سيرين ( مصدومة ) : …

احمد ( متابع بجدية ) : عدي وقصي قربوا يوصلوا جهزوا الاكل واذا ابوكي جاي احسبي حسابه

ياسمين ( بدلع ) : حاضر حبيبي

احمد ( بحزم ) : شدي حنكك قدام الناس مو ببيتنا احنا

ياسمين ( كاتمة ضحكتها ) : حاضر

احمد : وحاولوا وطوا صوتكم شوي مو عارفين نقعد بكفي صوت الصغار ولعبهم

 

ريم ( بهمس ) : مال ياسمين ؟

سيرين ( بهمس ) هههه وصلت حدها اليوم بكفيها لازم اروح

ديمة ( بهمس ) : شكله هيك والله .. فقدت صوابها من اهتمام احمد فيكي اليوم

سيرين : هيني مروحة لانه ايدي على قلبي تيجي آيات، خالتكم مو مرتاحة بلاها

ريم ( بقرف ) : تيجيها موجة، خليني ابعت لعلاء يروحنا احنا واياكي سيرين شو رايك ؟

ديمة : الله يهدي بالنا، سيرين ما تتدايقي من ياسمين حبيبتي والله ما بكون قصدها

سيرين : ضل عليي اتدايق منها ؟ والله ما النا الا بعض النا عين نحكي كمان .. هي الدنيا لفت فينا وشفنا مين المنيح ومين اللي بحبنا ومين اللي بضمرلنا الشر بعدين معها حق حتى انا تجنبت احمد بس شكله فاقد حنان الأخت يا ويلي عليه

ديمة : هههههه اه والله

ريم : معك حق، دمدومة يسعد قلبك ما اطيبك حبيبتي 

 

__________________________________________________________________

 

اجا وقت اللي تظهر فيه الحقائق وتنحل فيه العقد اللي ذبلت ارواحنا بسببها، كمية الاحداث المتراكمة هالمرة فاقت الوصف وموضوع مختلف عن كل مرة ..

سكتنا كثير لكن آخرة السكوت الانفجار، ما بنقدر نضل نجامل على مضض بس تحت مسمى علاقة اجتماعية او قرايب ..

 

هيثم : يلا يابا امشوا معي

ام ماهر : يعني خواتك مجتمعات ومالهن ما حدا خبرني ؟

هيثم : لا والله كلها صدفة اجت، حتى أولادهم ما بعرفوا .. بس خلينا نستغل الموقف ورجعة وليد لابوه ونصلحهم

أبو ماهر ( بغضب ) : محمود لا بدي اشوفه ولا يشوفني

هيثم : لا بدك تشوفه وتشوف مرته كمان، ما حدا رح يقدر يحكي معها غيرك .. برايي ابنك ما دخله والله يابا

ام ماهر ( مقهورة ) : لو يعرف ما بسمحلها بس كل شغلها من تحت لتحت، شفكنا على بنتها ووكفنا جنبها بس طلعت ما بتستاهل

أبو ماهر : بنتها بنتنا لا تقعدي تخلطي الحكي ببعضه، يلا وين السيارة ؟

هيثم ( تنهد ) : هيها على الباب .. رانيا والأولاد بسيارة ثانية

أبو عدي ( فتح الباب ) : وين هيثم ؟ يلا يا زلمة تاخرنا قصي قرب يوصل عندهم وعدي خايف نتاخر

هيثم : يلا هينا جايين اركبوا انت ومرتك

ام ماهر : بنتك جاي يمة ؟

أبو عدي : اه طبعا ما احلاها وما تيجي

 

////

 

كان قلبي بخفق بسرعة وما صدقت أوصل لبيت خالتي حتى اشوف ابني اللي انحرمت منه شهور بدون سبب، واليوم امه اكتشفت غلطها وامها حاولت تغير  الأحداث لصالحهم مع انه عارفين كلنا ضمنياً انها هية وسلفتها وجهين لعملة وحدة ..

 

قصي ( دقيت الباب وبنادي من ورا الباب ) : السلام عليكم .. خذوا طريق يا بنات

امجد ( فتحلي الباب يسرعة ) : في طريق ادخل برجلك اليمين

قصي : وين وليد ؟

سهى ( قربت مني ) : اهلين ماما يعطيك العافية

قصي ( مسكت ايديها ) : وينه ؟ ليه ما حكيتي معي بنفس اللحظة كيف هيك بتخبي عني ؟

ريم ( سحبتني من ايدي ) : تعال شوفه كيف بلعب .. وليد شوف مين اجا ؟

 

لف وجهه الصغير عليي وكان منسجم باللعب وبضحك من قلبه، من زمان ما شاف أطفال ولا لعب مع حدا ..

 

وليد ( ركض عليي وحامل لعبته بايده ) : بابا بابا

 

نزلت حالي لمستواه وفتحتله ايدي وحضنته بقوة كبيرة، فيها شوق كل لحظة مضت واحنا بعاد عن بعض ..

 

قصي ( نزلوا دموعي ) : حبيب بابا انت عمره وحياته اشتقتلك كثير

امير ( قرب يسلم عليي ) : كيفك قصي ؟ خلص لا تبكي هي وليد رجعلك، انبسطنا كثير مشانك

قصي ( مبسوط من كلامه ) : حبيب قلبي احلى شب بالدنيا، وانا فرحت بشوفتكم وكلامكم

مصطفى / ماهر / مراد / يحيى : الله يحفظلك وليد واتضلوا دايما مع بعض

قصي ( عيوني على امهاتهم وخالاتي ) : ويحفظكم حبايبي ويرضى عليكم .. اشتقتلكم كثير انا

سلمى ( باستني بقوة على خدي ) : احلى خال بالدنيا ما احلى عيونك لما تضحك، امانة لا تبكي والله قطعت قلوبنا

قصي ( بوستها من خدودها ) : احلى سوسو بالدنيا انتي يا حنونة يا بنت الحناين

 

كانوا الشباب جايين يشوفوني وسمعوا كل الكلام اللي صار، ومو عارفين يضحكوا ولا يحكوا معي ويقاطعوهم ..

قمت لعندهم وسلمت عليهم بشوق كبير لانه كان النا فترة مو ملتقيين خصوصا أولاد خالتي منى ..

