الحلقة التاسعة عشرة ١

عندما تتذوق الصعوبات في حياتك ..

يصبح عقلك اكبر من عمرك بكثير ..

فكل أذى هو مستوى جديد من النضج ..

من لا يتألم لا يتعلم ..

 

____________

__________

 

ابو قصي : الله يرضى عليك يا ابني، تصبحوا على خير

علاء / ريم : وانتوا بخير

سهى : نراكم ان شاءالله، حاولي نيمي بنتك ماما

علاء : ههههه اكبر حلم بحلم فيه في الوقت الحالي انها تنام لانه حاسس حالي رح اغفى على باب البيت

ريم : طيب يلا خلينا نلحق نفوتك على البيت ههههه

قصي : ههههه يلا سلام

 

ما لحقت اوصل بيتنا واصف سيارتي، الا تلفوني برن ..

 

علاء ( مستغرب ) : هاي امي !

ريم : طيب رد شو بتستنى

علاء ( بهز راسي ) : احم .. اه يا امي

نهى : اسفة عالازعاج، بس ازا ما وصلت البيت تعال عنا

علاء ( بقلق ) : انتوا بخير ؟

نهى : … لا، تعال هيني بستناك

ريم ( بخوف ) : قلبي هبط برجليي يا علاء بسرعة روح

علاء ( ماسك حالي بالعافية ) : طيب شورايك تنزلي انتي وسلمى، وانا اذا تاخرت بطلع من عندهم على دوامي

ريم : رجعني عند اهلي بطريقك

علاء : … ماشي، بس لا تجيبي سيرة اشي

 

مع اني كنت خايف من خالتي تقلق بدون ما نعرف لسا شو الموضوع، بس بضل قلبي متطمن على عيلتي ..

 

////

 

سيرين ( رفعت راسي المدفون بين رجليي ) : شو حكالك ؟

نهى ( بصوت مخنوق ) : هيو جاي، يمكن ريم تيجي معه

سيرين : عادي تيجي

نهى : بعرف عادي، بس قصدي انه الظاهر بعدهم ما وصلوا البيت، خليني اشوف ابوكي

 

ابو علاء ( معصب ) : خليكي عند بنتك ليه تيجي عندي ؟

نهى ( بتحاول تكون هادية ) : الله يسامحك، ليه انا بقدر اتخلى عنك ؟ او بوقف بصف حدا ضد حدا ؟

ابو علاء : … لنشوف

نهى ( مسكت ايده ) : اهدى، كل اشي بنحل بس بالرواق، والله بخاف يصيرلك اشي لا سمح الله وقتها ما بنفعنا لا حمزة ولا غيره

ابو علاء : … لا تخافي انا منيح

 

////

 

سهى ( متفاجاة ) : ريم !!

ريم ( مبتسمة ) : عادي انام عندكم اليوم ؟

ابو قصي ( بقلق ) : خير خير بابا ان شاءالله اموركم تمام ؟

ريم : ههههه الحمدلله كله تمام، بس راح عند اهله

قصي ( باهتمام ) : سيرين منيحة ؟

ريم ( بحزن ) : صراحة ما بعرف، بس انتوا خلص لا تقلقوا

سهى : نشفتي دمنا قال لا تقلقوا، فوتي نيمي هالبنت يا ويلي عليها عيونها رح يطلعوا من النعس

قصي : هههههه منيح ما اجا امجد ينام عنا اليوم

ريم : هههههه تخيل

ابو قصي : ارتاحي يا حبيبتي وبوصلك انا الصبح عالمدرسة

ريم : يسلمو بابا

 

////

 

منى : مال آيات وعمر كانهم ما بحكوا مع بعض ؟

انس ( بلعت ريقي ) : لا لا .. عادي قصدي

منى ( زورتني ) : شو اللي عادي ؟ مبين عليهم احكيلي شو صاير بينهم ؟

انس ( مسكت ايدها ) : يمة شو بدك بهالقصص، انسي كل اشي وارتاحي والله ما في اشي محرز تفكري فيه

منى ( بتلمس وجهي بايدها ) : يا حبيبي، الله يريح بالك ويوفقك ويطمن بالي عليك قبل ما اموت

انس ( نزلوا دموعي ) : تموتي ؟ من غير شر عنك شو جاب هالسيرة هسة ؟

ابو احمد ( اجا فجاة ) : نمتي … مالكم ؟ انتي منيحة ؟

منى ( بتمسح دموعي ) : الحمدلله، لا تخاف يلا هيني بدي انام وانت ماما ارتاح بكرا عندك دوام من الصبح

