مذكرات عاطفية ( 2 الحلقة السابعة ) - سلسلة ياسمينة الروح
مذكرات عاطفية ( 2 الحلقة التاسعة ) - سلسلة ياسمينة الروح
الحلقة الثامنة
لا بأس بالتعب أحياناً، كل شيء سيحدث في الوقت المناسب، سوف تتحقق جميع رغباتك ..
_______________
____________
رجعنا على بيوتنا وكل واحد فينا مشغول بهمومه، بالرغم من الفرح الغامرنا بعد العرس، الا انه افكارنا لازالت مشتتة ..
انا وياسمين باقيلنا ليلتين مع بعض وبعدها رح نفترق لحظيا لكم شهر ..
بس الله وحده اعلم بهالكم شهر شو رح يصير فينا، وكيف رح نعيش؟ ..
احمد ( عيوني بتراقب كل تفاصيلها ) : كيف كان العرس ؟
ياسمين ( واقفة قدام المراية ) : بجنن، الله يهنيهم ويدم السعادة علينا وعليهم يارب
احمد ( قربت منها اساعدها ) : امين، حكيتي مع بيان ؟
ياسمين ( لفت وجهها عليي وعلقت ايديها برقبتي ) : لا، ما بدي احكي معها، برايي طريق اختارته ما في داعي حدا يناقشها فيه خصوصا بعد فترة ٢٤ ساعة
احمد ( شديتها من خصرها وقربتها اكثر مني ) : طول عمرك بتفهمي يا بنت، وبتعجبني وجهات نظرك، بس الفضول قاتلني هالمرة اكثر منك، غريبة صح ؟
ياسمين ( بعدت عني بخفة ولفت وجهها عالمراية ) : يمكن لانه اخوك الضحية، بس بعد تجربتي الخاصة بنصحك بقتل فضولك قبل ما يقتلك لانه بجيب وجع راس
احمد ( قربت منها ورفعتها بين ايديي وحضنتها ) : مثل اللي كان يصيبك يعني ؟ ( رميتها عالتخت بطريقة اكون انا واياها جنب بعض ) وكنا نتمشكل ونبعد عن بعض وانحرم منك بسببه ؟
ياسمين : كل الحرمان اللي شفته ما بيجي جنب اللي رح يصير فيي بعد يومين ( نزلوا دموعها ) لا تتركني احمد انا بدي اياك معي دايما
احمد ( بلعت ريقي بغصة وحضنتها حتى ما تشوف دموعي ) : … بحبك، بحببببببك ياسمين انتي روحي وما في قوة بالدنيا بتقدر تفصل الروح الا اللي خلقها، تذكري منيح هالاشي
رفعت راسها ومسحتلي دموعي، وقربت وجهها من وجهي حتى صار نَفَسنا واحد ..
_______________________________
ابو عدي : الحمدلله اجا هاليوم وفرحت بابني وشفته عريس
ام عدي : الله يطول عمرك وتفرح بالباقي، بس والله قلبي واجعني على هالمسكينة بيان
ابو عدي ( تنهد ) : والله امجد حالته صعبة كمان، انصدمت من منظره اليوم
ام عدي : معقول ما يرجعوا يتصالحوا ؟ حرام هيك تخلص قصتهم
ابو عدي : العلم عند الله، احنا علينا ندعيلهم، وديري بالك على بنتك ما بدي قصص وهالحكي اللي بلا طعمة
ام عدي ( رفعت حواجبها ) : لا لا بنتك ما عندها هيك شغلات الحمدلله، بعدين اخوانها وراها وبتحسب حسابهم
////
غنى : مو عارفة انام
عمر : انا اللي عارف يعني
غنى : يا قلبي انت
عمر ( بتأمل فيي ) : كانك ضعفانة كثير ؟
غنى ( تلبكت ) : انا ؟ لا عادي
عمر : امبلا شوفي كيف عظامك مبينة، كل هاد دراسة ؟
غنى : اه طبعا دراسة والله تخصصي صعب يا عمر كتير كتير
عمر ( مو مقتنع ) : يعني بدك تصيري ياسمين النسخة الثانية ؟ ههههه
قبل ما اجاوبه وصلته رسالة، وبلحظة وجهه ضحك وعيونوا لمعت ..
غنى : تصبح على خير
عمر ( بهز براسه وعيونه عالموبايل وبكتب ) : تلاقي خير حبيبتي
انسحبت من غرفته وهربت لعالمي، كان محصور تفكيري باللي صار معي مبارح ( يوم الخميس ) ..
__________
________
الشب : لو سمحتي في حدا جنبك ؟
غنى ( مصدومة ) : … لا
الشب : بقدر اقعد انا صح ؟
غنى : … متل ما بدك
كنت مصدومة انه حكى معي او حتى تجرا يقعد جنبي، رغم انه ما صار بيناتنا اي حوار قبل هيك الا بالعيون ..
طول الطريق وجهي باتجاه الشباك، ومو قادرة اتحرك ولا آخد راحتي ..
الشب ( ابتسامة خبيثة ) : صح النوم
غنى ( بخجل ) : …
الشب : نومك ملائكي
غنى : شو عرفك ؟
الشب : كنت عم اراقبك طول الوقت، حبيت تجربي الشعور اللي كنت اشعره
غنى ( اخفيت ضحكتي ) : ما فهمت
الشب : معقول فقدتي ذاكرتك ؟
غنى : …
الشب : تمام، قبل ما انزل بدي احكيلك انه باين عليكي بنت عالم وناس، فيا ريت تحاولي ما توقفي على باب القاعات اللي بكون فيها لانه بنت مثلك حرام ينحكى عليها اشي عاطل من الشباب اللي حواليي، لانه سمعتك مثل المسك بكليتك وبين كل اللي بعرفوكي وهاد اكثر اشي متعجب منه وخلاني اتجرا واحكي معك اليوم
غنى ( قلبي بدق كتير وخدودي احمروا من الخجل ) : …
الشب : تمام يا .. غنى ؟! هيك اسمك صح ولا سامع غلط انا ؟
غنى ( مستغربة ) : امبلا صح بس كيف …
الشب ( مقاطعني ) : لا تسالي كيف عرفت، احنا الشباب ما في اشي بصعب علينا لما نحطه براسنا ( غمزني مع ابتسامة راقية ) عن اذنك اصحابي بستنوا فيي
__________
________
غمضت عيوني وتجاهلت دقات قلبي اللي كانوا بنفس الحالة مبارح، وبكل مرة بشوفه فيها ..
كان احلى يوم بحياتي اني سمعت كلامه، وتاملته عن قرب ..
////
آيات : مبارك يا اخو العريس
عمر : يبارك فيكي، لساتك صاحية ؟
آيات : عم استعد للنوم، بس خطرت ببالي قلت بباركلك
عمر : تسلمي، طمنيني كيف الامور عندكم ؟
آيات : قصدك امجد ؟
عمر : اه
آيات : ماشي حاله، بس لسا مبين عليه الزعل
عمر : يلا كم يوم وبنسى
آيات : عمر، حكالك اشي اليوم ؟
عمر : امممم
آيات : ما بدك تحكيلي، طيب ماشي يا عمر خلص زعلت انا
عمر : …
آيات : لا تنسى انه امجد اخوي يا عمر وبتهمني مصلحته
عمر : اخوكي ببيت ابوكي، انا صاحبه وما بقدر افشي اسراره، بعدين شو حكيت لتزعلي ؟ مالك صايرة دلوعة هيك
آيات : …
عمر : هبولة، مو قصدي يعني بس بتعرفي انا واياه بيوت لاسرار بعض، بعدين سيبك من هالحكي كله وخلينا بالمفيد
آيات : شو المفيد اكتر من اخوي ؟
عمر : انتي
آيات : مالني ؟
عمر : بتطيري العقل كنتي ، جد الله يحميكي
آيات : تسلم، بس .. بس اليوم كنت حلوة ؟
عمر : انتي شكلك نعسانة ومخك سكر عالآخر، خليني احكيلك تصبحي على خير احسن ما ندق ببعض اذا حكينا كمان كلمتين زيادة
آيات : تلاقي خير، اصلا الحق عليي اللي بدي احكيلك انت كمان كنت بتجنن وحديث الكل
عمر : تصبحي على خير يا حلوة
يا الهي، شو قصتها هالبنت والله رح تجنني ..
ما بصدق متى احكي معها، وبس نحكي اما بندخل بالحيط وما بنعرف نجمع كلمتين على بعض او بنصير بدنا نتمشكل على اتفه الامور ..
_______________________________
طلعت من غرفة النوم، ورحت عملت كاسة قهوة وفتحت اللابتوب اسهر على اي شي بلاقيه بوجهي ..
واول ما فتحت الفيس بوك، لقيت رسالة من شخص اول مرة ببعثلي وبكون في كلام خاص بيناتنا ..
بيني وبين حالي استغربت الموضوع، ومن الملل اللي كنت فيه رديت ..