 

عدي ( اجا فجاة ) : السلام عليكم .. دستور يا اخوات

منى ( بترحيب كيير ) : مية اهلا وسهلا تفضل عمتي نورت والله

عدي : يزيد فضلك يا نوارتنا .. سبقني قصي

أبو ماهر ( بدق الباب بعصايته ) : السلام عليكم يا احبابي

 

تفاجأنا كثير من اللي شفناه، وزادت صدمتنا لما دخلت غنى مع أهلها ..

كان خالي هيثم جايب عيلته ودار سيدي وبقية اخوالي، قعدوا وما كنت قادر اقعد معهم وضليت بمكان بعيد مع ابني ..

 

احمد / علاء : قصي !

عدي : قصي حبيبي بعرف منيح بشو بتفكر ويمكن أي واحد فينا هسة بهيك يوم مكانك بفكر مثلك، الزواج قرار كثير صعب وانت تحديت صعوبته واخترت تكوّن عيلة وكنت مبسوط، خلينا نقول انه اللي صار خير ويكون سبب في التغيير للافضل

هيثم ( لحقهم وقعد جنبي يطبطب على كتفي ) : اعذرني اذا دايقتك وعملت خطوة بدون علمك، بس الأوراق انكشفت اليوم واجا الوقت اللي نصلح فيه كل الأخطاء

قصي ( بحزم ) : الإصلاح الوحيد اللي بفكر فيه حاليا هو الطلاق، انا مو ناوي اتراجع بالعكس ازداد اصراري

عدي ( بغصة ) : طيب اسمعها اول

قصي ( بنبرة حادة ) : طول اليوم واحنا نحكي وسمعتها وحكتلي كل اللي عندها .. معلش عدي بس ما بقدر اكمل حياتي مع غنى بعد اليوم

علاء : طيب بس توصل مرت عمها اللي سمعت كلامها بنشوف شو بصير هسة خليك ساكت وما تحكي اشي لحدا

احمد : شو بدها تيجي تعمل ؟ من كل عقلك بدها تعترف بهالكلام ؟

عدي ( متوتر ) : هاد اللي خايف منه لانها غنى ما عندها تسجيل مكالمات

قصي ( نص ضحكة ) : حلو .. يلا فرجوني كيف رح تتعاملوا معها ؟ هاد اذا ما عمك قلب عليكم ووقف معها

 

////

 

أبو بيان : يلا انزلوا

ام بيان ( متوترة ) : شو صار اليوم بالذات لحتى ينادونا وليه هون اجتمعوا ؟

أبو بيان : الله اعلم مثلي مثلك جاي وما بعرف اشي

بيان ( بخوف ) : انا كتير خايفة بابا  ليكون غنى عاملة مشكلة جديدة وجابت سيرتي ؟

ام بيان : ما دخلنا فيها تبري منها .. حاولي تحافظي على زواجك قد ما تقدري المهم انتي وبس

أبو بيان ( مقهور ) : تبري منها ؟ اخص .. كيف بتحكي هيك مع بنتي وعن بنت اخوي قدامي ؟ ( بهدد ) والله يا ليلى اذا كنتي عاملة اشي انتي وبنتك من وراي قسماً عظماً ما بتضلي عندي يوم ( بصرخ ) فهمتي ؟؟؟

بيان : … اهدى بابا خلص متل ما بدك

ام بيان ( قالبة وجهها ) : بدنا نضل بالسيارة لف وارجع على البيت

أبو بيان ( بنبرة حادة ) : لا نازلين طبعا عشان نشوف شو آخرتها

 

////

 

أبو احمد ( مبتسم ) : اهلا وسهلا بالجميع يا حيا الله

أبو ماهر : الله يرضى عليك وعلى عدايلك دايما مبيضين وجهي وبتعوضوني عن كل واحد بزعلني

أبو علاء / أبو قصي : يطول عمرك ويبعد عنك الحزن والهم

ام ماهر : كيف حالكوا يمة ؟ شو طبختي لخواتك

منى : ههههه الحمدلله، سامحينا ما لحقنا نقلك كل اشي صار بسرعة واحمد بس فات سال عنك

نهى : ياسمين طبختلنا حاج محشي بشهي متلها

مها : جيبي دوقي خالك هيثم

هيثم : اخ منكم والله ما الي نفس .. هاتي لقمة بالشوكة

رانيا : الله يفرجها ويهدي بالك وبال الجميع

 

غنى ( بحزن ) : ما حدا عبرني ولا سال عني

ام عدي : اسكتي وبس

غنى : حتى وليد معهم وما اجا عندي

ام عدي : مرجوعه الك لا تقلقي خلينا نحل مشكلتك اليوم ولكل حادث حديث

 

هيثم ( باكل وعيونه على ياسمين ) : اممممم لذيذ .. بس كاني دايق هالطعم من قبل ؟ وصفة مين ماخدة ؟

منى / نهى / سهى : ههههههههه

مها : لازم تعرف لحالك

احمد : له له يا هيثم عنجد خانك لسانك ؟ وما عرفت وصفة مين

علاء : ولا كانه دايقه قبل كم شهر بعزومة رمضان

منى : هدول التنين جننونا زيحوهم من وجهي بالله فوتوا اقعدوا لحالكم

احمد : وااال ! هيك بهالبساطة زيحوهم من وجهي ؟ شكلك غيرانة من اختك

سهى : لا غيرانة ولا سائلة بس شفقانة على ياسمين المسكينة ما قدرت عليك

هيثم ( بضحك ) : ايوا ايوا هاي طريقة نهى صحيح ..لا صراحة اضحكوا علينا بكل اشي الا اكل نهى مستحيل حدا يقلده

سهى ( بتغمز رانيا ) : يييي اسال حمزة لما اجا عنا وهو خاطب واكل بقلي نفس اكل اختك ام علاء بس انت واصحابك لسانكم فيه غلط

مها : ييييي وانا اديه ببعتلهم اكل وبنعزموا عندي دايما باكل الصحن ورا الاكل، وهدول التنين كمان متله بس خلص بخت

رانيا : يسلموا ايديكم جميعا كل وحدة نكهة اكلها مميزة، وبناتكم متلكم

أبو عدي : خلونا بالمفيد يا جماعة .. احنا اجينا نصلح الأمور بين زوجين اختلفوا مثلهم مثل باقي الأزواج بالعالم وان شاءالله ابنهم برجع لحضنهم وبعيش حياة مستقرة لانه بصراحة الموضوع كله سوء تفاهم وزيدوا عليها قلة نضج وسرعة باتخاذ القرار

