الحلقة الثامنة والعشرون

 

“واختر خليلَ قلبك بحكمةٍ فليست كُلّ القلوب بالقلوب تليقُ .. واختر لنفسك شخصًا إذا قَست عليك الأيام يكن لكَ فيه عشمٌ لا يخيب“.

 

بعد ٥ شهور >>

 

كل يوم بنسمع خبر اغرب وبصدم اكثر من الثاني، مو طبيعي كيف المواضيع داخلة ببعضها وبحس كل نفس بناخده رح يأثر على اللي جنبنا بطريقة او بأخرى ..

 

ومع الوقت صارت الاضواء تختفي عن ناس وتتسلط على ناس ثانيين، واكثر حدا مختفية اخباره هالايام هية بيان بنت عمي؛ اللي سافرت عالعقبة واستقرت مع زوجها هناك بسبب ظروف شغله ومنعها تتواصل مع أي حدا بالعيلة حتى غنى اللي كانت اكثر من اخت الها ما قدرت تيجي تحضر عرسها ..

 

احمد : كمان شوي رح نطلع عالزفة، كل الأمور تمام ؟

عدي : عقبال زفة اولادك حبيب قلبي أبو يحيى، بانتظاركم عند بيت عمتي

 

اما امجد اكثر اشي بنعرفه عنه انه ملتهي بشغله وبحضر للدكتوراه وبحاول يسافر برا البلد، انتقالا لرنين اللي تركت حسام وبعد ثلاث شهور بالضبط بنسمع خبر خطبتها من صديقه المدعو ( طارق ) تحت ظروف غامضة وتكتمات غريبة من نوعها في عيلتنا وحضرنا جاهتها وخطبتها ومن وقتها كل واحد بحاله، وصولا لاختي غنى وخطبتها من قصي اللي ما حدا من عيلتنا انبسط من قلبه لما سمع عن الخبر ..

 

ديمة ( بتتاملني ) : دخيل هالشخصية اللي ربي اكرمني فيها يا ناس، تؤبر ألبي

عدي ( مبتسم ) : حبيبتي بعيد الشر عنك

 

كنت واقف عالمراية وبجهز حالي لحضور مراسم العرس، كثير انتظرنا هاليوم وفرحنا بقدومه ..

ما بعرف اذا كنت سبب في تعاسة اختي او سعادتها مثل ما انا بعتقد، بس كان كل هدفي اشوف اختي مع رجل حقيقي يخاف ربه فيها ويحافظ عليها ..

 

ديمة ( حاضنيتني ) : احلى اخو عروس بالدنيا كلها

عدي ( اعطيتها بوسة على جبينها وخدها ) : يسعدها اخت العريس المشعشعة المكان بجمالها

 

////

 

سهى : ﺍﻭﻫﺎ ﻳﺎ ﻋﺮﻳﺲ ﺭﻳﺘﻮ ﻣﺒﺎﺭﻙ .. ﺍﻭﻫﺎ ﻳﺎ ﻋﺮﻳﺲ ﺍﻟﺴﺒﻊ ﺑﺮﻛﺎﺕ..ﺍﻭﻫﺎ ﻭﺍﻥ ﺷﺎﺀ ﺍﻟﻠﻪ ﻟﻤﺎ ﺑﻴﺠﻴﻚ ﺻﺒﻲ .. ﺍﻭﻫﺎ ﻭﺑﺘﻜﻤﻞ ﺍﻟﻔﺮﺣﺎﺕ .. ﻟللللييييييش

نهى :اويها ويا وردة ويا ريحانة .. اويها يا فلة وزعفرانة .. اويها وكل الناس عرفانة .. اويها انك يا ام  قصي فرحانة .. اويها وريته ديارك بالحب عمرانة .. لللللييييييييش

 

شباب عيلتنا من كبيرهم لصغيرهم من اهل ابوي واهل امي كلهم تجمعوا وبانتظار تبدا زفتي، انا ما بعرف ليه بعدني موجود ؟ شو عم بعمل ؟ معقول اضل هيك ساكت وما أوقف هالمسخرة اللي عايش فيها ؟ ..

مرقت شهور وشهور وانا بحاول أأجل واماطل رغم كل التجهيزات اللي اكتملت واستمريت باختلاق الحجج لحد ما خلصوا، ومع انتهاء آخر سبب للتاجيل انتهت انفاسي الحُرّة ..

 

////

 

ام عدي : بسم الله ماشاءالله عليكي يا حبيبتي قمر مصور الله يحميكي ويحرسك من العين

 ام بيان ( بتبكي ) : يا عمري تبارك الرحمن ما اجملك … لللللليييييييش

غنى : …

 

نفسي كل شوي بديق ومو قادرة اتفاعل مع حدا ولا حتى ابتسم، اجا اليوم اللي كنت خايفة منه ..

اه خايفة وكتييييير مو مرتاحة، حاسة انتقام قصي مني رح يكون بأقصى درجاته اليوم ..

تهديده الي قبل ما أوافق عليه رح يتنفذ بطريقة احترافية،وما رح اقدر اوقفه او اتراجع بقراري اللي ما بعرف كيف قدرت اضل متمسكة فيه لحد هاللحظة ..

 

رانيا :اويها وعزمونا صحاب الدار .. اويها نبارك ونشوف ونختار .. اويها واخترنا هالصبية .. اويها يخزي العين حورية .. اويها والفرحة باول آذار

ام ماهر / ام عدي / ام بيان / رانيا : لللللييييييييش

أبو عدي ( دمعوا عيونه ) : الله يباركلك يابا ويسهل عليكي

هيثم ( بضحك ) : أي شو هالقمر هاد نياااله نيااااله اللي طلعتي من حظه ونصيبه

أبو بيان ( حضني ) : الف مبارك يا وردتنا الحلوة .. ان شاءالله كل ايامك بيضا مثل فستانك

أبو ماهر ( لبسني عبايته وباس جبيني ) : الله معك يا سيدي وسبع بركات واوصيكي بتقوى الله في زوجك وأهله

غنى ( نزلوا دموعي ) : الله يبارك فيك ويطول عمرك

ام عدي : عقبال فرحتنا بآدم وزيد يا عمي بوجودك

هيثم : تسلمي

 

وصلوا اخواني اللي سبقوا الزفة، وكانت الفرحة بعيون عدي على قد الحزن بعيون عمر ..

ركض عليي عمر وحضني بطريقة ملفتة نزلت دموع كل الموجودين حتى هوة، ما كنت عارفة انه اليوم رح اندم اني ما سمعت كلامه ..

________________________

__________________

 

بيوم كتب الكتاب >>

 

عمر ( بحنية ) : حبيبتي غنى لاخر مرة بطلب منك تفكري، تاكدي انه ما في قوة بالدنيا بتجبرك على الزواج

غنى ( مستغربة ) : شو قصتك عمر بشو احلفلك انه ما حدا غاصبني

عمر ( تنهد ) : انا حاسك مو مبسوطة ولسا العمر قدامك بتتجوزي اللي انتي بتختاريه

غنى : اتطمن اخي انا منيحة وموافقة بكل جوارحي على قصي، أصلا ما في منه مو شايفه كيف عم يتمنى رضاي وعوضني عن كل اشي مشان أوضاع الكورونا

عمر ( مو عاجبه ) : ما في منه قلتيلي .. يلا ان شاء الله يكون عند حسن ظنك بس لا تنسي اني موجود باي لحظة بتحسي حالك مو مرتاحة على طول خبريني

 

________________________

__________________

 

بعدونا عن بعض بصعوبة ولسا عيونا نظراتها ما بتتفسر، بابا وعدي كانوا مستغربين بس يمكن ماما فهمت لانها كانت تعرف اديه مرقت بايام صعبة خلال خطبتي ..

 

ام ماهر : أويها يا قاعدة عالمراتب قعدة البنا..أويهاوالكحل بعيونك زقفتلوا غنا ..أويها حطّي القدم عالقدم ما سمعتلوا رنّا .. أويها يجعل البطن يلّي حملك مسكنوا الجنة

النسوان والبنات : لللللليييييييش

 

سهى : اويها بمقص الذهب قصلوا يا حلاق ..اويها لزينة الشباب وزينة الحارة ..اويها ان وصفت بالوصف ما وفيت ..اويها أمير صغير وتلبقلوا الامارة

النسوان والبنات : لللللييييييش

 

منى : أويها لعقبال ( امجد ) كلكوا قولوا.. أويها إسمراني ومزينوا طولوا

.. أويها لعقبال لفرحته .. أويها أمه وأهله يغنولوا

النسوان والبنات : للللللليييييييش

 

////

 

كان لازم افوت واجامل واضحك واعمل حالي عريس وارقص مع عروستي، وبعدين اشبك ايدي بايدها ونروح على مكان الاحتفال ونكمل المراسم اللي ما الها طعمة بغياب المشاعر ..

 

غنى : شكرا لانك تفاعلت شوي معي قدام الناس

قصي ( قالب وجهي ) : لا تفرحي كثير، باقي شوي ونخلص

غنى ( بغصة ) : ..

 

وأخيرا خلصت الحفلة، وما ضل حدا الا اجا يسلم ويوصيني عليها ..

ما عدا عمر اللي كانت عيونه بتحكي لانه لسانه اكله القط من ساعة ما خطبنا وما بحكي معي الا مسايرة قدام العيلة ..

 

ام عدي ( بتبكي ) : الله معك يا حبيبتي

ام بيان ( بتبكي ) : …

 

////

 

سهى : الحمدلله يا رب اجا هاليوم وارتاح بالي

أبو قصي : لابقله هال… عريس وما حدا قده الله يسعده ويهنيه

عدي : ان شاءالله بتفرح باولاده يا عمي وتكون غنى نعم الكنة والبنت الكم

أبو قصي : الله يرضى عليك وعلى مرتك ويهدي بالكم

ديمة : مرته بس ادعولها تولد قبل ما تفقع

سهى : هههههه ما بتبطلي نهفات

ديمة : عنجد حاسة حالي رح اولد الحقوني

عدي : يلا اركضي ههههه الأولاد بامانتكم يا جماعة

 

////

 

ريم ( بتبكي ) : يا رب يحنن قلبه عليها يارب ما توقعني بخطيتها

علاء ( ماسك ايدها ) : مشان الله ريم ارحميني قلبي مو متحمل

ريم : تعبانة يا علاء .. ضميري بوجعني .. شو اللي خلاني امشي مع امي بهالقرار .. لو شفتها المسكينة كيف كانت مو فرحانة ابدا وكانها عم تستنى حكم اعدامها

علاء ( انحرق قلبي ) : ااخ منك قصي ليه هيك شخصيتك ؟ ليه ما وقفت بوجهنا ورفضت احسن ما توصلنا للي احنا فيه

 

رمت بحالها بين ايديي وما قدرت أوقف بكاها، كانت موجوعة كثير وريم حساسة أصلا فالامور اليوم عندها متأزمة لابعد حد ..

 

علاء ( ثبتت راسها بايدي ) : بكفي حبيبتي والله ما بهون عليي اشوفك بهالحالة ولا تنسي مشان بترضعي ابنك لازم تكون نفسيتك احسن من هيك، صدقيني كل اشي اله حل وما في قصة بتضل متخبية شوفي اخرة امجد وساندرا كيف

ريم : هاي المشكلة انه انا ما بدي إياه يوصل لهالمرحلة، لسا قول قصي أصلا حبيبته تزوجت مو متل امجد اللي ضاعت منه وهوة بتفرج عليها

علاء : يعني مصيبة مين اللي اصعب ؟ الله يكون بعون اهله ويفرجها عليه ما عرفته اليوم قد ما هوة متغير

ريم : الحمدلله عكل حال

 

////

 

احمد ( مقهور ) : كان نفسي امسكه من خوانيقه وادعس عليه لهال… الكذاب

ياسمين ( بتبكي ) : …. الله يسامحه ويسامح اللي مشى بطريقه

احمد ( بضرب على الباب بقبضة ايدي ) : اللي قاهرني تمثيله ولا عباله وعامل فيها عريس، والمسكينة جنبه مجرد ضحية

ياسمين : ما بعرف هالمرة ليه ما قدرت اعمل اشي او اساعد حدا، ضميري كتير بعزبني احمد .. مستحقرة حالي لدرجة لا توصف

 

زاد غضبي بس سمعت كلامها وصفنت فيها انه شو اللي بتحكيه قاعدة، بس سكوتي اعطاني فرصة افكر قبل ما احكي أي اشي ..

