الحلقة الثالثة والثلاثون

بعد عدة ساعات >>

 

رجعت على البيت بعد يوم حافل ولقيت سيارتها لسا موجودة، ولما دخلت بيتنا لقيت اخواني وابوي قاعدين وما على قلبهم هم واولاد احمد بلعبوا حواليهم ..

 

انس ( بنبرة هادية ) : السلام عليكم

يحيى / يوسف ( ركضوا عليي ) : هيييي اجا عمو انس

 

قعدت على كنباية مقابلهم ورميت مفاتيحي عالطاولة، كانوا بتطلعوا عليي وبضحكوا ..

 

أبو احمد : وعليكم السلام يا هلا بحبيب الشعب، شكلك تعبان من العزومة شو اكلتوا ؟

انس : والله انبسطنا يسلم ايديها خالتي ام محمد ما بتقصر دايما

امجد ( بقلد اسيل ) : كان كتير مستعجل  رمى الكيس عالعتبة وراح وماما يا حرام بتنادي عليه

الجميع : ههههههههههههههه

امجد ( متابع بنفس النبرة ) : عادي خالتو متعودين على عمايله

انس ( بضحك ) : سكتوه

احمد : لا والاحلى امي بتوصي فينا ما نخبرك قال مبين عليها بتمزح

امجد : بقلها خايفة منه ولا عليه

انس : لا اكيد مني صارت تحسب حساب لمشاعر بنت اختها المسكينة

احمد ( بمسخرة ) : مسكينة كثير  يا عليي

أبو احمد : خلص شو بدكم فيها المهم شوفوا اخوكم والله منور ما حدا قدك .. قديه الك مو شايفها ؟

امجد : سنتين الا شوي .. حتى برمضان والاعياد

انس : الا بيوم تخرجها كنت موجود بس ما خليتها تعرف

امجد ( صافن ) : مو كنت مداوم يومها ؟

انس ( ضحكة صفراء ) : مداوم من نوع آخر

 

اتطلعوا ببعض احمد وامجد، اجا دوري وصاروا اخواني يشفقوا عليي مثل ما كنت احس بايام عذابهم ..

 

أبو احمد : الله يختارلكم الأفضل

انس ( تنهدت ) : امين .. تولين صاحية ؟

احمد : علمي علمك الله وكيلك مرابطين هون من الظهر

امجد : رح تنقلب المرابطة احتجاج على التطنيش

انس : عاد امي ما قالتلي انها معزومة، وبلتني بهالكم علبة اللي بعثتهم لاختها

احمد : شو بدك احلى من هيك بلوة، وجهك بضوي من السعادة

 

ضحكت ونزلت راسي من خجلي، لساتني ما بحب اسمع هيك كلام قدام ابوي او اتجرأ افتح الموضوع قدامه ..

 

يوسف ( بوشوش فيي ) : بابا حكى انه الشاي اللي بتعمله مو زاكي

انس ( بضحك ) : احكيله قوم انت اعمله

يوسف : بخاف يعصب

انس : روح جيب تولين وانا بقله بدالك

منى ( ماسكة بايد تولين ) : وهي سيدك وعمك هون

تولين ( ركضت عليي ) : عمو

انس ( حملتها وحطيتها بحضني ) : حبيبة عمو

احمد : يا سلام عالركضة والله شكلها مشتاقة كثير

منى ( عيونها على ابوي ) : اهلا وسهلا متى اجيت ؟

أبو احمد : الي ساعة، وين اسيل روحت ؟

منى : اه هيها نازلة وراي تركتها بتلبس

أبو احمد : فوتيها على مكتبي بدي اشوفها واحكي معها شوي

منى ( مستغربة ) : شو بدك تحكي ؟

أبو احمد : بدي اتطمن عليها واسالها عن شغلة خاصة

منى ( مبتسمة ) : شكلك جايبلها عريس

امجد : هههههههه شكله

احمد : اكيد جايبلي عديل مرتب

منى : ان شاءالله يارب يبعتلها ابن حلال يستاهلها

 

كنت اضحك انا واخواني وامي مو فاهمة علينا بس برضو  بتضحك على ضحكنا، لحد ما سمعنا صوت يحيى ويوسف بتودعهم اسيل ..

 

أبو احمد : يا مسا الورد على دكتورتنا، شو هاليوم الحلو بوجودك عمي ؟

اسيل ( بخجل ) : مسا النور عمو كلك زوء

منى : فوتي شوي خالتو بده يحكي معك عمك كلمتين

اسيل ( مصدومة ) : انا ؟ كلمتين .. خير عمو ؟

احمد : تعالي اسيل ابوي بستناكي

 

انا وامجد كنا نضحك من تحت لتحت بدون ما امي تلاحظ، ومبسوطين واسيل ذايبة من خجلتها قدامنا ومو عارفة كيف تتصرف ..

 

////

 

يا ربي دخيلك شو بده مني ابوه ؟ معقول بعرف عن اشي ولا انا مزوديتها بالتفكير والاحلام ؟ ..

قعدت على كرسي عند مكتبه وقعد عالكرسي مقابلي تماما، كان مبين عليي الارتباك عكس هدوءه ..

 

أبو احمد : بدون مقدمات وعشان عارف انك متوترة وباين عليكي القلق والاستغراب واكيد انتابك الفضول من طلبي؛ رح ادخل بالموضوع على طول

اسيل ( بهز راسي ) : تفضل عمو

أبو احمد ( مبتسم ) : شفتي تولين ؟ مثال صغير ممكن اقدملك إياه لاشرحلك انتي شو عنا .. من لحظة ولادتك لليوم انتي قدامي قاعدة وبمركز طبيبة وان شاءالله باخر السنة بتتخصصي باللي بتحلمي فيه، انا بهمني مصلحتك وما بهون عليي اشوفك مجروحة والقدر مو منصفك لانك بتستاهلي الأفضل باذن الله

اسيل ( بلعت ريقي ) : وشو الأفضل برايك ؟

أبو احمد : الأفضل هو اللي انتي بتختاريه بمحض ارادتك

اسيل : معلش عمو انا مو فاهمة على شو عم تلمح ؟

 

قام من كرسيه ورا المكتب واجا قعد مقابلي، كانت نظراته حزينة كتير  وفيها كلام صعب صياغته ..

 

أبو احمد ( بحنية ) : يا بنتي انتي بتعرفي اكثر مني ومن أي حدا مشاعر انس تجاهك، واللي صار بينكم بهديك الليلة قبل سنتين من اليوم كان اشي بشع وانتوا ما الكم ذنب فيه

اسيل ( برجف ) : …

أبو احمد : عندي سؤال وبدي جواب صريح منك .. بتقبلي تتزوجيه لو طلبت ايدك من ابوكي ؟

اسيل ( نزلوا دموعي ) : ليه بابا موافق عليه ؟

أبو احمد : ان شاءالله بوافق، انا حبيت اسالك واتاكد من جوابك قبل ما احكي معه

اسيل ( بلعت ريقي ) : لسا بكير على هالخطوة

أبو احمد : احنا مستعجلين عليه بدنا نخلص منه ههههه

اسيل : …

أبو احمد ( متابع ) : اكيد اكيد الوقت اللي بناسبك احنا بنمشي عليه

اسيل ( تنهدت بوجع ) : اكيد انس حاقد عليي ويمكن بكرهني صار، والدليل انه ولا كأنه شايفني

أبو احمد ( فتح عيونه ) : اعوووذ بالله .. الله بعلم بالعشق اللي جوا قلبه الك، دموعه لليوم بتكويني كل ما اتذركهم

 

غصيت وتزكرت هديك اللية واديه بكيت فيها، رجعتلي نوبة البكى وما قدرت امسك حالي ..

 

////

 

منى ( مبتسمة ) : بتعرف شو ابوك بحكيلها ؟

احمد ( مرتبك ) : انا ؟ لا والله ما جابلنا سيرة كنا نتخوث قبل شوي

منى : يعني ما في عريس ؟

امجد : يمة هي الناس ملاقية تاكل لتقدر تتجوز ؟

منى ( بحسرة ) : الله يفرجها على عباده .. والله هالبنت طولت انا قلت كتيرها لما تتخرج بكون اجا نصيبها على حلاوتها وسمعتها

احمد : خلي العسل بجراره لتيجيه أسعاره على راي ستي هههههه

امجد : اكيد طبعا العسل مو مين ما كان بوصله لازم دب جبلي مخالبه كبيرة

احمد / انس : هههههههههههع

منى ( عصبت ) : دب متلك يعني ؟ روح امشي اطلع على بيتك خلص بكفي تشرد

احمد : انا كمان اطلع ؟

انس : خليك محرم لبنت حماك هيهيهيهي

منى ( بحنية ) : الله يرضى عليك يا ماما طيب خاطرها بكلمتين صارت واصلة بيتنا لا تروحها زعلانة

امجد : وامشي وراها بسيارتك عشان توصلها للبيت

انس ( بمسخرة ) : بخاف تطلب مني ادرسها اشي ويشوفنا حدا بعدين بتعرفوا باقي السيناريو

منى : لا لا بدون توصيلة بس كلمتين عالواقف

 

////

 

أبو احمد ( بهدي فيي ) : سامحيني يا عمي مو قصدي والله

اسيل ( محرجة منه ) : لا عمو انا اللي اسفة .. بستأزن منك لازم اروح تأخرت

أبو احمد ( برضا ) : اذنك معك الله يرضى عليكي ويهدي بالك

 

شكرته كتير، اول مرة بقعد مع حدا وبتناقش بهالموضوع بعقلانية، حبيت اهتمامه وجديته واقتناعه بانه انا وانس لابقين لبعض ..

لما فتحت الباب كانوا ساكتين وانس عيونه عالتلفزيون، قام احمد يشوفني حس عليي اني مو طبيعية ..

