مذكرات عاطفية ( 2 الحلقة الثانية ) - سلسلة ياسمينة الروح
مذكرات عاطفية ( 2 الحلقة الرابعة ) - سلسلة ياسمينة الروح
الحلقة الثالثة
إن الحياة التي تملأها السعادة يجب أن لا تخلو من ثلاثة أشياء؛ وهم الأمل والعمل والحب ..
فلا تتخلى عن اي منهم لتحيى في حياتك حياة سعيدة ..
_______________
____________
قصي : شو اخبار العرسان ؟
امجد : الله يهنيهم، عقبالنا
عمر : لازم يزق حاله بالنص بكل جملة بتخص العرسان هههه
امجد ( باستياء ) : ما تكون غيران عشان انت الوحيد العزابي بيناتنا
قصي : ههههههه لا لا عمر عقله اكبر من هيك
عمر ( بغرور ) : اكيد عقلي اكبر من هيك مستويات اكبر همها النسوان هاهاهاي
ديمة ( اجت فجاة ) : الشاي جاهز تفضلوا
قصي : شكرا حطي الصينية وروحي
عمر : عقبال ما نشربها ببيت عدلك الهي
امجد : هههههه الله يكون بعونها بس
ديمة : بعين الله، اللي بصبر ياسمين بصبرني
قصي / عمر : ههههههه
امجد : ماشي يا ديمة
_________________________________
ريم ( حاملة سلمى وبتبوسها ) : يا روحي انا ريتو نعيما
سهى : يلا رضعيها ونيميها
ريم : يلا، بس شوفي علاء ازا محتاج اشي
سهى : صحيح اي ساعة اجا مبارح ؟
ريم ( بارتباك ) : بعد ما طلعتوا على طول
سهى ( بتهز براسها ) : يلا منيح، الله يهديه
كنت محور الحديث بينها وبين امها، وكأني عامل جريمة بسهرتي مبارح؛ اللي من اشهر طويلة ما سهرت مثلها ..
سهى : اعملك اشي خالتو ؟
علاء ( بلا مبالاة ) : لا شكرا، كيف سلمى نامت ؟
سهى : اسم الله عليها تحممت وكانت هادية بتحب المي ههههه وهي بدها تنيمها
علاء : يلا منيح، يسلمو ايديكي، بس خلص هالكم يوم اهتمي بديمة وهي ريم بامانتي
سهى : الله يرضى عليك بس كمان انت عندك دوام ويادوب تلحق
علاء : يلا بتتدبر
_________________________________
سيرين : وين اختفيتي من الصبح ؟
نهى : عند خالك هيثم
سيرين : في اشي ؟
نهى ( بتهز راسها يمين وشمال ) : ابدا، حبيت اشرب فنجان قهوة معه
سيرين : جاب آدم ؟
نهى : لا، رانيا تعبانة خليه شوي عند امه
احترت اخبرها بالكلام اللي حكتلنا اياه رانيا مبارح او لا، خفت ازيد الامور سوء لانه لسا مو عارفين شو المشكلة، وبنستنى ياسمين شو رح تعمل هي واحمد ..
سيرين : ما حكيتي مع ريم ؟
نهى : زكرتيني فيها، بس خليني اشوف ابوكي واجهز غدا
سيرين : يا رب يكون وضعهم رواق
نهى : ولا رح اجيب سيرته، ما دخلني بحدا
_________________________________
ياسمين ( بدلال ) : احمودتي
احمد : عيونه
ياسمين : بما انه القعدة هون رواق وبالنا فاضي فكر وين رح نقعد انا واياك باقي الايام في الاردن
احمد ( رفع حواجبه باستغراب ) : مين قلك انه لسا بدي افكر، القرار محسوم من زمان
ياسمين : جد ! وين ؟
احمد ( شدني لعنده ) : نسيتي انه من السنة الماضية دار سيدي مفتوحة النا يا حبيبتي
ياسمين ( مصدومة ) : وين ؟!