فعلا لو ياسمين اتدخلت ما كان تم هالعرس ولا الخطبة من أساس، بس يمكن صار عندها خوف من أي اشي بتعلق بخالتي سهى وصارت تمنع حالها من أي تدخل باولادها ..

 

////

 

فرح : وهي خلصنا من قصي، خليني ارجع لدراستي بعد ما انام نومة عميقة

رنين / اسيل : ههههههه ادخلي القوقعة وما تطلعي الا بعد الامتحانات

فرح : بس هالمسكينة غنى ابدا ما حسيتها مبسوطة، شو رايكم انتوا ؟

رنين : انا اللي رح اسالكم لو شفتوني هيك مو مبسوطة متلها شو كنتوا رح تعملوا ؟

اسيل : بعيد الشر عنا، الهي يجمع كل وحدة مع حبها الحقيقي بالحلال ويكلل صبرها بالهنا والسعادة

فرح ( غمضت عيونها ) : اميييييين

رنين ( عيونها عليي ) : نعم يختي ؟

فرح ( استدركت حالها ) : قصدي الله يجمعني مع المعدل اللي بحبه ويريحني من هالتوجيهي

 

ما قدرنا نسايرها ونعمل حالنا صدقناها، رنين تنهدت وراحت تنام وانا غطيت حالي ومسكت موبايلي اشوف انس ازا منزل صور اله واتامله حتى يغلبني النوم ..

 

////

 

ما حب عمر نرجع على بيتنا ونترك مرت خالي بأول ليلة بعد زواج غنى، وفعلا معه حق حتى خالي كان تعبان وكل شوي يمرق يفتح باب غرفتها بدون أي سبب ويرجع يسكرها عاساس انه مخربط ..

 

عمر ( نص ضحكة ) : خلص ارتاح يابا انا بقوم بالواجب عنك

أبو عدي ( متفاجا ) : اه ؟ لا لا بس كنت بدور على شغلة مو عارف امك وين حطتها

آيات ( كاتمة ضحكتي ) : احكيلي عنها خالو انا بدورلك عليها

أبو عدي : ما بتقصري، خلص تصبحوا على خير مو مهمة بكرا بشوفها

 

عمر ( بحزن ) : الله يسامحك يا اختي

آيات ( مسكت ايده بحنية ) : ان شاءالله بتكون الأمور احسن من توقعاتك، متاكدة انها رح تكون مبسوطة مع قصي

عمر ( مكشر وببلع ريقه بصعوبة ) : مبسوطة ؟ بتحلمي .. من لما وقعت على كتب كتابها انتهت سعادتها للابد

آيات ( مصدومة ) : انت عن شو بتحكي ؟ هلا بدك تحكيلي كل اشي عمر ممنوع تخبي عني

 

ما تخيلت بحياتي اسمع هيك سيناريو تافه وغبي، ما حدا حب وعشق غير حضرة السيد قصي ؟! ..

يعني امجد وبيان تعزبوا كتير  ومتاكدة انها لما تركته كان لسبب مهم وما قدر يحكيلنا إياه، وباقي قصتهم موجعة بشكل لا يوصف ..

اما قصي فوق ما هية خانته وتركته يحلم فيها كمان بحمل بنت الناس جميلة انه بده يتجوزها ؟، وسايق فيها حبيب امه المرضي وسامع كلامها ومستقوي على غنى ! ..

 

عمر : ما بعرف اذا في حدا غيري انا وامجد بعرف بالموضوع، المهم حاولي تكتمي قد ما تقدري

آيات ( صفنت شوي ) : دقيقة عمر، يوم سهرة ديمة اجت بنت وقالت ياسمين انه هاي كنة خالتو سهى المستقلبية، معقول تكون نفسها ؟

عمر ( متفاجا ) : وغنى سمعتها ؟

آيات : ما بعرف والله بس ما بتوقع

عمر ( معصب ) : معناته ياسمين بتعرف، وليه ما اتدخلت ومنعت غنى توافق عليه ؟

آيات ( مو عاجبني ) : شو دخلها ؟ من وين لوين لتتدخل ؟ بعدين اكيد ما كانت متخيلة انه يكون لسا متعلق بالماضي

عمر : مو قلتيلي ناداها بالخطبة وخلاها تلبسها شالة ؟

آيات ( بفكر ) : معك حق، صدقني عمر مو بدافع عن ياسمين بس اكيد لو قدرت تساعدها ما قصرت

 

////

 

دخلنا على بيتنا بعد رفضي لحجز أي فندق او ما شابه حتى اقضي فيه ليلة عرسنا الميمون، لانه بكل بساطة عندي نوايا أخرى ..

 

قصي : يلا نتعشى، مو جوعانة ؟

غنى ( خجلانة ) : .. عادي باكل شوي

 

كنت باكل وماخد راحتي، طبعا ما عبرتها ولا سالت فيها اذا اكلت او لا ..

شفتها قامت تغسل بس مو عارفة تتحرك منيح بالبدلة، كانت حلوة وأول مرة بحس حالي منتبه لملامحها ..

بس غمضت عيوني حتى ما انسى انتقامي، واستمريت بقساوة قلبي اللي ما بعرف كيف قدرت اصطنعها ..

 

قصي ( بضب بالاكل ) : غنى اقعدي شوي بدي احكي معك كلمتين مهمين

 

////

 

اثار اهتمامي لما طلب يحكي معي، كنت متاملة انه الحياة تضحكلي من جديد وربي يعوض صبري ..

بس ربنا لسا مستمر بابتلائي، الف الحمدلله يا رب على كل اشي منك وانا صابرة لاخر نفس بحياتي ومتاكدة انك ما رح تترك قلب بنت متلي يتعزب ..

 

قصي ( بدخن وعيونه مليانة دموع ) : تصبحي على خير

 

أي خير هاد بعد اللي سمعته منك ؟!، كنت برجف ومو عارفة شو اعمل ..

خطر ببالي كتير ارن على عمر يجي ياخدني، بس استدركت حالي وكملت طريقي لغرفة نومي اللي صارت خاصة فيي ..

 

________________________

__________________

 

قصي : اسمعيني منيح يا بنت خالي، انتي غالية عندي ولولا اني بعرفك وما بهون عليي اهلك ولا انتي ما كنا رح نكون هون اليوم بهالبيت وتحت سقف واحد بجمعنا، بقدر اعمل فيكي مثل ما امجد عمل في ساندرا بس انتي ما بتستاهلي، مشان هيك انا واياكي رح نعيش كل واحد بغرفة منفصلة وما رح اقرب عليكي لانه بكل بساطة انا مستحيل المس أي بنت ما بحبها

غنى ( مصدومة ) : شو يعني ؟

قصي ( غمض عيونه وبلع ريقه ) : غنى انا ما بحبك وما حبيتك وما بعتبرك اكثر من بنت خالي اللي وعيت عالدنيا وانا واياها مثل الاخوة، مشان هيك اما بتستمري بحياتك معي وممكن مع الأيام تتولد مشاعر بيناتنا او بننهي زواجنا المزيف بعد فترة من الزمن بس انتي بتكوني كسبتي عذريتك

 

________________________

__________________

 

قاعدة على كرسي التسريحة ومحتارة بشو ابدا ولا من وين ؟!، بمسح مكياجي ولا دموعي ..

بفك تسريحتي ولا فستاني اللي لازم زوجي يساعدني فيهم، بس انا وين تفكيري ووين واقعي المرير ..

 

___________________________________________________________

 

” حتى لو تصرفت معك بغرابة، لو حالت بيننا ألف مشكلة، إعلم أن كل نوافذ قلبي تطل عليك”

 

صحينا على احلى خبر، وما صدقنا انه أخيرا رح نشوف البنوتة اللي اكيد اكيد رح تكون قمر متل أمها ..

 

حمزة : صباح الخير، بشوف بتلبسي عندكم كمان عرس اليوم ؟

سيرين ( مزعوجة ) : كمان عرس ؟ وانت مو معزوم معي مثلا ؟ خلينا بالمفيد وكمل فرحتي بالله

حمزة ( حامل ليليان وبلعبها ) : ايوا فرحينا معك

سيرين : دمدوم ولدت أخيرا وانا رايحة عالمستشفى وانت دير بالك على عمورة ولولو ما بتاخر

حمزة ( بخبث ) : الف الف الحمدلله عسلامتهم، وقديه بتعطيني عالساعة ؟

سيرين ( كاتمة ضحكتي ) : عامل خصومات هالايام ؟

حمزة : لا طبعا حضرتك .. اسعارنا ثابتة .. بتعرفي جودة ومصداقية

سيرين : هههههه تكرم

 

قاطعت مسخرتنا رنة خالتو مها على موبايلي بتستعجلني، رميتله بوسة بهالواء وطلعت من البيت ..

 

////

 

مها : يمة من كيد النسوان شو عاملة بالزلمة ولي لحتى قبل يخلي اولادك ؟

سيرين ( بسبل عيوني ) : أولادنا خالتو .. متل ما هوة بكون عنده مشاوير ضرورية ولازم ما يكون معه عيلة انا كمان عندي هيك ظروف

رنين : لازمني كم حصة عندك سيسو وماما كمان لانه من هلا طارق بنبه عليي قال ما بحب العناية بالاطفال ما بفهم فيهم، خصوصا بس المحله انه ياسمين عنا بدون أولادها هههههه

مها / سيرين : ههههههههه ابشري

 

وصلت ياسمين واخدتنا عالمستشفى ركض واحنا عاملين عرس بالسيارة وبنغني من فرحتنا، لقينا الكل واصل ما عدا بيت حماها ..

 

ريم : اهلا وسهلا بخالات العروس

سيرين : احلى خالة ريمو وأخيرا، ضل علينا بنت ياسمين وبتكمل الشلة

 

تشردقت ياسمين بالقهوة السادة اللي ضيفتها إياها خالتو، وغصت ..

 

ياسمين ( بتكح ) : بنت حماي بالرضاعة ورضينا، يعني بدي احكي عنك حماتي أي والله حماتي عمرها ما لمحت على هالموضوع

منى : ههههههه هاي سيسو بتقوم بالواجب ( غمزت ) يمكن اخوها موصيها

عدي : المهم وين أبو عمرو كان اجا ؟

سيرين : بسلم عليك وبدعي تكون بنتك من الذرية الصالحة

الجميع : هههههههههه

آيات ( اجت فجاة ) : سلاااام

ام عدي ( مع آيات وستي ) : لللللليش

ديمة ( بتلطم ) : نقزت البنت هههههه اهلا وسهلا

آيات ( بتسلم على ديمة ) : الف الف مبارك الحمدلله عالسلامة

ديمة : الله يسلمك، شفتي هي اجت العنصر الرابع ضلت الخامسة بنت اخوكي

ياسمين : ناويين اتطلعوني من هون زعلانة ؟

سيرين ( بتقلد حماتها ) : يلا يا ماما افطميني وجيبيلي اخو او اخت العب معه

البنات : يا رب تيجي بنت حماكي هلا تسمعك

سيرين : مهية بنت حماي اكتر وحدة بتعاني، وضلت وراها لفاولت عليها

الجميع : رانيا حامل !!!