علاء : مسا الخير، اهلا
… : كيفك ؟ ليكون ازعجتك ؟
علاء : ابدا، انا صاحي بس انتي ليه صاحية ؟
… : كنت بدي انام، بس فتحت الفيس اشيك عليه، ولقيت صورك مع شباب عيلتكم وما قدرت الا احكيلك نيااااال مرتك فيك
علاء : هههههه تسلمي، وانتي كمان كنتي منورة اليوم، لمحتك من بعيد
… : لا ما بوصل الك ابدا، اسم الله عليك انت قمر بحاله
علاء : رزان ؟!
رزان : بعتزر يمكن مو من حقي احكي معك بهالجراة، سلام
علاء : دقيقة، لسا بنحكي، هيك الواحد بنسحب ؟
رزان : لا ما بدي اتقل عليك، بعدين اكيد مرتك بتكون جنبك هلا وبلا ما ازعجك
علاء : لا مرتي نامت
رزان : معقول ؟ وحدة عندها زوج متلك بتنام وبتتركه يسهر لوحده
علاء ( مصدوم ) : ..
رزان : لا ما معها حق ابدا خصوصا بهيك يوم المفروض تكون متلهفة عليك كتييير ومو مصدقة متى ترجعوا عالبيت
علاء : لا عادي هي بعدها والدة جديد ويا دوب قادرة تسيطر على نوم بنتها
وكلام بجر كلام، ونسيت حالي بالحكي، لحد ما سمعت اذان الفجر ..
انتبهت للساعة، ولكمية السجاير اللي مدخنها بهالفترة ..
ما تخيلت بيوم انسجم بمحادثة مع اي بنت، باعتبار اني متزوج واصلا ما عمري حكيت مع بنت عالنت بعد الزواج ..
علاء : ماشي رزان انا بدي اروح اصلي وانام، يسلمو عالسهرة والكلام الحلو انبسطت معك
رزان : اوك وانا كمان انبسطت، يلا تصبح على خير
////
ما بعرف كم كان الوقت لما حسيت بحركته جنبي، لفيت وجهي عليه ولقيته متسطح على ظهره وعيونه معلقين بالسقف ..
ريم : بعدك صاحي ؟
علاء ( لف وجهه عليي لثواني ورجع لوضعيته ) : ليه صاحية انتي ؟
ريم : لا هلا صحيت عليك، كم الساعة ؟
علاء ( بجمود ) : قمت اصلي ورجعت، يعني الفجر
ريم : الله يقبل
قربت منه اكتر ولفيته بايدي التنتين، نيمت راسي على صدره ..
ريم : اشتقتلك كتير، مو مصدقة اني جنبك من جديد
علاء : … اقرصك عشان تصدقي ؟
ريم : ههههه لا بوسني احلى
نهضت حالي وقربت من وجهه واتدلعت عليه ..
ريم : ما كان قصدي اللي انت فهمته، انا مستحيل اندم اني حبيتك او تزوجت، بالعكس انت احلى اشي صار بحياتي وسلمى زادت هالحلاوة
علاء : بتحبيني ؟ احكيلي بكل صدق شو مشاعرك تجاهي
ريم ( استغربت ) : شو الي ساعة بحكي
علاء : عيدي معلش
ريم : اكيد بحبك، وبعشقك بجنون
علاء : …
ريم : شو القصة علاء ؟ مو المفروض انك ندمت على كلامك الي وانا على هالاساس رجعت ؟ نسيت !!
علاء ( مو عاجبه ) : نامي حبيبتي، نامي
لف وجهه عني، وانا ضليت صافنة اتطلع فيه كيف طنشني وكاني مو موجودة ..
راح النوم من عيوني، والتفكير وصلني للجنون ..
كل الاحتمالات البشعة مرقت بخيالي، حتى انه فكرت بالطلاق ..
وتخيلته متزوج، ومرته بتعامل سلمى باسوء معاملة ..
_______________________________
زياد : صباح الخير حبي
مها ( مبتسمة ) : صباحو، شو هالنشاط ؟
زياد : اضل استنى فيكي تصحيني وتحني عليي بفطور ؟، حكيت ما حك جلدك الا ظفرك اكيد مرتك مهدود حيلها من الرقص مبارح وما فيها حيل تفتح عيونها
مها : ههههههههه اه والله تحليلك منطقي، يلا صحتين حبيبي لا تنسى تسكر الباب بالمفتاح علينا لانه اكيد ولا وحدة صاحية من البنات
زياد ( رفع حواجبه ) : هاد بدل ما تقومي تودعيني وتتنشطي
مها : والله مو قادرة اتحرك، بس قولتك لازم اتنشط
ما كان قدامي الا اقوم معه، لانه الغيرة رح تاكله من مبارح لما شافني على آخر شياكة بعرس ابن اخوي، ورجعت عالبيت تعبانة وحطيت راسي ونمت ..
حنين : صباح الخير ماما، خلي عنك شو عم تعملي ؟
مها : يسعد صباحك، ما في اشي شوية حواضر
حنين : طيب اتركي هيني جاي اعمل انا، امير بعده نايم ؟
مها : كمان شوي بصحيه بس اخلص ما بدي يعجقني
اسيل : صباحو
مها : صباحو، شو هالنشاط حكيت ما بتقوموا للظهر
اسيل : عندي دراسة دوبني اخلص، وبعد بكرا عرس كمان
حنين : عقبال ما رنين تصحى تهكل هم دراستها
مها : اتركيها براحتها، هيها درست وجابت معدل وان شاءالله بترفعه او بتحافظ عليه عالاقل
رنين : صبحتوا تنموا عليي، شكرا
مها : ههههه لا كنا ندعيلك، يييي صوت امير
اسيل : انا بجيبه
حنين : افففت، هاكلة هم ياسمين والله قلبي مو متحمل اشوفها تعبانة
مها : انتي اللي كنتي تشجعيني هلا صرتي هاكلة همها
حنين : لانه ملامحها متغيرة مبارح كانت، حاسستها مو مبسوطة
رنين : لا حرام والله شفته شايلها على كفوف الراحة بس اكيد عشان سفره زعلانة
القعدة مع بناتي ما بنشبع منها، كل ما يكبروا كل ما بتعلق فيهم اكتر واكتر ..
ياسمين تركت فراغ كبير بالبيت، وبالرغم من حزنا على سفر احمد الا اانه مبسوطين لانها رح ترجع تعيش بيناتنا وتعطينا جو بوجودها ..
////
منى : قوم ماما هي عملتلك قهوة، وازا بدك تفطر في فطور عالطاولة
امجد : يسلمو ايديكي، لا بدي قهوة بس
منى ( قعدت جنبي ) : يمة يا حبيبي ما بصير هالحكي، انت مو مراهق، فكر باللي صار مع اخوك وشوف كيف تعذب واخر اشي الله ماجل نصيبه كان وضاعفله الفرح والسعادة
امجد ( شربت من القهوة ورجعتها عالطاولة ) : يمة انا وضعي مختلف عن احمد وحتى ظروف علاقتي معها كان غريبة شوي، الظاهر انقطع نصيبنا وانا راضي بحكم ربنا وقضاؤه
منى : الله يرضى عليك مدامك مؤمن ومقتنع، معناها الحياة ما وقفت والايام رح تجمعك بالبنت اللي تعوضك عن كل هالمشاعر
امجد : مين حكى انها وقفت، عادي هيني قدامك وعايش طبيعي، وكمان شوي بقوم افطر عشان تقتنعي
منى : هههههه يلا هيني بستناك
امجد : اه اضحكي، منا عارف انه كل هالسيمفونية عشان افطر هههههه
يارب اقدر اكمل حياتي بالقناعة اللي زرعتها جواتي، واتخطى كل اللي صار معي وانسى حبها ..
وقبل ما اقوم على فطوري اللي لو فكرت ما اكله امي رح تفتح مناحة وتعزم العيلة تقنعني فيه، كان احمد قاعد قبلي عالطاولة ..
احمد : الله على مفركة امي، شو هالنشاط يمة يسلم ايديكي
منى : شو النشاط بالموضوع ؟ هي بدها طنة ورنة يعني
ياسمين : بلمح عليي خالتو، الحكي الك واسمعي يا مرتي
آيات : هههههه
منى : بلشنا، انتي التانية شو هالحكي ؟ مو قصدك هيك صح ؟
احمد ( منسجم بالاكل كانه اله سنة مو ماكل ) : في حدا لسا ما اكل ولا اكل براحتي ؟
امجد : مين اللي اكل مفركتي ؟
احمد ( غص باللقمة ) : والله حماتي بتحبني عاد، ليه هيك حظي ؟ ضروري تكون حصة هالوحش
ياسمين / آيات : خطايا هههههع
امجد ( عيوني على ياسمين وبجاكر فيها بحواجبي ) : خلص عشان انت مسافر بعد يومين ورح ترجع عزابي وتتشحتف على لقمة مفركة من تحت ايدين امك مسااااامحك، كلهم وحلال زلال عليك
ياسمين ( بتردلي الجكر ) : قل اعوذ برب الفلق، ريته مطرح ما يسري يمري ويأسس ويبني ابن عمي
احمد ( صافن بياسمين ) : من عين مين ؟
امجد : من عيني طبعا، غشيم عن مرتك السوسة
منى : اييييه، بعدييين ؟
ياسمين : سامعة سامعة اولادك ؟ خلص انا بدي اروح عند اهلي اصلا
آيات : والله ؟! بطلتي تتحملي مزح ست ياسمين ولا بطلنا من مستواكي ؟
احمد : آيااات ؟
ياسمين : … انا ؟! الله يسامحك بس
انقلب المزح لزعل، وكله بسبب احمد وآيات اللي مو عارف كيف فمهوا الموضوع ..