احمد : ههههه مالك ؟ ما بدك يعني
ياسمين : معقولة احمد نسكن معهم ؟ احنا عرسان حبيبي لازم بيت لحالنا
احمد : من وين اجيبلك بيت لحالنا ؟ يا ريت بيتنا جاهز كان سكنا فيه اكيد
ياسمين : امممم طيب مليانة شقق مفروشة، وانت مو كتير رح تقعد بعمان يعني ما رح تكلفنا كتير
احمد : لا ما حدا قبل اعمل هيك، سيدي زعل لما قلتلهم رح اخد شقة
ياسمين : اه يعني الموضوع تم النقاش فيه وبت القرار بدون ادنى علم الي
احمد : مين الزلمة فينا ؟
ياسمين : اكيد انت بيبي شو هالسؤال
احمد : والسكن من مسؤولية مين ؟ يعني رب الاسرة مين ؟
ياسمين ( بلعت ريقي ) : تؤبر ألبي احلى رب اسرة بين الاسر كلها، مالها دار سيدي يعني اي بكفي بتصبح بكاسة شاي من ايدين ستي قبل ما اروح عالجامعة، وعمر ساكن فوقينا يعني كل شوي بيجي بتفقدنا ازا مبسوطين او لا
احمد ( عقد حواجبه ) : سكري عالسيرة خلينا نعرف نقعد هاليومين
ان شاءالله يعيد حساباته بعد ما جبت سيرة عمر قدامه، يا حبيبي على منظري عند دار سيدي اعيش وكل العيلة تعرف شو بنسوي ..
وام زكي ( عمر ) رح يشل املنا بزناخته وتعليقاته، وتلميحاته ..
_________________________________
هيثم : يا بنت الحلال ردي على هالتلفون
رانيا : هاي امي هلكتني قد ما رنت، مو قادرة ارد عليها وتسمع صوتي هيك
هيثم : نعم ؟ ناوية تخبي عن امك كمان ؟
رانيا : بالله ؟! اكيد قبل عرس حمزة ما رح احكي لحدا بدك اياهم يقعدوني عالكرسي ويربطوني
هيثم : ليه مو ناوية تقعدي ؟
رانيا ( عصبت ) : هيثم مالك عليي ؟ لما انا ادير بالي على حالي مو متل لما الكل يكون بس بده يقوم بالواجب ويعطي نصائح
هيثم ( مزعوج من عصبيتها ) : … براحتك
رانيا : … تمام
_________________________________
ام حمزة ( بقلق ) : اختك ما بترد يمة مالها ؟
رزان : معقول ؟ عاد بترد دايما، يمكن هيثم عندها ومو صاحلها تشوف الموبايل
ام حمزة : قولتك ؟ والله كنت ناوية ارن عليه بس خفت يكون بالمستشفى
رزان : لا ترني ولا عبالك، اكيد متل ما قلتلك توكلي عالله
ام حمزة : لعاد خليني اقوم اجهز الطبخة قبل ما يرجع ابوكي واخوانك
رزان : يلا قايمة وراكي
قلقت على اختي بعد اللي حكته امي، وبعتلها على الواتس اتطمن ..
ردت عليي بسرعة، وقالتلي انها مفلوزة وصوتها مو طالع وما بدها تقلق ماما عليها ..
صعقتني بحجتها، وحكتلها ماشي انا اقنعت امي انك مشغولة وطلع بالفعل هيثم بالبيت ..
_________________________________
آيات : ديمة وين رحتي ؟
ديمة : هيني، في اشي
آيات : طمنينا شو صار معك ؟
ديمة : ولا شي طبعا، بس صوتهم كله ضحك شكلهم مزهزين
آيات : اه يعني قاعدين بغرفة لحال
ديمة : اكيد بغرفة قصي، الحمدلله تحولت لمحششة
آيات : شو لابس عمر ؟
ديمة ( مصدومة ) : عادي تيشيرت وبنطلون جينز، ليه بتسالي ؟
آيات : لا عادي بس هيك فاضية اشغال
سيرين : بست
ديمة : يمة، ليه بتحكي عالخاص ؟
سيرين : بحاول استوعب مال آيات بتسأل عن عمر شو لابس ؟!