أبو قصي : ان شاءالله

أبو بيان ( اجا فجاة ) : يا مسا الخير عليكم جميعا

سهى ( مكشرة ) : خير ؟ منيح اللي شرفت عشان تشوف الخير اللي مرتك عملته بابني وفينا

ام بيان ( انخطف لونها ) : انا ؟

ام ماهر : اكعدي اشوف وهاتي خرفينا عن كلامك لغنى يوم ما حردت ببيت أهلها ؟

أبو بيان : شو القصة ماهر ؟

أبو ماهر : انا اللي بقلك شو القصة ( حكاله كل اللي وصلهم على لسان غنى )

ام بيان ( مرتبكة ) : انا حكتلها كم يوم مو خمس شهور ؟ شو دخلني ازا حضرتها غبية وما عندها بعد نظر

غنى ( بتبكي ) : …

عدي ( رفع ايده بوجهها ) : ما تغلطي على اختي ولا تقلبي الطاولة عليها .. وثقت فيكي واخذت بكلامك من عشمها انك بتحبي مصلحتها ما تخيلت انك بتخربي بيتها

أبو بيان ( معصب ) : وكل ما افتح الموضوع تحكي يا حرام قصي ولو بنتي ما بخليها تعمل هيك اتاريكي انتي السبب

أبو عدي : مهي بنتها طلعت مخبية بقشورها البريئة وما كنا عارفين نواياها

 

انس : روح احكي اللي عندك لا اتضلك واقف متفرج

قصي : استنى شوي خليهم يكملوا تخبيصاتهم، كلهم على بعضهم ما بهموني

انس : … الله يجيب العواقب سليمة

 

////

 

عمر : وينه ؟

امجد : هيهم عنا تعال بسرعة

عمر : وليه ما حدا حكالي ؟ كنت متفق انا وعدي نحكي لعمي شو اللي صار ؟

امجد : خلصني تعال بعدين بتسال اللي بدك إياه، طبعا حاول تجنب قصي لانه متغير كثير وعناده على الطلاق زاد

عمر : يبلط البحر بالناقص منه

 

////

 

سهى : انا بس بدي افهم شو مشكلتك معي ؟ ليه أصلا تقترحي عليها هيك اقتراح ؟ واضح انك كاتمة بقلبك هاتي اشوف شو عندك

ام بيان ( بخوف ) : والله ما قصدي انتي الله يسامحك شو في بينك وبيني من غير شر طول عمرنا حبايب واكتر

منى ( بنبرة حادة ) : حبايب قلتيلي ؟ اسمعي ليلى احنا مو هبايل تضحكي عليهم بهالكلمتين وتتخبي ولا بنات شوارع نقوم نطلع شعرك بايدينا .. انتي وسلفتك قضيتوا عمركم عايشات وراسكم براس بعض واسراركم لبعض وكنا معتبرينكم خوات النا وآخرها اتفقتوا علينا وأول وحدة انا ومرقنالكم إياها، وبعدين بتطلع بنتك حاطة غنى خاتم باصبعها وما اكتفيتوا، سكنت ببيتي وصارت تنقللها كلام وتفاصيل ما بتخصها وكمان ما فتحت تمي معها، واكتشفنا فيما بعد انها ما بدها امجد يوقف بصف اسيل ولا بدها انس يصالحها بعد ما زعلها .. شو اللي بدكم إياه منا ؟

سهى ( عيونها على ريم ) : ولا تنسي انك حكيتي لامآل انك شفتيهم بالسيارة ووسعتي ذمتك واجت تركض عندي احكي لمها اتضب بنتها خوفا من ابوها

مها : ههههههه اضب بنتي ؟ شايفتيها فلتانة ما عاذ الله ! هاد اللي مخبيتيه ؟

ام ماهر ( بقرف ) : يا كليلات الأصل

ام عدي ( بترجف ) : الحق علينا خايفين عليكي يا مها

مها ( بعصبية ) : اللي بخاف على التاني بتحكي من راسك لراسه مو تروحي على اختي تحكيلها وتزيدي الفضيحة ! شو دخلها سهى ليه ما اجيتي عليي انا ؟

أبو ماهر : صحيح .. مالك ومال أولاد بناتي ؟

نهى : أصلا ليلى ليه تنشر الخبر مو خالهم نزل وسلم عليهم وشافهم بدرسوا ؟ شو الداعي لكل هالكلام لو قصة اندفنت بارضها ما وصلنا لهون

ام بيان ( ببرود ) : انا ما قلتلها تروح تحكي، هية اللي تبرعت تنشر الخبر

ام عدي ( بقهر ) : نسيتي يا ليلى انك كنتي بدك تصوريهم بس بيان ما خلتك وقالتلك استري عليهم، وانا خفت انك تروحي تحكي قلت بضبضب القصة قبل ما تنشريها بس يا حوينة المعروف معك

مها ( بنبرة حادة ) : تصوريهم ؟ الله اكبر فيكي وفيها

أبو علاء ( فقد اعصابه ) : شو كانوا بعملوا حتى تصوريهم ؟ زودتوها عاد

ام بيان ( بمسخرة ) : غازين روسهم ببعض

سهى / مها ( كاتمين ضحكتهم ) : …

منى : حكالي كانوا يقرأوا على ضو التلفون فاكيد بدهم يقربوا بس ابني وواثقة بتربايته ما بعمل اشي غلط

الشباب ( كاتمين ضحكتهم وبتطلعوا بانس ) : …

امجد ( بقرف ) : بتعرفي لو صورتهم بنتك والله لارمي عليها اليمين بهاللحظة ولو عشر أولاد بيني وبينها ما بترجع الا بالذل .. انا اخوي هيك تفكري تعملي فيه ؟

ام بيان ( بترجف ) : …

 

////

 

خلص ما ضل مجال عندي اسكت، زودوها كثير وعملونا علكة بثمهم الفاضي اللي ما بطلع منه الا المصايب ..