احمد : اليوم الشباب بدهم يودعوني، ونقعد قعدة عائلية
منى : وين ؟
احمد : عند دار سيدي عالاغلب
منى : طيب اليوم صباحية عدي، شو الترتيبات ؟ حكولك اشي ياسمين ؟
ياسمين : …
احمد : ما شفنا حدا الا ستي وسيدي قبل ما نيجي، وما حسينا انه في اشي
آيات : احكي مع خالتو سهى بتعطيكي الصافي
منى : هاتي تلفوني خليني ارن اسالها
رجعت على غرفتي وكنت كثير متدايق، وما كان قدامي الا اني ابعث لياسمين عالواتس واطري الجو شوي، عشان ما تفهمني غلط لانه ما بهون عليي زعلها ..
امجد : حقك عليي يا عروس، صدقيني ما كان قصدي اللي صار
ياسمين ( شافت الرسالة وطنشت ) : …
امجد : بس بفرجيكي فيها اختي الزنخة، اللي بطلت تعرف المزح من الجد
ياسمين : انسى، ما دخلها
امجد : امبلا دخلها، اهم اشي انتي واحمد ما تزعلوا من بعض صدقيني مو محرزة باخر ايامه تتمشكلوا على هيك سيرة فارطة
ياسمين : حكتلك انسى مو زعلانة من حدا
احمد ( عيونه على ياسمين ) : مين بعثلك ؟
ياسمين ( زورته ) : اختي، اتطمنت ؟
احمد : لا، مو باين انك بتحكي مع اختك
منى : صلوا عالنبي يمة، مالكم ؟ هيك بتودعوا بعض بدل ما تكونوا عايشين بالعسل وكل كلامكم حب
ياسمين : …
احمد : اللهم صل عالنبي، ما في اشي يمة كلام عادي
آيات : ههههه ماما نسيتي جكرهم يعني ؟ هدول وضعهم ما بكون طبيعي ازا ما تجاكروا
ياسمين : ها ها ها
_______________________________
ام عدي : للللييييييش، ريته مبارك يا حبايبي، الله يهنيكم واشوفكم دايما هيك فرحانين، اسم الله عليكي شو هالحلاوة ؟
ديمة ( بخجل ) : الله يبارك فيكي خالتو، يسلمو عالفطور كتير زاكي
عدي : الله يبارك فيكي يمة ويدمك فوق راسنا انتي وابوي
ام عدي ( حضنتني ) : يا حبيبتي ما في اشي كتير عليكم، ريته صحتين وهنا على قلوبكم الطيبة
عدي ( غمزني ) : غلبتيني بالغزل ههههه
ديمة : تعلم ههههه
ام عدي : على سلامته، والله جمالك بنطق الحجر، الله يحميكي
عدي : شو الترتيبات اليوم ؟ عشان في قعدة نودع فيها احمد بده يجي حمزة كمان
ام عدي : هي عماتك وستك على الطريق، بيجو بباركولكم والمسا الكل بشوفكم وبنتحلى رجال ونسوان احسن ما يجو يعجقولكم البيت من اول يوم
ديمة : رجال ونسوان ؟ انا بدي اشوف رجال يعني
عدي : شو فيها ؟ اول مرة بتشوفيهم يعني
ديمة : عدي شو قصتك ؟ مو معقول تاني يوم عرسي فجاة اشوفهم، بستحي ئي
ام عدي : بنشوف شو بصير اليوم، اللي بريحك بنعمله خالتو
عدي : لا هيك كثير الوضع زاد يمة، شو هالدلال ؟
ام عدي : ههههه غيور طالع لابوك
ديمة : هههههه
////
سيرين : مين راحت فيكم ؟
ياسمين : ولا وحدة، بس النسوان لحالهم راحوا
سيرين : يلا المسا بنجتمع وبنشوفها، وين باقي الصبايا عالجروب ؟
غنى : صباحو، انا هلا فتحت عيوني
ياسمين : صباح الورد، مبارك حبيبتي عقبال ما نفرح فيكي
سيرين : مبارك غنوشة
غنى : الله يبارك فيكم حبيباتي، ما يحرمني منكم كنتوا بتجننوا مبارح وما حسيت حالي وحدانية ابدا
بيان : احم، اخت العريس منورة الواتس اليوم
البنات : كيفك بيان ؟
بيان : الحمدلله كتير منيحة، كيفكم انتوا ؟
سيرين : بدنا سلامتك
////
رانيا : جيب آدم على عرس حمزة
هيثم : كنت بدي احكيلك اذا اجيبه او لا، صراحة اشتقتله
رانيا : يييي شو بدها ازن حبيبي طبعا بدي اياه، انا اشتقتله كمان
هيثم : اليوم بعطيها خبر تجهزه وبكرا بجيبه
رانيا : بكرا رح يكون صعب، عقلي عند ياسمين
هيثم : الله يهونها، والله كلنا زعلانين على سفره هاد احمد قطعة من روحي، صحيح ليه ما رحتي على صباحية ديمة ؟
رانيا : استحيت من عدي والله، خلص هي المسا بنجتمع ونباركلهم
هيثم : ههههه ليه تستحي ؟ يلا براحتك انا عندي شغل برجعلك بس افضى
رانيا : اوك حبيبي يعطيك العافية
صحيت الصبح وقلبي متل النار بغلي، بفكر بآدم بشكل مو طبيعي ..
اتصلت على هيثم حتى اطلب منه يجيبه، والحمدلله وافق وما تحجج اني تعبانة ومن هالحكي ..
ام حمزة : وينك يمة برن عليكي ما بتردي ؟
رانيا : كنت احكي مع هيثم، كيفكم اليوم ؟
ام حمزة : الحمدلله، هيني بكمل تجهيز بيت اخوكي الله يهنيه فيه قد ما هو بفتح النفس
رانيا : امين يارب وعقبال حسين ورزان
ام حمزة : الله يطمن بالي على اختك، والله مهي عاجبتني عمايلها ولا نازلة من زور
رانيا : الله يهديها كتير متغيرة، نفسي افهم شو مالها انقلبت ؟
ام حمزة ( تنهدت بغصة ) : الغيرة يمة، منتي عارفة عقلها
رانيا : الله يبيض بختها ويريح بالها وبالنا
_______________________________
مساءا <<
احمد : اهلين بالشباب، ما يحرمني منكم
الشباب : هلا فيك يا غالي
عدي : بدل ما اطلع شهر عسل وحمزة يستعد لعرسه اجينا نتحلى معك
حمزة : بتطلع بعد بكرا، ملحق عالعسل
عمر : لا تواخذوه يا اخوان عريس ما اله ٢٤ ساعة خليه عايش بالاوهام والعسل
سيرين : مالك يختي كل هاد خجل ؟
ريم : ههههه شفتي
ديمة : مالكم ؟ عادي عندكم يعني
ياسمين : ولك عادي ما حدا بحكي اشي، بالعكس مبسوطين، المهم احكيلنا نفذتي المتفق عليه ؟
ديمة : اه طبعا ههههه معقول امضيله الليلة على خير
سيرين : يا حبيبي جاييني الدور، مو عارفة شو اعمل انا
ياسمين : اي اشي المهم تنكدي عليه
آيات : هي الخبرة حكتلك
ياسمين : بكفي آيات
آيات : شو حكيت ؟
ريم : هششش مالنا !!
سيرين : والله ! قلبتوها كنة وبنت حمى من اول اسبوع ؟
آيات : احكي لبنت خالتك المصونة، من اولها عملت فريق متجوزات وفريق خاطبات وضل تحكي مطلقات
ياسمين : انا ؟
ديمة : عن شو قصدك ؟
آيات : شو نسيتوا وقت الصورة الجماعية بسهرتك ؟
ياسمين ( فتحت عيوني بصدمة ) : لااا انتي مو معقولة ؟ شو هالحقد هاد ؟ معقول تفكريني هيك بقصد
ريم : عيب عليكي آيات، مستحيل ياسمين تفكر بهالطريقة
آيات : انا فاهمتها كتير لياسمين يا ريت ما حدا يحكي عن العيب لانه ما حدا عامله قدها
ياسمين ( عصبت ) : انتي وحدة مريضة، رح تندمي كتييير على كلامك هاد
تركتهم ورحت اقعد مع احمد بمجلس الرجال وما همني الموجودين كلهم، خليها تشوف ياسمين شو رح تعمل ..