ديمة : صراحة انا لسا ما استوعبت كمان، مالها انجنت كنها
سيرين : والله بنتفها ازا بتفكر فيه مجرد تفكير
ديمة : لا ما اتوقع، مو زابطة عمر و آيات ههههه ضحكتيني
آيات : وين رحتي ؟
ديمة : هيني بس رحت اتفقد الاكل عالنار
آيات : خالتو عند ريم ؟
ديمة : اكيد
آيات : يلا ديري بالك، اسمعي ازا صحلك تلقطيلهم صورة لا تقصري
سيرين : شو بدك في الصورة ولي ؟
آيات : بسم الله، ولا شي بس هيك بس تعلمت من ياسمين نخبي اشي للمستقبل كله بنفع هههههع
ديمة / سيرين : واااو صايرة خطيرة
آيات : بتعرفوا فاضية اشغال وهيكا
سيرين : الله يشغلك بكل ما هو مفيد يا اختي
ياسمين : كل شي بتحشروا ياسمين فيه، مسكتكم
البنات : اهلااا بالعروس واخيرا بينتي
ياسمين : يا الله شو اشتقتلكم
البنات : صدقناااكي، اقعدي ساكتة والله مو متزكرة حدا فينا بهالاجواء اللي حوالكي
ياسمين : قربت اجي عكل حال وبنتحاسب
البنات : هههههه بتموني
سيرين : ياسمين حلفتك بالله في اشي بين آيات وعمر ؟
ياسمين : حسبي الله ونعم الوكيل، ولك هو ازا سالت عنه يعني لازم يكون في اشي مالك عالبنت ؟
سيرين : ما اقتنعت، اعطيني دلائل اقوى
ياسمين : دلائل اقوى من اي ناحية ؟ افرضي انه في اشي ضروري انا اعرف فيه مثلا ؟
سيرين : صدقيني في اشي اسئلتها مو طبيعية، ولاحظت عليها كمان مبارح بالقعدة عند دار خالتو لما اجينا نودعك
ياسمين : روحي حققي معها بدل ما توجعي راسي ببنت حماي وقصصها
سيرين : لا تخافي عليي، اصبري بس افضالها
_________________________________
مها : كيفك ؟
منى : الحمدلله، شو اخباركم انتوا ؟
مها : تمام مبسوطين
منى : الله يبسطكم ويبسطنا جميعا، طمنيني كيف وضعك ان شاءالله مو تعبانة ؟
مها : لا الحمدلله كل شي تمام، شو بتعملي ؟
منى : والله قاعدة بستنى بامجد يرجع عالبيت ويجيبلي اغراض الطبخة
مها : تفضلوا عنا بالله عليكي
منى : يزيد فضلك، بنيجي ان شاءالله
مها : اهلا وسهلا باي وقت، شو كنت بدي اسالك صحيح
منى : تفضلي
مها : عندك علم وين دار احمد بدهم يسكنوا بهالايام اللي رح يقعدها ؟
منى : ليه ما حكتلك امي انه رح يقعدوا عندهم ؟
مها : والله ! لا ما حدا حكالنا يلا طمنتيني امي بتدير بالها عليهم
منى : اه هههه حبيبها حمادة، وابوي ضل وراه وما خلاه يستاجر شقة
مها : الله يطول عمرهم، مشتاقينله مهمة بدهم اياه يضل حواليهم
منى : ستي كل البيوت على حسابهم، وين ما بحبوا يقعدوا
مها : بصير هيثم يطقس على اهلي ويعمل حاله غيران هلا
منى : هههههه بطلعله يغار
مها : لاحظتي رانيا مبارح ما كانت على بعضها
منى : يمكن عشان آدم مع زينة، بتقلي ام عدي كل ما يروح عندها بتصير هيك
مها : يا رب تريحنا من زينة وسيرتها يا قادر يا كريم
منى : بتضلها ام الولد، الله ما يحرم حدا من ضناه
مها : … امين، اخ شو بدنا نحكي واقع ومجبورين عليه
منى : عند ربك ما بضيع اشي، ديري بالك على حالك واي اشي بتحتاجيه كلنا معاكي والله اولادي بس بدهم طلب منك
مها : ما يحرمني لا منك ولا منهم، صحيح ما لقيتي خاتم اسيل ؟
منى : لا والله دورنا عليه اليوم وهيني بدور، ماشاءالله عليها كبرت مرة وحدة الله يحميها متل القمر كانت بالحفلة
مها : تسلمي، ويحميلك آيات وتشوفيها احلى عروس عاجل غير اجل يارب
منى : الله يسمع منك، مع اني شايفتها مو سائلة عن هالموضوع والتهت بالشغل
مها : احسن مو كويس التفكير خلص عالتساهيل الواحد يترك الامور
منى : معك حق
مها : يلا سلمي عليهم كلهم، طولت عليكي
منى : الله يسلمك، بسيطة منا قاعدة بستنى بالافندي
_________________________________
عمر : يلا ما بدك تقوم ؟
قصي : قاعدين هينا ، مالكم !