انس : …

ابو احمد ( بربت على كتفي وبمزح ) : متى رح تكبر يا ولد ؟ خلص صرت دكتور ولساتك بتعيط على امك

منى : حبيبي انوس، الحق عليي انا بكيته

ابو احمد : الله يعيني عليكي، بكفي احمد زهقنا اسئلة

 

////

 

عمر : بحكي معك ليه ما بتردي ؟

آيات : …

عمر ( بدا يعصب ) : بس احكي معك بتطلعي فيي وبتجاوبي

آيات ( لافة وجهي عنه ) : ما بدي اجاوب ولا بدي تحكي معي

عمر : والله ! ( مسك وجهي ولفه ) اتطلعي عليي

آيات ( نزلت ايده بقوة ) : اوعى تلمسني، الكلام انتهى عمر اللي عندي حكتلك اياه قدام الكل روح فكر على مهلك واعرف ليه انا زعلانة

عمر ( صغر عيونه ) : قدام الكل ؟ كثير شاطرة لانك

آيات : اه شاطرة طبعا، واشطر منك بمراااحل

عمر ( رفع حواجبه ) : ماشاءالله نيالي، طيب يا شاطرة انا رايح هسة ولما اخلص تفكير بنبقى نتواصل

 

ما اهتميت لكلامه، وضليت قاعدة بمحلي وحاطة رجل على رجل وبمرجح رجلي، وهو طلع من البيت وعينه عليي ..

 

امجد : ما ابيخك

آيات : مو ابيخ منك ومن صاحبك

امجد : بس تكوني غلطانة بصير صاحبي وببطل خطيبك سبحان الله

آيات : هيهيهي

 

طنشت تعليقاته وكملت طريقي لغرفتي حتى اغير ملابسي وارجع اشوف امي؛ اللي اكيد عقلها عندي انا وعمر، والف تساؤل في نظراتها النا ..

 

___________

_________

 

عمر : الله يقدرني واسد باقي الديون بسهولة مثل ما تيسرت فلوسك يا عمي

ابو بيان : امين، وهيني برجع اذكرك باي وقت بدك خذ  وكلنا ايدنا بايدك

ابو عدي : ما قصرتوا، ربنا يرزقك ويوسعها عليك يا ابني ويرضى عليك وعلى اخوتك

آيات : امين خالو، ضلك ارضى عليه وما بدنا اشي، وهي انا ايدي بايده وان شاءالله ما بنحتاح حدا

ام بيان : …

ابو احمد : وهون بيجي دور الزوجة ومعدنها ببان بهيك ظروف

عمر : بس انا بدي اياها تترك الشغل بعد العرس

آيات ( بصدمة ) : ليه ؟

عمر : عشان انا هيك بدي، وسكري عالموضوع هسة

آيات ( عصبت ) : شو انت هيك بدك ؟ انا ما عندي راي ولا شخصية يعني

امجد ( بنبرة حادة ) : آيات !

عدي : لا صح كلامها، مثل ما هو قرر انه يعتبر الفلوس دين وبده يسدهم باول حياته، هي من حقها انه  تعمل اللي بناسبها كمان

عمر ( بلع ريقه وعيونه عليي ) : انا بس فترة ما اسد الديون بعدين بخليها تشتغل مثل ما بدها

ابو احمد : بس هيك انت بتظلم حالك، شايف كيف المعيشة غالية ويادوب راتبك يكفي ما فيها اشي لو تساعدتوا

ام بيان : هو حط على حاله كل هالديون مشانها، لازم تساعده اصلا

عمر : وانا مسامحها بهالمساعدة، شكرا لآراؤكم غلبناكم معنا

آيات ( مقهورة ) : …

ياسمين ( ماسكة ايدي بتهديني ) : انا برايي تتركوا الامور عالتساهيل، وبينك وبين خطيبتك بتتفق

ابو احمد : صحيح

هيثم : شادد على حالك زيادة عن اللزوم والله يا عمي، الحياة ابسط من هيك، واسمها شريكة حياتك يعني بكل اشي انتوا متشاركين

عمر ( بانفعال ) : الا هاد الموضوع، مستحيل اخليها تتحمل اي قرش، انا المسؤول وبسسسس، ولو سمحتوا ما حدا يرجع يناقشني

علاء : سكتنا، خذلك هالسيجارة هدي ابو الشباب

آيات : يسلمو، ما بدخن

عمر : صرتي ابو الشباب حضرتك ؟

آيات ( ضاربة بوز ) : انا واياك واحد

علاء : ههههه اول مرة اشوف آيات هيك، شو عامل فيها وله ؟ تاثيرك قوي

عمر : هيك اشي

قصي : الله يسامحكم، هيك طلعتوه عن موده

امجد : هسة بغنيله شوي برجع للوضع الطبيعي

البنات : انت بالذات لا تغني

عمر : ههههههههههه ليه ؟

امجد : ها شفتوا، طلع تاثيري اقوى ولا لا يا علاء ؟

علاء : اه ماشاءالله عليك، منور المنطقة

الجميع : هههههههه

 

___________

_________

 

انس : امي بتسال عنكم، بدك تحكيليها اشي ؟

آيات : اشي متل شو ؟

انس : قصدي عنك وعن عمر، شو مالك !!