عدي ( عصب ) : يا ربي دخيلك ولك روحي احسن ما يجي الكادر الطبي يقلعونا من هون

ام ماهر : الف الحمدلله، ربي يطعمك يا هيثم الصبيان ويفرح قلبك يا حبيبي

 

////

 

حمزة ( بضحك ) : تعال خذ أولاد اختك وروحها عندك اليوم

احمد ( فاهم عليه ) : من عيوني خصوصا اني فاتح حضانة هالفترة

حمزة ( فرط ) : ههههههههههه مهو قلت الحال من بعضه خلينا ننبسط مع بعض احسن ما كل واحد فينا بعيط مع أولاده بجهة

احمد : طيب حياك الله تعال انت واياهم لانه انا مستحيل اطلع

حمزة : والله وانا كمان صعب اطلع فيهم بخاف صراحة

احمد : المهم شو رايك بالعرس مبارح انبسطت ؟

حمزة ( تنهد ) : بصراحة في اشي غريب، يعني ما حسيت قصي كثير متلهف او بهيئة عريس مع انه حاول جهده ها، بس مو من قلبه ذكرني بعرس امجد على ساندرا للامانة

احمد ( مقهور ) : وانا نفس شعورك .. ومقهور اكثر على امجد اللي لحد هسة ما تحسن وضعه

حمزة : يا رب من عندك مثل ما جمعتني بسيرين بغير حول ولا قوة مني تجمع امجد مع بيان

احمد ( مبسوط ) : اميييييين من كل قلبي ومؤمن بالاستجابة

 

////

 

حنين : صباح الخير .. زمان صحيت ؟

وائل : صباح الورد .. قبل شوي قلت بشرب قهوتي على رواق .. شو الاخبار ليه تلفونك كان برن كتير ؟

حنين ( بشرب قهوة من فنجانه ) : اه ديمة ولدت وكانوا بتفقوا مين يروح عندها

وائل ( بتاملني ) : مبارك عقبالك هههه

حنين : يييي مو عارفة كيف افتح الموضوع مع ماما، طول مبارح وتحكيلي حاسستك مخبية اشي عليي

وائل : ههههههه عادي إحساس الام، صراحة انا خبرت عمي واحمد كان معنا

حنين : يا فرحتي .. هلا بتقلي انا اخر من يعلم، المهم  راحوا عالمستشفى بس انا قلتلهم بس تطلع على بيتها بروحلها

وائل : اكيد أبو ماهر فرحته من فرحتنا والله غالي

حنين ( مبتسمة ) : تسلم .. حبيبك ماهر انت ههههه

وائل : اه والله بحبه هالولد من لما كان صغير، وليث حبيبي ان شاءالله بكبر وبصير من احسن الشباب

حنين ( بدلع ) : لمين بده يطلع غير لابوه

وائل ( ايده بشعري ) :  حبيبتي انتي .. بس بتعرفي اني ما نمت منيح .. كنت افكر بعرس قصي مبارح حسيته مو مبسوط كثير .. شو رايك ؟

حنين : رأيي الله يعين غنى عليه .. وان شاءالله تكون رنين اختارت الصواب لما ارتبطت بطارق

وائل : صراحة شتان بينه وبين حسام .. حتى لو انهم أصحاب بس مختلفين .. حتى امجد مختلف عنهم .. يعني كل واحد شخصية مختلفة

حنين : امجد احسن منهم صح ؟

وائل : ما بعرف كثير عن طارق بس حاسه عارف طريقه وشو اللي بده إياه اكثر من امجد .. بكفي قصته مع بيان وساندرا وزواجه اللي ما استفاد منه الا المخاسر ووجع القلب لعيلته

حنين : الله يهون عليهم دار خالتي موجوع قلبهم عليه .. ( ايدي على بطني ) وائل .. اخ .. بطني يا وائل

وائل ( بقلق ) : سلامتك شو القصة مال بطنك .. حنين ردي عليي

حنين ( متمددة ) : ما بعرف شو صابني فجاة خليني ارتاح شوي هيك يمكن يروح الوجع

وائل : ماشي ارتاحي وبنشوف بلكي نروح عالدكتورة افضل

 

////

 

قصي ( مستغرب ) : صباح الخير

غنى ( مطنشة ) : صباح النور .. عن ازنك انا رايحة عالمستشفى اشوف مرت اخوي وبنتها

قصي ( مو عاجبني ) : نعم ؟ وين طالعة بصباحية عرسك هسة

فجاة بتلاقيهم كلهم اجوا

غنى ( رافعة حواجبها ) : صباحية عرسي ؟ لا انا مشان هيك بدي اختصر عليهم الطريق بلا ما يجوا ويقعدوا يسالوك ازا كل اشي تمام او لا ؟ بتعرف هالسيرة متوارثة عربيا وبلا ما تنحرج

 

وصلت لعند الباب وقبل ما تفتحه لفت وجهها عليي ..

 

غنى ( زمت شفايفها ) : صحيح بس في شنتة عالارض يا ريت ترفعها فوق الخزانة لاني ما قدرت احملها .. سلام

 

ماشاءالله عليكي بديتي حربك على بكير وما حبيتي اتضيعي وقت، أي شو عليه وانا بالمرصاد خليني اتسلى شوي لحد ما اقدر ارجع حريتي ..

كنت لابس وجاهز ولحقتها، شحطت بريك جنبها ونقزت كانت لسا بتستنى بتكسي او ما بعرف بشو بدها تروح وكيف ..

 

قصي ( نزلت فتحتلها الباب ) : فكرت بكلامك وطلع صح .. بس لازم نروح سوا بما انها اختي كمان

غنى ( بطرف عينها ) : اوك .. هيك أوجه اروح مع زوجي

 

ركبت جنبي وفعلا شفت بعيونها نار، شكله السحر انقلب عالساحر ورح ابدا آكل العصي بدل ما اعدها ..

حاولت اطري الجو واخفف دمي، عاساس انا واياها أصدقاء وهية طايقتني ..

 

قصي : ما لحقت ارفع الشنتة اول ما نرجع ان شاءالله بساعدك بكل اشي، احنا لازم نكون أصدقاء او ما شابه المهم مو أعداء .. اتفقنا ؟

غنى ( بلا مبالاة ) : اللي بريحك اكيد بكون مناسب الي، ما تستنى ردي على كل اشي بخطر ببالك تحكيه، يعني مثلا لو شفتني قاعدة عند التلفزيون وما بتابع شغلة وحبيت انت تحضر وناسبني بضل قاعدة ازا ما انسجمت بروح على غرفتي او بحضر على موبايلي اللي بدي إياه ما في مشكلة

قصي :  وبالنسبة للاكل ما …

غنى ( لفت وجهها عليي واعطتني نظرة قوية ) : واجباتي تجاهك رح تكون على اكمل وجه من طبخ وغسيل وتنضيف ما تهكل هم ابدا، لو احتجت مساعدتك اكيد ما رح تقصر صح ؟

 

لا خليني ساكت احسن، الحمدلله  ما طولنا بالطريق ووصلنا عالمستشفى ..

وماشاءالله عم العروسة الصغيرة بالاستقبال، حاولت اتخفى بس لقطني ..

 

عمر ( بمسخرة ) : شو هالنشاط يا عرسان شكلكم نايمين قبلنا مبارح ؟

قصي ( مرتبك ) : لا والله بس ما حبينا نضيع علينا لحظات السعادة معكم بالحفيدة الجديدة

غنى ( مبسوطة ) : كيفها شفتها ؟ اكيد بتشبهني صح ؟

 

قبل ما يجاوبها عمر كانت خالتي منى قدامنا؛ جاية تمسك الين بدل ابوها مشان يطلع يشوف بنت اخوه  ..

 

منى ( مبتسمة ) : هاي عمرانة هون، والعرسان منورين يا حبايبي الف مبارك

غنى ( بتسلم عليها بطرف ايدها ) : الله يبارك فيكي

قصي ( بسلم عليها ) : اجينا نبارك ما لحقنا نحتفل اجا مين يضارب علينا

عمر ( بجكر ) : على نياتكم ترزقون

غنى : الله يسامحك، بالعكس احلى تاريخ انها اجت بيوم زواج خالها وعمتها .. يلا نطلع نشوفها

عمر : امشي نشوف النمرة الجديدة .. الله يستر من بنت ديمة

منى : هههههه ولا كلمة ها عندك بنت وامها آيات

قصي : ايوا هيك يسلم ثمك خالتي

 

زورني بطريقة ملفتة حتى غنى كتمت ضحكتها وكانه انتصرت وسجلت اول نقطة بانه الها سند وفي حدا فاهم عليي وعلى تمثيلي غيرها ..

بس اللي ما فهمته هية ليه واثقة من عمر لهالدرجة ؟ معقول يكون حاكيلها اشي عني وقررت انها تحاول معي بدل ما ترفضني وانا خيبت املها بهالمحاولة ؟ .. لا لا مستحيل تكون بتعرف .. يا حبيبي على وضعي لساتني بأول يوم وصرت امشي لحالي ومرتي مع اخوها ..

 

عمر ( من بعيد بضحك ) : السلاااام عليكم

الجميع : وعليكم السلام

سهى / ام عدي ( بصدمة ) : قصي وغنى ؟!!! شو بتعملوا

غنى ( بلا مبالاة ) : صرنا ب٢٠٢١ ما في داعي نضل نعيد ونزيد ببروتوكلات زمان

قصي ( مسكت ايدها ) : يعني رح تخرب الدنيا لو طلعنا بصباحية عرسنا قبل ما حدا يجي يباركلنا او يقولونا صباحية مباركة يا عرسان

 

////

 

كان نفسي اخنقه وهوة بحكي بكل ثقة، قال عرسان !

 

آيات ( بهمس ) : ما اتقل دمك

 

////

 

وقفت استنى عدي يجيبب بنته مشان اشوفها برا الغرفة، وفات قصي مع غنى يسلم على اخته ..

 

عمر ( حامل البيبي ) : حبيبتي يا عمو الله يحميكي ويجعل ايامك حلوة مثلك

عدي : الله يرضى عليك ويحميلك الين

قصي ( اخذها مني ) : تبارك الله عليكي طالعة لعمتك نعومة وامورة

 

شو الحل مع هيك منافق، اجا ببالي اعطيه كف اخلع نيعه ..

بالرغم انه شافها بالغرفة، بس اجا يمثل قدام عدي ويكمل مسخرته عندي ..

 

////

 

كزبت حالي لما سمعت هالجملة منها، شكله العيلة كلها حاسة عليك يا قصي وشاكين بمصداقيتك كعريس ..

 

ياسمين ( بهمس ) : اسكتي لتسمعك امه

آيات ( متدايقة ) : مو خايفة منها

سيرين ( بهمس ) : شوفي ما اقواها قال ما بدها تسلم على حدا خايفة من كورونا، ومبارح كانت تعبطنا وتعيط ليش ؟

ياسمين / آيات ( كاتمين ضحكتنا ) :  اردحيلها

سيرين : شو دخلني .. امشي نروح خلص باركنا وشفناها

رنين : وانا مبسوطة عحالي ورايحة اسلم عليها مرقت عني وما عبرتني

ياسمين : خايفة يكون ابن خالتنا فضحنا يا بنات واجت تنتقم ههههه

آيات : هههههه يخزي شيطانك

 

////

 

كلام العيون اليوم كان كتير ومو مفهوم، شو مخبى ورا قصة قصي وزواجه من غنى ؟، وليه آيات اليوم مو طايقته وبتتهامس عليه !!