امجد : أم…
عمر ( قاطعه ) : عمتي بدها اغراض تطبخ وتاخر عليها وانا جاي بسيارته
امجد ( عيونه على قصي ) : حنون طول عمره، بقلك خلينا نجوزك حنين ما بترد
قصي : ههههههههاي
عمر ( بغضب ) : اذا بتفتح هالسيرة مرة ثانية بتنساني للابد، فهمت ؟
امجد ( رفع حواجبه ) : في غيرها يعني ؟
عمر ( بمسخرة ) : اذا ما عندك مانع
قصي : طولوا بالكم شباب، كنا رايقين
عمر : الله يجيبك يا طولة البال
قصي : طب اقعد احكيلك شو عاملة ياسمين مع احمد بالعرس
امجد / عمر ( باهتمام ) : شو ؟؟
قصي : يا عيني عليكم لما تروقوا، هاد يا سيدي مخليته يرقص معها وواصلة معه مرحلة الهز والخلع
عمر : وهز يا وز
امجد : لا يا رجل مستحيل احمد هيك يعمل، انا بعرفه
قصي : والله امي وديمة حكولي، بس اوعوا تجيبوا سيرة
عمر : مستحيل شو نجيب سيرة، هو هاد موضوع بنحكى فيه ههههههه
امجد : له له يا ابو حميد، مين عرف بهالموضوع كمان ؟
قصي : مو عارف، بس المهم ما يوصله انه في حدا عرف
عمر : اهئ اهئ اهئ يا حبيبي يا حمادة، اخرتك تصير نجم في ساحات الرقص الشرقي
امجد / قصي : هههههههه
_________________________________
ام عدي ( مصدومة ) : يعني رجع طلب ايدها ؟!
ام بيان : والله انصدمنا، ومحمود زعل كتير
ام عدي : صراحة الموضوع بزعل، يعني اول اشي البنت انحكى فيها والشب ابن عمتها وبيني وبينك مبين انه رايدين بعضهم
ام بيان : هو ضل فيها بيني وبينك، مهي مبينة عينك عيني انه في اشي
ام عدي : يعني متدايقة انتي ؟
ام بيان : من شو بدي اتدايق ؟ فوق ما طلب ايدها وتحمل مسؤولية
ام عدي : والله كبر بعيونا كلنا ليه الحكي يعني، اولاد ام احمد برفعوا الراس
ام بيان : اولادكم كلكهم الله يحميهم ما في واحد بعيبه اشي
ام عدي : عقبال ما تفرحي ببيان ويصير عندك احفاد ويرفعوا راسك
ام بيان : الله يسعدك، ديري بالك بس تجيبي سيرة عن اللي صار لانه ما بدنا يوصل الموضوع لامجد واهله
ام عدي : اعوذ بالله، بس انتي روقي الجو بين اخوكي وزوجك وخلوا الامور تمشي عالنصيب وبالاخر كل شي بالغصب الا الزواج
ام بيان : بصير خير يارب يهديهم، كتير معصبين لانه وعليت اصواتهم على بعض وطلعنا زعلانين
ام عدي : لا حول ولا قوة الا بالله
_________________________________
آيات : انوس بدك اشي ؟
انس : كاسة عصير لو سمحتي
منى ( اجت فجاة ) : اعمليله سندويشة معها
آيات : مع مين كنتي تحكي ؟
منى : خالتك مها بتسال وين دار احمد بدهم يسكنوا
انس : صح وين ؟
آيات : عند دار سيدي
انس : يا سلام عالدلال
منى ( بتدور بين الاغراض ) : ما مرق عليكم خاتم اسيل ؟ رجعت سالت عنه خالتك
انس ( بارتباك ) : اه ؟ كيف شكله ؟؟
منى : والله نسيت اسالها بس كانه فضة واكيد بكون بناتي وناعم متلها
انس ( لمعوا عيونه ) : اكيد
آيات ( اجت من المطبخ ) : تفضل هي الاكل، لا دورت كتير والله
انس : يسلمو، اكيد بتكون ناسيته بمكان ثاني
عمر : بدي افوت اسلم على عمتي
امجد : عمى الدبب مبارح شفتها خلص، هي الفرجة ببلاش ؟!