احمد ( مستغرب ) : في اشي ؟
ياسمين ( معصبة ورح ابكي ) : اه في، مو قادرة ابعد عنك انت من حقي بهيك وقت
ابو احمد : اه والله يا عمي حقك، اقعدي جنبه ما عاش اللي بده يفرقكم
ياسمين ( بغرور ) : تسلم عمو، فعلا لسا ما طلعت عليه الشمس اللي بده يبعدني عن احمودتي
الشباب : يااا سييييدي
ابو امير : معلش يابا ايام وبتعدي وبتقعدي عنده لتزهقي وتصيري تترجيه ينزلك عالاردن اجازة
احمد : …
ما كان احمد عاجبه اللي بعمله، ومع ذلك شبكت ايدينا ببعض، ولزقت فيه وسبلتله عيوني ..
ابو عدي ( بنادي على ديمة ) : تعالي يا عروس انصمدي جنب عريسك انتي كمان من حقك
عمر : خليه مرتاح شوي منها
ديمة : سمعتك
امجد : هيهيهي يمة
قصي : لحقي حالك شكله بطل ياخدك شهر عسل
عدي : لا طبعا رح نروح بس محتارين
حمزة : سيرين وين حابة نروح ؟ عشان نحجز مع بعض شو رايكم
سيرين : انا اي مكان معك بروحه، حتى لو عالعقبة
رانيا ( اجت فجاة ) : اممم حمزة والعقبة ؟! مو زابطين للاسف
هيثم : ليه ؟
رانيا : كنا نترجاه ياخدنا قال ما بحب يروح ما فيها اشي بس تعب سواقة عالفاضي
سيرين ( بتغمزلنا ) : ييييي بيبي معقول ؟ لو تشوف قبل سنتين اخدونا عالعقبة مع انه ما كنا حابين نروح بس عملولنا اياها مفاجاة
ياسمين : ترجونا ترجاية، كل واحد يبعتلنا رسالة من جهة ومشان الله يا بنات الرحلة مو حلوة بلاكم
هيثم : ههههه
رانيا : نيالكم، والله رح تنصدمي بكرا بحمزة ما بحب هيك مشاوير
علاء : له يا ابو نسب ما حبيتها منك، بس اكيد رح تتغير بس تصير تطلع مشاوير مع مرتك حبيبتك، ومع عيلتنا بشكل عام
ريم : اه والله كانت رحلة لا تنتسى، وبعدها على طول انا وعلاء خطبنا
ياسمين ( بسبل عيوني ) : وانا احمد اعترفلي بحبه وطلب ايدي للزواج
ديمة : انا نجحت بالفصل الاول بمعدل عالي صراحة، فعلا تغيير الجو باثر عالنفسية
قصي : وانا اكلت قتلة قبل ما اروح، قصدي مشاوي وانبسطت كثير بمية البحر داوت جروحاتي
الشباب : هههههههههه
ابو امير : حاولوا ما تتذكروا رحلة عجلون
الرجال : هههههههه
هيثم : الحمدلله ما كنت موجود وقتها
مها : احلى رحلة راحت عليك صراحة
سهى : المشاوي كانت زاكية
منى : والببسي عمل فياضانات
نهى : والشاي نسيتوه ؟ ههههه
رانيا : حاسستكم بتتمسخروا، ولا احساسي غلط ؟
هيثم : لا والله صحيح، لو تعرفي شو اللي صار وقتها الا تفرطي
علاء : المشكلة ضايل يومين عالعرس خليه يمرق على خير بعدين لحالهم بصيروا يكتشفوا
حمزة ( رفع حواجبه ) : يعني سيرين عاملة اشي ؟
عمر : مستحيييل، كله بالصدفة كان
امجد : بس اكثر ناس انبسطوا اخوي ومرته ههههه
ابو احمد : كان رح يصيدلها عصفور ويحلبلها اياه عشان كانت عطشانة
احمد : اااخ بس
آيات : مسكين كنت تحت تاثير سحرها، واكلت الضرب ( اكلت المقلب ) يا اخوي
ما بدها تقعد عاقلة بنت حماي المحترمة اليوم، ماشي يا آيات ..
لفيت وجهي عليها ورجعت وجهت نظري عالجميع ..
ياسمين ( بجكر ) : صار لازمها طلعة مرة تانية خصوصا للعزابية بلكي بتزبط معهم هالمرة بما انه خف العدد
احمد : شو قصدك ؟
ريم ( بترقع وراي ) : قصدها انه العقبة فالها حلو علينا، كلنا خطبنا بهالسنتين
ياسمين : وصار في علاقات جديدة مخفية، بما انه الزمن تغير والوضع صار طبيعي هالايام مو متل ايامنا يا ريم
سيرين : ما في اشي تغير، الكل متل ما هو
قصي : كانه في طخ في المنطقة ؟
عمر : اعطوني خوذة، ترا بعدني بعز شبابي
ابو بيان : لا والله كلام ياسمين صحيح، اوراق كثير انكشفت، وشكله المخفي اعظم
ياسمين : يسلملي اللي بفهمها عالطاير خالو حبيبي
احمد ( بعصبية ) : بنات، لو سمحتوا ارجعوا على مكانكم
ياسمين : اهدى بيبي ما حكينا اشي
احمد : انتي بالذات قومي من هون، مو عاساس ديمة خجلانة وما بدها حدا يشوفها اليوم ؟
عدي : احمد ؟!
آيات : روق عدي عادي لازم تصير مشاكل، لانه كنتنا الجديدة ما بتعرف تقعد عاقلة
ياسمين : من وين جبتي كلمة الجديدة ؟ طول عمري الاصل والقديمة وما الي بديل
ديمة : شو رايك انتي تقعدي عاقلة بدالها ست آيات ؟!
منى : يا لطيف مالكم ؟ شو هالنهار هاد كله مشاحنات من اوله
مها : يا عيب الشوم عليكم، شو مالكم ؟
هيثم : ياسمين وآيات الحقوني
ياسمين : مو وقت محاكماتك خالو، خليها بعد ما يسافر اخوها بعدين لحالها بتهدى، وضعها طبيعي يا عليي
آيات : سمعتوها ؟
سيرين : يااااسمين، بكفي جد بزعل منكم
بيان : آيات تعي شوي
آيات : شو بدك انتي التانية ؟ مو بكفيكي اللي عملتيه الك عين تحكي معي ؟
امجد ( بنبرة حادة ) : آيات ؟!
ياسمين : معك حق امجد، الكلام اللي حكيتلي اياه اليوم طلع صحيح، بس عشان تعرف مين ياسمين
احمد : اي كلام ؟
عدي : لا دقيقة، قبل ما تكملوا نقاشكم احنا بنستاذن وشكرا عالسهرة الجميلة
خالو هيثم اشر لعلاء وعدي وغمزوه لحمزة، وطلعوه من البيت بجو لطيف من رجال العيلة واعتذارات، وضل خالو موجود ..
ابو عدي : حليتلكم المشاكل اليوم ؟ شو قصتكم
ابو ماهر : والله عيب هالحكي قدام زلمة غريب، بدكم توطوا راسنا
هيثم : بسيطة حمزة مو غريب، بس في اشياء غلط عم تصير ولازم تنحل
احمد ( بدخن بعصبية ) : …
ابو احمد : خذ مرتك واطلعوا شموا شوية هوا غيروا نفسية
ياسمين ( بعفوية ) : فكرة حلوة
احمد ( زورني ) : ما بدي اسمع حسك، فاهمة ؟
ياسمين ( رجفت من نظرته وهزيتله راسي ) : …
ابو بيان : يعني مشاكل احمد وياسمين معروفة للكل، بس امجد وبيان حدا يحل لغزهم ويفهمني
بيان : بابا !
ابو بيان : بكفي سكوت والله رح انجلط من اللي صار، انتي مو قابلة تحكي اشي ومن حقي افهم
امجد : سلامتك خال، بس انقطع النصيب بيناتنا والله يستر عليها، انا مسامحها وما بدي الا اشوفها مبسوطة مع شخص يستاهلها اكثر مني
ام بيان ( بغصة ) : بهالبساطة ؟!
عمر ( بهمسله ) : بلا هبل، لا تعمل حالك الحلقة الاضعف لانه مبين انه هي تركتك لاشي غلط شافته منك
امجد ( بهمسله ) : عادي بحكيلهم ما عندي مشكلة
ابو عدي ( عيونه على عمر ) : ابعد عنه خلينا نفهم، احكي يا خالي كلنا بنسمعك واللي بنقدر عليه بنعمله وان شاءالله نصيبك ما بنقطع
منى : لا تغلبوا حالكم، خلص اتخذوا قرارهم وانتهي ليه موجعين راسكم فيهم
ابو بيان : شكلك بتعرفي ومخبية علينا
ابو احمد : لا والله ما بنعرف وما حكالنا، واحنا خففنا اسئلة وتركناه براحته لحاله اختار ولحاله ترك
ام بيان : المشكلة ما ترك، هي تركت معناها في اشي غلط صاير
ام ماهر : شو قصدك ؟ ابن بنتي عديم اخلاق ولا بخيل ولا ما بخاف ربه ؟
هيثم : لا يمة مو هيك قصدها
ام بيان : آسفين، خلص بنتنا اللي غلطانة
عمر : له يا مرت عمي، مو هيك النقاش الله يسامحك، بعدين لسا ما انخلق اللي بده يجيب سيرتها بالعاطل
ابو عدي : لا حول ولا قوة الا بالله، الظاهر ما بدهم يحكوا، مثل ما حكى ابوه اتركوهم وهمة حرين اذا في نصيب بكملوا
ابو بيان : …
كل هالكلام ما همني، ينحرقوا ..