 

سيرين ( بسلم عليهم ) : بنشوفكم قريبا

ديمة : ممنوع اصطحاب الأطفال بالمباركة

ريم ( بمسخرة ) : خايفة يجي عريس لبنتها من اول يوم، ريحتينا من المراكضة وراهم

سيرين ( بضحك ) : افهم انك طمعانة بابني مثلا ؟

ياسمين : بتحلمي حبيبتي هاي محجوزة ليحيى

ديمة : استغفر الله العظيم ( بتسبل عيونها ) انا بنتي بتاخد اللي بتحبه وبحبها وبس انتي واياها كل وحدة اتضب ابنها ايوا

ريم : نضبهم ليه ؟ لازم نعرضهم عشان بنتك تختار الحب

سهى ( بنبرة حادة ) : يا عدي .. تعال سكت مرتك

سيرين : يلا ياسمين نهرب

 

////

 

وصلنا الاستقبال وكانت ماما تستنى فينا بفارغ الصبر، طبعا بسبب بنتي اللي مجمعة المستشفى عليها قد ما لفت وراها ..

 

آيات : ياسمين عادي اجي معك اروح عندكم عالبيت ؟

منى : هلا بيجي اخوكي ياخدنا ماما يمكن ما معهم وسع

ياسمين ( بتقلب عيونها بيني وبن ماما ) : خالتو رح اخدك انتي وآيات وماما وعمر بروح سيرين ورنين، شو رايكم ؟

سيرين ( بصدمة ) : انا اروح مع عمر !!

مها : انا ليه اجي معك ؟

ياسمين : زمان ما اجيتي عندي شوفيها لو قعدتي شوي وبعدين بنوصلك ؟

سيرين : لا انا عندي اقتراح تاني، مين جاي ياخدك خالتو منى ؟ بروحني انا ورنين وخالتو مها وهيك انحلت القصة

آيات : بنقلك البنت بدها أمها

مها : لا خليني اروح اشوف حنين هلا باخد تكسي حاسستها مو على بعضها

منى : حكالي احمد انها حامل  ان شاءالله تقوم بالسلامة

البنات ( بصدمة ) : جد !!!

مها : امين .. والله عرفت عشان هيك زياد مبسوط وبقلي اعزميها ودلليها ومقصرين معها

ياسمين : ضمير زياد النايم صحي هههههه

سيرين : اعملي حالك ما بتعرفي خالتو خليها تفاجاك

مها ( بتهز راسها ) : بصير خير

نهى : يلا مبارك .. عقبال العرسان ورنوشة على خير

رنين :  تسلمي .. يلا ماما بنروح انا واياكي عليها وهي سيرين بتروح مع عمر وخلصت القصة

منى : هيهم اجو .. يلا وين امي ؟

غنى : ورانا .. احنا لازم نطلع .. بنشوفكم

سيرين : قصي خدني معك لو سمحت وروحني عشان ياسمين مروحة على بيتها

قصي ( عيونه على غنى ) : طيب يلا امشي

غنى ( بانزعاج ) : طريقنا مختلفة بنعتزر .. هي عمر بوصلك انا بحكيله

 

اتطلعوا ماما وخالاتي مها ونهى بطريقة ملفتة ببعض، صراحة كلنا ما عرفنا شو نتصرف خصوصا انه سيرين انحمقت وقصي انحرج منها لانه طريقهم مو بعيدة لهالدرجة ..

 

قصي ( بجدية ) : تفضلي سيرين بغير الطريق على شانك ولو

سيرين ( عيونها عالباب ) : لا هي اجا علاء الحمدلله، حبيبي طول عمره رجل المواقف الصعبة

علاء ( بضحك ) : لما شفت هالتجمع كنت بدي الف وارجع بس خفت اتورط بلسانكم  وبالمرة ابوس العريس واتطمن عليه

غنى ( شدت قصي بقوة ) : لا لا بنخاف ننعدي لا سمح الله احنا هون بمستشفى .. يلا سلام

 

نفس الصدمة ركبت علاء وما تنفس بكلمة وزاد ذهوله اكتر لانه ريم كانت نازلة تركض وكانه حدا بلحق فيها، وقفت بس شافتنا ..

 

ريم : يلا بسرعة أولادنا بالسيارة لحالهم

نهى : صحيح ماما كيف بتنزل وبتتركهم ؟

علاء ( معجوق ) : سلمى معها تلفون

ريم : مهية اتصلت فيي بتعيط قال بابا تركنا وراح

الجميع : هههههههه

علاء ( عصب ) : هسة بفرجيها .. يلا ماما جاية معي صح ؟

سيرين : وانا كمان علاء معلش صح ؟

ريم : يلا بسرعة انا سابقتكم

مها : شوي شوي خالتو

ياسمين / آيات : مشعوطين صح ؟

علاء : والله صرعوني .. انتي وين جوزك ؟

آيات : ما بعرف يمكن مع اخوه وامه ضل

علاء : طيب انا حكيت لعدي جاي اشوف بنته واباركله هيك بتطلعوني بالخجلة ؟

نهى : لا ما عاش اللي بده يخجلك، احنا بالسيارة بنستناك اطلع وسلم وبارك براحتك

سيرين : اكيد، امشوا صبايا

 

////

 

بعد ما روح علاء والجميع وضليت مع ديمة وعمتي، حسيت فعلا انه شكوكي بمحلها وحتما صاير اشي وانا ما عندي علم فيه ..

حبيت الطف الجو مع عمتي عشان قصي وغنى، وجيتهم عالمستشفى بأسلوب مو مألوف ابدا ..

 

عدي : ان شاءالله بكرا بتعوضويلهم الصباحية  انتي وامي .. الله يهديهم

سهى ( ببرود ) : صباحية مين ؟ عندي بنتي نفساء اهتمامي فيها  أولى

عدي ( متفاجأ ) : اه طبعا .. اللي بتشوفيه مناسب اعمليه

ديمة : … بس كان نفسي احكيلها مدام ما بدك تسلمي ليه تحملي بيبي وتبوسيها ؟ يعني خايفة منا كلنا واحنا ما بطلعلنا نخاف منك !

سهى : كان حكيتي ؟ هاي المواضيع ما فيها خجل متل ما هية تصرفت كان لازم تردي

ديمة ( بتباكي ) : خفت عدي يزعل مني وامه تقول كسفت عمتها الوحيدة

 

كنت بقلب عيوني بينهم ومو فاهم عن شو بحكوا، لحد ما استنتجت من كلامها الأخير انه الموضوع كله محوره غنى ..

 

عدي : ما فهمت مالها غنى ؟

سهى : ولا اشي عمتو لا تاخد ببالك، شو رايك تروح ترتاح شوي الك من مبارح ما نمت وبتشوف اولادك شو لازمهم

 

شفت ديمة مو متفاعلة لا معي ولا مع أمها، هزيت براسي واستأذنت منهم وضليت مروح ..

 

////

 

علاء ( ميت ضحك ) : هههههههههههههههههههههه جنس حوا ما اله حل ابدا

سيرين : ااخ بس هاد اللي بقهرك انه عدوة حواء .. حواء نفسها

ريم : قلتيلي طريقهم بعيدة اه ؟ ماشي يا غنى

نهى : طولي بالك انتي واياها مالكم ؟ برضو البنت عروس وحقها تكون مع زوجها بالسيارة بأول يوم الهم

علاء : اه صح كلامك بالنسبة للتوصيلة انا معك، بس شو مشان السلامات ؟

سيرين : دخيلك ريحتنا، بس قولة ياسمين شكله ابن خالتنا فاضحنا مبارح ههههه

ريم ( قاطعتها بشهقة ) : يييييييي نعم ؟ كيف بتسمحوا لحالكم تحكوا هيك عنه ؟

علاء : استغفر الله العظيم، انا برايي ما نكثر كلام بالموضوع ونترك كل واحد بحاله ولا شو رايك يمة ؟

نهى : والله انا ما اتدخلت وهيني بسكت فيكم بس ما حدا سامعني

سيرين : سوري ريم اكيد بنمزح وشو ما كان صاير بينهم العيلة ما دخلها فكان غلط منها تتعامل هيك معنا

ريم : والله يا سيرين مقهورة اكتر وحدة فيكم بس خلص غلطة ورح ندفع تمنها غالي .. هيك الظاهر

نهى : انا قلبي على امك خايفة تنحمق كتير ويصير فيها اشي لا سمح الله

علاء : والله وحياتك سوسو ما في اشطر منها بالتطنيش والزبل، راقبي بصمت وشوفي اختك لما تصير حماية هههههه

 

يا الهي كمية الكلام اللي رح يصير بعيلتنا السعيدة من ورا هالجوازة اللي ما الها طعمة، وفعلا مثل ما قالت ريم غلطة ورح ندفع ثمنها غالي ..

 

////

 

احمد : اهلا وسهلا بخالات البيبي … شو كان اسمها ؟

ياسمين / آيات ( بضحك ) : اهلين بعمو احمد .. لسا ما سموها

احمد : كيفك ؟ شو هالزيارة الحلوة

آيات : الحمدلله .. تسلم قلت خليني اقعد برواق شوي زمان ما اجيت لحالي

ياسمين : قبل ما نبدا بالقعدة شو بتحبي تتغدي ؟

احمد : رتبي البيت اول كيف جايبة ضيوف عندك ؟

آيات : مو ضيفة انا عادي كل اللي عندهم أطفال هيك وضعهم

ياسمين : لو سمحتي عم تحكي مع احمد بيك النضايفي المتكتك ما بتحمل أي اشي والأطفال مو عذر

احمد ( بنبرة حادة ) : مو عاجبك يا بنت مها .. وينها امك كان اجت وشافت بيت بنتها اللي طالعة من الصبح زيارات

آيات ( قاطعتني وما سمحت لياسمين ترد ) : احمد لو سمحت ممكن تتركني شوي مع ياسمين حابة احكي معها بموضوع لحالنا

احمد ( باهتمام ) : حاسس في بقلبك وبثمك كلام من لما فتي، هاتي اشوف انا وياسمين واحد ما بنخبي على بعض اشي

آيات ( عيونها على ياسمين ) : اكيد ؟

 

تنهدت ياسمين وما عرفت شو ترد بس لما حكت آيات شو اللي عندها؛ انصدمنا بكلامها كثير وفكرنا بعمق وما كان في أي جواب شافي لتساؤلاتها ..

 

ياسمين ( بحسرة ) : صدقيني الموضوع اكبر من اني اتدخل فيه، حتى احمد مبارح تقريبا كسر حيطان البيت من كتر ما ضرب عليهم

آيات ( مستغربة ) : كنت تعرف انه ما بحبها ؟

احمد : الحب اشي واللي صار مع قصي اشي ثاني، هوة مو متقبل فكرة زواجه لا بغنى ولا غيرها مو مثل امجد لما تجوز ساندرا لانه كمان ما بحبها بس كان بده يتزوج

ياسمين : بالزبط هاد اللي صار، فكرة تقبل الواقع صعبة وبدها درجة عالية من الرضا بالقضاء والقدر

آيات : ولمتى حضرته بده يضل مو متقبل زواج حبيبته السابقة ؟

احمد : هاد اللي بنحكي فيه اتركوا الحياة اتداوي جروح اللي علمها الزمن في قلوبنا، لو تركته امه يداوي حاله وينسى ويطلب منها تزوجه كانت الأمور افضل بكثير من اللي بصير

ياسمين : او لو خطبتله وحدة غير غنى عالاقل لانه اخوها بعرف حقيقة كل اشي مخفي، فلو كان قصي بده يمثل الرضا بالقدر اللي انكتبله ما رح يقدر يزبط الدور بنفس الاتقان لو كان مع اشخاص تانيين

 

كل كلامنا لا بقدم ولا بأخر ولا بفيد، وقع الفاس بالراس والباقي على أصحاب الشأن‏ ولكن ‏تصرفات غنى اليوم ‏بتدل ‏على أنها بدأت تكشف أسرار هذا الزواج وصار لازم تنتقم من اللي كان السبب فيه ..

 

////

 

عدي ( معصب ) : شو اللي صار اليوم ؟ ما لحقت تتجوز بدينا أفلام !!