عمر ( بمسخرة ) : فرجتك اه بس فرجتها اكيد بتستاهل احلى بوسة مني
منى : يارب يجيبك يا امجد
آيات : هي صوت الباب فتح
امجد ( بصوت عالي ) : يا الله، يمة وينك ؟
منى : هيني فوت
عمر : السلام عليكم
آيات ( بفرح ) : عمر معه
منى ( باستغراب ) : طيب فوتي على غرفتك خلصيني
امجد : نفوت ؟
منى : تفضلوا، مالك تاخرت يمة ؟
عمر ( بسلم على عمتي ) : والله لو معي سيارتي كان انا رحت جبتلك الاغراض بس شو جابرك عالمر الامر منه
منى : ههههه حبيبي الله يرضى عليك، هو المفروض اني ما اقطع مشواره بس محتاجة
امجد : استغفر الله، يلا قوم هي شفتها واعطيتها بوسة امشي خليني اوصلك
منى : لا والله ما بطلع بدون غدا
عمر : يا حبيبتي يا عمتي ضروري تحلفي الله يسامحك شايفة ابنك مستقلع مني، بس يلا عشان حلفتي هي قعدة، وينك يا آيات هاتي بزر مطلقات
آيات : يلا اجيت، نورت المنطقة
امجد ( رفع حواجبه بصدمة ) : بوجودك والله
كانت لابسة لبس مرتب كتير ومبين عليها انه مشاني، لانه غير عن كل مرة بتكون مثلا باواعي الصلاة ..
امجد وعمتي كانوا يتطلعوا ببعض، وبراقبوا فيي وفيها ..
عمر ( عيوني عليها ) : يسعدها اخت العريس، ما حدا قدي انا تعالي اشوف
آيات : هيني اجيت، شو اخبارك ليه طاشش ؟
امجد : عشانه هامل
عمر : سامعة اخوكي الحسود
آيات : هههههه
منى ( اجت من المطبخ ) : شو حابين تتغدوا ؟
امجد : اشي بخلص بسرعة عشان عمر ما يتاخر على اهله
آيات : مال اهلك ؟
عمر ( باللبناني ) : ما فيهن بلاي
امجد : يا دلي عليهن على هيك خلفة
منى / آيات : ههههههه يقطع شركم
آيات : شو عاملين عند قصي حكتلي ديمة معجبين
عمر : ما عنا ادنى شك بانه الاخبار بتوصل بسرعة الضوء، بس اذا بتحبي بنعيد المشاهد عشانك
امجد : يا حسرتي عليهم احمد وعدي وحمزة واللي بده ينبلي بهالبلوة اللي عنا
_________________________________
كنت سامع الاصوات ببيتنا والضحك، بس عقلي مو معي بعد ما خالتي رجعت سالت عن خاتم اسيل ..
رجعت مسكته وتأملت فيه، وحلمت احلام كبيرة ما بعرف اذا بيوم من الايام رح تتحقق ..
منى : شو جاي عبالك تتغدى ؟
انس ( مفزوع ) : ماما خوفتيني
منى : يييي مو قصدي
انس : اطبخي المناسب انا حاسس حالي مو جاي عبالي اكل اليوم
منى : لا ما بصير، بس عشانك شبعان هلا، يلا رح اعمل برياني
انس : اه زاكي كثير، يسلمو
_________________________________
امجد : شوف
احمد : مين هاي ؟
امجد : اختك المصونة
احمد : مالها يعني ؟ هيها ماشاءالله عليها حلوة
امجد : بتعرف مين عنا ؟
احمد : مين ؟
امجد : عمر
احمد : ؟؟! مو فاهم وين المشكلة ؟
امجد : يا زلمة فتح مخك شوي، عمرك شفتها لابسة هيك لبس لما يجي عنا حدا من الشباب ؟
احمد : امممم لحد ما تركتكم الصيف الماضي ما كانت هيك
من كثر ما انصدمت فيها، صورتها بدون ما تنتبه وبعثت الصورة لاحمد عالواتس ..
ما سيطرت على حالي، والافكار تزاحمت في راسي بدون وعي ..
احمد : انت شو رايك ؟
امجد : انا كلها هالصحبة ما دخلت مخي، اخ منك الحق عليك من لما تركت ياسمين العيلة كلها انقلبت
احمد : وهيني رجعت لياسمين، يلا فرجيني شطارتك
امجد : شطارة شو ؟ لا يصلح العطار ما افسده الدهر
_________________________________
كان قاعد جنبي بس عقله مو معه، ما بعرف مين كان يحكي معه وانقلب مزاجه بعد ما ترك الموبايل من ايده وبدا يدخن، وراح لعالم آخر ..
ياسمين : حبيبي
احمد : …
حتى ما عم يسمعني، قمت من مكاني، قعدت جنبه واخدت الموبايل بطريقة عفوية وانسحبت من المكان ..
فتحت على محادثات الواتس بسرعة، كانت اخر محادثة مع امجد ..
احمد ( بنبرة حادة ) : ياااسمين !