 

احمد ( بهمس ) : انتي منيحة ؟ اناديلك ياسمين

اسيل : لا ما في داعي، يلا تصبحوا على خير

منى : تلاقي خير حبيبتي سلمي عالجميع عندك

 

هزيتلها راسي وعيوني لسا بتراقبه، التفت عليي بدون قصد وما كان متخيل اني بتطلع عليه ..

التقت عيونا وابتسمنا لبعض لا شعورياً، وطلعت من بابهم على سيارتي ..

 

انس ( اجا فجاة ) : استني

اسيل ( متفاجئة ) : خوفتني

انس : انا هون تحت الحاح شديد من امي اني اطيب خاطرك واعتذر عن كلامي هداك اليوم قدام العيلة على أساس انه انتي من يومها زعلانة ومقاطعتيني بسببه

اسيل : اوك .. احكيلها اسيل مسامحيتني

انس ( بغصة ) : احكيلها اني بحبك ؟

 

رجف قلبي من كلمته، من زمان كتير ما سمعتها الا من تسجيلات مكالماتنا لما اسمعهم كل فترة ..

 

اسيل ( هزيت راسي بالنفي ) : ما في داعي مو ناقصها هموم

انس ( بتأملني ) : لما شافت هالجمال كله نسيت همومها

 

كاتمة ضحكتي وغاصة بدمعتي والف شعور بتضاربوا بدماغي، شو اعمل بعد اليوم ؟ سنتين وانا عم حاول اشفي جروحي وارممهم وبغلطة بسيطة وعزومة ما بعرف ازا كانت مقصدوة او لا رجع كل اشي متل اول ..

 

////

 

انس ( متابع ) : تتذكري لما حكتلك بتشبهي الاميرات اللي بالقصص الخيالية ؟

اسيل ( غمضت عيونها ) : لو سمحت انس انا تاخرت، والكلمتين اللي اجيت بحجتهم خلصوا .. اغلبك تنزل من السيارة عشان اروح

 

خطرتلي فكرة جهنمية، شغلت السيارة ودعست عالبنزين من مكاني ومشيت بالسيارة وهية لسا جمدانة بمكانها من الرعبة ..

 

اسيل ( بتصرخ ) : انت عنجد مجنون

انس ( دعست بريك ) : لسا ما شفتي اشي من جنوني، انزلي خليني اوصلك

اسيل : لا ما حزرت اقعد مكانك او انت انزل من السيارة خلص بكفي عاد

 

كل التفاصيل اللي صارت اليوم ما غيرت اشي بحياتنا، مجرد لحظات وتبخرت لنرجع للواقع الأليم اللي عايشينه ..

ضليت معها ورجعت تكسي بعد ما وصلت بيتهم، حكالي ابوي كل اشي وفرحت بكلامه ..

 

” كلماتك يا ابوي بلسم يداوينا، وانفاسك عطر يحيينا، هيبتك ما الها بديل وعطفك دوم يروينا ..

لو تطلب الروح تفداك والقلب بنبضه يرعاك، والعين ما تشبع رؤياك ريت العمر ينهدى ونعطيك رداً على عطاياك “

 

#وعد_السعيد

 

__________________________________________________________________

 

” -أين وجدتِ الأمان ؟

-بجوار قلبه “

 

تفاصيل ليلة عمرنا مستحيل تغيب عن مخيلتنا مهما مرقت الأيام والسنين، تاريخ جمع قلوبنا بعقد ربّاني مقدَس رح يكون مقدس متله ..

للسنة التانية على التوالي بلبس بدلتي البيضا وبتزين كأني عروس، بجهز لسهرة مميزة وبخترع فكرة مميزة ..

 

بيان ( متوترة ) : يلا امجد طولت

 

 

تأخر عن موعده وتوترت كتير، وما بدي اتصل عليه والاكل قرب يبرد ..

كنت طول اليوم بدون اكل عشان اقدر انجز الأشياء المخطط تنفيذها، وحسيت بدوخة ووجع ببطني من كتر الجوع ..

 

_____________________

__________________

 

احمد ( بضحك ) : الليلة ليلتك يا عريس

امجد ( متحمس ) : مو أي ليلة

عمر : وأخيرا الذنب اللي ملاحقني بدي ادفنه بسابع ارض ( بمسخرة ) اهئ اهئ اهئ ما تنساني يا امجد

امجد ( بتباكي ) : لا يا عمر مشان الله دموعك غالية ما تبكي مستحيل انساك حتى لو نسيتك بكذب عليك

الشباب : ههههههههه بالضبط

علاء : المهم بتطول بالك وما بدنا من اول يوم نلاقيك منزل ستوري الا ليت العزوبية تعود يوماً

امجد : عزوبية شو انت الثاني .. بعدولي هيك خلص باربيتي بانتظاري .. جاي يا عمري

 

حملوني الشباب وعملولي زفة، عوضوني فيها عن كل القهر اللي عشته بغيابها ..

 

الشباب ( بغنوا ) :

قوم هلّي بينا خيي العريس، وفرّش ولقينا يابو العريس ..

ولاتعتب علينا ام العريس، ودوم اللي جينا واحنا الصبايا ..

وليليتن وليلة واحنا مشينا، ويا فرحة العيلة جوزنا الغالي ..

وعلى لالو لالو لالو والعريس شايف حاله، بيطلعله بيطلعله عريس الزين بيطلعله ..

لوين نزفك يا عريس الزين، خوالك وعمامك بالزفة صفة ..

لوين نزفك يا حبيب امك، ويا اغلى من العين ع ولاد عمك ..

لوين نزفك والكل يحبوك، ويا اغلى من العين يا مدلل ابوك ..

وعل لالو لالو والعريس وفرحناله وتدللاها وغازلها والعروس ما تزعلها ..

////

 

انتظاري لانتهاء حفلتنا البسيطة؛ كان اشبه بانتظار البحر ليتبخر ، حسيت الوقت عم يمشي ببطء بالرغم من جمال الحفلة وفرحة الناس حوالينا ..

 

منى : اويها ولا بالمال ولا بالمال

اويها بسيف العدل ينقال 

اويها حبيتك يا حبيبي 

اويها قايد في لهيبي 

اويها يا اسمر سيد الرجال

 

البنات : ﻟﻠﻠﻠﻠﻠﻠﻠﻠﻠﻴﻴﻴﻴﻴﻴﻴﻴﺶ

 

ام ماهر : ﺃﻭﻫﺎ ﺍﻟﺪﻫﺐ ﺑﻘﻔﺎﺻﻮ

ﺃﻭﻫﺎ ﻭﺍﻷﻟﻤﺎﺱ ﺑﺠﺮﺍﺻﻮ

ﺃﻭﻫﺎ ﻭﺍﻟﻠﻲ ﺑﻴﺎﺧﺪ ﻣﻦ ﺑﻨﺎﺗﻨﺎ

ﺃﻭﻫﺎ ﺑﻴﻤﺸﻲ ﻭﺑﻴﺮﻓﻊ ﺭﺍﺳﻮ

 

البنات : ﻟﻠﻠﻠﻠﻠﻠﻠﻠﻠﻴﻴﻴﻴﻴﻴﻴﻴﺶ

 

ام بيان : أويها غلينا قهوة

أويها طلعت مرّة

أويها إلّي ما فرحتلك يا ( بيان )

أويها تيجي عليها الضّرّة

 

البنات : ﻟﻠﻠﻠﻠﻠﻠﻠﻠﻠﻴﻴﻴﻴﻴﻴﻴﻴﺶ

الجميع : هههههههههه فرحنالها والله

امجد : قصف على جميع الأصعدة عشان ما حدا يفكر ها مجرد تفكير انه ما يفرحلها

ام عدي : ما حدا بشوفكم وما بفرحلكم هاي مجرد نكتة

نهى ( حضنتني ) : اه والله يا ربي يهنيك حبيبي خالتو وان شاءالله بنزغردلك وانتوا حاملين اولادكم

امجد : يسعدها الغالية يحميلك احفادك

سهى : والله مو ملاقية كلام اباركلك فيه ( ضمتني بقوة ) يا عمري انت الحمدلله اجا هاليوم وشفتك فيه عريس ومع اللي بتمناها قلبك

امجد ( دمعوا عيوني ) : ما يحرمني منك ومن كلامك، بدون ما تحكي والله واصلني مشاعركم ومحبتكم العظيمة اللي ما الها مثيل بالدنيا

مها ( ضمتني بقوة ) : امجدنا الحلو اللي قلوبنا بتضحك بس تلمحك نيال بيان فيك ونيالك فيها .. مبارك زواجكم والله يتمم فرحتكم بتخرجك ونحمل اولادكم يارب

امجد : يبارك بعمرك وعقبال ما نزف امير وريان وانتي مجبور خاطرك فيهم حبيبتي يا احلى خالة

بيان : احنا محظوظين بعيلة متلكم والحمدلله انكم موجودين بحياتنا وبتباركولنا وهاد لحاله ما بنوصف

الجميع : الحمدلله

امجد ( بضحك ) : حبيبتي ليه تحكي قبل ما تعطيني إشارة، كلامك جواهر لازم المه بصندوق عشان احافظ عليه

سيرين ( بمسخرة ) : خدلك هالدجال

ياسمين ( متابعة ) : لما تدفن الصندوق بالله لا تنسى تحط بالمكان علامة عشان ما اتضيعه

آيات / ديمة / حنين / رنين / غنى : هههههههههه علم على سارية اضمن

امجد ( بمسخرة ) : هيهيهيهيهي قومي اركضي ورا اولادك انتي واياها اعملوا اشي مفيد

ام ماهر ( بنبرة حادة ) : ولا وحدة تفتح ثمها واسمعها بتحكي تعليك على امجد ها

امجد : ايوا ستي اطلعيلهم بالعالي

منى : انت التهي بعروستك .. قوموا ارقصوا حطولهم اغنية بحبها

غنى : لقيت الطبطة ؟

امجد : لقيتها طبعا .. بس حطيلي اشي برقص اكثر

آيات : عمر برا بتحرقص بده يغنيلك ويرقصك على كيفه

امجد ( بضحك وبصوت عالي ) : خليه برا بطل يلزمني

عمر ( من بعيد ) : اخرتني الزمك والله بلوك احلى من اللي بالي بالك

قصي : مالكم يا شباب ؟ امجد بدك مساعدة حياتي ؟

امجد ( بلف وجهه علينا وبضحك ) : لا يا عمري كله مية مية بس انت لهيلي نسيبك اللي مرابط ورا الباب

 

هدول التلاتة ولا الف عرس بلهيهم عن بعض، لا بد دايما من بعض التعليقات والمسخرة والتداخلات  ومشاركة من باقي الشباب ..