بس احمد شو مخبيلي ؟، كان كل شي بفكر فيه بهاللحظة، وآيات اللي ما شفي غليلي منها لسا ما بعرف شو اعمل فيها ..
قلبت قلبي لحقد وسواد عمري ما كنت هيك، بس صدمتني من تفكيرها السخيف وتحليلاتها السطحية ..
////
حنين : ما لازم تسكتي اكتر من هيك، ازا عامل اشي غلط احكي لاهلك من حقهم يعرفوا
بيان ( بتبكي ) : المصيبة اني غلطت بحقه خايفة يجبرونا نرجع
غنى : طيب عادي ارجعوا، ليه هالقد خايفة ؟
حنين : لانها ملت منه ومن عمايله السودا
غنى : اي عمايل ؟ فهموني
بيان : غنى معلش بس كلام صعب احكيه لاي حدا، بترجاكي ما يطلع من بيناتنا
حكتلي بيان كل شي كان يصير بينها وبين امجد، وصدمتني بالموقف الاخير ..
غنى : انتي جد هيك بتفكري ؟ ولك طلاب الجامعة بمسكوا ايدين بعض، هاد خطيبك ليه ما تنبسطي معه ؟
حنين : يعني صحيح اللي بعملوه طلاب الجامعة ؟ هدول لسا مو مكتوب كتابهم
غنى : يا شيخة ؟! هو لسا ضل فيها كتب كتاب، احمدي ربك انه اجا وخطبك وتحدى الدنيا مشانك، مو معقول واحد متله يكون بتسلى
بيان : انا ما حكيت انه بتسلى، بس ما عم يصبر على نصيبه
غنى : انتي كتير غلطااانة، عالاقل بسحب ايدي وببهدله بطريقة ادبية مو تتركيه وتضربيه قدام كل العالم
حنين : صح الكف ما كان اله داعي بيان، خصوصا بمكان عام وبنضل مجتمع شرقي
غنى : يعني لو انا كنت بالمطعم وشفت هالموقف، بقول ابصر هالشب شو عامل لحتى اكل كف
بيان : خلص اللي صار صار، انتهينا
غنى : بس من حق امجد اعتزار منك
حنين : لا خلص ما في داعي بلا ما يكبر راسه اكتر، مدام انتهوا، يفضل انه كل شي بينهم ينتهي حتى رقمه اعمليله بلوك بلا ما تضعفي
غنى : وآيات وياسمين مالهم داقين ببعض اليوم ؟
حنين : لا تزكريني، نفسي اعضها قدام الكل
بيان : انتي شوفي كيف حكت معي ؟
غنى : استغفر الله العظيم، عين وصابت عيلتنا والله كنا ما احلانا
حنين : عمرنا ما كنا ما احلانا، دايما مشاكل انسي
بيان : شكلها كتير غيرانة من ياسمين، مسكينة الله يبعتلها نصيب احسن من محمد
غنى : امين، فعلا عالاغلب غيرانة
////
سيرين ( بتلطم ) : انفضحنا وانشل املنا
ريم : مجنونات التنتين
ديمة : اجتهم الحالة عند اخر يوم، بدل ما يكونوا مبسوطين وبشموا هوا
ريم : ولا احمد صدمني، قال ديمة خجلانة ليه جايين عنا
ديمة : يييي لا تزكريني تمنيت الارض تنشق وتبلعني
سيرين : حسيت عدي رح يقوم يقتله
ريم : ههههه اه يختي صارت مرته خلص
علاء : لا تواخذنا حمزة والله ما بعرف شو مالهم اولاد خالتي
حمزة : لا يا رجل بالعكس انشغل بالي عليهم، الله يهديهم
عدي : … مسخرة
علاء : بسيطة عدووش، مرقله اياها ههههه
حمزة : ما حكى اشي قصده يقنع ياسمين تقوم، افكاره تشتت من العصبية
عدي : افكاره تشتت وعروقه انفجرت من عمايل مرته واخته
علاء : اول مرة بشوف آيات هيك
حمزة : اه والله مبين عليها عاقلة وسيرين بتمدح فيها وبتحبها
عدي : انسى يا زلمة غيرة بنات، من حب احمد لياسمين الكل صار يغار منها
علاء : يضرب هالحب، ما اجانا منه الا وجعة راس
حمزة : مسكينه شو تعذبت بس ما حدا حاسس فيها
عدي : احمد تعذب اكثر منها، وعمل اللي ما بنعمل بس مشان يرضيها
////
رانيا : وين راح حمزة والشباب ؟
هيثم : ما بعرف بجوز على بيت علاء
رانيا : خلص لازم سيرين تروح ترتاح وحمزة كمان
هيثم : شو دخلني، احكيلهم انتي انا اللي فيي مكفيني
رانيا : روق، خلص يصطفلوا، احمد اكيد بقدر يتفاهم مع مرته واخته
هيثم : ولك راسي رح ينفجر كل ما اتذكر هداك المشهد، مو طبيعيات كانوا ولا كانهم ياسمين وآيات اللي بعرفهم
رانيا : وانا انصدمت فيهم، بس بيني وبينك بدون زعل، الحق على آيات واهلها ما قدروا يسكتوها ؟!
هيثم : شو يسكتوا فيها مهي ياسمين نازلة طخ فيها ولا انتي ياسمين حبيبتك ما بتشوفي غلطها !
رانيا : هلا هاد اللي طلع معك، خلص انسى شو دخلني فيهم
_______________________________
خلصت هالسهرة، اللي يا ريتها ما كانت ولا صارت ..
رجعنا على بيوتنا وقلبي وعقلي عند بنتي، ورح اموت من خوفي عليها، وشو رح يعمل احمد معها ؟ ..
زياد كان بحالة اصعب مني، وايده على قلبه من اللي صار ..
رحت قعدت جنبه عشان اهديه شوي، على اساس انا وضعي احسن يعني ..
مها : شو عم تحضر ؟
زياد : … احضر ؟ لا اطفيه اطفيه ما بحضر اشي
مها : وين عقلك ؟
زياد : وين بده يكون يعني ؟ عاجبك اللي عملته بنت اختك اليوم
مها : يعني انت مو زعلان من ياسمين ؟
زياد ( اتطلع عليي بصدمة ) : ياسمين ؟! شو عملت ؟ هو كل ما دق الكوز بالجرة بتحطوه بظهر هالبنت، لا يا ستي آيات اللي غلطت وانا لو مكان ياسمين بمسح فيها الارض وحلال عليها اللي حكتلها اياها
مها : بس احمد كتير كان معصب
زياد ( بعصبية ) : ويبلط البحر، مكتوب على بنتي الوجع والعذاب واخته ما بتغلط ؟ ملاك صارت
مها ( بخوف ) : طيب روق روق صحيح كلامك انا امها كمان وما بتهون عليي، مشان هيك خايفة عليها
زياد : مقهور يا بنت الحلال والله مقهور من كل قلبي، ليه هيك بصير مع بنتي ؟ شو هالذنب اللي عملته بحياتها لحتى انكتب عليها كل هالعذاب ؟
مها : الذنب ؟ ، ( بصوت مهزوز ) يمكن العشق، اه عشقته وعشقها وانكتبتلهم هالحياة
زياد : ريته ما كان هالعشق اللي بتحكي عنه، ريته ما كان
نزل راسه وغطاه بايده، كان بحالة سيئة كتير ..
مو غريب عليي هالمشهد، ياسمين غالية عليه بحجم الدنيا يمكن واكتر ..
_______________________________
احمد ( بصوت عالي ومعصب ) : فهميييييني شو اللي بصير ؟ ولك انتي ما بتتغيري ؟
ياسمين : ليه شو عملت ؟
احمد ( ضرب الطاولة بعصبية ) : لا تجننيني، كل ما احكي معك بتحكيلي شو عملت ؟ حرام عليكي ياسمين متى رح تشفقي عليي وتحسي فيي ؟
ياسمين ( عصبت ) : اسمع احمد، اسمعني منيح يا زوجي وحبيبي، لما تبقى تشوف بعقلك وقتها رح تعرف اني ما بعمل اشي، وكل اللي حواليي همة اللي بغلطوا بحقي وبظلموا، واليوم بالزات اختك هي الغلطانة
احمد : …
ياسمين ( مسكت ايده واتطلعت بعيونه ) : انا تعبت، حس فيي احضني تقرب مني وقت اللي بتصير مشكلة مو تهاجمني بهالطريقة وتنفرني منك، النا سنين على نفس الموال بس ما كنت مرتك وقتها
احمد ( هز راسه ) : اسالك سؤال وبدي جواب صريح وبكل امانة، اذا فعلا انا بهمك امري وبعدها انهي النقاش
ياسمين ( بلعت ريقي ) : تفضل
احمد ( تمالك اعصابه وقعد ) : انتي شو كنتي تقصدي بانه في علاقات ومن هالحكي، انا شاكك انه عمر وآيات في اشي بينهم، صح ؟
كان سؤال كتير صعب، وجوابه اصعب، شفت بعيونه حيرة ورجاء ما عمري شفتهم الا يوم ما تقابلنا بعد ما اتطلقنا ..