ياسمين ( برجفة واضحة ) : ن ن نعم
احمد : وين موبايلي ؟
ياسمين : م ما بعرف، هلا بشوفلك اياه
رميت الموبايل على سرير الغرفة بطريقة عفوية، كنا لسا عم نتجهز بدنا نطلع مشوار مع الجروب ..
ياسمين : هيو حبيبي لقيته، يلا انا جاهزة
احمد : … شكرا، امشي تاخرنا
محراك الشر امجد، ما رح اسمحلك تتدخل بحياة آيات شو ما كانت حجتك ..
هلا صار خايف عليها، ونسي حاله كيف كان يحبي ورا بيان متل الولد الصغير ومو سائل لا عن اخت ولا عن حدا ..
_________________________________
ياسمين : وينك ؟
قصي : هلا، هيني بمكاني
ياسمين : اسمعني منيح قصي ما معي وقت، احكي لعمر يتجنب آيات عالاخر هالفترة ويطنشها قد ما يقدر حتى لو هي حكت معه
قصي ( مصدوم ) : ليه ؟ عامل اشي معها ؟
ياسمين : افهم عليي، اخوانها شاكين انه في اشي بينهم والموضوع مرفوض بالنسبة الهم
قصي : وانتي كيف عرفتي بهالحكي كله ؟
ياسمين : يعني انا كزابة مثلا ؟ قصي يا اما بتساعد آيات يا اما بتنسحب وانا بلاقي غيرك يساعدها
قصي : … ماشي
حاولت قد ما اقدر امسك اعصابي لما سمعت عن عمر وآيات وشو بفكروا اخوانها، ولو ياسمين مو حاسة انه الوضع خطير ما كانت قدمت مساعدة ..
قصي : الو عمر
عمر : يا هلا، لحقت تشتاقلي ؟
قصي : انت وين ؟
عمر : رجعت مع امجد على بيتهم
قصي : طيب روح على بيتك او تعال عندي، المهم ما اتضل هناك ولا ثانية
عمر : ما فهمت ؟ لشو كل هالحكي
قصي : بس اشوفك بفهمك، ياسمين بعثتلي كلام صعب اشرحلك اياه عالتلفون
عمر : ماشي ماشي هسة بشوف شو بقدر اعمل، يلا سلام
الحمدلله قدر يفهم عليي ويرتب المكالمة حتى ما يحسس اللي حواليه باشي ..
_________________________________
عمر : عمتي اذا بعدك ما طبختي لا تحسبي حسابي
منى : يووه، ليه ؟
آيات : لا عمر خليك
امجد : …
عمر : سامحيني بس اجاني شغل ضروري، ان شاءالله بنعوضها بيوم ثاني، يلا سلام
الجميع : مع السلامة
معقول امجد مو حابب جيتي لعنده، وقصي حاسس عليه مشان هيك طلب مني اروح ؟! ..
لو ما كان هيك ليه ما شد عليي اضل ؟، يا ترى شو قصة ياسمين وقصي وشو صاير ؟ ..
عمر : اه قصي هيني طلعت من عندهم، بدي اخذ تكسي واروح على بيتنا اذا بتحب تيجي تعال
قصي : لا ديمة لحالها بالبيت ما بقدر اتركها، المهم يا عمر خلاصة الكلام انك تتجنب آيات قد ما تقدر
عمر : آيات ؟؟!
قصي : اه، واضح انها عم تنسى حالها معك وهالاشي مو عاجب اهلها
عمر ( بهز براسي ) : فهمت، يلا بصير خير، شكرا قصي حبيبي
قصي : العفو، ما بدي الا تكون مبسوط
كل شي توقعته الا تكون آيات الها علاقة، شو اللي عم يصير معها ؟ ..
يا رب يا آيات تكوني من نصيبي بيوم من الايام، ورح اعمل المستحيل اذا اكتشفت انك بتحبيني ..
_________________________________
احمد : شو جاب تلفوني عالسرير ؟ بتذكر كان على الطاولة محل ما كنت قاعد
ياسمين ( بارتباك ) : انا ما بعرف، كنت اجهز حالي وما انتبهت عليه
احمد ( مو مصدق ) : والله ! مو انتي كنتي قاعدة قبالي واجيتي جنبي وبعدين اخدتيه ؟
ياسمين : انا ؟
احمد : … خلص انسي، بس حاولي ما تعيدي هالحركات، مو اني اعطيتك الرقم السري تقضيها تنبشي فيه
ياسمين ( بصوت مخنوق ) : الله يسامحك حياتي هيك يعني ؟ خلص غيره للرقم ما بدي تحكيلي اياه
اوقات النسوان بحشروا حالهم بقصص ما بتكون لسا اكتملت ملامحها، وبستبقوا الاحداث ..