 

علاء : ولك اخرته يحتاجكم لما يرجع ويلاقي الباب مسكر ويحاول يطلع من الموضوع باقل فضيحة ممكنة ما بلاقي غيركم

انس : خصوصاً اذا كنت انا مداوم وما في حدا يفتحله باب بيتنا ينستر فيه

احمد : في غرفة عالسطح من بيت انس قربت تجهز بنخلي مفتاحها بقوار الزريعة احتياطاً

عدي : طيب خلوه يتجوز اول وبعدين بنشوف اذا رح يطلع من البيت اول بعدين بتقرروا شو بده يصير فيه اذا رجع متأخر ؟

هيثم : اه قصدك يعمل مثلك نعد شهور وما نشوفك يا حبيبي، لا امجد غير غير اسالني انا هيهيهيهي

 

انا كنت مفكرة عرسي خلص بس هدول حبالهم طويلة، وانا متت من تعبي ..

بس اجا وقت اللي يدخلوا فيه اهالينا ويباركلونا، وحتى بعد المباركة ضل قاعد معهم ..

 

بيان ( بهمس ) : كتير تعبت ونعست

منى ( بتهز براسها ) : يلا كل وحدة تمسك ايد زوجها وتتاكد انه فات البيت يا نسوان .. اول وحدة العروس خد ماما هي مسكة الورد احملها عنها وامسك ايدها وطلعها على بيتكم

امجد : امسك شو ( مسكني الورد وحملني وركض فيي ) نايتي شباب .. يمة ما بدك توصاية بفطورنا بكرا اه ؟

الجميع : هههههههههه الله معه

 

////

 

ام ماهر ( دمعوا عيونها ) : الله معكم يا حبايبي زيجة الدهر

ام بيان ( بتبكي ) : الله يهنيكم ويجعل كل ايامكم ضحك وهنا وسعادة

ام عدي  ( بتلطف الجو ) : طيب كان سلمنا عليهم اول

سهى : ههههههه بنيجيهم بكرا ملحقين

احمد : هاي امي قلعتنا بطريقتها هههههه

هيثم : يا اخي زهقتونا ئي؛ خلي هالليلة تمرق على خير

عمر : انا بدي انام عند حماتي اليوم عشان اونسها بغياب امجودتها ( بتباكي ) اهئ اهئ اهئ وين رحت يا حبيبي وتركتنا

آيات : بالطابق التاني طول بالك عمورتي

البنات : وانتي صدقتيه ؟

سيرين : بلا عمورتي بلا نيلة هوة وصاحبه من تحت لتحت

عمر ( بخبث ) : اللهم اني مغلوب فانتصر

غنى : يا قلبي قصي ما في منه صح سيسو ؟

سيرين ( بجكر ) : لما يكون لحاله ما في احسن منه، عمري ما بنسى حنيته لما اخدنا عالمول

ياسمين / ديمة : هههههههههه اه والله

احمد ( بضحك ) : حموزتك بالسيارة برا .. طيااارة

 الحقيه

 

مراد : تعالي نرقص مع بعض

الين : …

مراد : امسكي ايدي وانا برقصك

 

علاء : شوفوا هالشوفة ههههه

هيثم / احمد / عدي / قصي / انس : هههههههه يا سلام

عمر : والله ما بعرف هالولد طالع لعمه ولا خاله ولا ابوه ؟ المهم رومنسي وانا موافق عليه

احمد : بالله عليك ؟ اثقل شوي ئي شوف كيف علاء منشف دم امير وأهله

علاء : مقهور على امير ولا على اهله انت ؟

هيثم : هههههه هاد علاء والاجر على الله

عمر : انا ما بثقل على ابن اخوي حبيبي، عارف لمين معطي

عدي ( بضحك ) : طيب بنشوفك كمان كم سنة، اذا شفت ابني معصب او نزلوا دموعه عينيك بدي اطلعهم وله

انس : بكون بعيط من ورا عمايلها فيه اكيد، العرق دساس بنات عيلتنا لابد من قصصهم الناقصة

الشباب ( كاتمين ضحكتهم ) : …

 

ديمة : ما احلاهم

ياسمين : بجننوا

آيات : طالع لعمه

ديمة ( بتبرة حادة ) : لابوه

غنى ( بنبرة حادة ) : تلتين الولد لخاله

ريم : استغفر الله العظيم .. الحمدلله سيرين روحت

البنات : ههههههه

رنين : ليث كمان حاطط عينه على بنوتي بالمستقبل

حنين : حجزت الولد قبل ما تجيب بنت .. خلفيها اول بعدين احجزي

ياسمين : يحيى كمان حاجز وحدة بس شاطر بالتخباية

آيات ( بتضحك ) : متل ابوه

حنين : اكيد بنت خالته

ياسمين ( مبتسمة ) : بنت خالته بس مو اللزم

ريم ( كاتمة ضحكتها ) : عرفتها

البنات : واحنا هههههه

فرح : راحت الحفلة على اسيل والله كانت بتجنن

ديمة : استغربت ليه ما اجت ؟

حنين : والله امتحانات ومستشفى وابصر شو يعني يا دوب بتتنفس

آيات : لو الكتب لفوق راسي ما بضيع عرس امجد وبيان هههههه وأخيرا تجوزوا يا ربي مو مصدقة انه امجد تجوز يا جماعة لو ابني ما فرحتله هيك

ياسمين : الحمدلله .. عقبال ما تقومي بالسلامة وتفرحي بابنك بما انه فرحتي ببنتك هههههه

البنات : ههههههه

 

////

 

دخلنا بيتنا وسكرنا الباب، سكرته بكل قوة وثقة ..

بيتنا اللي حلمنا نعيش فيه حتى قبل ما نبنيه، دخلناه اليوم واحنا عرسان وقدام كل العالم ..

مو قادر اسيطر على دقات قلبي، حاسه رح يطلع من بين ضلوعي ..

 

امجد ( بتامل فيها وجبيني على جبينها ) : بحلم ولا علم احنا ؟

بيان : اناديلك إياهم يقرصوك ههههه

امجد : هههه بتتمسخري عليي ؟ بطلعلك يا احلى حلم بالعالم

بيان ( بدلع وماسكة قبة بدلتي ) : واغلى حقيقة واجمل شب بالدنيا، كلمة نيالي فيك قليلة

 

الكلام بضيع وقت كثير بالنسبة الي بهيك ليلة ما بدي احكي، بدي أعيش لحظات حلمت فيها وتخيلتها حتى مع ساندرا ..

خلصنا روتين الليلة الأولى واجت اللحظة المهمة، كانت قمر وطالع بالبيت واني ابعد نظري عنها مهمة صعبة ..

 

امجد ( ماسك ايديها ومقربها مني ) : صعبتي المهمة عليي

بيان ( بخجل ) : طيب لا تصعبها اكتر بكلامك لانه كتير متوترة

 

////

 

كنت مخبية مفاجأة من نوع مختلف الليلة، لدرجة انه ما قدر يحكي أي كلمة بهديك اللحظة ..

 

بيان ( بحب ) : انا الك وبس مستحيل أكون لحدا تاني

امجد ( برجف ) : مو عملية يعني ؟

بيان ( غمضت عيوني ) : مستحيل .. ما قدرت

امجد : …

 

////

 

استحقرت حالي كثير اني قدرت اتزوج وعشت علاقة مع غيرها حتى لو انه قلبي كان معها، قدام اللي هية عاشته ومقاومتها واصرارها عالطلاق لحتى ترجعلي ..

 

امجد ( حاضنها ) : بموت فيكي

بيان ( بدلع ) : وانا كمان .. بموت الف موتة ولا أكون لغيرك انت الي وانا الك وبس

امجد : في حدا بعرف ؟

بيان : اكيد اهلي بعرفوا

امجد : منيح اللي ما قبلت اكتب الكتاب الا قبل العرس، كنت حاسس انه خالي خايف اغلط معك فخليته متطمن

بيان ( بتسبل عيونها ) : عكيفك تغلط معي ؟ بعدين لو كتبت كتابنا ما بضل مخبية لهلأ بس قلت بما انه ما ضل اشي للعرس خليها مفاجأة لحبيبي

امجد ( رفعت حواجبي بخبث ) : هاي قنبلة فجرت كل اشي جواتي، المهم بدي ولي عهد حلوان المفاجأة

بيان : هههههههههههههه حاضر

امجد : خلينا نخطط منيح عشان يجي واحنا مستعدين

بيان ( بحزن ) : قصدك لما تيجي من المانيا وتخلص دراستك على خير

امجد ( بلعت ريقي بغصة ) : معلش انا حبيت نكون متزوجين قبل ما اسافر حتى لو قبل بكم يوم، بس هيك اريح النا الاثنين وانتي اقتنعتي

بيان : قصدك اقنعتني .. خلص خلينا مبسوطين ونعيش احلى أيامنا

 

_____________________

__________________

 

احمد : مو اليوم ذكرى زواج امجد وبيان ؟

ياسمين ( بدرس يوسف ) : اه اليوم ليه ؟

احمد : هسة امجد شفته صف السيارة

ياسمين ( اتطلعت عليه بصدمة وضربت وجهي بايديي ) : بتحكي جد ؟ ليه هيك متأخر طيب !