آيات : عادي خليها تعرف عن كلامه، بس مو ضروري تكبروا القصة وتبينوا انه في مشكلة

انس : يعني تصالحتوا ؟

آيات : … خلص انس ما بعرف، يلا رايحة اشوف ماما قبل ما تنام

انس : طيب

 

منى : لساتك صاحية ؟

آيات : انا ولا انتي ؟

منى : مال وجهك ؟ في حدا مزعلك

ابو احمد : …

آيات : لا تعبانة شوي بكرا رح اعطل عشان اضل معك

منى : والله منيحة ماما ما في داعي، الا ازا تعبانة وحابة تعطلي

ابو احمد : لا خليها معك، بنتطمن اكثر

منى : طيب متل ما بدكم، زمان ما افطرت معك على رواق

آيات ( مبتسمة ) : اه والله، يلا معناها تصبحوا على خير

 

////

 

علاء : السلام عليكم

نهى : وعليكم السلام، سامحني ماما ازعجتك بوق..

علاء ( قاطعتها ) : شو صاير ؟ نشفتي دمي من منظرك

نهى : اختك

علاء ( بقلق ) : مالها

ابو علاء ( اجا فجاة ) : ما بدها تتطلق

 

انصدمت بكلام اهلي عن سيرين، والمستجدات الفجائية اللي صارت اليوم معها ..

 

علاء ( بحاول احافظ على هدوئي ) : شو اللي صار اليوم بالذات حتى تغيري رايك ؟

سيرين : … مو ضروري يكون صاير اشي، بالنهاية انا ما بدي اخرب بيتي

علاء ( بضرب الطاولة بعصبية ) : ولك اي بيت ؟ مو انتي حكيتي ما بدك تشوفيه، وما بدك اياااه

 

كانت موجوعة وجرح قلبها عميق، حسيت فيها بس ما قدرت الا اني اذكرها بقرارها قبل اقل من شهرين ..

 

سيرين ( بترجف ) : بس .. بس انا .. أ أنا بحب…

علاء ( قاطعتها ) : وليه هيك صار بينكم ؟ وين محبتك اله لما ضربك ؟ نسي انك كنت تدعي ليل نهار تلتقي فيه ؟

سيرين ( بتبكي ) : ساعة شيطان انا متاكدة، لانه بنفس اللحظة تغير ورجع لطبيعته

نهى ( منهارة ) : …

 

ما كنت عارف مين اللي وجعها اكبر، امي اللي خايفة على بنتها الوحيدة وشافتها باصعب الظروف ومع ذلك ما بدها خراب بيتها ..

ولا دموع اختي اللي بتجرح وجهها وبتحرقه من حرارتها، على حبها اللي بتحاول تتمسك فيه وتدعس على كرامتها مشانه ..

 

علاء ( اخذت نفس ) : سيرين انا عارف وفاهم كل اشي بتفكري فيه، بس احنا صعب نتقبل رجوعك بهالبساطة، ابوكي رافض تماما الفكرة وقلبه مو متطمن من ناحيتهم

سيرين ( مسحت دموعها باصرار ) : اكيد ما رح ارجع الا بشروط فكرت فيهم كتير منيح، ما تخافوا عليي مو لهالدرجة انا غبية وبفكر بقلبي بس

نهى : شو همة ؟

 

تغيرت نفسيتها لمجرد انها حست بشوية امل لرجوعها اله، تركتها مع حالها وتسطحت على تختي ..

ما اجاني نوم بهالليلة، وكل ما اغمض عيوني اتذكر الماضي واحساس الذنب ما فارقني ..