وانا ما كنت حابب ياسمين تشوف كلام امجد، حتى ما تتسرع بالحكم علينا وتفكرنا خانقين اختنا، وما بنحب تكون مبسوطة بحياتها ..
بس للاسف ياسمين وبعرفها، اكيد شافت واكيد صارت راسمة خطط ويمكن بدات تنفذ فيهم ..
الله يسترنا منك ياسمين، ما بتعرفي انه ما بدي اشي الا اني اشوف اختي مرتاحة بحياتها ومع شخص يحبها ويقدرها ..
_________________________________
انقهرت كتير لما طلع، وحسيت كاني مخنوقة وما عم اقدر اتنفس منيح ..
كنت مبسوطة بقعدته والكلام معه، يمكن تعودت على وجوده بحياتي وبحس بشعور غريب لما يكون يتأمل فيي، كأنه عم يوصلي كلام بعيونه بس لحد هلا ما قدرت افهمه ..
المهم اني برتاح لنظراته، ووجوده ..
منى : قومي ساعديني مالك قاعدة ؟
آيات ( مزعوجة ) : يلا جاي
امجد ( بنبرة مسخرة ) : خليها تغير لبستها اول احسن ما يتوسخوا من المطبخ
آيات ( بتقلد صوته بمسخرة ) : اتطمن رح اغيرها اكيد، مع انه حاسستك كتير مبسوط فيها وما قمت عيونك عني
منى : استغفر الله العظيم، بكفي عاد انت واياها كل واحد واقف للتاني على نكشة
امجد ( مو عاجبه ) : بفرجها الله فيكي، والله لاربيكي من اول وجديد ولسانك هاد بدي اخليكي بايدك تقصيه
آيات : نعم ؟ سامعة ماما
منى : …
بس امجد انقلب فجاة عليي وحتى مع عمر متغير، وما بحس انه بوثق فيه متل زمان ..
بس انا كيف بدي اهدي الامور بينهم، لانه هالاشي مو لمصلحتي ..
كنت مفكرة بالبداية انه امجد مستحيل تتغير نظرته لعمر، بس بعد ما صرنا صحاب وانضميت لشلّتهم، معاملته اختلفت خصوصا لما يكون ببيتنا ..
_________________________________
ديمة : قصي ؟
قصي : …
ديمة : والله ؟ شو متخانق انت وسعادتك
قصي : لا لا ابدا
ديمة : احكيلي صاير معك مشكلة طيب ؟
قصي : لا ما في اشي، خلص يلا بدنا نتغدى بدها تيجي امي ولا شو ؟
ديمة : استنى بابا كمان شوي برجع وبنتغدى سوا، وامك اتركها عند بنتها
سيرين : شو القصة ؟
ديمة : ما بعرف، سمعته بحكي مع عمر بقله اطلع من عندهم ضروري
سيرين : الله اكبر ! شو ممكن يكون صاير يعني ؟
ديمة : بيني وبينك انا مو مرتاحة لآيات، خايفة تكون عم تخبص بحياتها واهلها اكيد حاسين عليها
سيرين : يا حبيبي على هالخبريات، ولك العيلة خربت عالآخر
ديمة : الله يهدي البال، اهم اشي نتطمن على ريم وعلاء يارب امورهم تكون منيحة والباقي بهون
سيرين : معك حق، حبيبتي ريم ما بتستاهل اللي بعمله اخوي فيها والله يا ديمة انه احنا واقفين بصفها
ديمة : اهم شي نكون مع الحق، برضو كل واحد فينا عنده سيئات وحسنات يعني مو معقول كل الحق على طرف واحد
سيرين : جايينا الدور حبيبتي، مفكرة في حدا قليل يعني ؟
ديمة : يييي لا تزكريني، لنشوف ياسمين شو رح يعمل فيها احمد
سيرين : لا من غير شر، يارب ايامهم عسل تكون ويهدي بالهم
_________________________________
ام عدي : وينك يمة تأخرت
عمر : … هي رجعت
ام عدي : كانك مو مبسوط ؟ وين كاين يا حبيبي
عمر : يمة مشان الله لا تنقي ما فيي اشي احلفلك عشان تصدقي ؟
ام عدي : … خلص اسفة
عمر ( استدرك حاله ) : انا اللي آسف، سامحيني بس مزعوج شوي، خلص فايت على غرفتي
غنى ( اجت فجاة ) : عمر، ليه اصواتكم طالعة ؟
ام عدي : لا عادي بنحكي، اعملي فنجان قهوة لاخوكي
عمر : لا ما بدي اشي، لما يجهز الغدا احكولي
اول مرة بشوف عمر بهالمزاج، كان وجهه مو مرتاح ابدا وكانه حدا خانقه ..