احمد : ههههه شكله رح ينام على الدرج اليوم اخوي

ياسمين : يا حرام كانت تستنى اليوم

احمد : كانه امي قالت انها يمكن حامل ؟

ياسمين : لا قالت ادعولي

احمد : ان شاءالله نشوف خلفته لهالمحترم اللي عامل فيها تنظيم من أولها، بقله طيب جربوا حالكم بتخلفوا ولا لا اول بعدين نظم الاسرة قد ما بدك

ياسمين : ههههههه عحبتني نظم الاسرة، خلص احمد شو دخلنا يدبروا حالهم

احمد : قولتك .. ( مرتبك ) انا بدي اخذ تولين واطلع فيها لفة بالسيارة ويمكن أوصل بيت علاء شوي وبرجع

ياسمين ( رفعت حواجبي باستنكار ) : لفة بالسيارة وتوصل بيت علاء ؟ سبحان الله

احمد ( غمزني ) : معلش مرقيلي إياها اشتقتله وحابب اشرب انا واياه فنجان قهوة وطلب مني اجيبله تولين

ياسمين : اوك .. سلم عليهم

 

////

 

منى : يا رب يا رب تكون حامل

أبو احمد : مين ؟

منى : بيان

أبو احمد : الله كريم .. قد ما بحب الأطفال وبدلعهم اشتهيتله

منى : انا كل ما اشوفه طالع على بيته من سنتين لحد هلا مو مصدقه انه متزوج وصار عنده بيت ومرته بيان

أبو احمد ( تنهدت ) : الحمد لله .. عقبال ما نلاقي لانس بنت حلال

منى ( بحسرة ) : لولا اللي صار ما بلاقيله احسن منها بس اكيد مستحيل اللي بفكر فيه

أبو احمد ( فتح عيونه ) : مين قصدك ؟

منى : .. اسيل

أبو احمد ( بدهاء ) : وليه ما نجرب حظنا وين بنلاقي احسن منهم، بالنهاية لا انس ولا اسيل الهم علاقة باللي صار

منى ( نزلوا دموعها ) : والله ما بعرف شو احكيلك، يمكن ما يكون بفكر باللي بنفكر فيه

أبو احمد : انا متاكد انه ما بفكر باشي يا دوب يتذكر ياكل .. اتركيه عليي خلص

 

////

 

فتح الباب وانا كنت قاعدة على كرسي مواجه للباب، ولافة رجل على رجل وزهقانة على قد ما استنيته ..

 

امجد ( حامل باقة ورد كبيرة ) : مساؤووو

بيان ( مكشرة ) : صباحوووو .. لانه ضل ساعتين وبتصير ١٢

امجد ( بأسف ) : لو تعرفي شو صار معي ما بتكشري بوجه ورداتي هيك

بيان ( كاتمة ضحكتي ) : دايما جايب عذر معك، متل طلابي اللي جننوني غيابات ومجبورة اقبل باعذارهم

امجد ( نزل على ركبة ونص قدامي وانا قاعدة ورفع باقة الورد بوجهي ) : يا من عملتني الحب ووهبتِ قلبك لمسامحة عاشقك المغفّل اقدم لك خالص حبي واطمح ان تضيفي عذر الليلة على أرشيف اعذاري

بيان ( قهرني بذكاؤه ) : كالعادة طبعا عالارشيف شو بدي اعمل يعني، بس عقابك اليوم تسخن الاكل وتحضر السفرة بما اني تعبانة من الانتظار

امجد ( وقف وشدني لعنده ) : احلى سفرة وازكى اكل لعيون عروسىتي

 

////

 

من وين بدي اجيب كذبة اليوم، الله يسامحكم يا عمر وقصي دايما مخربين بيتي بقلة حيلتكم ..

انجبرت اعتمد عليهم يوصولي عالورد عبن ما رحت اجيب الهدية، والحمدلله برن عليهم ولا واحد برد واركض من محل لمحل ادور عالباقة اللي بدي إياها لحد ما لقيت محل باخر الدنيا وعلقت بالازمة ..

وطبعا اذا بدي احكي هالحكي الها؛ رح تلومني وتحكيلي ما كان الها داعي واكيد مو حلو ادخل على البيت وانا حامل صندوق صغير في قطعة ذهب وكم غرض ثانيين ..

 

بيان : زاكي الاكل حبيبي ؟

امجد ( نقزت وغصيت باللقمة ) : بشهي يا عمري يسلملي المبدع

بيان ( مو عاجبها ) : امممم ووين كنت سرحان

امجد ( كتمت ضحكتي ) : بالطعم بحاول ادور بقاموسي على كلمة مناسبة

بيان ( انقهرت ) : والله ؟

امجد ( عصبت ) : انتي مالك مستشرة اليوم ؟ خلص قلتلك صار معي ظروف وتأخرت يعني اشي فوق ارادتي

 

انصدمت من عصبيتي ما كانت متوقعة انه رح يديق خلقي بسرعة، تركت المعلقة وقمت ..

 

امجد : دايمة عالاكل .. يسلمو ايديكي

بيان : …

 

رحت على غرفة النوم عشان اغير اواعيي؛ لاني بعدني فيهم ..

وقفت قدام التسريحة وكنت بحاول اهدا شوي، سندت ايدي ونزلت راسي وانا بفكر كيف اصلح كل اللي عملته ..

 

امجد ( مسكت الفحص ) : شو هاد ؟

 

تمعنت فيه اكثر ولاحظت الخطين الواضحين عليه، طلعت من الغرفة لعندها وانا ماسكه بايدي ..

 

امجد ( بلهفة ) : بيان ! هاد لمين الفحص ؟

بيان ( مطنشة ) : فحص شو ؟

امجد ( قربت كرسي من كرسيها ومسكت ايديها ) : انتي حامل ؟

بيان ( مقهورة ) : اه قصدك فحص الحمل اللي عالتسريحة .. اه الي اليوم الصبح فحصت وطلع إيجابي الحمدلله

امجد ( طاير من الفرح ) : الحمدلله ( حضنتها ) حبيبتي الف الف مبارك .. كنت احلم بهيك خبر والله

بيان ( ببرود ) : الله يبارك فيك

امجد ( تنهدت ) : خلص حبيبتي والله رح احكيلك كل اشي هسة بس افردي وجهك شوي خلينا نكمل فرحتنا

بيان ( نزلوا دموعها ) : كان نفسي نفرح اكتر من هيك، تأخيرك مو بس برد الاكل .. بردت لهفتي على استقبالك والاحتفال معك وحتى اني ارافقك لغرفة النوم حتى اشوف ردة فعلك

امجد ( بمسحلها دموعها باصابعي ) : شو اعمل حتى تسامحيني وتعذريني ؟ لانه والله ما كان ابدا ببالي اني اتأخر

 

////

 

فتحت الباب بعد ما تجهزت انا وتولين وبدي انزل من البيت، بلاقي بوجهي امجد نازل مثل البرق وفات على بيت اهلي ..

 

احمد ( بنادي ) : امجد ؟! شو قصته عمك تعال نشوفه

تولين : بدي عمو

 

لحقته بسرعة ووصلت لقيته بدق الباب على غرفة نوم امي، وقفت اضحك عليه ..

 

////

 

امجد ( مبسوط ) : انتوا هون ؟ يمة صاحيين

أبو احمد ( مستغرب ) : ادخل يابا اه صاحيين

منى : بسم الله .. شو فيه ؟

امجد ( بفرجيها الفحص ) : رح اصير اب وأخيرا شوفي بيان حامل حامل مو مصدق وأخيرا رح يصير عنا بيبي

منى ( حضنتني ) : يا عمري الف الف مبارك الحمدلله لللللليييييييش

أبو احمد ( مبسوط ) : كانت تدعيلكم قبل شوي ريته مبارك يابا يا امجد فرحتنا

احمد ( لفيته لعندي وضميته ) : ولك لابقلك يا … الف مبارك الله يتمم ويجيكم البيبي بصحة وعافية يارب

منى ( مسحت دموعها ) : امين امين .. هي تولين جاية تبارك لعمها تعالي تيتا

 

////

 

تولين ( حملها امجد ) : عمو حبيبي

امجد ( ببوس فيها ) : روح عمو انتي .. شوفي رح يصير عندك بنت عم حلوة مثلك .. او الله اعلم يمكن محمود على الطريق

أبو احمد : وهي الاسم جاهز كمان، الله يطعمكم الذرية الصالحة

احمد ( بغمز اهلي ) : هاد متفق مع أصحابه يسموا على الوزن نفسه وليد ابن قصي وجواد ابن عمر وهي محمود ابن امجد

منى : الله يعين اهاليهم عليهم هههههههه

أبو احمد : من قلب الحدث

 

////

 

ياسمين : روح شوف تيتا ليه بتزغرد ؟

يحيى : بتكون بيان حامل اكيد

ياسمين : خالتو بيان اسمها .. بعدين شو يعني خليها تحمل ان شاءالله تكون حامل

يحيى : طيب روحي لحالك شوفي انا مو فاضي عندي دراسة

يوسف : اروح اشوف انا ؟

ياسمين ( بزور يحيى ) : لا ما حدا يروح خلص اقعدوا مكانكم

 

ما عجبه كلامي، او يمكن ما قدر يقاوم وسحب حاله ونزل ..