أبو عدي : اهدى يابا مو هيك بتنحل الأمور

عدي ( بغضب ) : مبارح كانت ما احلاها وصاحبة الكل

ام عدي : ايدي على قلبي من عمتك لتحطها براسها

أبو عدي : مثل ما قدمتي لكناينك بتلاقي ببنتك ..

عدي ( قاطعتهم ) : ديمة مو ماخذة ببالها اشي عليكي وعمتي مو حقودة بالعكس لو انها هيك كان ما فكرت تأخذ بنتك لابنها

 

////

 

ايدي على قلبي ليكون عمتي تحط غنى براسها مثل ما قال ابوي، راسي رح ينفجر من احداث اليوم ..

بعثت آيات عند مرت اخوها لتفهم منها اذا قصي لسا حاطط بباله حبيبته القديمة مثل ما انا بفكر ولا نسيها، وبنفس الوقت كان لازم امي تكون بعيدة عن أي حدا بالعيلة بعد ما شافت بنتها بصباحية عرسها واكيد بتكون خايفة تسمع كلام عن تصرفاتها مع عمتي وبناتها ..

 

عمر : اه حبيبتي شوصار معك ؟

آيات : رح اضل عندهم اتغدى بتحب تيجي ؟

عمر : آيات ؟ افهمي عليي بسالك عن موضوع قصي

آيات : ما بقدر احكيلك عالواتس بس اشوفك بفهمك كل اشي

عمر : طيب انا رايح على شغلي وبس اخلص باجي اخذك .. ديري بالك على حالك والين

آيات : تمام .. بنحسب حسابك بالغدا وبس تيجي تروحني بتاكل

 

انا عقلي بشو وانتي بشو، عاملة حالك قلقانة عليي وانتي يا دوب تطبخي ببيتك ..

والي عين اتفلسف عليكي بعد كل اشي عملته بحالي مشانك، لمتى رح اضل بهالدوامة ؟ ليه هيك بحس حالي بدون مشاعر ؟ ..

معقول قصي عايش مثلي وحاسس باحساسي، ولا انا بتوهم ؟ ..

 

////

 

ريم : طيب ليه ما حكيتي لما وصلناكي ؟

سيرين : ما كنت اعرف والله وعقلي بالاولاد

ريم : بصراحة سيرين انا بحاجتك، يعني هيك بدي حدا اقعد معه وانسى همومي

سيرين ( بتضحك ).: ابشري .. استني اضب البقجة

ريم : بحكي جد والله، بس خليني اخبر علاء عشان يجيبك

 

 طلعت من غرفتي اشوفه لقيته فارط ضحك وابصر مع مين ..

 

علاء : دقيقة بحكي مع عدي

 

////

 

علاء : هلا والله بالعديل الغالي

عدي ( مخنوق ) : ازعجتك ؟

علاء ( مستغرب ) : ديمة وبنتها بخير ؟

عدي : الحمدلله كل اشي تمام، انا عند اهلي

علاء : شكلك متدايق .. صاير اشي ؟

 

حكيت لعلاء اللي سمعته من امي ومن ديمة وعمتي، ما كان مصدوم كثير وشكلها الاخبار واصلته وفي زيادة كمان ..

 

علاء : والله هاد اللي صار، سيرين كانت متدايقة بس انا وامي اقنعناها انه تصرف العروس طبيعي

عدي : علاء انا مصدع مو طبيعي الأفكار اللي براسي، صدقا محتاج نصيحة تريحني شاور عليي كيف اتصرف، اخطات باشي انا ؟

علاء ( تنهد ) : ما عاش اللي بده يعمل فيك هيك ولك انت ما بتعمل الا الصح وعن فهم كبير، وبما انه الوقت فات عالنصيحة المهمة خليني اريحك بشغلة وانصحك تسحب ايدك من كل اشي بعد اليوم .. حاول ما تكون وسيط بين النسوان خصوصا .. بنات عيلتنا .. وحط الف خط احمر تحت كلمة خصوصا

عدي : صحيح

علاء : والسبب يا صاحبي انه فجاة بتذكروا انهم صاحبات وحبايب وما شابه وقولة هالوحدة لولا جنس آدم عمرنا ما بنختلف وبتطلع انت بسواد الوجه وفوق هيك بعملوك صاحب مشاكل ونيتك تفرقتهم

عدي : ههههههههههههه والله انك جبتها وغيرت مودي صراحة يسعدلي قلبك ولسانك اللي بنقط فهم

علاء ( بضحك ) : بعدين اللي عنده مثل هالبنوتة الله يحميها احكيلي رح يفضى يفكر بغيرها ؟ أي عليم الله ماسك موبايلي وبتفرج على هالكم صورة ماشاءالله لاقوة الا بالله

عدي : تسلم أبو مصطفى ويحفظك الحلوين اللي عندك ان شاءالله بتفرح فيهم

علاء : بس اذا طلعت لبنت خالتها الله يكون بعونك

عدي : ههههههه يا سيدي يا ريت تطلع

 

وما اكثر الأوقات الصعبة اللي بتمرق مثل النسمة علينا بوجودنا سوا وسندنا لبعض، ضحكنا كثير انا واياه وانهينا المكالمة بسعادة لا توصف ..

 

////

 

ريم : عادي ؟

علاء : شو اللي مو عادي ؟ اكيد اهلا وسهلا

ريم :اوك بخبرها انك جاي تاخدها كمان شوي

 

انبسطت كتير على جية سيرين لعندي بهيك يوم، بتسلى معها وبنسى حالتي النفسية واحساس الذنب اللي ملازمني ..

 

////

 

‏امجد ( بنادي من الباب ) : وين إلين ؟

آيات : نايمة .. كيفك ؟

امجد : الحمدلله .. بس تصحى احكيلي

احمد : طيب تعال اقعد معنا مالك ؟

امجد : ما بدي ازعجكم خذوا راحتكم

ياسمين : هي حسبت حسابك بالقهوة انت وانس وخالتي تعالوا

 

‏مسكين أخوي ‏ما عاد يلاقي اله مكان او موضوع ‏مثل زمان ‏بيناتنا لكن مهما صار راح يظل امجد صاحب الابتسامة والحضور الحلو، ‏وفنجان القهوة معه غير ..

 

امجد : يوسف كمان نايم ؟

احمد (باستياء ) : بس شاف امه اتطمن وحط راسه ونام

امجد : قاهرتك امه ؟ ما انت كل يوم بتظل نايم وهية بتصحى وبتلاحق بخلفتك

ياسمين / آيات : يا سلاااام

آيات : صار في نصير للمراة بعيلتنا وأخيرا، قولة غنى صرنا ب٢٠٢١ طلع معها حق

ياسمين : شفتي شفتي

احمد : تتهنوا بطلعلكم نصير بعد هالمعاناة اللي عايشينها

امجد ( باهتمام ) : ما فهمت شو جاب سيرة غنى على هالصبح ؟

آيات : ما قالتلك امي اجوا العرسان يباركوا

امجد ( عيونه عليي وبضحك ) : صباحية مباااااركة يا عرسان هيك بنص المستشفى حكتولهم ؟

ياسمين ( بتصب القهوة ) : ولا استرجينا .. تفضل

احمد : يسلمو حبيبتي، المهم اخوي علاء رجل المواقف الصعبة اجا بالوقت المناسب

منى ( قعدت جنبي ) : يسعد علاء ويسعد اخوه ما في بعدكم ولا قبلكم رجال

انس ( بمسخرة ) : آيات اعملي حالك كبستي على التسجيل بالغلط وابعثي لابوي خليه اليوم يميل يتعشى مع سيدي

منى : واحكيله امي بتسلم عليك

ياسمين : الله يعطيني نص الثقة اللي عندك هههه ما بسترجي صراحة

احمد : لانه قصدها عن كل الرجال من بعد ابوي .. يعني مو مشمول بالمقارنة من أساسها

امجد : يسعدلي الفهمان .. ايوا ياسمين شكلها فرح ناوية تدرس طب اسنان ما عرفتها مبارح مختفية من التوجيهي

ياسمين : اه والله خلينا نتفائل وحدة تانية تدرس طب عنا، حرام خمس بنات ما يطلع منا دكتورة ودكتورة اسنان

آيات : لو خطبتها خالتو سهى بعد كم سنة لقصي احسنلها من هالعملة اللي عملتها

ياسمين ( باستغباء ) : ييي قبل اسيل ؟ تخطب اسيل أولى

منى ( مو عاجبها ) : كتيرة عليه .. غنى لابقتله اكتر

احمد / امجد : هههههههه اوف شو هالاعتراف

منى ( مقهورة ) : ما بعرف ليه قلبي كش عنه فجاة مع اني بحياتي ما حكيت هيك لا عنه ولا عن غيره. بس يمكن تاثرت بعمر ورايه وحسيت كلامه صح

امجد : ارحميني انتي وعمر بالله .. عايامه ما قبل راي حدا هسة صار عنده وجهة نظر يمليها علينا ؟!

آيات : شو حكيت حبيبي ؟

امجد : اللي سمعتيه

آيات ( عصبت ) : عفكرة عمر معه حق وخليك ساكت لانه انا وانت بنعرف كتير منيح ليه معه حق، بس قصة وانتهت تزوج وخلصنا منه

امجد ( مستغرب ) : ما فهمت عن شو بتحكي ؟

انس : ما بعرف شو مال العيلة بكل قصة زيجة يا بندلقوا مرة وحدة وبحملوا العرسان للسما او بنقلبوا وبدوروا على سولافة يوجعوا راسنا فيها .. ملاحظين مثلي ولا انا ذكي زيادة عن اللزوم ؟

احمد : ذكي واخر حبة عنا طال عمرك؛ اشرب قهوتك وروح كمل دراستك اللي بتحملنا جميلة بس تقطعها مشانا

الجميع : هههههههههه

منى : عقبال عندك انت واخوك ونعمللكم احلى اعراس

آيات ( حاملة بنتها ) : صحيوا من صوت الضحك فجاة .. تفضلي هي خالو

ياسمين : يلا روح على عمك ههههه

 

////

 

بلعب مع أولاد عيلتنا كلهم وكانهم اولادي وقطعة من روحي، محبتي للأطفال كبيرة بحجم حلمي انه يكون عندي أطفال ويلعبوا معهم ..

 

آيات ( بتضحك ) : كل ليلة عمر بنبهني ممنوع احمل الا لما يتزوج امجد قال عشان أولادهم يكونوا قد بعض

منى : بالله ؟ احكيله ريحتني

احمد : هههههههه

امجد : بعد ما يخلص هال… بتذكرني من حنيته

الجميع : ههههههههههه طبعا

ياسمين : يا حبيبي على خجلتك يا آيات ضروري تجيبي السيرة

آيات ( مستحية ) : انا ما حكيت اشي غلط، بس اخوي دايما تفكيره مو مريحه

انس :  نيته صافية بس انتي حكيتي كل ليلة، غصبن عنه بده يروح تفكيره لبعيد

امجد : يسعدلي الفهمان .. خليك قاعد معنا احسن بتفيدنا بذكائك وبتسكت الناس اللي تفكيرها محدود

انس : لا خلص بكفي

 

وقبل ما يكمل انس كلام، رن موبايله ولما شاف الاسم اخذ فنجان قهوته وطلع من البيت ..

 

احمد : قلبي حاسسني انه المتصلة انثى

منى : معجباته كتار كل يوم بحكي مع تلاتة أربعة ههههه

آيات ( مستغربة ) : معقول ؟

امجد : شو اللي معقول ؟ هاي امي بتساير حبيب قلبها احمد لانه مستحيل تحكيله انت خطا يا امي اخوك عاقل ومحترم

احمد / ياسمين : ههههههههع

منى : يا ربي على هالغيرة والله دايما فاهمني غلط بحبك انت واياه وانس قد بعض بس بحب آيات اكتر وحدة لانها صديقتي

ياسمين : وانا خالتو ؟

منى : انتي طبعا ما بدك حدا يقلك

ياسمين ( مبتسمة ) : بعرف بس عشان اخوي امجد وانا طالعة اله فهيك بحب انكش مخي

احمد : يطوللنا بعمرك وان شاءالله نكون قد هالمحبة

 

////

 

فرحت بهالمكالمة وطرت من مكاني، من زمان ما حكت معي ..