وامي كمان لاحظت عليه، وضلت عيونها تراقبه لحد ما اختفى من قدامها ..
غنى : شو قصته ابنك اليوم ؟
ام عدي : الله اعلم، والله ما في حدا مرتاح
غنى : حاولي ما تبيني قدام بابا اشي لانه ما بحب يشوفه هيك
ام عدي : ابوكي يا دوب ملحق على عرس اخوكي وتجهيزاته
غنى : الله يتمم على خير
_________________________________
هيثم : اهلا اهلا والله شو هالمفاجاة الحلوة
ام حمزة : هلا فيك الله يرضى عليك ويسعدك، لا تآخذنا بس قلقت على رانيا وينها ؟
هيثم : هههه معك حق، تفضلي هيها بغرفة النوم
رانيا ( اجت فجاة ) : ماما ؟ رزان ؟
رزان : تخيلي ههههه
ام حمزة : طمنيني عنك يا حبيبتي، مال وجهك هيك اصفر ومو على بعضك ؟
رانيا ( عيونها على هيثم ) : والله اخدت برد من اول مبارح وفلوزت
رزان : طيب وين آدم من غير شر ؟
هيثم : عند امه من اول مبارح
ام حمزة : وانت معطل ؟
رانيا : هههه شوي شوي علينا، شو اعمللكم ؟
رزان : اقعدي انا بعمل، ما احنا مشتاقين وانتي اختفيتي مو متعودين على غيابك
هيثم : هههههه والله زمان عنكم، انا مو معطل بس بتهرب شوي عشان دلوعتي بحاجتي هالفترة
ام حمزة : دلوعتك هههه خاف الله بنت ١٩
هيثم ( قعد جنبي وضمني ) : شو ما كانت بتضل حبيبتي ودلوعتي
رانيا ( بخجل ) : تسلملي يارب حبيبي
رزان : يلا ان شاءالله بتتحسني قبل الاعراس، ما بدي احكي عرس لانه ماشاءالله انتوا مو ملحقين
هيثم : ان شاءالله بنختمها بعرسك يارب، والله كثير ناس بسالوا عنك بتقلي امي، ونهى اعطت رقم خالتي لاكثر من وحدة
رزان ( بغرور ) : ان شاءالله يكونوا كويسين
ام حمزة : الله يبيض بخت جميع البنات
الحمدلله مرقت هالزيارة على خير، وقدرت اخبي خبر الحمل عنهم ..
_________________________________
ابو قصي ( حامل سلمى ) : يا سيدو يا حلوة انتي، ماشاءالله عليكي كبرانة
علاء : والله اهلين بعمي، اشتاقتلك سوسو
ابو قصي : وانا اشتقتلها اكثر، اصبر عليي شوي لما تخلص ريم نفاس ما بروح من عندكم
ريم : ههههه حبيبي بابا اهلا وسهلا فيك
سهى : والله وسمعناك بتلعب اولاد صغار
ابو قصي : من يوم وطالع بدنا نتدرب، الله يكثر الاحفاد
علاء : امين يارب
سهى : انبسطت انك اجيت
ابو قصي : بدي اشوف شو قصتهم، والله طول الوقت بفكر بهالبنت
سهى : الله يهديهم، اليوم ما كان منيح بس اجيت وشوي شوي تغير مزاجه الحمدلله
ابو قصي : يا ستير لهالدرجة ريم زاعجته ؟
سهى : الله اعلم، على ذمتها ما عملت اشي غلط
ديمة : طولتوا
سهى : اجا ابوكي وسهر مع علاء
قصي : كيف سوسو وريم ؟ نفسي امرق عليهم بس والله مستحي
ابو قصي : روح يابا هاي اختك حبيبتك وبنت اختك والله مثل القمر، بتشبه ديمة بصغرها
ديمة ( بفرح ) : الله على هالخبرية، انا كيف رح انام الليلة، استنى بابا عيد كلامك خليني اسجله واسمعه لعدي
سهى : هههههه وقعت بلسانها
ابو قصي : الله يجبر عليه هالشب، قربت نهايته
قصي : العد التنازلي بمشي بسرعة
ديمة : احكوا اللي بدكم اياه المهم سوسو بتشبهني