 

////

 

ريم : شو الاخبار ؟

علاء ( تنهد ) : مو منيحة، بدها ترجعله

ريم ( شعور مختلط ) : جد ؟

علاء : كسرت قلب ابوي عليها، انا خايف عليه كثير

ريم : لا من غير شر عنه، اكيد ما بهونلها فيه ورح ترضيه

علاء : ان شاءالله

ريم ( بفضول ) : وانت شو رايك ؟ موافق

علاء : … ما بعرف، صدقيني صعب القرار

ريم : علاء حبيبي، برجع ازكرك انه هاي حياتها الخاصة، وبالنهاية لو ما كان في بيبي بالموضوع كان ضلت القصة بينهم وما حدا عرف فيها، مو اول زلمة بضرب مرته

علاء : يعني عادي يضربها ؟

ريم : اكيد لا، بس المشاكل الزوحية ما بتنتهي ازا صار في تدخلات خارجية

علاء : صحيح .. كمان الخيانة صعبة اكثر من الضرب وانتي كلامك عن تجربة

ريم : … انا ما حكيت هيك عشان افتح ماضينا احنا سكرناه وانتهى

علاء : انتهى لانه ضل بيناتنا تقريبا

ريم : برضو انا ندمانة اني حكيت لرانيا وما حسبت حساب انه حمزة زوج اختك، وحملت خطية سيرين انها انحرمت من اهلها بسبب عدم مقدرتكم على المواجهة بهديك الفترة

علاء : … ستي، الله يجيب العواقب سليمة

ريم : امين، يلا تصبح على خير

علاء : وانتي بخير

 

////

 

تاكدت انها غفيت، وفتحت موبايلها ..

كان عندي فضول اعرف شو اللي كانت مشغولة فيه، لما اجيت اخذتها من عند مها وانادي عليها وما ترد ..

 

حمزة : بكل جدارة قدرت امسك ايدها، كانت ماشية جنب ابوها ومرقت ومديت ايدي بسرعة شبكنا اصابعنا لمدة ثواني بعد غياب شهر يا رانيا، متخيلة !

رانيا ( بدهشة ) : ابوها ما شافكم ؟ وهية عادي استجابتلك ؟

حمزة : صدقيني ما بهمني ابوها، بس اللي قهرني هية بعدت حالها بسرعة وكاني حدا غريب عنها

 

ضليت اقرا بهالجملتين اكثر من عشر مرات حتى قدرت استوعب اللي عمله، سكرت موبايلها ورجعته لمكانه ..

 

هيثم : الو مسا الخير

سيرين ( بصوت مخنوق ) : مسا النور، اهلين خالو

هيثم : ازعجتك ؟

سيرين : لا عادي صاحية

هيثم : انتي منيحة حبيبتي ؟ صوتك مو طالع

سيرين ( بدات تبكي ) : …

هيثم : وقفي، بكفيكي لهون انا حسيت انك مو بخير وحكيت معك

سيرين ( بقهر ) : ليه هيك صار معي ؟ شو ذنبي خالو بس فهمني انا بشو غلطت لحتى انحرم من حمزة ومن اني اكون ام لاولادنا انا واياه، انا بحبه كتير وكنت اعمل كل اشي مشان ارضي اهله، بس للاسف ما الي حظ

هيثم ( بغصة ) : ما بستاهلوكي، الله يبعثلك نصيب احسن منه

سيرين ( مصدومة ) : بس انا ما بفكر في الانفصال

 

انا كنت بدي اوصل لهون، ومتاكد انه اللي عمله حمزة اليوم هو سبب كلامها هاد ..

 

هيثم : لا تخلي الحب يدمرك، مو لهالدرجة اتضحي بحالك اهلك ما رح يسامحوه بهالسهولة

سيرين : بس اخرتهم يسامحوه، حمزة انا بعرفه مستحيل يعمل هيك فيي لولا حدا ماثر عليه، وبوعدك خالو رح اكشف هالسر

هيثم : ما انتي عارفة انها امه

سيرين : لا لا خالتو كتير بتحبني وبعرف انها ما بتريد لاولادها خراب البيت، في اشي اعمق من هيك

هيثم : … مو بعيد، طيب بشو بقدر اساعدك انا ؟

سيرين : حبيبي خالو رح اطلب منك المساعدة وقت ما بحتاجها، ما يحرمني منك

 

كانت مكالمة صعبة ومهمة بيني وبينها؛ حتى اعرف قلبها شو صار فيه بعد اقل من شهرين ..

المشاكل اولها بتكون نار وبتحرق كل اشي حواليها،  ولما تبرد ما حدا بقدر يرمم الرماد اللي تركته ..

 

////

 

اتخذت قراري بالرجعة، بس الرجوع رح يكون حتى ابني حياة جديدة واهدافها مرسومة، لانه زمان اول حول ..

 

حمزة : سيرين !