 

////

 

امجد : انت وين رايح ؟

احمد : والله علاء مشتاق لتولين حكالي تعال اشرب كاسة سحلب بهالبرد وجيبلي إياها

منى : يعني عارفين انه الدنيا برد وماخد الطفلة معك ؟ يجي هو يشوفها

يحيى ( اجا فجاة ) : تيتا ليه بتزغردي ؟

امجد ( هجم عليه وضمه ) : تعال بارك لعمك وأخيرا رح يصير عندي ولد شاطر مثلك

يحيى ( انقهر ) : … يلا منيح

منى ( بحنية ) : احكيله مبارك يا عمي

يحيى : مبارك يا عمي .. ضل اشي ثاني احكيه ؟

احمد : لا .. خلصت دروسك ؟

يحيى : اه زمان

احمد : طيب يلا على النوم بابا عشان تصحى نشيط

يحيى ( برضا ) : حاضر بابا

احمد : سلام لازم اطلع تأخرت

الجميع : سلم عليهم

 

////

 

ديمة : تاخروا دار احمد

ريم : الغايب عذره معه بكونوا بالطريق اكيد

سيرين : ياسمين بتعرف انه احنا جايين ؟

آيات : ما بعرف انا ما تواصلت مع حدا اليوم، وامي عقلها عند بيان مو مجمعة كلمتين على بعضها

غنى : يا رب تكون حامل

آيات : يارب، خلينا نشوف خلفته لمحراك الشر ههههههه

سيرين : يسعدلي خلفتك انتي وبنت حماكي ومرت اخوكي .. وديمة نسخة وياسمين نسخة كمان

ريم : انا واياكي نفدنا

ديمة : هههههههه يصحلك انتي واياها

 

ماهر : هسة بيجي يحيى بنلعب معه

مصطفى : اشتقناله كثير من زمان ما شفناه صح

عمرو : يحيى كثير متغير بعد ما تزوج عمو امجد وسافر

مراد : بس يحيى بضل احسن ولد بالعالم، بتشوفوه بكرا بس يكبر رح يكون غير شكل

قصي : يسعد قلبه مراد ولك اشتقتلك يا خالو وين ما بتسال عني ولا بترن عمسنجر ؟

مراد : عندي دراسة كثير الصف الثالث صعب وفيه جدول الضرب جننتني امي فيه

عدي : ما انت هلكتنا ومو كاين تحفظ

سلمى : لو تشوف الصف الرابع ولا الخامس والسادس شو بتحكي ؟ انا وامير وآدم طول نهارنا ندرس

عمر ( بمسخرة ) : يا حبايبي

ماهر : انا حفظته خالو قصي ماما قالتي انت مخك مثل خالك رح تطلع مهندس

علاء : وابوك شو ؟ وينها ديمة ام لسان

عمر : يا ويلي عليه اخوي حظه هيك بالحياة مبلي هالبلوة

حمزة : ههههههه ضحكتوني

عدي : شايف بالله هاي آخرتها

قصي : غيرانين مني أصلا انتوا

 

احمد ( مبتسم ) : السلام عليكم

ريم : وعليكم السلام تاخرتوا .. وينها ياسمين والأولاد ؟

احمد ( مستغرب وعيونه علينا ) : انتوا هون ؟

علاء : اجا احمد ؟ هلا هلا بحبيبة عمها ( حمل تولين وبوسها ) وينك يا زلمة طولتوا

احمد : مو عاساس انا واياك بس اللي بدنا نقعد ؟

علاء : نسيت احكيلك اني ناديت عدي وحمزة ومرتي عزمت اختها خاوة واختها عزمت سلفتها وبنت حماها من حنيتها فقلت خلص ما وقفت على سيرين خليها تيجي مع حمزة

البنات : هههههههههه

سيرين : ما يحرمنا من حنيتك دمدوم دايما مزبطيتلنا الوضع

ديمة : حبيبتي ولو واجبي وزيادة

عمر : خصوصا انه ابنك طالع لخاله ذكي ومستقبله مهندس

احمد : اه الحمدلله مو طالع لابوه هامل وعاطل عن العمل .. المهم هسة شو اعمل بياسمين ؟ حاولوا تعملوا حالكم ما اجيتوا بالله احسن ما انام الليلة على الدرج بدل اخوي

عمر / قصي : ههههههههاي

آيات : طيب خبرها تلحقك

احمد : لا ما رح تيجي عارفها، يلا بتديروا بالكم على تولين

مراد : حرام عليك عمو كيف بدنا نلعب بدون يحيى وانت عارف انه قائد الفريق ؟

احمد : دبروا حااكم بدونه أصلا لو اجا ما رح يكون مروق كثير ليلعب

الجميع : ماله ؟

 

////

 

استدركت حالي وانا بحكي عن يحيى وتذكرت انها امي وصتني ما اجيب سيرة عن حمل بيان لبعد ما يثبت حملها، وامجد وافقها الرأي واكتفى باخبار اهله وأهلها ..

 

احمد : يعني هيك بس يكون نعسان بقلب على نكد

مصطفى : الله يسامحه بابا حليله يعمل سهرة بايام المدرسة، ما دخلنا يوم الخميس بدنا نطلع مشوار كلنا

علاء ( باستنكار ) : لا يا ؟

ماهر : او نتجمع ببيت سيدي أبو ماهر ونكيف ( برقص ) ونلعب عالدرج ونتسحسل عليه

عدي : عيد الرقصة اشوف ؟

احمد : نفس رقصة خاله المهندس هههههه

الجميع : هههههههه

 

ريم ( بهمس ) : يا سيدي على مراد ما بوفر لحظة مع الين

ديمة : هههههه خليه يختي شو مزعلك انتي ؟

آيات ( بنبرة حادة ) : اه اه خليه .. منيح اللي ما اجا يحيى عشان عدي يضل مروق الليلة

سيرين : تعالوا شوفوا ابن خالتكم كل يوم بسمعنا ( سيبي شباكك مفتوح ليه تقفليه )

الجميع : هههههههههههه

احمد : بدي اقص لسانه ريان

حمزة : لمين بغني ما فهمت ؟

عمر / قصي : لبنت الجيران ههههههع

علاء : الله يسامحها خالتي ضلت تقول نفسي بولد مثل امجد وعمر وقصي لحد ما الله ابتلاها

عمر : يا عمري انت، طيب دير بالك لتنبلي من كثر ما بتتشمت بالناس

قصي : عقبال ما يجي لامجد ولد ونفرحله والله

احمد : الله كريم

عدي : ولد او بنت كله نعمة

ديمة : قصده مشان أولادهم يعني .. بس ما بكون قد اولادكم

عمر ( ضرب على ظهر قصي ) : عادي هي اخوكي كان زغنون يا حبيبي وكبر

غنى ( ركضت على قصي ) : سلامتك ما كان قصده اكيد ما وجعك كتير

قصي ( عصب ) : غنى ؟؟ شو انا ولد صغير من عقلك جاية تسالي هالسؤال .. بنمزح قاعدين

غنى : …

عمر ( بغني ) : والبابا ما عاد يكزب

مصطفى / مراد : تحية لابو الوليد

عمر ( متابع ) : بس لساته بعصب

عمرو / ماهر : وصراخه بيعلى وبيزيد

احمد / علاء / عدي / حمزة : ههههههههههههه فرقة صارت

 

////

 

ياسمين : الف مبارك حبيبتي بيان ربنا يتمملك على خير وتقومي بالسلامة

بيان : يبارك بعمرك ويحفظلك اولادك، الحمدلله ربنا اكرمنا

ياسمين : فرحتينا ربنا بعلم اديه بنستنى بهالخبر، باركي لامجد عني وبشوفك بكرا

بيان : ان شاءالله .. انتي ما رحتي مع احمد عند دار علاء عالسهرة ؟

ياسمين : لا والله احمد لحاله هيك مشتاق لاخوه واخد تولين معه

بيان : شو مالك ياسمين كلهم هناك البنات راحوا مع ازواجهم

ياسمين ( مستغربة ) : معقول ؟ طيب غريبة ليه ما قالولي ؟

بيان : الظاهر حتى احمد ما معه خبر لانه امجد سائله وبحكيله انه رايح يشرب كاسة سحلب معه وبتخوتوا

ياسمين : امممم احتمال برضو .. يلا بسيطة أصلا صعب اروح بكل الأحوال .. تصبحوا على خير

 

////

 

” لقد أصبنا بالوعي فجأة ، دفعة واحدة ، بينما كان

ينبغي أن ينمو فينا تدريجيًا ، حتى لا نضطر على

حمل هذه الفجوة بداخلنا “

  

غنى : يوم الجمعة كانت ياسمين عازمة اسيل

ديمة : جد ؟ من زمان عن اسيل والله

غنى : حكتلي بيان كتير انبسطوا قضوا نهار سوا وعاملتلها أصناف وسألت عنك آيات

ديمة / سيرين( بنتطلع ببعض ) : …

ريم : بتشوفيها سيرين ؟

سيرين : مرات بلمحها وهي جاية من المستشفى او رايحة

غنى ( بفضول ) : لساتها حلوة ؟

سيرين ( بثقة ) : ماشاءالله عليها كل ما تكبر تحلى هالبنت، يا رب يبعتلها نصيب بحلاوتها

آيات : دخلك بيجيها عرسان ؟

ديمة ( كاتمة ضحكتها ) : …

سيرين : وحدة متل اسيل ما بتستقبل مين ما كان، ازا ما كان يليق بها ومقتنعة بمواصفاته يا دوب توافق يزوروهم

ريم : هوة هيك افضل

غنى : يا حرام كيف انس زعلها، من يومها تغيرت وبعدت عن العيلة

آيات ( بمسخرة ) : صالحها حبيبتي بعتته امي وراها لما روحت

البنات ( بفضول ) : وقبلت ؟

آيات ( مو عاجبها ) : انه على أساس متقاطعين !! انا مو مصدقة هالمسرحية كلها وحدة مصلحجية متلها مو لصالحها تحارب انس على موقف تافه

ديمة ( مقهورة ) : موقف تافه شو ؟ البنت انحكى عليها وتشوهت سمعتها وقدام ابوها الله اعلم ازا حكى معها او لا

غنى ( مستغربة ) : عنجد ؟ شكله ما حدا بعرف لانه بيان ما حكتلي

سيرين ( رح انجن ) : …

آيات : واحلى اشي ماما مبسوطة قال اجت اسيل وسالت عليكي ههههه على أساس طايقتني

ديمة : حرام عليكي، على فكرة اسيل كتير طيبة والله بس هيك لسان متل ياسمين على الفاضي