بس بالاخر جاوبته جواب ذكي، حفظت فيه خط الرجعة مع آيات، وبنفس الوقت ارضيت فضوله كأخ شرقي، وكسبت ثقته واني بهمني رضاه ..
_______________________________
امجد ( بصوت عالي ) : شو الخبايص اللي حكيتيها لياسمين اليوم ؟ شو عملتلك المخلوقة ؟ ولك ما في حدا بالعالم قلبه طيب وبحب الناس وخصوصا انتي قدها
آيات : في اشياء انت ما بتعرفها عنها، مشان هيك اختصرني لانه موصلة معي للسما
امجد ( بقرف ) : روحي من وجهي، وحدة غبية، صدقيني رح تندمي على هالعمايل كلها، ولسا بتطولي لسانك على بيان كمان، هاي حسابها ما اجا لسا
آيات : هاد اللي ناقصني، الحق عليي بدافع عنك رغم اني متاكدة مليون بالمية انك عامل خبصة معها مشان هيك رمتك باول حاوية يا غبي
امجد ( ضربت الحيط بايدي ) : انقلعي من وجهي احسن ما انبلى فيكي بهالليل
منى : روح شوفهم والله انفضحنا صوته عبى الحارة
ابو احمد : خليه يربيها، انا ما بدي اشوف وجهها ولا اسمعها، فهمتي ؟
منى ( بتبكي ) : ياربي شو صار فينا، ليه هيك ما بتكتمل علينا فرحة ؟
ابو احمد ( بغضب ) : من قلة تربايتنا، انا طلعت ما بعرف اربي، انفضحت قدام الرجال
منى : … يا حسرتي على هالبنت حطت كل غيرتها بمرت اخوها
ابو احمد : مدامها غيرانة ما توافق على عريس وتخلصنا، هلكتنا زيارات ومواعيد للناس ومو عاجبها العجب وبتحكي ما بتفكر بالزواج
انس : خلص اهدى، اتطلع على حالتك كيف
امجد : اتركني انس، انا منيح
انس : لا مو منيح، مستحيل اتركك بهالحالة والله خايف عليك
امجد ( عصبت ) : قلتلك منيح، روح شوف اختك
انس : والله تعبت من هالحالة، حرام عليكم يصير فينا هيك، ما لحقنا نفرح بعرس احمد
امجد : لا تجيبلي سيرته، كل الحق عليه، ما عرف يسكت اخته، اكيد هسة حط كل قهره بالمسكينة ياسمين
انس : كانك متعاطف معها كثير ؟!
امجد ( اتطلعت عليه بطرف عيني ) : … شو قصدك ؟
انس : لا لا انا قصدي انه ضد اختك واقف معها، مو لهالدرجة ياسمين مظلومة
امجد : لساتك صغير يا انس، لما تكبر رح تعرف انه معي حق
////
تركته ورحت على غرفة آيات، مسكت ايد الباب وحاولت افتحه، بس للاسف كان مسكر ..
رجعت على غرفتي، ورميت حالي على التخت وبراسي الف قصة وقصة ..
منى : نمت ماما ؟
انس : من وين بده يجي النوم ؟
منى : الله يفرجها، يا حبيبي لا تفكر بحدا الك بحالك وبس يدبروا حالهم
انس : مو منطق هالكلام كيف يعني الي بحالي ؟ هو انا عايش بكوكب ثاني، بعدين آيات ليه مسكرة الباب عحالها دقي عليها وشوفيها
منى : خليها مع حالها شوي بلكي تراجع تصرفاتها
انس : تقعد ما اختلفنا بس ما تسكر بالمفتاح
منى : طيب هلا بشوفها بلكي تفتحلي
////
كل اللي حواليي مفكرين اني غيرانة من ياسمين، وكأنه عمري مية سنة وعنست وقطعت الامل من حالي ..
ما حدا قادر يفهم انها بتجرح في الناس وكله بدون قصد، واخر شي بنطلع احنا اللي ظالمينها ..
منى ( بتدق عالباب ) : آيات ؟ صاحية ماما، افتحي يا حبيبتي لا تسكري بالمفتاح والله بخاف عليكي
آيات : اه صاحية، اتطمني ما فيي اشي، نامي انتي وارتاحي
منى : طيب خليني اشوفك قبل ما انام، يلا ماما
آيات : مو جاي عبالي افتح، خلص بشوفك الصبح ازا ضليت عايشة
منى : من غير شر، شو هالكلام الفاضي يلا مو رايحة الا لما تفتحي بهون عليكي رجليي يوجعوني من الوقفة وانا اترجاكي هيك
ما هان عليي امي وموقفها، وبالنهاية ما الي غيرها يفهمني ويوقف بصفي ..
_______________________________
نهى : شو مالك انتي التانية ؟
سيرين ( بتبكي ) : كل اللي صار بتحكيلي شو مالني ؟ حرام نفرح احنا والله
ريم : بالله عليكي سيسو لا تعملي بحالك هيك، والله ما في اشي بستاهل خلص فخار يكسر بعضه احنا مالنا فيهم
نهى : لا حول ولا قوة الا بالله، هيك اخرتنا ؟ ليه بتوقفوا بصف ياسمين وبتتركوا آيات ؟
ريم : مين قال انه وقفنا بصفها ؟ بعدين انتي ما عرفتي شو قصتها آيات وكيف بتلطشها كلام طالع نازل وكله ما اله داعي وبدون ما ياسمين تعمللها اشي
سيرين : لا ريم ياسمين غلطانة كمان، بس غلط آيات اكبر المفروض انها تواجهها بالكلام بدل ما تحقد عليها وتصير تزت حكي بلا طعمة
نهى : فهموني بس اي كلام قصدكم ؟
ريم : يوم سهرة ديمة مو ياسمين قالت المتزوجات جنب بعض والخاطبات جنب بعض، راحت آيات حكتلها والمطلقات بالنص، وقتها كنا نفكر انه الكلام كله مزح وهبل طلعت آيات زعلانة من كلام ياسمين ومفكرته مقصود الها
نهى ( ايدها على تمها ) : يا عليناااا
سيرين : تخيلي عاد لما تصير تفكر تستد منها، وشفتي بعينك تلطيش الحكي
نهى : الله يهديهم، كلام ما اله طعمة ولا داعي حتى، بتعملوا من الحبة قبة
ريم : شفتي بالله، ما فادنا غير الفضيحة قدام حمزة
نهى : ولا فضيحة ولا اشي حمزة بطل غريب وقلبه ابيض ما عنده حكي عالعالم
سيرين : اه حكالي علاء انه مو معلق بالعكس ضل عقله معهم
ريم : يلا اهدي وحاولي تنامي منيح قد ما تقدري
سيرين : خلي سلمى عندي
ريم : اوك خليها لحد ما تغفي باجي باخدها
نهى : حبيباتي الله يحميكم من العين واتضلوا حبايب طول العمر
ريم / سيرين : امين، واتضلي فوق راسنا
////
ما صدقت متى ارجع، حتى احكي مع رزان اللي كانت تبعثلي طول اليوم وما صحلي ارد عليها ..
كنت بدي افهم شو قصتها اليوم وليه هيك بتزن ..
رزان : واخيرا
علاء : شو بتساوي ؟ المفروض عندكم حفلة بكرا
رزان : شو يعني ؟ ما بدك تحكي معي
علاء : بالعكس طول اليوم نفسي احكي معك بس ما صحلي والله، طمنيني كيف استعدادك لعرس اخوكي ؟
رزان : ماشي حالي
علاء : شو مالك ؟ كانه مو مبسوطة
رزان : اااخ يا علاء والله نفسي يكون اشي متل ما بدي، بس للاسف الحال على قده والله بعلم فيه
علاء : له يا بنت الحلال، احكي الحمدلله ماشاءالله مو ناقصكم اشي الله يديم الوالد واخوانك فوق روسكم
رزان : ما قصدي اشي بس كل البنات بكون عندهم احلام، وللاسف اللي متلي صعب تحقق احلامها
علاء : طيب احكيلي شو ناقصك؟ احنا اهل وان شاءالله بقدر اساعدك قد ما اقدر
رزان : يا عيب الشوم الله يسامحك، ما كان قصدي هيك، انا بس بفضفضلك
علاء : بعتزر منك فهمتيني غلط، مو قصدي الاهانة والله
رزان : خلص علاء، ارجوك رح ازعل منك
علاء : لا انسي، غيري الموضوع
رزان : اه بكون احسن، بس برضو انا نعسانة ولازم انام عنا بكرا شغل كتير وسهرة شباب متل ما بتعرف
علاء : براحتك، تصبحي على خير
الحمدلله اللي خلصت كلام قبل ما تدخل ريم الغرفة، وبدون سلمى كمان ..
بما انه اليوم اجينا عند اهلي، فشكله الوضع النفسي الها مرتاح بوجود امي حواليها ..