 

اسيل : شو اخبارك ؟

انس : كثير مبسوط .. بسبب اتصالك طبعا

اسيل ( بخجل ) : حبيت ارن عليك من زمان ما حكينا وفرصة انه ماما مو بالبيت

انس : مانعتك تحكي معي ؟

اسيل : ما في داعي تعرف انه بحكي معك بشكل خاص، يعني بدون مصالح دراسية

 انس ( برومنسية ) : بشكل خاص .. اممم المصطلح هاد بعبر عن احلى اشي صار بعرس مبارح وانه صحلي اشوفك، كنتي بتطيري العقل واحلى صبية بالحضور كله

اسيل ( بدلع ) : يلا منيح عجبناك دكتور انس

انس : بتتخوثي صح ؟ لسا بدك تعجبيني !

اسيل ( بخبث ) : هههههه يعني اعتبرك من معجبيني ؟

انس : لا .. بس بحب اعبر عن رايي .. المهم تفضلي عنا سعادتك زمان ما اجيتي تزورينها

اسيل : اه والله انا وفرح عايشين بانعزال من ورا دراستنا ونفسنا نشم هوا متل الخلق، بس كله بهون فداء للمستقبل

انس : صحيح .. طيب كيف شايفة وضع فرح ؟ كنت مبارح بدي اسالها بس ما صحلي يعني مثلا اذا بتحب ادرسها او اشي مثل هيك خبريني

اسيل ( غارت ) : وانا شو بعمل ؟ ولا مو معبية عينك

انس : الله يسامحك بس حبيت اقدم مساعدتي مو اكثر، طيب اسمعي امك ورنين راحوا عند حنين تعالوا انتوا عنا وتغدوا معنا

اسيل : عشان اتدرس فرح ؟

انس : لا انا يمكن ما تشوفيني لانه شربت قهوتي معهم وهسة فايت اكمل دراستي، بس بحكي مشانكم تغيروا جو مثلا

اسيل ( انقهرت ) : يسلم شانك ابن خالتي ما بتقصر .. هلا بنشوف المناسب وبنتصرف انت فوت ادرس يلا بلا ما اعطلك اكتر من هيك

انس ( كاتم ضحكتي ) : كلك زوء، يلا سلام

 

والله صاير اجكر منها شو قصتي ؟ يا الله شو اشتقت اقعد معك اسيل ليه مو فاهمتيني ؟ ..

شو سر هالاتصالات اللي بتوصلني منك ؟ معقول انتي كمان بتشتاقيلي وبتفكري فيي ..

 

////

 

رنين : ماما شو  رح نعمل هلا ؟

مها : هلا بحكي مع ياسمين وبخبرها

رنين : منيح اللي اجينا كان ليث يا حبيبي ما عرفوا يدبروه

مها : قلبي حسني .. الو ياسمين ..

 

////

 

بعز الضحك والفرفشة بوصلني اتصال من ماما، استغربت وقلت يمكن غيرت رايها وبدها تيجي عندي بس اللي سمعته كان مختلف ..

 

منى : الله يهون عليها، ان شاءالله بتقوم بالسلامة

ياسمين : الله يسلمك، سبحان الله منيح اللي ماما راحت مع رنين كان ما قدرت تلحق

امجد : والله يا حنين بدنا نشوف نسخة ثانية منك، بلكي بنت هههههه

احمد : يلا طيب قومي جهزي للاكل شو بتستني ؟

انس ( اجا فجاة ) : يمة انا بالبيت اه

منى : ماشي، بدهم يجوا اسيل وفرح وامير وريان كمان شوي ادرسلك شوي احسن ما تلتهي

آيات : بمين يلتهي ؟ التنتين اللي جايات نيردات متله يعني حتى مواضيعهم متشابهة

امجد : مواضيع ؟ هاي اشكال بس تنحت بالصخر وتنتحر على علامة مو يحكوا مواضيع

انس : استغفر الله .. من عينيكم بس

 

كانت حنين مع وصلة ماما تعبانة كتير وبدها تروح عالمستشفى تفحص، ومحتارة وين تحط ليث ..

توترت كتير وما عرفت كيف اتصرف، بخاف اتحمل هيك مسؤولية خصوصا مع وجود انس  ..

 

احمد ( لحقني عالمطبخ ) : شو مالك ؟ كانك اتدايقتي

ياسمين : احمد انا خايفة من اسيل ما اضبطها

احمد : ما حسيت انس فرقت معه لما حكتله امي

ياسمين : انا بحكي عن اختي احمد، ماما لما تحملني مسؤولية بتبهدلني لو حست انه في اشي غلط صار

احمد : طيب اهدي الموضوع مو مستاهل هالقد، لو بدها تعمل اشي غلط هيها بالجامعة ما حدا شايفها ليه محملين الموضوع حجم اكبر مما يستحق .. ولا عشان بالذات انس وامه منى وما بدكم أي تطور ؟

 

صفنت بكلامه انه عنجد ليه هيك بنتصرف؟  لو ما كانت في مشكلة قديمة معقول نكون هيك ؟ ..

طيب انس شو موقفه ؟ كيف رح يتصرف لو اهلي اعترضوا طريقهم ؟ او يمكن اهله كمان يعترضوا ؟ ..

 

////

 

اكتئبت من تصرف ماما ومو حابة اروح بعد ما حكيت انا وانس، ما ضل الي نفس احكي مع حدا ..

 

فرح : يلا اسيل متى رح نطلع ؟

اسيل : انتي حابة تروحي ؟

فرح : اكيد لا، بس عشان امير وريان حدا يمسكهم عنا مو معقول انتي اتضلي ملتهية عشان انا ادرس

اسيل : طيب عادي هيني مبسوطة معهم، بلا ما نروح شو رايك ؟

فرح ( كاتمة ضحكتها ) : ما بدك تشوفي الحب ؟

اسيل : لا عادي .. بتعرفي صحيح حكالي لو فرح بدها اشي ادرسها إياه احكيلي فشوفي حالك شو اكتر اشي لازمك بما انه رايحين رايحين

فرح ( مستغربة ) : عادي ؟ يعني ما بتزعلي

اسيل . من شو بدي ازعل ؟ بدك تحطي عينك عليه مثلا

فرح ( بذعر ) : اعوووووذ بالله مستحيل شو بتحكي ؟

اسيل : طيب يلا بسرعة خلينا نطلع

 

لبست اسوا اشي عندي، وركبت انا واخواني بالسيارة ووصلنا بيت خالتي ..

 

منى : اهلا وسهلا بالحلوين الشطورين

امير : كيفك خالتو

منى : مبسوطة بشوفتك، تفضلوا

اسيل / فرح : السلام عليكم

 

طلعنا على بيت ياسمين وكانت آيات، انا لما شفتها انصدمت وبان عليي ..

 

آيات : اهلا وسهلا، رجلي جرارة اجيت وجبتلكم ضيوف معي

احمد : كلكم صحاب البيت .. شو الاخبار مكتأبين ؟

امير : والله عندي دراسة الله يسامحها ماما دايما بتطلع بنكشات من تحت الأرض تشتت تفكيري

الجميع : هههههههه عنجد

ياسمين : يلا فوت ادرس حضرتك

ريان : الحمدلله طلعنا لانه عمرو ولولو كمان طلعوا وانا زهقت

آيات : مع مين طلعوا ؟

فرح : شكله حمزة مداوم فاجا علاء اخدها مع الأولاد، هيك حكتلي اسيل

ياسمين : غارت منك هههههه

آيات : شكلها هههههه

امجد : ايوا سيد ريان مشاكل ما بدي اليوم

ريان : ان شاءالله، بس بدي العب عالبلايتيشن مباراة وحدة معك وخلص

امجد : بالله عليك ! بتعرف كم حقها اللعبة معي ؟

يحيى : لا احسن اشي عمو امجد انت بس طلعنا لفة بالسيارة ولعلنا هديك الاغنية واحنا رح نكون شاطرين

امجد ( بضحك ) : اشر باصبعك الصغير انت يا عمو يسعدلي إياه الفهمان

احمد ( مو عاجبه ) : بدل ما تقعد تعمل اشي مفيد وله انت وخالك تعلم ادرس مثل امير

اسيل : يلا عن ازنكم .. فرح تعالي عالغرفة يلا

فرح ( تنهدت ) : والله لو تفوتي انتي تدرسي عبن ما اشوف ازا انس موجود يفهمني هالكم شغلة ( بتباكي ) لا تقولوا انه مو بالبيت

ياسمين ( عيونها عليي ) : انس ؟ هي اسيل اتدرسك احسن

فرح : يييي ناقصني هاي عصبية ازا غلطت بتلطشني كف

امجد ( ماسك موبايله وبرن ) : دكتورنا ان شاءالله ما تكون غرقت بالجبل اللي حواليك عشان محتاجينك ضروري

انس ( بمسخرة ) : لا تحكيلي اسيل بدها ادرسها لاني مو فاضي

 

انصمدت خالتو من كلامه واتطلعت عليي بخجل، بس الباقيين كانوا بضحكوا على شو مو عارفة ..

 

امجد ( بضحك ) : مع اني ما حبيتها منك بس هالمرة  ال best friend تاعتك فرح  اذا متذكرها ؟ بدها شوية تأخذ من وقتك الثمين

انس : اه اكيد وهل يخفى القمر .. اطلع انا ولا هية تنزل ؟

امجد ( بقلب بعيونه على بيتنا ) : انا برايي تطلع عشان القمر صعب ينزل ههههه واحنا ننزل مع الأطفال هون لانها عجقة وخلي احمد وياسمين معكم افضل

منى : استغفر الله العظيم، حدا يسكته قبل ما يرتفع ضغطي من بياخته

 

////

 

كنت حاسس اسيل رح تفقع فحبيت اثقل العيار شوي عليها، بحب اشوف ملامح الغيرة على البنات ..

 

امجد : يلا فرح ضبي شعرك منيح ونزلي كمامك واستعدي هسة بوصل سموه

فرح : الله يسامحك والله ما عندي هالحركات انا وانت عارف منيح مين بنت زياد

احمد : يسعد زياد ويسعد خلفته، عارفينك طبعا بس بتعرفي امجد وتعليقاته

آيات ( مقهورة ) : خفوا علينا يا

ياسمين ( عصبت ) : مشان الله خلص مو ناقصني مشاكل، كل هالتعليقات بتجيب كلام ما اله داعي

منى ( فهمت عليها ) : اه والله صحيح، يلا قوموا فضوا هالعريشة خلينا نكمل الطبخة ونتغدى على بكير قبل ما تيجي امك ورنين

انس ( اجا فجاة ) : السلام عليكم .. اهلا وسهلا شو هالزيارة المفاجاة ؟ مثل أيام زمان

اسيل ( لفت وجهها وبدها تفوت غرفة ) : انا لا تحسبوا حسابي ما بدي اكل اليوم .. ما الي نفس

 

اتطلعت على انس لقيته ذايب فيها وعيونه بتلاحقها، واكيد آيات ما رح تتركه بحاله ..

 

آيات : له له مين سادلك نفسك ؟ شكلك عشقانة يا بنت اعترفي

انس ( بمسخرة ) : نص الجامعة معجبين فيها والنص الثاني طلب ايدها مني بس رفضتهم لعدم توافر الشروط المطلوبة

اسيل : …

 

اسيل مستحيل تسكت على هيك كلام، بس اليوم بالذات سكتت وطنشت وكله في سبيل تهرب من المكان اللي فيه انس ..