سيرين : ياسمين ما في منها لا تقارني، بس اسيل اثبتت انها حقانية برضو

ريم : والله كلنا كويسات ههههه يعني الحمدلله ما في وحدة فينا عليها عمايل لا سمح الله لا أخلاقية او ما شابه

ديمة ( غمزتني ) : بس بلاحظ انه اخبار دار خالتو مها مختفية عن الساحة

سيرين ( فهمت عليها ) : التكتم اللي فيه دار خالتي مع فرح واسيل ما مرق عليي يا جماعة

آيات : يا حسرة على أيامنا كل اشي كان ينحكى بآخر رواق، حتى رسالة لو بعتناها الدنيا كلها تكشفنا

غنى : اه والله وخصوصا مرت عمي عجبت عليكي وما كان بدها اياكي تتزوجي عمر، وانا وبيان نوقفلها وما نسمحلها

آيات ( ضحكة صفراء ) : اها

سيرين ( بخبث ) : مرت عمك لحالها ؟

غنى ( تلبكت ) : يعني كانت مؤثرة بشكل قوي خصوصا بعد ما بيان وامجد انفصلوا وحقدت عالدنيا كلها

ديمة : غيروا الموضوع صبايا شو بدنا بفلان وعلان خلونا سهرانين ومبسوطين بالكتاكيت .. يختي ما احلاها تولين شو هالكنة يا ريم نيالك ههههه

ريم ( حضنتها وباستها ) : حبيبتي بموت عليها كتير هادية وذكية

سيرين ( بتسبل عيونها ) : لعمتها طبعا ههههه

ديمة ( بفخر ) : لخالة ختشيبها

ريم : وطوا صوتك ليسمعكم احمد ههههههه احنا ما بنحجز حدا كل مين ياخد اللي بريده

غنى : انتي امنتي سلمى مع امير وبطلت تفرق معك

ريم : قصدك امنوا عليها دار حماها

 

////

 

احمد ( انخطف لونه ) : ياسمين بترن اسكتوا ( مبتسم بتصنع ) هلا والله

ياسمين : شو حبيبي ان شاءالله كاسة السحلب ولا القهوة اللي رحت تشربها زاكية ؟

احمد : لسا ما عملوا والله شكلهم ضحكوا عليي

ياسمين : عيب شو هالحكي، أصلا روحتك ما الها داعي بهالوقت .. يلا تعال

احمد : طيب هيني جاي

علاء ( تشردق بالشاي ) : كح كح كح .. وين رايح ما لحقت توصل بعدك .. ياسمين بعدين معك اعتقيه لوجه الله

ياسمين : .. سلم عليهم احمد واحكيلهم كان بامكانكم بس تخبروا عالجروب عالاقل

احمد ( مستغرب ) : على مين اسلم ؟

ياسمين : على الناس اللي سهرانين معك

 

سكرت الخط وكانت معصبة، واحمد معصب اكثر منها ..

 

احمد ( بغضب ) : انا مو نبهت عليهم ما يحكوا

عدي : طول بالك هسة بنسالهم .. يا صبايا

ديمة : ايوا عدي

احمد ( بقهر ) : ليه تحكوا لياسمين ؟

البنات ( بصدمة ) : ما حكينالها

علاء : هسة ياسمين اتصلت وبتعاتبكم انه عالاقل لو خبرتوها عالجروب

ريم : والله ما حدا فينا حكى علاء مالك ؟!

احمد : طيب دقيقة .. مين فيكم مخبرة حدا أمها او ما شابه ؟

آيات : لا انا برايي ارجع رن على مرتك واسالها مين اللي خبرك اضمن شو رايك ؟

احمد : … ما في داعي هيني مروح

سيرين ( عصبت ) : ما تروح هيني رنيت .. اه ياسمين حبيبتي كيفك ؟ معلش سامحينا بس حابين نعرف كيف عرفتي ؟

ياسمين ( حكتلنا كل اشي ) : انا ما كان قصدي اعصب على احمد أصلا ما زعلت والله لانه هيك هيك ما كنت رح اقدر اجي

سيرين ( عيونها على غنى ) : ماشي ياسمينتي بنشوفك بالويكند ان شاءالله .. اه ست غنى كيف بيان عرفت ؟

غنى ( مرتبكة ) : يعني .. كنا نحكي وعم بتجهز عشان نطلع وخبرتها

ديمة : انا لاحظت انه انتي وبيان عالخط المباشر عايشات اسم الله .. ادق ادق التفاصيل بتوصلك منها وبتوصلها منك ولا شو رايك ؟

غنى ( اتدايقت وبدها تبكي ) : الله يسامحكم .. بس انه بتحاسبوني بهالطريقة ما حبيتها منكم انا مو بنت صغيرة هاد أولا .. تانيا احنا متعودات على بعض هيك طول عمرنا متل الخوات

عمر ( عصب ) : ترا ياسمين الها سنين متجوزة ما سمعنا منها سر او أي خبر بدون اذن أصحابه

آيات : حرام عليك عمر برضو غنى وبيان مو قصدهم وانفهموا غلط، ومو حلوة بحق بيان انه ياسمين تتصل بهالاسلوب مدامها ما زعلت

احمد ( بغضب ) : الحق لا على غنى ولا بيان .. الحق على اخوكي اللي ما عرف يضب لسان مرته من اول يوم .. ( عيونه على عمر ) انت مفكر ياسمين من شطارتها ساكتة ؟حبيبي انا من تاريخ ما رجعت من السفر نبهت عليها

علاء : صحيح .. تمام روقوا واحنا اجتمعنا وكلنا امل وكالعادة امل ميتة بس بدنا نرجع نحييها ونعمل احلى سهرة لعيون أبو يحيى بدون ما نعصبه .. خلص هسة اقعد بما انه المدام روقت ومو زعلانة والباقي كله بنحل

قصي : … على فكرة غنى انا مو حاكيلك نفس الكلام برضو ؟ وبتعرفي انه اكثر اشي بقهرني لما تقعدي تحكي براحتك سواء لامي او خواتي او مين ما كان ؟

غنى : … صح

عدي : خلص هاد درس بتتعلم منه، لساتها جديدة وما كانت متوقعة توقع بهيك دوامة

 

رجعنا فصلنا القعدة ..

 

ديمة ( معصبة ) : آيات انتي ما بتبطلي عادتك ؟ طلعت ياسمين غلطانة كمان هالمرة ؟

آيات ( ببرود ) : انا واخواني ونسوانهم حرين ببعضنا ما تدخلي لو سمحتي

غنى : كانت بتدافع عني ديمة حبيبتي كلك زوء ومفهومية ما شفتي كيف عمر عصب عليي ؟

ريم / سيرين : …

ديمة : اه وعشان اتدافع عنك لازم ترمي ذنبك على غيرك ؟ بامكانها اتدافع بطريقة اكتر رقي وبدون ما تخسر حدا او بدون ما توقف بصف واحد ضد التاني !! يا ام الزوء والفهم

ريم : وقفوووووا .. انتوا التلاتة عيب عليكم عنجد عيب

آيات : احكي لاختك اتضلها ساكتة وما تعمل على غنى بنت حمى عند كل نكشة

سيرين / ديمة ( ضربوا كف ) : هههههههههههه

سيرين : اااخ آيات عنجد ضحكتيني .. اكتر اشي بخليني اسكت اليوم لما اتزكر كلام ياسمين لما تحكي عمرها آيات ما بتتغير

ديمة : خلص انتي التانية برضو رجعتي جبتي سيرتها

آيات ( بتصرخ ) : ايييييه شو بدك فينا جبنا سيرتها ولا لا ؟ شو اكلناها يعني ؟ مهيها بتجيب سيرة الكل بعدين ما صارت عدوة كله كلام تافه بس السوسات اللي بتحط على النار زيت يا ريت تعرفوا حالكم منيح لانه احنا كاشفينكم

 

احمد ( اجا فجاة ) : صوت مين هاد اللي طالع ؟

البنات : …

ديمة : اختك ما بدها اقلها ما تجيبوا سيرة ياسمين

احمد ( بغضب ) : جيبوا سيرة اللي بدكم إياه اما اسمع صوتك بتصرخي بهالطريقة لسانك بقصه فاهمة ؟ عدي ( بنبرة حادة ) : ديمة لو سمحتي حاولي تختصري قد ما تقدري .. لانه الكل هون غلطان، مو كل شوي تحطي آيات بوز مدفع كرهتوها حياتها للمخلوقة

ديمة ( مصدومة ) : …

عمر ( ببرود ) : جهزي حالك حبيبتي بدنا نروح، ما بتحمل اضل بمكان ما حدا مقدرك فيه

ريم ( بتلطف الجو ) : حقك علينا عمر وانتي آيات حبيبتي والله كلنا مقدرينك وبنحبك لا تفهمي الأمور غلط

غنى ( معصبة ) : ما في اشي مفهوم غلط، ديمة وسيرين كل ما بتيجيهم الفرصة بهاجموا آيات وفوق هيك كمان هاجموني مو عارفين مين نصّبهم قائدات علينا .. خلي ياسمين تنفعهم على كل حال ورح اخبر بيان تحاول تخفف معها لانه الواضح شو ما اعتبرناها طيبة وبتحبنا بكون في أشياء مخفية

احمد ( بضحك ومو عارف شو يحكي ) : هههههههه

قصي : هاد اللي طلع معك ؟ ماشاءالله شو فهمانة يا مرتي لو ضليتي ساكتة احسن

سيرين / ديمة ( كاتمات ضحكتنا ) : …

ريم ( بتضحك ) : القائدة هون انا حبيبتي اكبر وحدة فيكم، ضبوا لساناتكم وانشغلوا بحالكم واتركوا العالم بحالها الطيب ربنا بعرفه والعاطل كمان ربنا بعرفه