ريم : شو عم تعمل ؟
علاء : لا ولا شي، وين سوسو ؟
ريم : عند عمتها بدها اياها تنام جنبها
علاء : الله يسترها ما تنعدي هههههه
ريم : هههههه حرام عليك، الله يتمملها على خير
علاء : تعالي اشوف بما انك فاضية اليوم
ريم : امممم يعني مو فاضية كتير، رح اجيبها كمان شوي، بس يلا هيني جاي استغل هاللحظات الرومنسية بما انه مزاجك منيح اليوم
علاء : نيالي
_______________________________
قصي : نمت ؟
عمر : لا وانت ؟
قصي : عايف حالي اقسم بالله، نفسي احكي معها بس بعد ما بهدلتني هداك اليوم بطلت استرجي اتطلع فيها
عمر : هههههه عالاقل البنت متزوجة، مو حبيبتك ونفسك تحكي معها ومو قادر
قصي : حبك برص انت الثاني، بلشنا بياخة
عمر : خلص اسكت، انا حمار بنسى حالي وبحكيلك اشي
قصي : طيب احكيلها يا فهمان
عمر : ما بدي احكي لحدا، خليني مرتاح هيك
قصي : والله انك بتفهم، بس هي شو قصتها بحسها بتحاول كثير تلفت نظر
عمر : قولتك بتحبني ؟
قصي : هي آخر فترة فاقدة عقلها شوي، فاكيد حبتك بالمعيّة بما انه حب واحد مثلك ضرب من الجنون
عمر ( رمى عليي المخدة ) : ولك الحق مو عليك، انا حمااار وغبي اللي اجيت عندك اواسيك بوحدتك
قصي : هيهيهيهي اكلت الضرب
عمر ( حافظ على كشرته شوي بعدين ضحك ) : هههههههه ما اسقع وجهك، انطم ونام
_______________________________
احمد ( متسطح على ظهري وياسمين راسها على ايدي وايدي الثانية تحت راسي ) : بكون بفكر فيها ويمكن حكى معها صح ؟
ياسمين ( رفعت راسها وارتخى شعرها من كتفها على وجهي وجسمي ) : وعدتني ما تفكر بالموضوع كتير صح ؟
احمد ( رفعت الشعر عن وجهي وقرصتها من خدها بخفة ) : تذكرت حالي ايام العزوبية، هيك كان يصير فيي واتمنى اكون جنبك بكل لحظة
ياسمين ( رمت حالها عليي بدلال نيمت راسها على صدري ) : وهلا انا معك، ممنوع تفكر باشي تاني، يلا العب بشعراتي خليني انام
احمد : بتؤمري، بس ممنوع تقومي، بدي نضل هيك طول الليل
ياسمين ( بنعس ) : هو كم ضل من الليل اصلا ؟ يلا غمض عيونك متلي واحلم فيي
احمد : ههههه حابب احلم بابنّا اللي مشتاقله كثير
ياسمين : اوك، المهم اشي بتعلق فيي، يلا هدووووء
احمد ( بغني ) : يلا تنام يلا تنام …
_______________________________
يوم الاثنين ( عرس سيرين ) <<
ريم : بتاااخدي العقل
سيرين ( بفرح ) : الحمدلله، اتطمني على ماما لا تتركيها ريم حبيبتي انتي
ريم : ولا يهمك انا جنبها بكل لحظة، انتي لا تفكري باشي اليوم غير انك تنبسطي للسما
سهى : تاخرنا عليكم
نهى : لا هلا اجينا من الصالون، وين ديمة ؟
سهى : ههههه نسيتي انه صارت مع زوجها واهله
نهى : الحمدلله، عقبال ما تيجي مع كنتك
مها : اويها لمو الورد يا بنات
اويها عرسنا منه ما فات
اويها وفرحتنا ب ( سيرين )
اويها زينة كل الوردات
بنات مها وامها ونسوان اخوانها وباقي بنات العيلة : لللللللييييييش
////
ديمة : ما فيي حيل اوقف
ياسمين : شو احكي انا دوام جامعة وقلة نوم وامتحانات عالابواب
بيان : الله يعينك والله بفكر فيكي بحكي لماما مسكينة ياسمين بتركض ركاض ومو ملحقة
غنى : منيح اللي جامعتك قريبة، اهون شوي
حنين : والسيارة معها بتوفر وقت اكتر
ياسمين : مين قلك ؟ بهكل هم المصفات بخلي احمد يوصلني
بيان : وشو رح تعملي بس يسافر ؟
ديمة : شو مالك الوضع كله رح يختلف
ياسمين : الله يهون عليه السفر، اليوم كان بالسوق من الصبح بجيب اغراض، التاني ما بنام منيح
حنين : احسن اشي جاي طيران لو بر وبده يسوق مشكلة
ياسمين : اه طبعا مأساة الوضع بكون
ديمة : المهم شو بدنا بالحكي، سيسو طالعة غير شكل اسم الله عليها
ياسمين : اووويلي بس شفتها عيوني قلبوا قلوب حب، وحمزة دخل بحاله وبطل يجمع يا ويلي عليه
غنى : التاني ماشاءالله عنه متل القمر ههههه
حنين : الله يهنيها ويبعتلنا متله واحد هني رضي
بيان : ركزولي على رزان شو لابسة بعرس اخوها
ديمة ( بتلطم ) : يمة بس اتزكر منظرها بسهرتي بغمى عليي
البنات : هههههه رهيييبة انتي
ريم : يلا آيات تعي معي، مو حلو منظركم هيك كل وحدة قاعدة بجهة، عالاقل عشان العرس لازم تقعد مع حماتها
آيات : ريم لا تزهقيني خلص حكتلك تروح تقعد معها ما منعتها انا، خليني بحالي هيني قاعدة ومرتاحة ومريحتكم مني
رانيا : يا آيات الله يرضى عليكي والله ياسمين ما كان قصدها اشي وانتي اللي بديتي قدام الرجال صرتي تحكي كنت مسحور فيها يا اخوي ومن هالحكي
آيات : معلش رانيا انتي ما بتعرفي من الاساس انا ليه حكيت معها هيك، فلو سمحتي اتركيني براحتي
ريم ( زورتها وعضت على شفايفها ) : …
رانيا : اوك، بعتزر، عن ازنكم
منى : اكيد ياسمين ماخدة على خاطرها من آيات
مها : لا الله يسامحك، طول عمرهم خوات واعز، وآيات اخت الغالي هههه بس انتي اتركيهم لحالهم بروقوا وبتفاهموا عادي
سهى : والله من يومها وانا بفكر فيهم وبدعيلهم
ام عدي : طولوا بالكم عادي كل البنات هيك، سوء التفاهم موجود بين الكل ان شاءالله شدة وبتزول
ام بيان : برضو عشان احمد مسافر ياسمين متوترة المفروض تسايروها وتوقفوا جنبها، مرت عمي كتير بتحكيلي بتشوفها قاعدة ودمعتها على خدها
مها ( دمعوا عيونها ) : يا حبيبتي
منى ( مسكت ايدها ) : لا تخافي ان شاءالله رح تكون منيحة
سهى ( بتلطف الجو ) : ماشاءالله على ام علاء شو منورة اليوم، وماسكة حالها كمان ههههه
ام عدي : ما في داعي للحزن هي بنتها معها وقدام عيونها وقت ما بدها، عقبال ما نفرح بالصبايا كلهم
منى : آمين يارب، والشباب
رانيا ( اجت فجاة ) : كيف حالكم ؟
سهى : يا هلا باخت العريس، اي شو هالحلاوة هاي ما تبلي الهي
مها : نيااااله هيثم نياااله وربي يهنيه فيكي
رانيا : ههههه خجلتوني يا جماعة بعض ما عندكم
منى : الله يهنيكم حبيبتي ان شاءالله بتفرحوا بحسين ورزان
ام عدي : بشوف آدم معك اليوم، متى جبتوه ؟
رانيا ( بحزن ) : مبارح، بس يا حبيبي مو على بعضه
الجميع : ماله ؟
رانيا : مو راضي ياكل ولا يلعب، ومقضيها نوم ما بعرف ليه
منى ( ايدها على وجهها ) : يا لطيف ؟ شو بده يكون ماله يعني، طيب هيثم شو حكى ؟
رانيا : بدنا ناخده عالمستشفى ازا ضل هيك لبكرا
مها : يا حبيبي اله زمان عندها، ابصر شو عاملة فيه مخربة نظام حياته
سهى : طولوا بالكم بجوز كاينة تسهره ومكسور عليه نوم
رانيا : الله يستر
نهى : يلا العرسان رح يدخلوا
مها : يمة ما احلاها ام العروس هههههه
نهى : اتركيني بحالي انتي، ههههه ضلي طقسي عليي اليوم
سهى : مكيفة عليكي، زمان ما شفناكي بلا حجاب حتى بعرس عدي واحمد ما فرعتي
منى : شفتي بالله، ترجيتها تيجي معي عالصالون ما قبلت
_______________________________
هاد اليوم اللي استنيته وحلمت فيه من لحظة ما شفتها، لما قلبي دق لاول مرة بحياته وداق طعم العشق، والنوم جافاني من التفكير اللي ما فارقني ولا تركني اتهنى الا لما وصلت لباب بيتها..