سيرين ( بجمود ) : ان شاءالله ما اكون ازعجتك

حمزة : انا ما بنزعج منك انتي بتعرفي، بس كيف خطرنا على بالك ؟

سيرين : سيبنا من هالكلام وخلينا بالمفيد

حمزة ( تنهد ) : بتؤمري، شو المفيد ؟

سيرين : مصير زواجنا

حمزة ( انفعل ) : بايدك

سيرين ( بهدوء ) : تمام، اكيد بتعرف انه اهلي ناويين يطلقوني

حمزة ( قاطعني ) : على جثتي، مستحييييل اوافق انا بدي اياكي متمسك فيكي سيرين انا بحبك …

سيرين ( قاطعته ) : كلام الحب هلا ما بنفعني، انا كمان ما بدي اخرب بيتي، ورح اعتبر اللي صار محنة ومرقت علينا، بس عندي شروط للرجعة

حمزة ( برجاء ) : حكتلك من البداية حطي الشروط اللي بدك اياها وما عندي مانع، المهم نرجع لبعض وبوعدك كل اشي يتغير

سيرين ( بدهاء ) : اوك، رح احكي اللي عندي وانت فكر على مهلك

 

كتبتله شروطي وودعته ..

بعرف انها شروط تعجيزية، واحتفظت فيها لنفسي وما حكيتها لاهلي ..

حابة اشوف ردة فعل حمزة الها، وشو ممكن يعمل مشاني ؟ ..

 

////

 

وصلنا البيت، وما كان الي نفس لاي اشي ..

نظراته غريبة، ومزاجه معكر وما برد عليي باي كلمة ..

 

ديمة : تصبح على خير

عدي : …

 

انخنقت من اسلوبه، وما اجاني نوم من كتر التفكير ..

كيف ممكن اتغير حتى تنتهي هالمشاكل بيناتنا ؟ ..

قعدت على الكنباية في صالة القعدة، مديت رجليي التعبانات والمتنفخات من الحمل ..

 

////

 

حسيت فيها لما انسحبت من جنبي، لحقتها بدون ما تحس وتاملتها بالعتمة المكسورة بنور الاباجورة الخافت ..

كنت مفكر رح تفهم عليي، وتعرف تتعامل معي بعد كل هالفترة بيناتنا ..

بس ديمة الظاهر انها صعب تتغير، ولسا تفكيرها محدود وخارج اطار العلاقات الزوجية ..

ما قدرت اخفي زعلي لما اقترحت تنام عند اهلها، وكانه اشي عادي تترك زوجها وتعيش حياتها كانها لسا بنت مو متزوجة وما عندها مسؤوليات وواجبات ..

 

ديمة ( بتحكي مع حالها ) : لنشوف كم رح اتضلك زعلان هالمرة يا زوجي العزيز، وهي قعدة ها

 

مدت رجليها ومسكت موبايلها، وانا لسا واقف بتفرج من بعيد ..

كثير خطر ببالي اروح انكشها مثل ما بعمل دايما، بس هالمرة قاومت حالي ورجعت اجر اذيال الخيبة لغرفة النوم الباردة ..

 

////

 

ياسمين ( بحزن ) : طيب شو اعمل اكتر من هيك ؟ نفسي اخبره عن مرضها بس خايفة يزعلوا مني، وهو مُصر اني بعرف شو مخبيين اهله وبده اياني احكي

حنين : لا تخبري ولا عبالك، خلص خليه بزعل شوي وبكرا برضى لحاله

رنين : نفسي افهم شو دخلك انتي ؟

ياسمين : كانت تحكي عني، وبتطلب من الله يسامحها ويغفرلها، بس اوعوا حدا يحكي هالكلام

حنين : اتطمني ما بنحكي، المهم هو واهله يفتصلوا اول عن آخر رح يعرف متل ما عرف عن المصيبة اللي صارت معك

ياسمين : قولتك، اخرته يعرف ويرضى بالامر الواقع، نص البلد ازا مو كلها مصابين بالضغط والسكري شو الجديد يعني ؟

رنين : طبعا والعمر اله دور كمان، خالتو مو صغيرة

ياسمين : بالضبط، يا ستي الله يشفيها ويهون على عيلتها

حنين : امين

 

كان احساس الذنب ملاحقني بهالليلة العصيبة، وبعد احمد عني والحالة السيئة اللي ملازمته من وقت ما اغمي على امه، شد الحبل اكتر على رقبتي ..

سندت ظهري على مخدة، وقعدت افكر مع حالي وابحث عن نهاية معقولة لكل اللي بصير معنا ..

 

////

 

طلعت من غرفتي اشرب مي، لمحت ضو خافت من تحت باب غرفتها ..