 

////

 

نفسي افهم شو سبب هالتصرفات، ليه هيك بتتغير فجأة ولا كانها اسيل اللي بتستنى أي نص فرصة لتلتقي فيه ..

 

فرح : انس اكتر من نص ساعة ما رح اخد من وقتك بدي رؤوس أقلام بس

انس ( تنهد ) : كل وقتي عحسابك ابشري

فرح ( بهمس ) : مشان الله اختصر

 

ما كان فاهم عليي، انسحب الجميع وضليت قاعدة بالصالون انا واياه واحمد، عيون آيات رح تاكلني انا واسيل وامجد كان فاهم عليها وبجاكرها ما بعرف ليه ..

 

انس ( بهمس ) : ما فهمت شو كنتي تحكي قبل شوي ؟

فرح : كنت احكيلك تختصر قد ما تقدر قدام آيات مو شايفها ما بتطيقنا خصوصا اسيل

انس : اسيل حسابها بعدين حتى مرحبا ما بتحكي .. لو بدها مصلحة ما في اشطر منها

فرح : الله يسامحك بس اجت متدايقة عشان اللي عملته ماما فينا وانت كمان ما قصرت فيها لما حكى امجد معك

انس ( مصدوم ) : كان فاتح سبيكر ؟

فرح ( رفعت حواجبي باستنكار ) : عامل حالك مو عارف ؟!

 

تنهد وهز راسه وبدا يفهمني بقلب وضمير، واحمد كان بشتغل بس عيونه عليي وكل ما اغلط يبهدلهي ويسمعني كم كلمة ..

 

////

 

قصي ( بسوق بعصبية ) : انتي مو طبيعية ابدا .. شو هالعمايل هاي ؟ عاملة كنة وحماية من أولها ؟

غنى ( بتبكي ) : لا ترفع صوتك عليي عم تفهم ؟ .. وقف نزلني ما بدي اضل معك

قصي ( فقد اعصابه ) : لا ما حزرتي .. انا زوجك وكلمتي ممنوع تنزل الأرض شو ما كان صاير بيناتنا

غنى ( بمسخرة بين دموع ) : هاهاها ضحكتني والله، لما يصير بيناتنا اشي يا زوجي عالورق .. عم تفهم !!

قصي ( ضرب بريك ) : اسمعيني يا بنت الناس انا كل اللي عملته بس احتراما الك وعشان ما تيجي بيوم من الأيام تحكيلي دمرت حياتي وانت عارف انك ما بتحبني، فهيني بقلك اليوم بتحملي اغراضك وبتروحي بيت اهلك او بتضلي عندي ليوم ما ربنا يريد ويزرع محبتك بقلبي ( برجف وايده عصدره ) وانتي حرة

 

كان منظره محزن، نفسي اضمه واهدي اعصابه ..

نفسي اتعامل معه كاي شخصين بينهم علاقة بالحلال، كلامه كتير اثر فيي وحسيت بقلبه النظيف اللي كل العيلة بتشهد عليه ..

 

قصي ( بمسح دموعي باصابعه ) : اسف .. ما كان قصدي اعصب هيك وانا نادرا لاوصل هالحالة

غنى ( متجمدة من حركته ) : … عادي

 

استدرك حاله وكملنا طريقنا، بس خابت توقعاتي وما اخدني عالبيت ..

 

قصي : جوعان كثير وطلعنا بلا فطور، كنت رح اكل كل الحلو اللي بالمستشفى هههه

غنى ( مبسوطة ) : وانا كمان ههههه

 

اخدني على مطعم فخم كتير، كنت حابة أكون متشيكة اكتر من هيك بس ماشي حالي ..

ما استرجيت اشبك أيدينا ببعض متل هالعرسان وضليت محافظة على هدوئي واحاول انشغل باي اشي تاني متل التصوير او مواضيع بعيدة عن واقعنا ..

 

////

 

الله يعدي هاليوم على خير، ما بعرف ليه بتصير مشاحنات كل ما تكون آيات موجودة ..

معقول معارضة حب انس لاسيل ؟، كنت احس زمان انه مو فارق معها بس الظاهر بعد هديك القصة قلبت عليها وبطلت اتطيقها ..

كنت مبسوط بتصرفات انس خصوصا قدام امي، وعمايل امجد ضحكتني وكل ما اسكت ارجع أتذكر واضحك مع حالي، لحد ما رن موبايلي وكان رجل المواقف الصعبة فعلا هاللقب لابقله ..

 

احمد ( بضحك ) : نورت بزوج خالة الاميرة الجديدة هلا وغلا

علاء ( مستغرب ) : شو اللي بضحك بالموضوع ؟ ترا متصل فيك وانا شوي رح افقع

احمد : له له سلامتك، خير مين مدايق اخوي الغالي ؟

علاء : يا زلمة اقسم بالله عيلة بتجيب الجلطة، بعدين مع هالبنات صعب يكبروا ؟ مستحيل يتغيروا ؟ شو بصيبهم بالضبط لما يدخلوا عش الزوجية ؟! لاقيلي حل لهالاسئلة

احمد ( بلعت ريقي ) : والله معك حق اشي بزعل، عاد احنا قلنا خلينا ناخذ من بنات عيلتنا على قد ما كانوا كويسات بس للأسف خيبوا ظنا

علاء ( بقهر ) : يا الله يا احمد شو انقهرت بس خالتي خطبتها، خلصت البنات !! مشاااان ربك لاقيلك وحدة ثانية .. اقلك كان اخذت رنين ولا اسيل

احمد : لا هاي ولا هاي .. خلص اخذ نصيبه المهم هسة يتعاملوا بحنكة معها ويكونوا طبيعين

علاء : ريم من القهر اليوم جابتلي سيرين وتقريبا بطل الي مكان بالبيت هههههه قلت اروح عند امي اجيبها وارجع عند ابوي اكيف لحالي احلالي

احمد : لا خليك معهم عشان تسيطر على الوضع، لانه انا كمان قاعد مراقب ههههه

علاء : خلص بحكي معك بعدين بس دير بالك تفضفض لمرتك وتفضحنا

احمد : هههههه لا لا اتطمن

 

////

 

يا فرحتك يا مها تاركة بناتك وبتلفي من مكان لمكان، وكله كوم وحنين كوم تاني ..

 

حنين ( بتعب ) : ماما انا منيحة يسلمو ايديكي عالبيت غلبتكم

رنين : شو هالحكي انتي التانية، المهم تكوني بخير وكل اشي بهون

مها ( بتبكي ) : يعني لسا بدكم تستنوا كم أسبوع ؟

وائل : لحد ما يبين النبض

مها : انا بفكرك من زمان حامل ومخبية، ليه تنشري الخبر من أولها ؟

رنين : ما نشرت ماما والدليل حتى انتي ما حكتلك

وائل ( بحزن ) : الحق عليي انا اللي حكيت، بس ما كنت متخيل هيك رح يصير

حنين ( متدايقة ) : لا تزودوها عليي اللي ربنا كاتبه رح يصير

 

////

 

يوم طويل ومليان احداث ما بعرف باي حال رح ينتهي، المهم تكملها علينا بالستر والعافية يا رب ..

 

امجد : السنة الجاي مثل اليوم بكون عيد ميلاد بنت ديمة، ويلا يا امجد وصلنا يمة

منى ( مطنشة ) : …

آيات : عقبال ما يكون ميلاد ابنك يارب

امجد : مرسي بوجودك حياتي

آيات : ههههههه

منى : …

امجد : عمر متى جاي ؟

آيات : صحيح زكرتني حكالي رح يجي ياخدني  بس يخلص شغله معقول ما يخليني اتغدى لانه ما كان يرد عليي بس أسأله ؟ .. ماما لو سمحتي شدي عليه يضل وازا ما قبل عالاقل يخليني انا

منى : …

آيات ( مستغربة ) : ماما سامعتيني ؟ بحكي معك

منى : … بصير خير

امجد ( قربت منها وحضنتها ) : زعلانة ؟

منى ( لفت وجهها ) : … خليك بعيد عني بكون احسن

آيات : اوف ! شو عمل ؟ اه ليكون طقس على بنات اختك وتقل دمه عليهم شوي

منى ( معصبة ) : انتي خليكي ساكتة، بتدوري على اقل كلمة لتعملي منها مشكلة وترمي حكي بلا طعمة

آيات ( بقهر ) : انا ؟ الله يسامحك عفكرة مو انا اللي بديت

منى ( زورتني ) : بعرف، عشان هيك بقله خليك بعيد

امجد ( انحرق دمي ) : سامحيني …

 

اخ اخ اخ وين اروح بحالي، ليه هيك حظي ؟!! شو فيها لو كانت اختي مثل ياسمين ولا ديمة الواحد يحكي قدامها اشي تفهمه بدل ما تموت من  غيرتها ..

سامحيني يمة والله بزعلك بدون قصد، وجودي قدامك دايما متعبك شو اعمل لترتاحي مني ..

 

////

 

ريم : جيبلي الأغراض اللي كتبتلك إياهم وبطريقك كم شغلة زاكية نتسلى

علاء ( كاتم ضحكته ) : اجيبلك مهرج ؟

سيرين : لا ما بحب المهرجين، اساساً اليوم كله درامي خلينا بالمود احسن من التقلبات وبعدين تصيروا تعلقوا علينا

ريم : بقولولك عقل البنات ضارب

علاء ( رافع ايديه باستسلام ) : لا على سلامتكم، ما في مثل البنات وعقلهم قل اعوذ برب الفلق

ريم / سيرين : ههههههههه

علاء : اسمعوا عندي فكرة، شو رايكم اجيب امي ؟ بتكيفوا صح

 

اتطلعنا ببعض انا وسيرين وهزينا راسنا بالإيجاب، يعني شو بدنا نحكي غير اكيد واللي بتشوفه مناسب ..

 

علاء : يا عيني عليكم بس تشغلوا مخكم، عالاقل عالاقل ما بتهكلوا هم هاد اكل وهاد مو راضي يسكت وهاي ابصر مالها ساكتة .. عندها حل لكل اشي الهي وانت جاهي يطول بعمرها ويحفظها

سيرين ( بخبث ) : اه اه امين يارب، يلا دوبك تروح تجيبها طيب عشان نتغدى احنا واياها وبرضو بابا حرام ما تتركه لحاله

علاء ( بدهاء ) : لا ابوي اتركيه عليي، انا اليوم حالف يمين الكل يكون مبسوط وراضي ناهيكي عن الدراما اللي عشتيها الصبح بس وحياتك لانسيكي وضلي بس احكي اخوي حبيبي رجل المواقف الصعبة

 

يمة يا حبيبتي ما اقواك، شكلك ناوي على خطة مرتبة تهرب منا من خلالها ..

 

ريم : تمام حياتي .. بنشوفك ان شاءالله

علاء : سي يو ( رمالي بوسة بالهوا ) ديري بالك عحالك

 

////

 

كنت سامعة صوته ونفسي اطلع احكي معه او اشوفه، خايفة حتى اروح اشرب مي احسن ما يفهمني غلط ويقول عني بركض وراه ..

 

اسيل ( بصوت خافت ) : ياسمين جيبيلي مي

 

استنيت كتير وما حدا سمعني ومو قادرة اعلي اكتر ولا افتح موبايلي عشان انس ما يفكر يبعتلي اشي، عاساس انا فارقة معه كتير ..

 

انس ( من ورا الباب ) : تفضلي هي المي

 

انتفضت بس سمعت صوته، قال ما حدا سامعني ..

 

اسيل ( مديت ايدي بخجل ) : شكرا

 

كنت محجبة بس ما بدي ابين عليه ولا التقي فيه، بس كان اشطر مني وبعد كاسة المي ..