 

انس : اسمعوني كلكم .. انا واسيل علاقتنا شوي خاصة ومختلفة عن أي اشي بالعيلة وبكل بساطة ما بنحب نحكي عن حالنا كثير اعتبروه غموض او أي اشي المهم اتركونا بحالنا انا واياها أولاد خالات وزملاء عمل لا توسعوا خيالكم اكثر من هيك

البنات : احلى دكاترة بالدنيا هههههه

هيثم ( بضحك ) : المشكلة الغموض بثير الفضول اكثر

انس ( مطنش ) : يدبروا حالهم انا مو مجبور أوضح أي اشي بعمله

فرح : المشكلة مو فيك للأسف .. المشكلة انه مجتمع ذكوري والبنت بس اللي بتغلط وعليها الحكي وبسوقولك فيها الشرف، ومن غير اشي الأحقاد على اسيل كتيرة والها أسباب متعددة ( بجكر ) خصوصا الشكل والشهادة واكيد الذكاء الخارق اسم الله عليها وبتعرف المنافسين كتار ابن خالتي

منى ( مبسوطة ) : قل اعوذ برب الفلق عليها فعلا كل اشي فيها مميز

أبو امير ( بدق على الباب ) : وينكم يا جماعة .. السلام عليكم

مها ( بهمس ) : هشششش وطوا صوتكم ليسمعنا

أبو احمد : افتح لعمك أبو امير واستقبله يابا

منى ( بفخر وبتلف عيونها على الجميع ) : الله يرضى عليه شو فهمان وكلامه برفع الراس، ولو أبو امير شاف غلط واحد ما بسكت واحنا كلنا عارفينه

أبو علاء : اه والله .. نورت بعديلنا البش مهندس

أبو امير ( مبتسم ) : ماشاءالله شو هاللمة الحلوة ينور ايامكم جميعا ويجمعكم على المودة .. كيف حالكم ؟

مها ( كاتمة ضحكتها ) : بسيرتك والله

أبو امير : اه عشان متركة البيت من الصبح شكلك جايبة جاهة ترجعك معي

الجميع : ههههههههه لا

أبو ماهر : اليوم دور بنت اخوها لترجع وتصلح غلطها

أبو قصي : … وين قصي يابا ؟

ديمة : هيو واقف هناك مو شايفينه ؟

 

////

 

يا سلام وأخيرا اجا دوري، واجت اللحظة الحاسمة اللي احكي براحتي واعطيهم قراري النهائي ..

 

أبو عدي : تعال يا خالي نحكي .. اول اشي سامحنا وحقك على راس راسنا من فوق وغياب ابنك عنا كان فوق ارادتنا والله

قصي ( رفعت حواجبي بمسخرة ) : ما فهمت كيف فوق ارادتكم ؟ ما بتقدر تحمل طفل وتجيبه لبيت اختك ؟  او تنزله لبيت اهلك كم درجة عشان يشوفه ابوه ؟

أبو عدي ( بهدوء ) : حمل طفل اكيد سهل بس اكسر بخاطر بنتي صعبة كثير بعد الكلام اللي سمعته منك صح ؟

قصي ( بجدية ) : حكتلكم ابني ما بستغني عنه .. لا تحاول خالي اللي عملتوه فيي كان بارادتكم وبنتك برجع اقلك انها ما بتلزمني

غنى ( انهارت ) : لاااا لاااا لاااا والله التوبة بوعدك بوعدك اني اتغير واصلا انا تغيرت ووعيت كتير

قصي ( بنبرة حادة ) : لوما امك قالتلك انها حامل بولد وفتحت معك الموضوع ما كنتي رح توعي وتكشفي قناعهم المزيف ومحبتهم الكذب

بيان ( بصوت عالي ) : احترم حالك قصي وخلي كلامك موزون انا وغنى طول عمرنا خوات واكتر وعمري ما عملتها خاتم باصبعي وهالكلام الفاضي كله .. مو من مسؤوليتي اربيها أصلا، ومو  يعني ما قلتلها اني حامل يعني بكرهها، خالتك وصتنا ما نخبر حدا بحملي ولما ماما رنت عليها تقلها انه امجد منعني احكي معها ما سالت عني ازا حامل او لا وماما نسيت تقلها

امجد ( سكر تمها بايده ) : هششششش وطي صوتك وين قاعدة انتي ؟ كل العمايل اللي عملتوها كمان بتتفلسفي ؟ امشي اطلعي فوق خلصيني وحسابك على كلامك هاد عندي كبير كلام امي مو فاضي فاهمة ؟

آيات ( مسكت بيان ) : اتركها .. تعالي معي حبيبتي سيبك منهم هدول كلهم متأثرين ببعض ومعميين عن الحقيقة لسا ما عرفوا انك احسن وحدة واكتر حدا فهمان

البنات : ههههههههههههههههههههه كملت بآيات

آيات ( منزعجة ) : هاد اللي شاطرين فيه يا سوسات

عمر ( اجا فجاة ) : السلام عليكم .. قراتي دعاء التحصين حبيبتي بكونوا معلقينه مشانك اكيد

احمد ( بغضب ) : حبك برص منك الها مين جابهم هدول ؟ مو اتفقنا يا عدي عمر ما يجي ؟

عدي : مو انا اللي جبتهم

آيات ( بغصة ) : احمد ؟

احمد ( بنبرة حادة ) : ولك انخرسي لا تجيبي اسمي على لسانك، شو بتحكي لبيان قاعدة ؟ مين اللي فهمان اكثر واحد اه ؟ خوثة انتي ولا بتتخوثي ؟

أبو بيان : اوف ! يعني ممنوع تكون فهمانة مثلا  ؟

امجد : لو فهمانة عالاقل كان دافعت عن بنت عمها اللي بتتدعي محبتها وما بدها قصي يشكك فيها، ما سمعت صوتها قبل شوي وهي بتغرد المحاضرة ؟ بعدين من الأساس مكانها هناك جنب البنات وممنوع تتدخل لا بسلبي ولا إيجابي ممنوع توقف بصف حدا لانه الكلام لاصحاب الشأن اليوم وبس

علاء : مشان خاطر قصي احنا حبينا ننهي المشاكل مو نحط على النار زيت

أبو ماهر : صحيح .. اقعدي يا آيات جنبهم وانتي يا بيان وممنوع حدا يتدخل بين قصي وغنى اليوم

البنات : ….

قصي ( التفتت على غنى ) : طريقنا وصلت لنهايتها .. استري ما شفتي مني وانتيــــــــــ

غنى ( بتصرخ ) : لاااااا

أبو امير ( مسكني بقوة ) : اوعى … ( ضمني ) اوعى يا عمي تغلط هالغلطة، الطلاق عواقبه وخيمة لا تخرب بيتك وتشتت ابنك على كلام واحقاد نسوان صدقني ما في ولا بنت بتستاهل تكسر قلب مرتك عشانها .. سترك وغطاك وام ابنك والاهم من كل هاد انها اعترفت بخطأها .. الله يرضى عليك تروى احسن ما تندم

أبو قصي ( بغصة ) : اسمع كلام عمك والله يابا ما في اشي مستاهل

عمر ( حضن غنى وبهدي فيها ) : خلص اهدي حبيبتي

 

////

 

انتهت سهرة اليوم اللي قدرنا فيها نقنع قصي بعدم التسرع واتخاذ قرار الطلاق؛ اللي رح يكون اكبر  ضحية فيه هوة ابنهم ..