كان الباب مو مسكر عالاخر، وقفت وراه وقدرت المحها وهية قاعدة على تختها ومنكمشة على حالها ..

شعرها الحريري الطويل كان مغطي نص جسمها، ورجفتها وهي تبكي واضحة ..

نحيبها بذكرني بصوت ريم لما كنا نتمشكل، وتكون قاعدة بهالوضعية ..

ما قدرت احكي اي كلمة معها، رجعت اكمل محاولات نومي للكم ساعة اللي ضلوا قبل ما يجي موعد دوامي بالجامعة ..

 

////

 

اول مرة من تاريخ ارتباطنا بتصير هيك مشكلة بيناتنا، وبتعاملني بهالقسوة ..

بعرف انه كلامي مو منطقي، بس اللي مو منطقي اكثر هوة اني اخليها تسد ديوني من تعبها وهية ما الها اي ذنب فيها ..

يمكن ذنبها او ذنبي كمان انه حبينا بعض، وسمحنا لعواطفنا تجتاح عقولنا، ومشينا بمغامرتنا بدون اي تفكير بالمستقبل ..

الله وحده بس بعرف التعب والشقى اللي عايش فيه، وعدد الساعات المحدود اللي بنام فيهم، ويمكن يكون معدوم في بعض الايام ..

تحدي الدخان كان اكبر من كل اشي، بهيك اوقات كانت سيجارتي رفيقتي وبدخن بدون وعي ..

اما اليوم انا انسان ثاني، والتفكير اله طعم خاص ..

 

////

 

حرام اللي بصير معي، انا ليه هون بعيد عن اهلي وعيلتي اللي بحبها ؟ ..

ليه دايما بحس انه في سر مخبينه عني، ومتكتمين عليه ؟ ..

لمتى رح يستمر هالتكتم ؟، وانا لمتى رح اضل بعيد هيك ؟ ..

كل هالاسئلة واكثر كانت محور تفكيري، وعقلي رح يجن عالاخر اذا ما عرفت اجوبتهم ..

وياسمين مثل العادة هية الضحية لسكوتي ووحدتي، وعدم مقدرتي عالفصل بين حياتي معها وعلاقتي باهلي واسرارهم اللي ما بعرف اذا ياسمين بتعرف اشي عنهم او لا ..

 

_______________________________

 

بعد مرور ١٠ ايام <<

 

حمزة ( بعصبية ) : انت بتقبل بهيك شروط ؟ احكييييييي

هيثم ( بنبرة حادة ) : لما اعمل بمرتي اللي انت عملته وقتها بقدر اجاوبك، بعدين ليه معصب ؟ مو انت حكتلها حطي الشروط اللي بدك اياها بس ارجعيلي

حمزة ( بقهر ) : بس مو هيك ! ما في زلمة بقبل بهالحكي

رانيا : طيب طيب خلص اهدوا انتوا التنين، انا برايي تروح تحكي مع اهلها واحنا بنروح معك وبنطيب خاطرها وبنتفق على شروط تانية تناسب الجميع

حمزة : انا كان قصدي مثلا تطلب تغيير في البيت او اشياء خاصة فيها انا ما كنت موافق عليها زمان، اكيد فاهمة عليي

هيثم : قصدك تسمحلها تزور خالتها اللي بينكم وبينها شاحطين درج بعد ما منعتها

حمزة ( بلع ريقه ) : …

هيثم ( متابع ) : اعمل اللي حكتلك عليه اختك لعل وعسى تقدروا تلاقوا حل وسط احسن ما انت مبسوط على الخراب اللي عملته ببيتك وتجبر قلبها بعد ما كسرتلها اياه

رانيا ( عيونها على حمزة ) : انا بحكي مع اهلي وانت حبيبي الله يخليك لازم تيجي معنا

هيثم ( بالم ) : هو المفروض ما اجي بس عشان خاطر المسكينة اللي مو عارفة شو تعمل حتى ترمم عمايل زوجها قدام اهلها

حمزة : …

رانيا : يا رب تهديكم ويصلح ذات بينكم ونشوفكم مع بعض من جديد وباحسن حال

حمزة ( تنهد ) : اميييين، الله يسمع منك يختي ويرضى عليكي

 

////

 