 

انس ( بنبرة حادة ) : اطلعي اشوف

اسيل ( دايبة فيه وقلبي بدق بسرعة ) : … غلبت حالك

انس ( بتاملني ) : غلبتك راحة

 

////

 

دقات قلبي كانت مليون .. بحبها يا ناس نفسي احكيلها .. نفسي الدنيا كلها تعرف .. تعبت من هالسر اللي ما بعرف اذا تعبي عليه رح يروح خسارة ولا نكون لبعض انا واياها ..

 

فرح : انس خلصت .. انس ؟!

 

ما شبعت لسا بدي اضل اتاملها واشبع عيوني منها، لسا في كثير مشاعر جواتي بدي اوصللها إياها بس لمتى ؟

 

احمد ( صافن فينا ) : صحتين على المي .. انس طالبتك بتنادي عليك اذا تكرمت

فرح : هههههههه فاصل اخوك .. واختي ابصر مالها شكله اول شب بجيبلها كاسة مي

 

كنت رايح اقتلها على هالتعليق، بس اجت ياسمين اللي كانت مو بالبيت أصلا بس على حظي لازم تكمل الفضيحة، واسيل كان فيها عقل وطار ..

 

ياسمين ( بعصبية ) : شو عم بصير ؟ خلصيني منك الها الاكل رح يجهز وانتوا ما خلصتوا

اسيل ( مزعوجة ) : قلتلك ما بدي اكل، سلام

 

فاتت وسكرت الباب بوجهنا كلنا، وانا لساني انربط ووجهي صار بالألوان قدام احمد ..

 

احمد ( باشرلي بعيونه ) : يلا كمل مع فرح قبل ما نمد السفرة

انس ( مزعوج ) : طيب هيني رايح

 

فرح ( كاتمة ضحكتها ) : لو قلتلي كان انا رحت بس ما فهمت شو اللي صار ؟

انس ( معصب وبدي انتفها بين ايدي ) : اللي صار انه لسانك طويل وتعليقاتك غلبت تعليقات امجد، شو رايك ؟

فرح ( قامت عن الكرسي ودمعوا عيونها ) : .. شكرا، عن ازنك

 

////

 

الحمدلله اني شغلت ياسمين بالمطبخ وكنت لحالي اتابع المشهد المؤثر بين اخوي واختها الحساسة ..

 

احمد ( وقفت بطريقها ) : وين رايحة ؟

فرح ( بتبعد وجهها ) : عالغرفة اكمل دراستي

احمد : انس .. تعال اعتذر من بنت خالتك على كلامك الها واسلوبك

انس ( بثقة ) : لما تروح تعتذر من اسيل اول بعدين بيجي دوري

فرح : على فكرة انا واختي متفاهمين ومتعودين على بعض، بس شكله اللي فيه مسلّة بتنغزه

احمد / انس ( بصدمة ) : نعم ؟ شو قصدك

فرح : قصدي واضح، عن ازنكم

 

رفعت عيوني لقيت ياسمين مستندة على الحيط ورح توقع من ورا اللي بصير، كانه قلبها حاسسها انه اليوم ما رح يمرق بسلام ..

 

////

 

سهى : اهلا وسهلا شو هالمفاجأة الحلوة ؟

هيثم : مفاجأة احلى من شوفة هالاميرة الحلوة ما فيه، سبحان الله ما احلاكي يا عمو

ديمة : خالو تسلم جيتك بالدنيا والله

سهى : لو جبت اخوك معك

هيثم ( مستغرب ) : ما اجا ؟

ديمة : كان بالشغل والله لما زاروني الصبح، اكيد بكرا بس اطلع عالبيت بيجي

سهى : بنته اجت بتكفي وبتوفي

هيثم ( بضحك ) : جد ؟ هيك عادي بالصباحية ؟ مو مستحية مثل بنت حماها بزمناتها ههههه

ديمة : شايف بالله

سهى : زمان اول حوّل ( بتقلد غنى ) صرنا ب ٢٠٢١ما في داعي للبروتوكولات

هيثم / ديمة : ههههههههه

هيثم ( بجدية ) : بتستاهلي .. نصحتك وما سمعتي، تشاطرتي على بنتك وما قبلتي تخطبيها عدي من أولها، وابنك غصبتيه كانه عمره ستين سنة مستعجلة تجوزيه

ديمة : …

سهى : ما غصبته، من وين بتجيب هالحكي ؟

هيثم ( تنهد ) : انا جاي ابارك واروح، صدقيني من مبارح ما نمت ساعتين على بعضهم

ديمة : صحيح مبارك حمل رانيا الله يقومها بالسلامة

هيثم ( ضحكة صفرا ) : شكرا .. يلا سلام بنشوفكم قريبا

 

سهى : لو ما اجا احسن، رجع يهز بدني

ديمة : الكلام الصح بهز البدن دايما

سهى : لا تعصبيني انتي التانية، شوي وتاركتك ومريحتك مني

ديمة ( مخنوقة ) : اسفة

 

////

 

نهى : لو اجيتوا كلكم عنا أوسع وهيك بضمن ابوك ما يضل لحاله

علاء ( بتباكي ) : والله ما خطر ببالي بس صدقيني لو ضل وسع الي كان ضليت وما غلبتك بس الصغار بدهم يلعبوا، هسة بوصلك وبرجع عند بابا

نهى : بيتك عامر ان شاءالله وبوسع الف محب

علاء ( مبتسم ) : تسلمي، المهم بدي تهدي أعصاب ريم لانها تعبانة كثير ومبارح نامت وهية تبكي، مشان هيك برضو لما طلبت اجيب سيرين بدون تفكير عملت اللي بدها إياه .. ريم تعبانة كثير وانا جد خايف عليها

نهى ( بقلق ) : خوفتني

علاء ( بلعت ريقي ) : خايفة يكون قصي مو منيح مع غنى وما بحبها، باختصار خايفة توقع بخطيتها عشان كانت مقترحة على خالتي تخطبله إياها

نهى ( نزلوا دموعها ) : كنت حاسة انه غنى مو منيحة طول فترة الخطبة، حتى أمها ساكتة ومو قادرة تحكي متل عادتها بس الحق مو على ريم ولا أمها الحق على اللي فكروه زلمة وبدهم يفرحوا فيه

علاء : وانا هاد اللي قاهرني، يا اخي وقف .. اعترض .. اعمل .. ساوي .. أي اشي المهم ما تتزوج غصب، وحكيت مع خالتي قبل ما تكتب الكتاب مشان الله ما بدك هالخطبة ما ردت عليي

نهى ( تنهدت ) : يا داخل بين البصلة وقشرتها .. المهم دير بالك على مرتك وخليك جنبها هيك ارفع راسي فيك واشوفك احسن زلمة بالدنيا

علاء ( مسكت ايدها وبستها ) : انتي ما عاش اللي بده يوطي راسك طول ما فيي نفس

 

////

 

منى ( بتنادي ) : يلا يا أولاد السفرة جاهزة

ياسمين ( بتهز راسها ) :  يلا تفضلوا

احمد ( سندها وضمها ) : خليكي قوية ما في اشي لا تخافي

ياسمين : ان شاءالله .. انا منيحة حبيبي لا تخاف

 

كنت أتطلع عليهم وخجلان قدامهم، ما احلاكم وما احلى رومنسيتكم حتى باصعب الأوقات الحضن كافي لينسينا اكبر وجع ..

 

انس : انا سابقكم

احمد ( وقفني ) : افردلي خلقتك بلاش امي تشوفك هيك

ياسمين : سامحني انس ما بعرف مالهم خواتي اليوم

انس : خواتك ما عملوا اشي الله يسامحك، الحق عليي انا

 

سبقت الكل وقعدت اول واحد مع الصغار ؛ اللي كانوا مبسوطين بجمعتهم مع بعض ..

تذكرت أيام طفولتنا لما كنا نجتمع مثلهم وننبسط واكبر همنا لعبتنا، آيات وامي مو على بعضهم وشكله صاير نقاش بينهم حتى امجد لما نادته آيات قعد بدون ما يحكي ..

 

ياسمين ( بتسكب بالاكل ) : تفضلوا ان شاءالله يعجبكم ههههه

آيات : متل مقلوبة ماما بتشهي طالعة

منى : يسلم ايديكي

ياسمين : اكيد متلها لاني تعلمتها منها لما اجت عندي على جدة

احمد : اهلا وسهلا بالجميع، كان لازم فوق حطينا الاكل عشان تكون العزومة متكاملة

امجد : احنا واياكم واحد، ما بتقصروا

 

مثل ما توقعت اسيل ما نزلت، وفرح كانت تاكل وعيونها بصحنها وساكتة عالآخر ..

 

منى : من كل عقلها اسيل ما بدها تاكل ؟

ياسمين : هلا بطلعلها صحن مو على كيفها

امير : بتاكل الأخضر واليابس لا تردي عليها

امجد ( تشردق ) : هههههع كح كح يقطع شرك الحقني بكاسة مي

احمد : ههههههههه مثل هالوحدة اللي اكلت المفركة وبعدين شاورما وبعدين مشاوي

 

بس ما تخيلنا بهيك موعد يجينا حدا ..

 

مها / رنين : السلام عليكم

الجميع : وعليكم السلام

منى : حماتك بتحبك الا شوي هههه تفضلي

مها : الله يرحمها، يا عليي وين اسيل ؟ اكيد مو ملحقة تدرس وتاكل

احمد : لا طلعلنالها صحن، تفضلي رنين ( قام من مكانه )

رنين : اقعدي ماما انا شبعانة والله صحتين

مها : فروحة شو مالك ساكتة ؟ زعلانة مني  صح ؟ حقكم عليي

فرح ( بقهر ) : بسيطة ماما بس بتعرفي اللي بطلع من داره بنقل مقداره

امجد / انس /ياسمين / آيات ( مصدومين ) : والله !!!

مها ( انقهرت ) : اخص عليكي وانتي وين جاية ؟

آيات ( بنبرة حادة ) : لا وبتحكي قدامنا عادي، الحق مو عليكي الحق عاللي قال انتوا أصحاب البيت

احمد ( عصب ) : آياااات !

 

قامت خالتي واشرت لبناتها يجيبوا إخوانهم ويلحقوها، طبعا فرح ولا كانها عاملة اشي وبتطلع فيي وبتزورني ..

قمت من مكاني ركاض ولحقتها كانت بتطلع عالدرج على بيت احمد وعيونها مليانة دموع، وقفتها وقلت اشرحلها شو اللي صار ..

 

مها ( مو عاجبها ) : وانت ليه تجيبلها المي ؟

انس : عشان فرح كانت بتدرس وقلت بشوفها بدل ما هية متخبية

مها ( باستنكار ) : تشوفها ؟ ليه

انس ( سحبت نفس غميق وسكرت عيوني وفتحتهم ) : لاني اشتقتلها .. لانها حبيبتي .. انا بحب اسيل يا خالتي والله مو بايدي

مها ( بترجف ) : حكتلها ؟

انس : لا والله ما حكيت، بس قلت بحكيلك انتي عشان تفهميني ما بدي تاخذي فكرة سيئة وانه ما درنا بالنا على بناتك وخصوصا كلام فرح قبل شوي

مها ( بلعت ريقها ) : مدام ما حكيتلها بتنسى الموضوع انا ما عندي بنات للحب بناسبوك، انت بتستاهل احسن شوفلك وحدة غيرها خالتو

انس ( نزلوا دموعي ) : هيك ؟! عادي !! ليه شو مالني انا ؟

مها ( بغصة ) : انت بتعرف منيح شو مالك مشان هيك اختصر علينا وعليها ولا توجع قلبها بهالحب اللي ما اله نهاية

 

ما بعرف شو اللي خلاني اتجرا وافتح هيك موضوع واليوم بالذات، لفت فيي الدنيا وتمالكت حالي قدامها، طلعت من البيت وركبت سيارتي ..