 

مهند : ماما خلي وليد ينام عنا

ريم ( بحب ) : وليد اليوم رح ينام بحضن خالو قصي لانه مشتاقله كتير

علاء : وبكرا بتروح على الروضة وبترجع تلعب معه

قصي : شكرا كثير الكم وقفتكم معي ما في كلمة بتوصفها

أبو قصي : الشكر الكبير الك لانك سمعت كلام عمك أبو امير جزاه الله خيراً عنا جميعاً .. قدر يوقفك باللحظة المناسبة

علاء : صراحة كان باين عليها انها ندمانة ومتغيرة

سهى : وين بتلاقي احسن من قصي يصونها، شو بدها بفلانة وعلانة ما حدا بنفعها

ريم : بس امجد عجبني اليوم مع انه ما كان داخل مخي انه ممكن يعمل اشي مع بيان بس واضح عليه القهر

قصي : … الله يعينه ويهديه

علاء ( كاتم ضحكته ) : امين

سهى : طيب شو رح تعمل هلا ؟

قصي : خليها ببيت أهلها لحد ما يصفى قلبي عليها ووليد بجيبه عندي ثلاث أيام بالاسبوع خميس وجمعة وسبت

أبو قصي : ما حسيت حالك بعد هالفترة مشتاقلها ؟

قصي ( انحرج ) : … ما بعرف، يلا انا نعست ووليد نام

سهى ( فهمت عليه ) : تصبح على الف خير

علاء : نوم العوافي، يلا واحنا اسمحولنا

 

////

 

أبو امير : يا ربي دخيلك كان رح يخرب بيته على شعرة هالمسكين

مها : يا لطيف هالبيت العمران يعني

أبو امير ( بحزم ) : اكيد عمران، لحد هسة ما شفت سبب مهم يدّعي الطلاق .. ما في بيت الا وفي مشاكل وقصص النسوان عمرها ما بتخلص

مها ( تنهدت ) : بهاي معك حق، الله يهدي باله ويختارله الأفضل .. طول اليوم خواتي نهى وسهى يمدحوا باسيل وفرح ويا ريت عنا أولاد نخطبهم

أبو امير ( مبتسم ) : الله يرضى عليهم ويبيض بخت، من سوء حظنا انه ما في عندهم أولاد احنا الخسرانين

 

////

 

أبو علاء : لا والله زياد الخسران اذا برفض هالشب

نهى : منى قلبها بطقطق تخطبله إياها .. قولتك لو ضغطتوا عليه بوافق ؟

أبو علاء : الزواج ما فيه ضغط واذا ما اقتنع صعب نأثر عليه

نهى : يعني قصدي تحكوله عن انس وتمدحوه وانه لو عنا بنات ما بنرفضه

أبو علاء : يا ريت اختك ام قصي تأنت كم سنة واخذت فرح

 

////

 

سهى ( بحسرة ) : وين كان عقلي دبحت حالي اجوزه، لو صبرت كم سنة كان اخدتله فرح

أبو قصي : بنات زياد ما بتعوضوا، بس النصيب فوق كل اشي وكمان غنى بنت كويسة وانا متاكد انه رح يرجعلها

سهى : ولا وين بده يروح بحاله وبهالولد يا حسرتي عليه، الله يصلح احوالهم

أبو قصي : بس ما حبيت كلامهم عن انس واسيل شو هالمسخرة مالهم ومال هالبنت يا ربي اتروكها بحالها

سهى ( بتنفض بايديها ) : يييييي متل الاميرات ربي يحميها ويجعلها من نصيب انس يا قادر يا كريم

أبو قصي ( مستغرب ) : وام احمد موافقة ؟

سهى ( نص ضحكة ) : قاتلة حالها عليها وأبو احمد ناوي يحكي مع زياد خلص

أبو قصي : واحنا معه لازم نقنعه، احسن ما يجيبوا كنة مثل بيان

 

////

 

احمد : امي حابة تخطبله اسيل وحكت قدام خالتي نهى اليوم

ياسمين : الله يقدم اللي فيه الخير شو بايدنا غير ندعيلهم

احمد : امين … كأنه في مشكلة بينهم او شو الموضوع ما فهمت ؟

ياسمين ( بتضحك ) : جاييها عريس وسالت ماما شو صار، بعدين اجت تحكيلي انس بده يحكي معي تحملي غيرته ست ياسمين

احمد : هههههههه لابقله والله اذا ما غار عليها على مين يغار

 

////

 

زياد ( مستغرب ) : ما فهمت ام احمد شو حكت ؟

مها ( بتفرك ايديها ) : ما حكت بس خواتي لمحولي انه لو طلبوها بتوافقوا

زياد ( صغرت عيوني ) : وشو جاوبتي حضرتك ؟

مها ( بخوف ) : انا ما بجاوب حبيبي الكلمة لابوها طبعا

زياد ( بنبرة حادة وبهدد ) : اوعي يا مها اياكي تفتحي هالموضوع حتى مع حالك فهمتي ؟ انس على عيني وراسي والله من قلبي بدعيله لكن زواج مرة ثانية لاولاد منى ما بدنا

مها ( بتهز راسها بقهر ) : حاضر

 

حبيت اعمل هالفيلم فيها حتى اشوف شو مخبية عني، وواضح انها مخبية اشي كبير من دموعها اللي حاولت تخفيهم ..

لساتني عند شكوكي وقصة مرض اسيل قبل كم سنة ما بتروح عن بالي، بدي اعرف مين هاد اللي يسامحها ؟ ..