علاء ( برومنسية ) : نسيت اجيب صندوق الكنز احط الجواهر فيه قبل ما تحكيهم يا احلى كبيرة بالمنطقة، قل اعوذ برب الفلق انا خايف يحسدوني عليكي صراحة

الشباب : هههههههههههه

احمد ( مبتسم ) : شكرا ريم .. شكرا آيات وغنى وانتوا كمان سيرين وديمة ما قصرتوا .. بتشكركم نيابة عن ياسمين كمان وان شاءالله ما رح تشوفوها لانه ما أتوقع ضل نفس لحدا يشوف الثاني .. سلام

آيات ( بلهفة ) : والله العظيم ما كان قصدي اشي بس انقهرت على غنى لما بهدلها عمر، وحاولت اخفف عنا قدامكم

احمد : … عمر ما بهدلها كان يقصد بيان انها بتطلع اسرار عيلتها

سيرين ( بفخر ) : يا عيني عليك

آيات ( بلعت ريقها ) : تولين نامت غيرتلها قبل ما تنام حطها بسريرها على طول

احمد ( بهز راسه ) : يسلمو ايديكي .. تصبحوا على خير

 

////

 

علاء : هسة بدي اعرف مين اللي بدا بكل اللي صار ؟ احكي انتي ريم

ريم ( عيوني على ديمة ) : … ديمة بس ما كان قصدها تعمل مشكلة

غنى : …

ديمة : لا كان قصدي اعمل مشكلة لا اتدافعي عني ريم، انا ما بحب حدا، بكره الكل .. شو بدكم كمان ؟

سيرين : تسكتي بلا حكي فاضي

عدي ( بلطف ) : لو سمحتي اعتذري من آيات وغنى قبل ما نطلع من هون، ما بدنا مشاكل من اول وجديد

غنى : انا ما بدي اعتذارات تتركني بحالي انا وبيان ومسامحتها

قصي : انتي وبيان ؟ شو انا متجوزك ولا متجوزها كمان معك ؟ ديمة مرت اخوكي وبنت حماكي لا تخلطي الحابل بالنابل .. ( عصب ) بيان الغلط راكبها من ساسها لراسها ووقعتك معها، بهمني علاقتك مع اختي واخوكي حاليا والقصص الثانية بنحلها مع بعض

ديمة : بس مشان اخوي لانه منبهك وانتي اللي ما مشيتي على كلامه رح اطلب منك السماح

قصي ( بحب ) : تسلميلي دمدومة يلا غنى دورك

غنى ( من غير نفسك ) : سامحتك

 

حمزة ( بهمس ) : يا الله منظرنا قدام أولادنا مو طبيعي مستحي أتطلع بواحد

علاء : وانا والله .. المشكلة صاروا واعيين

عدي : مراد قلبه رح يوقف اذا امه ما اعتذرت من آيات

حمزة : من غير شر عنه

 

عمر : يلا اعتذري من آيات كمان بما انها نيتها طيبة من الأول كانت وانفهمت غلط

ديمة ( بترجف ) : حقك عليي آيات

 

استدركها عدي قبل ما ينزلوا دموعها، واخذ أولادهم وطلعوا ..

 

سيرين : اجا دوري صح ؟ قبل ما حدا يفتح تمه متل ما قال احمد عن ياسمين انه ما حدا رح يشوفها انا كمان ما حدا رح يشوفني، طفح الكيل عندي الحمدلله ماخدة واحد غريب وكنت حاسبة حساب هاليوم مو مجبورة اصلح علاقات على حساب مبادئي وكرامتي .. حمزة ( سحبها من ايدها بقوة ) : امشي طيب .. تصبحوا على خير

 

////

 

” الكل يفتقد النسخة القديمة من نفسه رغم أنها كانت أضعف وأقل نُضجًا وأكثر غباءًا، ولكنها كانت أكثر سعادة وراحة.. دائمًا تبقى الطمأنينة أغلى شعور “

 

عدي ( ماسك ايدها ) : ما تبكي الاعتذار قوة والبعد عن المشاكل والله اهدا للنفس

ديمة ( سحبت ايدها ) : كان اعتزرت عني ؟ اختك على عيني وراسي عدي اما سلفتي انا مو مجبورة اعتزر منها لاني ما غلطت معها وكزابة نيتها عاطلة وعاملة حزب مع غنى ومن لما قعدنا وهية تحكي عن اسيل ومتل ما قال احمد عمر ما بهدل غنى

عدي : بعرف حبيبتي .. بس طول عمرها آيات صديقتك وبنت خالتك كلمة سلفة هاي مجرد لقب المفروض علاقتكم اكبر منه بكثير

ديمة ( مو عاجبها ) : لا انا انسانة متلي متلها يعني بغلط متل ما هية بتغلط، والمثاليات هاي تركتها الك حبيبي

عدي : اوف ! هاد قلبك مليان عليي .. خلص اعملي اللي بريحك

ديمة ( انفجرت ) : هوة ضل اشي اعمله براحتي ؟ ما تركتلي مجال افهمك اشي .. وصلني عند اهلي ما بدي ارجع على البيت

عدي ( ماسك اعصابي ) : الوقت تأخر مو حلوة، بكرا الخميس بتروحي تقضي العطلة عندهم وتغيري جو

 

////

 

حمزة ( متدايق ) :  كلامك بين انه ديمة غلطانة مع انه اللي عملته قمة بالاخلاق

سيرين : خلينا الاخلاق الكم

حمزة : سيرين ! ما بتزوج وحدة بلا اخلاق انا .. لا تكوني منحازة لطرف كوني حيادية وانصري الحق

سيرين : الحق انها آيات تغلط على ياسمين وقت ما بحلالها وما حدا يوقف بوجهها ؟ ولا تسكت على عمايل بنت حماها وعاملة حالها مرت الأخ الحنونة ؟! جاوبني

حمزة : آيات معدنها اصيل وبنت عالم وناس والبنت دايما بتنفهم غلط من تصرفاتها العفوية، ما فيها اشي لو مرة بس مرة وحدة بحياتها تفاهمتوا معها بالعقل بدون ما تحطوها بقفص الاتهام

سيرين : ما تركتولنا مجال نفهمكم شو صار مشان هيك ما رح اجاوبك هلا ولا بدي سيرتهم .. وجعنا راس الصغار وخربنا عليهم قعدتهم

 

////

 

اول ما سكرت الخط مع سيرين، وقع قلبي من الخوف وحسيت بقبضة غريبة ..

ضليت على اعصابي لحد ما سمعت دقات خفيفة عالباب، عرفت انه احمد حامل تولين ومو قادر يفتح الباب ..

 

ياسمين ( بلهفة ) : وأخيرا .. هاتها عنك انا بنيمها

احمد ( بغصة ) : خليها مثل ما هي آيات غيرتلها قبل ما تنام

ياسمين : .. ماشي

 

يا حبيبي على صوته يا دوب طالع، ووجهه ما بتفسر ..

حطيتها بسريرها وركضت لعنده، كان بدخن وعقله بعالم آخر ..

 

ياسمين ( مسكت ايده ) : ان شاءالله ما صار اشي ؟

احمد ( بهز راسه بالنفي ) : للأسف صار أشياء .. بس ما رح احكيلك الا الخلاصة واوعديني ما تسالي حدا عن اشي

ياسمين : بوعدك بس احكي

احمد ( تنهد ) : ما رح نلتقي مع حدا ابدا بعد اليوم .. خصوصا انتوا البنات ممنوع تتواصلوا ولا تحكوا مع بعض

ياسمين : هههههه عشان شو ؟ انا ما زعلت ابدا

احمد ( بقهر ) : وليه اتصلتي تعاتبي وتسمعيهم حكي ؟

ياسمين : قصدك انه معاتبتي فتحت آفاق جديدة للمشاكل ؟

 

جبرته يحكيلي كل اشي صار، وفوقها حبة مسك متواصل مع سيرين وحكتله كل كلام البنات لما كانوا لحالهم ..

 

ياسمين : اللي عملوه ديمة وسيرين مشاني اكيد كبيرة قيمته عندي، بس بنفس الوقت انا حالفة يمين ما اعمل مشاكل مع آيات وبما انها حاولت تقنعك انها نيتها مو عاطلة لذلك رح امشيلها إياها واعتبر ما صار اشي

احمد : …

ياسمين : اما بالنسبة لغنى وبيان بقدر احكي انهم مو فارقين عندي .. انا بيان منيحة معها عشان اخوي امجد اما اطباعها ما في تنين بختلفوا فيهم انها شايفة حالها وما بدها حدا يكون لا احلى منها ولا احسن منها وازا بيوم من الأيام صف معها ضدي ما بزعل بس وقتها بعرف كيف ارد عليه

احمد : امجد عقله صعب وتاكدي انه ما بصف مع حدا ضدها، يعني ما بننكر انها بتحبه مثل ما هو بحبها فما تحطي حالك بنفس الكفة معها

ياسمين ( باستنكار ) : بنفس الكفة ؟ هاد اللي ضايل عفكرة انا بقول عنه اخوي بس عشان اوضحلك علاقتي معه بس بالنهاية فعلا ما بعنيلي مشان يفرق معي

 

////

 

قصي ( بهمس ) : خلينا نروح ما ضل داعي لقعدتنا

عمر ( بهمس ) : كنت قايم أصلا .. ما شفت كيف علاء قاعد مطنشنا وريم فاتت تنيم أولادها وتركت آيات وغنى

علاء ( بتطلع عليهم بقهر ) : على شو عم يتوشوشوا الحبايب ؟

قصي : تأخر الوقت والصغار نعسوا، بدنا نستأذن وان شاءالله بس تهدى الأمور شوي بنشوفكم على خير

علاء ( وقفت اودعهم ) : اذنكم معكم

 

ما بعرف شو اعمل بحالي ووين اروح بوجهي من احمد اللي كان عنجد مشتاق لقعدة معي ورحت خربتها عليه، وعملت حالي عامل خير  بس أي خير مع هيك نفسيات ..