علاء : ما فهمت ؟

هيثم : بحكيلك بدهم يجوا يتفاهموا عالشروط اللي حطتها اختك عشان ترجع

علاء : اي شروط ؟

هيثم : ما بتعرف انها اتفقت معه على كم شغلة ؟ بس طبعا تعجيزيات هههه

علاء ( باستنكار ) : متواصلة معه يعني ؟

هيثم ( مستغرب ) : نعم ؟ علااااء شو قصتك هاد زوجها بعده واذا حردانة يعني

علاء : اتطق جوزة حلقه ان شاءالله وارتاح منه هالنذل، خلي يجي عشان اكسر رجليه واحمله اياهم

هيثم ( عصب ) : لا انا برايي انت لا تيجي، السلام عليكم

 

ريم ( بقلق ) : مالك معصب ؟ خوفتني بس رميت الموبايل

علاء : … اتركيني شوي

ريم : حاضر

______________

 

في اليوم التالي ( الخميس ) <<

 

سهى : اي ساعة موعدك ؟

ديمة : وقت ما بناسبك بنطلع

سهى : طيب خليني اكمل الطبخة وبطلع عندك على طول

ديمة : اوك بستناكي

 

عدي ( بجمود ) : اليوم موعدك عند الدكتورة صح ؟

ديمة : اه، رايحة انا وماما

عدي : …

 

النا اكتر من اسبوع على هالحال، لا هوة بادر بالحكي ولا انا نكشته ..

مليت من هالوضع ووصلت لذروتي من التحمل، نفسي افهم شو عملت حتى هيك زعل ؟ هي اول مرة بتستمر بيناتنا مشكلة كل هالفترة ..

 

////

 

نهى : عندك اشي اليوم عالستة المسا ؟

ابو علاء : لا ليه ؟

نهى : رانيا حكت معي عشان تيجي هي وهيثم ومعهم اهلها وحمزة

ابو علاء ( زورها ) : ما بدي اسمع اسمه

نهى : بس سيرين ما بدها تنفصل وحطت شروط لرجعتها، خليهم يتفاهموا وان شاءالله الماضي ما بتكرر

ابو علاء : ما بعرف .. اعملي المناسب

نهى : ازا ما بدك ما بردلهم خبر

ابو علاء : اذا هيثم جاي بستقبلهم، اما همة مو طايق اسمع سيرة اي حدا فيهم

 

كنت اسمع حوارهم وايدي على قلبي من اللي رح يصير ازا اهلي رح يستقبلوهم او لا، وشو ممكن يصير لما نتواجه ؟ واعرف راي حمزة بكلامي بعد ما اختفى كل الاسبوع الماضي على عكس عادته من لما اجيت عند اهلي، كل يوم ببعتلي وبسال عني ..

 

////

 

ياسمين : الله يجيب اللي فيه الخير

سيرين : امين … انا كتير تعبانة نفسي ارتاح، يمكن الطلاق خير الي الله اعلم

ياسمين : من غير شر عنك، ان شاءالله بترجعوا لبعض وبتعيشي الحياة اللي نفسك فيها وبنشوف على ايدك بيبي السنة الجاي

سيرين ( بحزن ) : اي بيبي هاد اللي بحلم فيه ؟ عمري ما تخيلت اعيش هيك ظروف، يا الله الزواج شو صعب

ياسمين : هههههه يرحم ايام الامتحانات

سيرين : يا ريت كل حياتنا دراسة وامتحانات اهون من اللي بنعيشه

ياسمين : ااااخ، الحمدلله .. دخلك ديمة شو اخبارها ؟ كانه مختفية

سيرين : من الهموم اللي عايشة فيها ما لاحظت، بس فعلا زمان ما بعتتلي اشي كانت كل يوم تسال عني

ياسمين : يا ريتها ريم ما جابت سيرة عزومة ولا زيارة، احنا لابقلنا بطيخ بوجهنا

سيرين : بعين الله، سامحينا ياسمين استقبلناكي بمشاكلنا

ياسمين : وانا كيف حالتي على اساس ما عندي اشي، بتصدقي احمد ما بحكي معي الا رسائل عالواتس ؟

سيرين ( مصدومة ) : اوف ! ليه ؟

ياسمين : شكله مو طايق يسمع صوتي ولا يشوفني، او بقضي وقته يحكي مع امه ويتطمن عليها

سيرين : امه ؟ كانها خالتك ياسمين صح ؟

ياسمين ( ببكي ) : … خالتي اه خالتي اللي كانت اغلى اشي عندي، اللي كانت تحن عليي وتوقف جنبي حتى ضد ابنها، بس وين هاد كله راااح ؟ فهمييييني ويييين

سيرين ( بصوت مخنوق ) : برجع انا متاكدة، انتي قربتي تصيري ام ورح تفهمي اللي عملته كتير منيح، يمكن ما تفهميه وتحكي انا مو متلها وما بعمل هيك اشي، بس كمان الكمال لله وكلنا بنغلط