 

////

 

منى ( بتعلي صوتها عشان اسمع ) : قال ما بده شعر طويل بحب القصير

أبو احمد : ههههههه وشو كمان ؟

منى ( متابعة ) : وعكس مواصفاته، مو عارفة بدي اشوف بنت حلال وشريكة حياة اله ولا بكسة بندورة ؟

انس ( من بعيد ) : بكسة فراولة ازكى

أبو احمد : هههههههههههه الله عليك  .. بلبقلك يابا يا حبيبي انت اطلب وأتمنى بس

انس : تسلم .. وقفولي الكلام عن هالموضوع حاليا لكم شهر

منى ( قلبت وجهها ) : براحتك

انس ( بستها بثقالة دم ) : بدي انام كم ساعة صحوني على الفجر ضروري بدي ادرس شوي قبل دوامي

 

__________________________________________________________________

 

وجه ابني اللي اضاء عتمة قلبي بعد الكابوس اللي مرق علينا وشوفتها بعد غياب وبحالة صعب وصفها وكلام عمي أبو امير وكبارية العيلة معي؛ لخبط أفكاري وزاد من توتري وصعوبة اتخاذ أي قرار ..

 

قصي ( متمدد جنب وليد وبلمس شعره ووجهه ) : كيف قدرتي تحرميني منه يا غنى وانتي اكثر وحدة عارفة شدة تعلقي فيه ؟ حرام عليكم اللي عملتوه والله حرام

 

نهضت حالي ومسحت دموعي، مسكت الموبايل وصورته  وبعثت الصورة لامه ..

 

قصي : بتكوني مفتقديته بأول مرة ما بتكوني معه وقت النوم .. مرقت بهالشعور فحبيت ابعثلك صورته

غنى ( تسجيل صوتي وبتبكي ) : قصي والله العظيم ما عندي أي كلمة توصفك وتعطيك حقك كل اللي بتمناه انك تصدقني وتصدق توبتي، بكل ليلة كنت اتخيلك جنبنا وانا واياك بنحكي قصة لوليد وبنبوسه وبنحضنه وبنام بيناتنا

قصي ( بغصة ) : الله يهديكي كسرتي قلبي وما بعرف متى رح اسامحك، لحد هسة مو مستوعب انه جنبي خايف اروح على شغلي بكرا وافقده

غنى : لا رح اضل استناك حتى تجيبلي إياه بايدك، وبتاخده وقت ما بدك طبعا

قصي : … ان شاءالله

 

وين كنا ووين صرنا يا غنى، كان لازم اكشفك من يوم ما رحتي خبرتي امي بتفاصيل الحياة السرية اللي عشناها حتى لو كنتي مجبورة تحكي لتبرري غيابك عنها بس ما كان لازم حكيتي بدون اذني ..

 

////

 

بعد ما خلصت هالليلة السودا واقتنع الكل بانه غنى ضحية، وسبب دمارها بيان وامها حتى لو بدون قصد بس النتيجة كانت واضحة متل الشمس ..

 

عمر ( مخنوق ) : شو اعمل يا ربي كيف اتغير واغير زوجتي ؟ اهديني ونور بصيرتي ودلني على الصراط المستقيم

 

كان بصلي العشا وفقدته فتحت باب الغرفة شوي وسمعته بدعي وهو قاعد على سجادة الصلاة ورافع ايديه للسما ..

قشعر بدني وما عرفت شو اعمل بحالي وبالناس اللي ما بحبوني، ولا بعترفوا انهم باذوني ..

 

////

 

أبو عدي ( بغضب ) : شفتي اللي كنتي بدك تفضحي بنته شو عمل مشانا ؟ افرضي كان قاعد بأول الجلسة وسمع اللي عملتوه كان بنتك هسة مرمية مطلقة بسبب تافه

ام عدي ( منهارة ) : والله ما فضحتها ولا بفكر باشي متل هيك، مها وبناتها ما بهونوا عليي انا انفهمت غلط صدقني

أبو عدي ( متابع ) : اصدق شو ؟ كان سكرتي ثمها لسلفتك وما دخلتيها بيتك اللي ما بهمها الا مصلحتها .. اياكي اسمع انك صحبة معها ولا بنتك تقعد مع بيان او آيات، وديها عند ديمة تصير بني آدمة مثلها ملاك الكل بحلف بحياتها

 

////

 

أبو بيان ( بغضب وبضرب بالموقد ) : وين اروح بوجهي من عيلتي وخواتي وازواجهم ؟ كيف ارفع عيوني بعيونهم واحكي معهم مثل دايما ؟ بدك تصوريهم اه ؟ ولك ما بتخافي ربك من فضيحة تلحقك ؟

ام بيان ( مغطية وجهها بايديها وبتبكي ) : الله يخزيها امآل مثل ما خزتنا وفضحتنا

أبو بيان ( بصرخ ) : فضحتك ؟ ما انتي كنتي رح تخربي بيت بنتها واتضل خطيتها معلقة برقبتك طول عمرها لو نطق هديك الكلمة لولا ستر ربنا والله اعلم اذا ما رح يغير رايه لبعدين وغلطتي على بنتهم انتي وبنتك يا قليلات الفهم يا عديمات المنطق يا اللي ما بتخافوا ربكم .. ولد صغير كان رح يتجرجر بالمحاكم وساعات مشاهدة من ورا لساناتكم اللي بدها تفوتكم جهنم

ام بيان : …

أبو بيان : استغفري لربك وتوبي لعل وعسى يهديكي، والناس تقدر تفوتنا بيوتهم

 

 __________________________________________________________________

 

 

بعد ثلاثة اشهر >>

 

اليوم مو مثل أي يوم ..

اليوم عيد بعيلتنا الصغيرة بحجمها بس كبيرة بطموحاتها واحلامها، حلمنا تحقق وبنتنا نجحت بامتحان الامتياز واخذت تخصصها اللي بدها إياه ..

 

أبو امير ( بسعادة لا توصف ) : احلى تحلاية لاحلى ناس نورتونا والله وزدتوا فرحتنا

الجميع : الف مبارك لاسيل

أبو امير / مها : الله يبارك فيكم

هيثم ( بضحك ) : خلص هيك كثروا منافسيني بالعيلة بطل الي هيبة يا جماعة

انس / اسيل ( مع بعض بالصدفة ) : انت قدوتنا خال / خالي

 

اتطلعوا بوجوه بعض وضحكوا، والعيلة ضحكت معهم ..

 

////

 

أبو علاء : عقبال عندك يا فرح

فرح ( بخجل ) : بوجودك عمو ادعيلي كتير

أبو احمد : بندعيلك كتير بدون ما توصي كم فرح عنا احنا هههههه

امير : احلى فرح بالدنيا واحلى اخت

أبو قصي : واحلى اخ انت وعقبال ما نشوفك بالمكان اللي بتستحقه

 

كان الكل على اعصابه وما حدا مسترجي يحكي او يعلق بحرف؛ لانه الوضع حساس ومو متحمل وبس بدهم رضى زياد ..