 

ريم : طلعوا ؟

علاء : اه .. منيح اللي اعطيتهم قيمتهم

ريم : سلمى كتييير انزعجت علاء أولادنا بطلوا صغار، كانت مقهورة وفاهمة كل كلمة

علاء : اشي بقهر لانه، اللي مهون عليي انه قصي طلع زلمة مو مثل هالنضوة اللي ما بضل بمكان ما حدا بقدر فيه حبيبته

ريم ( معصبة ) : التنين كزابين ما حدا فيهم بحب التاني .. منك لله يا آيات بس حسابها عند ديمة عسير رح يجي يوم تعمل في بنتها اللي عملته حماتها فيها

علاء ( مصدوم ) : شو مال بنتها ؟

ريم : ما بعرف .. بكرا الأيام بتلف وبنشوف

 

حتى الأطفال اللي شفقانين عليهم اليوم كمان طلعوا ضمن حساباتهم، يا الله دخيلك شو بصير بعيلتنا ليه ما في حل جذري لاي مشكلة ؟ ..

يا خسارة يا آيات والله حرام تكوني اخت لاحمد، كل ما نفكر انه تصلحت نفسيتها بترجع تثبتيلنا العكس ..

 

////

 

قصي ( معصب ) : مبسوطة يا حلوة ؟ احكيلي ان شاءالله عقلك مرتاح

غنى ( معصبة ) : مو مهم انا المهم انت وخواتك تكونوا مرتاحين .. يا حلو

قصي ( بضرب بعصبية على مقود السيارة ) : انا وخواتي ؟؟ اوعي تجيبي سيرة خواتي بتعرفي ليه ؟ لانك مطولة كثير لتصيري مثلهم، كان نفسي ما أوصل لهالكلام معك بس صدقا طلعتيني عن عقلي انتي واللي عاملتيها مثل اختك

غنى ( مقهورة ) : مطولة لاصير متلهم ؟ كتير منيح معناها رجعني لعند اهلي وبس اصير متل خواتك بنبقى بنتفاهم

وليد ( ببكي من اصواتنا ) : …

 

اتطلعت بابني اللي ما اله ذنب، وتذكرت كيف فرحنا لجيته وكل أيامنا اللي تعبنا فيها حتى نوصل لمرحلة العيلة المستقرة ..

 

قصي ( ماسك اعصابي وبنبرة هادية ) : بس نوصل البيت بنتفاهم، النقاش مع العصبية ما بجيب فايدة

غنى ( باصرار ) : مستحيل .. ازا هلا ما اخدتني لعندهم انا بتصل فيهم يجوا ياخدوني

قصي ( تنهدت ) : الله يهديكي

غنى ( بمسخرة ) : امين واصير متل خواتك

قصي ( نص ضحكة ) : هههه هاد اللي لقطتيه من كل اللي صار اليوم ؟ يعني مثلا ما حاولتي تتقبلي انك غلطتي وكان لازم تفكري اكثر وتستفيدي لقدام من هيك مواقف !

غنى : لا ما استفدت ولا تعلمت نسيت اني وحدة لسا بدي فت خبز

قصي ( قاطعتها ) : عشان تصيري مثل خواتي ههههههههه اوك ماشي

 

سكتنا، ولان السكوت من ذهب خلاني اجمع كلام موزون احكيه لاهلها؛ بما انها مصرة تروح عندهم ..

 

////

 

الحمدلله عدي ما رد عليي ووداني عند اهلي، ما كنت بعرف شو احكيلهم لو رحت بهيك وقت ..

معه حق بكلامه وكلنا غلطانين اليوم، شو بنخسر لو بعتنا عالجروب أي تلميح انه رح نجتمع بسهرة فريدة من نوعها الليلة هههه ..

بس لعله خير، خلي المستور ينكشف ونعرف الناس على حقيقتها ..

 

عدي ( بتاملني ومبتسم ) : الله يهديكي

ديمة ( كاتمة ضحكتي ) : ليه ؟

عدي : ابدا .. بدعيلك لانه ما ركبتي عقلك وسمعتي كلمتي

ديمة : … شكرا ويهديك انت كمان

 

////

 

أبو عدي ( بفزع ) : بسم الله .. مين عم يدق بهالوقت ؟

ام عدي ( بخوف ) : روح شوف دخيلك قلبي صار برجليي

أبو عدي ( مصدوم ) : غنى ؟؟؟! خير يابا فوتي فوتي

قصي ( مسكني من ذراعي ) : شرفي اشرحيله كل اشي بالتفصيل واستعيني ببنت عمك تشرح معك عشان بكون اكيد وصلها التفاصيل .. ( التفت على بابا )  بعدالسلام .. خالي بناءاً على طلبها وبعد محاولات فاشلة باقناعها بعدم العناد ونرجع على البيت .. هي بنتك عندك وصارت ما بتلزمني

ام عدي ( بتبكي ) : يا حبيبي هالطفل شو ذنبه ؟ طول بالك خالتو كل مشكلة والها حل

قصي ( معصب ) : علمي بنتك تتعلم من الحياة بدل ما تركب راسها على الغلط، ابني ما تخليت عنه ولا بتخلى اكيد

أبو عدي : طيب طيب روق خالي يمكن مضغوطين شوي وبحاجة راحة، خدوا وقتكم بالتفكير وان شاءالله ما بصير الا كل خير

غنى ( مقهورة ) : كانكم ما بدكم اياني ؟ فوق ما حكالك ما بلزمه كمان بتترجاه يفكر ؟ وبدك اياني انا افكر لارجعله ؟

ام عدي ( بنبرة حادة ) : مبين انه الحق عليكي ولسا الك عين

غنى : احكي مع ابنك واساليه مرته شو عملت عشان تعرفي على مين الحق

قصي ( بقرف ) : ما في فايدة منك .. ( حمل وليد وباسه ) تصبحوا على خير

 

__________________________________________________________________

 

انتهت مناوبتي وطلع الصبح، واي صباح بعد ليلة عاصفة مرقت على بيوت عيلتنا  ..

 

ام ماهر ( بتضرب على راسها ) : يا خراب ديارنا هاي آخرتها يا ستي ؟

أبو ماهر : لا حول ولا قوة الا بالله .. يعني بدنا نرجع نعيد نفس الدروس ؟ صار عندك ولد مثل القمر والك كم سنة متزوجة يا سيدي عمرنا ما سمعناكي بتشكي والله قصي زينة الشباب ماشاءالله عليه شو اللي خلاكي تفكري مجرد تفكير لتخربي بيتك بهالشكل وعشان شو ؟

غنى : … انا ما خربت بيتي طلبت اجي عند اهلي مشان يلاقوله حل لانه اهاني بدون ما يفكر، هوة اللي قلهم اني ما بلزمه يعني زاد اهانتي الضعف

هيثم : إهانة ؟ طيب ديمة ليه ما قالت لعدي وديني عند اهلي عشان انا كمان انهنت واعتذرت وعلى فكرة ما كانت غلطانة هداك الغلط لحتى تعتذر بالعكس حاولوا ما يقطعوا حبل الود

أبو عدي : والله عدي ما بسمحلها تروح انا متاكد حتى لو طلبت

هيثم ( بنبرة حادة ) : وقصي ما كان بده يجيبها، بنتك بنص الليل ركبت راسها ولا تنسى انه خبرة قصي اقل من عدي صح ؟

ام ماهر : احكي معه يمة خليه يجي يقعد معها ويرجعها شوف شو اللي بدها إياه بنتك واحكيله

غنى ( باصرار ) : انا ما بدي إياه افهموني خلص ما عم اقدر أتطلع فيه مرة تانية .. ( متمالكة حالها ) أساسا انتوا زوجتوني إياه غصب وبالنسبة لكلامك عمي هيثم انه عدي خبرته اكبر بحب احكيلك بهالمناسبة القصة مو واقفة على الخبرة، القصة ( غصت ونزلوا دموعها ) …

أبو عدي ( بلهفة ) :  اقعدي يابا .. اهدي اهدي

هيثم ( بالم ) : استغفر الله العظيم

غنى ( مسحت دموعها ) : القصة عمي انه عدي بحبها لديمة وهي بتحبه كمان واكيد كلكم بتعرفوا انه حبهم قوي كتير وحقيقي .. عكسي انا وقصي

الجميع ( مصدومين ) : كيف يعني عكسكم ؟

عدي / عمر ( فتحوا الباب بلهفة ) : غنى ؟!

هيثم : ليه اجيتوا ؟

عدي : اخذت مغادرة والله .. انجنيت بدي اشوف شو مال عقلها اختي

غنى ( بنبرة حادة ) : منيح اللي اجيت عشان احكي اللي بقلبي قدامك

عمر ( مسكها يهديها ) : طيب شوي شوي ما في اشي بستاهل صدقيني كلها كلام نسوان وقلة عقل

عدي : تعالي اطلعي معي نحكي بهداوة

 

////

 

اخذناها على بيتنا وقعدنا احنا الثلاثة، وحاولنا نفهم منها بس اجا عمي هيثم وقعد معنا وما قدرنا نمنعه ..

 

هيثم ( تنهد ) : عندي فضول اعرف شو جواتك، كملي عمي

غنى ( حضنت عمر وبتبكي ) : يا ريتني رديت عليك ووقفت بوجه هالخطبة، يا ريتني حكتلك عن صهيب ووقفت معي مشان اتزوجه

هيثم / عدي ( بنتطلع ببعض ) : مين صهيب ؟

غنى ( بغضب ) : الشب اللي شافني بعرس امجد الأول .. الانسان الوحيد اللي حبيته بحياتي كان معي بالجامعة كسرت بخاطره وما وقفت بوجهكم ودافعت عن حبي .. كلكم اخدتوا اللي بدكم إياه الا انا كنت ضحية لقراراتك وحكمت عليه بانه صاحب حسام بس ما كان نفسه ابدا