حمزة ( شابكين ايدينا ببعض ) : مستعدة لمقابلة الجمهور
سيرين ( بفرح ) : ههههه اكيد
حمزة : ما يحرمني هالضحكة، خايف عليكي والله
سيرين : من الكعب ههههه
حمزة : من حالي
سيرين : منك ما بخاف، انت اماني وسر اطمئناني
حمزة : شاعرة هههه
سيرين : مهمة طولوا بفتحة هالباب قلت بألف بيت شعر هههه
ولما انفتح الباب، وبدات انشودة ماهر زين بالصلاة عالنبي، قشعر بدني ودعيت ربي يحفظنا لبعض طول العمر، ويبعد عنا كل منغصات الحياة ..
سيرين : لا تنسى البوسة بعد تبديل المحابس
حمزة : مو عارف كيف قادرة تفكري بكل هالتفاصيل، انا معجوق كثير
سيرين : انا هون لمساعدتك حبيبي
حمزة : طيب قربي اكثر عشان اعرف ابوس منيح
سيرين : هههههه
////
وصلنا للنهاية، والنهاية هي البداية وعالم جديد رح نعيشه، وما بنعرف شو مخبيتلنا الايام ..
حمزة : يلا البسي رح يدخلوا الرجال
سيرين : ساعدني، حمزة قلبي بوجعني على اهلي كيف بدي اسلم على بابا هلا ؟
حمزة : لا تخافي حبيبتي اهلك مبسوطين كثير، بس انتي خليكي محافظة على هدوئك
ريم : خالتو انتي منيحة ؟
نهى ( بتمسح دموعها ) : منيحة خالتو يلا امشي نوقف جنبها هلا بفوت عمك وزوجك
ريم : هاتي ايدك
ياسمين : يا ويلي على هاللحظة
ديمة : قلبي بدق، تزكرت حالي قبل كم يوم كنت محلها
غنى : الله يعيني على يومي انا هههه
حنين : خدلك انتي واياها، اتطلعوا علاء ضحكته من الدان للدان
بيان : خلص منها
البنات : ههههههه
ديمة : بدي اشوف عمر شو رح يحكي
ياسمين : لا تخافي ما رح يخلي عليها ههههه
عمر : يلا يا شباب باجركم اليمين، وبس نخلص بدنا نسجد شكرا بنص القاعة انه خلصنا من هالشلة
امجد : ههههههه نسيت آيات
قصي : لا ما نسيها بس بخف خطرها بعد زواج ثلاثة ارباع الشلة
عمر : يارب جوزني بالسهولة اللي جوزت فيها سيرين، ابعثلي حماية تعمى عيونها عني مثل ما انعمت عيون حماة سيرين
الشباب : هههههههه
احمد : ولك حرام عليك، شو عاملة المخلوقة ؟
عدي : ههههههه مقهور منها عشنها بتحكي لديمة اوعي تجيبي ولد طالع لعمه
احمد : طيب كلهم هيك بحكوا حتى آيات حكت عنه هيك وقدامه
عمر ( عيونه على آيات من بعيد ) : …
امجد : اهم اشي ياسمين تجيب ولد طالع لعمه
احمد : يا فرحتي بهالولد
عمر / قصي : هههههههع
امجد : ماشي يا احمد، يلا اجا دورنا
ياسمين : امشي نروح نسلم مع ازواجنا
ديمة : ههههههه عجبني المصطلح
حنين : متى بدك تروحي ياسمين ؟
ياسمين ( تنهدت بقوة ) : يلا هلا بنسلم وبنطلع
بيان : يا قلبي انتي
غنى : الله يهون
عمر : كل واحد يتأبط حوريته قصدي زوجته
قصي : هههههه
امجد : الحمدلله رجعت عزابي وجاري البحث عن حورية
عمر : بدك استراحة محارب اول
احمد ( بسلم على حمزة ) : مبااارك يا احلى عريس واحلى صدفة
حمزة : حبيبي انت الحلى كله
ياسمين : قلبتوها غزل ههههه
حمزة : توصل بالسلامة وان شاءالله بنشوفك على خير
احمد : الله يسلمك، يلا شدوا حيلكم وتعالوا عمرة خلونا نشوفكم
حمزة : ياسمين فضلك عليي ما بنساه طول حياتي، اذا انا اليوم مبسوط والناس بتباركلي فانتي السبب تأكدي
ياسمين : ابدا، هاد نصيبك وانا كنت وسيلة لانه ربنا بحبك ونيتكم صافية انتوا الاتنين
سيرين ( ضمتها وبتبكي ) : حبيبتي ياسووو ما يحرمني منك
ياسمين ( بتبكي بشدة ) : ادعيلي سيرين، انا تعبانة كتيييير
عمر : اي خلصينا انتي واياها
احمد : يلا ياسمين نتصور معهم ونمشي
سيرين : خليكم كمان
قصي : زبطوا مكياجكم قبل الصورة ههههه
امجد : مبارك يا عروس عقبال ما نباركلك بالصبي
سيرين : تسلم عقبالك يارب
بعد ما سلمت على اهلي، كان اقسى مشهد لما سلمت على ياسمين وكلامها ..
تركتنا هي واحمد، وطلعوا يقضوا آخر ساعات قبل السفر مع بعضهم ..
_______________________________
رحنا على مكان بنحبه كتير، وبجمعنا فيه ذكريات ..
قعدنا جنب بعض، لانه عيونا كانت صعب تلتقي بهيك لحظات ..
احمد ( ماسك ايدي بايديه التنتين ) : اعطيني ايدك تسافر معي
ياسمين : طيب خدني انا مع ايدي كمان
احمد ( لفني من خصري وضمني ) : هانت يا عمري والله ما بتركك ابدا بعد ما نجتمع من جديد
ياسمين ( ببكي ) : بحبك احمد، انا متعلقة فيك لدرجة صعب اوصفها، ليه هيك نصيبنا ؟
احمد ( مسحلي دموعي ) : احلى نصيب نصيبنا، احمدي الله انه قدرنا نتجاوز كل شي ونتزوج
ياسمين : ليه بقدر اعيش لو شفتك تزوجت وحدة تانية ؟
احمد : ولا انا بتخيلك مع غيري، خلص ما بدي اسمع اي اشي سيء، بدي اضل اتاملك واشبع منك
ياسمين ( هزيت راسي ورجعت ضميته ) : …
قعدنا فترة منيحة، بعدين رحنا على بيت سيدي نرتاح شوي قبل ما نطلع عالمطار، وكانت احلى ليلة جمعتنا، مستحيل انساها طول حياتي ..
ودع دار سيدي واخوالي، واجوا اهله واهلي وطلعنا ..
في المطار <<
كنت محتارة اخبره بالاشي اللي شاكة فيه، او اخبي الموضوع لحد ما اتاكد ..
بس هو كان مبسوط لانه ما صار اللي كنت متوقعته وحاكيلته عنه، ومضت اخر ايامنا بسلام وانبسطنا بكل اوقاتنا ..
ابو احمد : طمنا عليك يابا، الله يسهل امورك ونشوفك على خير
احمد : ان شاءالله كل اشي بكون منيح، ما بدي اوصيكم على ياسمين
منى : ولا يهمك يمة الله يرضى عليك
كنت اتمشى واستنى يخلصوا وداعهم، حتى اقدر اخد راحتي ..
ابو امير : مالك بابا هيك بتمشي، روحي عند احمد خليكي معه
ياسمين ( هزيت راسي ) : يلا هيني رايحة
احمد ( بنادي عليي ) : تعالي ( قربت منه ) ليه بعيدة عني حبيبتي خليكي معي
ياسمين ( شبكت ايدي برقبته وعيوني بعيونه ) : روحي معك وين ما تروح
احمد ( ضمني بقوة ) : ياسمينة روحي، بعشقك ما تخوفيني عليكي ياسمين ديري بالك على حالك وكوني بخير
ياسمين ( ببكي ) : ……
بس كان لازم ينتهي كل هاللقاء، ويروح من بين ايدي ويمشي ..
كان يمشي وعيونه عليي، وما قدر يلف راسه ولا يشوف الطريق اللي ماشيها ..
مها ( بتبكي ) : الله معك يا حبيبي
منى ( بتبكي ) : الله يحميك
ياسمين ( بصرخ ) : احمممممممممممد ، لاااا ترووووح احمممممممد خليك معي احمممممممد
كان آخر اشي بتزكره لما لف وجهه عليي وشافني وانا بنادي، رفع ايده ولوحلي من بعيد، من بعييييد كتيييير ..
////
هيثم ( مفزوع ) : الو مها ؟!
مها ( بتبكي ) : الحقنا يا هيثم، ياسمين انهارت ورا احمد وهينا ماخدينها عالمستشفى
هيثم : يلا يلا هيني لاحقكم
رانيا : شو في ؟
هيثم : ياسمين منهارة، ماخدينها عالمستشفى
رانيا ( بتلطم ) : يا حبيبتي، يا رب الطف في هالبنت
هيثم ( بلبس بسرعة ) : ديري بالك عحالك، بطمنك اول باول لا تخافي رح تكون منيحة