 

نهى : حنونة ورنوش اشتقنالكم حبيباتي الحمدلله على سلامتكم

حنين / رنين : الله يسلمكم

سهى : ما عمرها صارت انه تنتين يولدوا بنفس الأسبوع يعني كلنا ولدنا بنفس السنة بس بهالتقارب هاد ما صارت هههههه

ياسمين : والتنتين بنات

وائل : اه والله غلبنا خالتي كثير تعبت معنا

طارق : ما يحرمنا منها الحنونة الغالية بتتعب وما بتحكي ولا بتحسس حدا

مها ( منحرجة ) : يا عيب الشوم ازا ما تعبت لبناتي لمين اتعب ؟ بهمني سلامتهم وسلامة احفادي والباقي بهون

الشباب ( بمسخرة ) : يسعدلي التيتا

أبو امير  : هههههه احلى تيتا

 

لمحت غنى ماسكة ايد وليد ومحتارة فيه وعم يبكي كتير، لحقتها اشوف شو مالها ..

 

غنى ( مرتبكة ) : نسيت اكله بالتلاجة لانه كان نايم وقت الغدا بلاقي عندك شوية رز ؟

مها ( مستغربة منها ) : لهالدرجة عمتو وين جاية انتي على صحرا الله يسامحك، أي ازا ما فيه بطبخله

غنى ( مبسوطة ) : الله يسعدك والله بعرف ما بتقصري بس عشانك معجوقة وعندك ضيوف

مها ( قاطعتها ) : ما في حدا بغلى على وليد حبيب خالته هاد، بعدين وين الضيوف كلهم أصحاب البيت اقعدي طعميه وخدي راحتك هي الاكل كله تحت تصرفك

 

تنهدت بالم عليها وبفكر بقصي اللي ما بعرف لما يجي كيف رح يكون منظرهم كل واحد بجهة وهالولد محتار بينهم، مرق كم شهر ولساته ما تحرك باي خطوة ..

 

////

 

علاء ( بهمس ) : لا امجد ولا عمر  ولا قصي رح يجوا ؟

عدي : كيف بدهم يجوا ونسوانهم ممنوع يلتقوا ولا حدا أصلا بطيقهم، وقصي ما بعرف عنه متامل يجي يجبر خاطر غنى شوي

علاء : شفتها فاتت جوا شكلها مو عارفة تقعد

عدي : الله يهون عليها، وضعها صعب والله يا علاء بجيبها عندي مرات بس لسا بحس نفسيتها تعبانة

علاء ( تنهد ) : لا حول ولا قوة الا بالله

 

////

 

امجد ( بقهر ) : عمري ما تخيلت انحرم من مناسبة بسبب مرتي، أي أيام ساندرا ما خليت اشي يروح عليي

عمر : انا واياك انطفينا يا امجد وصار غير مرغوب فينا بسبب نسوانا

امجد : يا خسارة على حظنا، والله لو بعرف هيك آيات بدها تصير ما جوزتك إياها .. ولا انا فكرت بيان زينة البنات واعقلهم طلعت حية من تحت تبن هي وامها

عمر : لسا فبها خير شوي بتقدر تستغله لصالحك، اهون من أمها

امجد : لا لا حاطة اسيل براسها وخايفة تصير سلفتها بس بيني وبينك هالحكي

عمر : شو احكي عن اختك اللي بدها تعمل المستحيل ولا تشوف اسيل صارت مرت اخوها

امجد : هيها صارت دكتورة والف مين بتمناها

 

////

 

بهالاثناء برن الجرس ولما فتحوا الباب ظهرت قنبلة السهرة ..

 

قصي ( ابتسامة عريضة ) : مساء الخير

 

ماسك باقة ورد وهدايا بايده وبالايد الثانية كرتونة فيها قالب كيك، ولابس بدلة ومتشيك وطالع عريس ..

 

الجميع ( مستغربين وبتطلعوا ببعض ) : مساء النور

أبو امير ( بغير الجو ) : اهلا بشيخ الشباب أي شو هاليوم الحلو اشتقنالك يا زلمة

قصي ( بضحك وبدور بعيونه على شخص ) : تسلم يا عمي والله مشتاقلك اكثر ومبارك لاحلى دكتورة بالبلد ( مد ايده واعطاها هدية )

اسيل ( مبسوطة ) : يبارك فيك ويسعدك وعقبال ما تشوف وليد باعلى المراتب شكرا كتييير عالهدية كلك زوء والله

البنات : خلصينا افتحيها بلا كترة حكي هههههه

مها ( مبتسمة ) : وليد هلا فات ياكل قال مستحية امه بتسال ازا في اكل قلتلها بطبخله للافندي مية طلب متل هالطلب

قصي : والله ما بتقصري خالتي

أبو امير : نزليله كل الاكل اللي عندك

هيثم : يسعدها التيتا يا ناس

احمد ( بضحك ) : سنتين زمان بتلاقي مفركة مخبية بالفرن

علاء ( متابع ) : وبتيجي بنتك جوعانة وبنات خالاتها ويا لطيف على مفركة ستي

الجميع : ههههههههههه

وليد ( اجا يركض ) : بابا حبيبي بابا بابا

غنى ( لاحقته ) : تعال غسل اول

قصي ( عيونه على غنى وحمل بوكيه الورد ومشى لعندها ) : كل عام وانتي بخير العمر كله .. تاخرت عليكي شوي سامحيني

غنى ( خجلت وعيونها ضحكوا ) : وانت بخير .. بسيطة

قصي ( رفع كيس الهدية وفتحه ) : بتقبلي ترجعيلي ؟

 

كان فيه محبس بجنن آخر موديل، وقدمه بطريقة رومنسية ..

 

أبو قصي ( مبسوط ) : جاوبي يا عمي

غنى ( نزلت راسها ) : … بقبل

أبو ماهر / أبو عدي ( بتطلعوا ببعض ومبسوطين ) : الحمدلله

 

قصي كان اليوم مميز وجريء وواضح انه اخذ وقت بالتفكير والتخطيط، ساعدوه خواته وحضروا الكيكة رغم انهم كانوا متفاجئين مثلنا بس انبسطوا لاخوهم ..

شدها لعنده ومسك ايدها ولبسها الخاتم الجديد، ورفع وجهها بحب وقرب منها وباسها ..

 

نهى / سهى / مها / ام عدي : للللليييييييششش

منى ( بتضحك ) : الف الف مبارك نعنشتونا

ام ماهر ( خبت وجهها بايدها ) : يا كشيلي على كلة الحيا

الشباب : هههههههه دبري حالك بدنا نعيش

أبو ماهر : الله يرضى عليك يا سيدي ويجبر خاطرك

أبو عدي : الله يديم مودتكم ولا يفرقكم

أبو قصي : امين .. وما نشوف غير الأيام الحلوة للجميع

أبو احمد / أبو علاء / أبو امير : مبارك يا قصي وغنى

قصي ( حاضنها وراسها على صدره ) : يبارك بعمركم جميعا ولولا كلامكم وخبرتكم ما كان قدرت اتخذ قرار صحيح بحقي وحق عيلتي

ريم : ان شاءالله يكون درس لكل وحدة بتسلم حياتها للناس وبتسمحلهم يتدخلوا فيها، طول ما زوجك متاكدة من اخلاقه وعارفة حالك ما بتهوني عليه ومحترمك وحاطك انتي واهلك فوق راسه بدك تاخدي على حالك شوية وتكملي هالحياة ما في زواج بدون مشاكل لكن الشاطر اللي بده يتجاوزها

علاء ( بضحك ) : هاي الي المحاضرة ؟

ديمة : لا الي عشان كنت راكبة راسي وقلت لعدي يوصلني عند اهلي كمان يومها

عدي ( بثقة ) : على جثتي

احمد : بعيد الشر عنك .. يسلم ثمك يا ام مصطفى

أبو علاء : يا هيك التغريدات يا بلا

ريم : تسلم عمو

ياسمين : هينا يختي ساكتات وقاعدات هههههه

سيرين : اه والله

رنين : انا بكون حاملة البقجة وعلى باب البيت بتزكر اني اخدته بكامل قواي العقلية بقوم برجع وكان شيئاً لم يحدث

طارق ( عيونه على ابوها وبمسخرة ) : يا ريت اشي بستاهل الواحد بقول معاها حق

حنين ( بتعلق على رنين ) : على ربطة خبز

وائل : ههههههه وانتي على ضمة نعنع

حنين ( بثقة ) : كله ولا النعنع عندي

هيثم ( بضحك ) لازمتنا لعبة صراحة جديدة

ديمة ( بخجل وعيونها على عدي ) : يومها شفتني بضحك وقلتلي الله يهديكي كنت بحكي بعقلي الحمدلله اني رديت عليك وما رحت شو كنت رح احكي لاهلي

عدي : عمري كله انتي مستحيل انام بالبيت وانتي مو فيه

أبو قصي : كان جبتي اخرتنا يابا انتي واخوكي بنفس اليوم

الجميع : لا سمح الله

ابو عدي : وانا قلت لهيثم مستحيل عدي يقبل لو طلبت منه

غنى : بعترف انه قصي ما غلط بالعكس طلب مني بكل هدوء نرجع على البيت بس خلص .. الله يلعن الشيطان

 

////

 

على الواتس اب >>

 

انس : يا زلمة عادي تعال

معاذ : تمام هسة باجي انا وامي

انس : اهلا وسهلا

 

أبو امير ( بهمس ) : اكيد اهلا وسهلا ما بدها سؤال عمي

انس : تسلم .. اعطي خبر لخالتي لو سمحت

 

مها ( مستغربة ) : اهلا وسهلا بس امه ليه جاية ؟

أبو امير : الشب استحى يجي لحاله، بعدين شوفيها لو اجت باركتلك ؟ انتي استقبليها وقومي بواجبها

مها : اه والله لازم نردلها المعروف

 

منى : مية اهلا وسهلا بام محمد شو هالزيارة المباركة

ام محمد ( خجلانة ) : اهلين فيكم والله

ام ماهر : ربي يكثر من امثالك يا حبيبتي اللي عملتيه مشان بنتي مها وابنها ما بننساه

ام محمد : ولو ما عملت الا واجبي واي حدا مكاني كان عمل نفس الاشي .. الله يحفظه هالولد حبيته كتير

مها : تسلمي والله وهو بضل يتزكرك

 

ريان ( بسلم على معاذ ) : اهلا وسهلا دكتور كيفك ؟

معاذ ( مبتسم ) : اهلا بريان البطل انا مشتاقلك وانت كيفك ؟

ريان : نفسي اضيع مرة ثانية عشان اجي عندك

الجميع : هههههههه

أبو امير : بناخدك عنده بدون ما اتضيع يابا مو ناقصنا

أبو ماهر : الله يرضى عليك يا ابني

انس : اجدع صاحب .. والله الدكتورة اسيل طلبت اتطعميك حلوان التخصص

معاذ : يعلم الله فرحتلها هالدكتورة من زينة البنات، وعقبال الدكتورة فرح

أبو امير ( مبتسم وعيون على احمد ) : تسلم من طيب اصلك

 

فرح ( بتضيف بام محمد ) : تفضلي خالتو

ام محمد ( بتتاملها ) : يزيد فضلك ويرضى عليكي وعقبال حلوانك حبيبتي

مها ( عيونها على خواتها ) : بوجودك يارب

ام محمد ( بتأشر لفرح تقعد جنبها ) : كيفك كيف دراستك ؟ أي سنة صرتي

منى / نهى ( بتطلعوا ببعض وبضحكوا ) : …

فرح ( بخجل ) : الحمدلله خلصت الخامسة ضايل اخر سنة

ام محمد : وشو حابة تتخصصي ؟

فرح : والله ما بعرف خالتو انا حاطة ببالي طب أطفال بس حسب ما بطلعي الله اعلم

ام محمد : معاذ كتير بحب الاطفال ومبسوط بالتخصص وان شاءالله ربنا بوفقك وبتتخصصي باللي بتتمنيه

الجميع : امين

 

سهى ( بهمس ) : دابت فرح هههه

نهى ( بهمس ) : جيتها مو لله امه صح ؟

منى ( بهمس ) : ان شاءالله يكون متل ما بتفكري من حسن حظها لفرح

سهى ( بهمس ) : والله همة المحظوظين اكتر .. شوفي كيف بتطلع عليها وين ما تحركت وبتساير بمها وبتحكي مواضيع