ياسمين : انا تعبت من هالكلمات، كل ما اشوف حدا بالعيلة بحكيلي اياهم، هية بني ادمة بتغلط وانا ملاك لازم ما ازعل واسامح على طول، طب انا كمان بني ادمة وبزعل ويمكن من النوع اللي ما بسامح صح ؟ ولا تعودتوا على ياسمين تنسى وتسامح وتمشي وكانه شيئا لم يكن

سيرين : سامحتي احمد

ياسمين : ما طعن بشرفي، واتهمني .. احمد بطلعله اسامحه لانه خبى عليي من خوفه ومن محبته الي، ولو سمحتي سكري عالموضوع

سيرين : سكرته، وبعتزر ازا دايقتك .. ادعيلي

 

////

 

منى : هيك سمعنا

احمد : شفقان على حمزة، والله بحبها هالمسكين شو اللي صار بينهم وخلاهم يوصلوا هيك ؟

منى : والله السر عندك ومخبيه عنا، طيب احكيلي عشان اعرف ازا بستحق تشفق عليه

احمد : … انسي، شو اخبار اخواني وين ما ببينوا؟

منى : ملتهيين بدراستهم، امجد ما بنشوفه واليوم رايح عند خالتك سهى وبده ينام عند قصي

احمد : له له مسكينة يا خالتي، الله يعينها عليهم اليوم

منى : ههههه شايف، قال هية اصرت عليه

احمد : اكيد تحت التهديد وافقت

منى : … شو اخبار ياسمين ؟ دخلت بشهرها صح

احمد : كويسة، اه دخلت الها من اول شهر ١٢ ( كانون الاول )

منى : بالسلامة يارب يطمن بالك وبالنا عليها

احمد : امين

 

ما قدرت احكي لامي اني ما شفتها ولا سمعت صوتها من هداك اليوم، خايف تحس بالذنب انها السبب ..

لسا ما بعرف امي شو مخبية عني، بس قربت اعرف ..

 

////

 

المراسل : مهندس عدي هاي الك تفضل

 

التفتت على المراسل ولقيت بايده باقة ورد كبيرة، لمعوا عيونها من جمالها ..

اخذتها وشكرته، انتبهت على البطاقة المعلقة فيها ..

فتحتها بلهفة وقراتها، كانت جملة بسيطة بس فيها معاني كبيرة ..

 

( You miss I ) Deema

 

رنيت عليها وبسرعة ردت ..

 

عدي ( برومنسية ) : وانا اشتقتلك اكثر، انا بحبك .. بحبك كثييير

ديمة ( بخجل ) : وانا كمان بحبك وبموت فيك، سامحني حبيبي

عدي : وانتي كمان سامحيني، رجعتي من الدكتورة

ديمة : اه زمان وبابا رجعني عالبيت

عدي : يسلم ايديه، طيب جهزي حالك عشان قربت اخلص شغل خلينا نطلع سوا مشوار ونتغدى بمكان رايق

ديمة : تمام، حلو كتير زمان ما طلعنا

عدي : بعرف، يلا خدي وقتك

 

ما احلاكي دمدومتي، يا الله شو انبسطت بحركتها وحسيت انها جد بتحبني ومو قادرة تعيش بدوني اكثر من هيك ..

حتى انا تعبت من بُعدها، وكل يوم بستناها تقرب مني ..

 

////

 

وبينا معاد لو احنا بعاد

اكيد راجع ولو بيني وبينه بلاد

لو احنا بعاد وبينا معاد

اكيد راجع ولو بيني وبينه بلاد

قصاد عيني في كل مكان

 

في يوم هنعود

ده بينا وعود

و في غيابه اكيد لسه الأمل موجود

في يوم هنعود

ده بينا وعود

و في غيابه اكيد لسه الأمل موجود

قصاد عيني في كل مكان

قصاد عيني في كل مكان

ومن تاني اكيد راجعين

أنا دايب وكلي حنين

ولا عمري أبيع لو مين

قصاد عيني

ومش قادر على الأيام

ولا يوصف هويا كلام

وطول ليلي ولما بنام

قصاد عيني

قصاد عيني في كل مكان

 

علاقتنا تغيرت بعد اخر مناقشة صارت بيناتنا، والظاهر انها عنيدة اكثر مني ومو فارق معها كل اشي بعمله مشانها ..

حاولت اوصللها كلام مع امجد، بس ما تجاوبت ولا حتى كلفت خاطرها ترن وتسال عليي او تبعثلي رسالة اعرف من خلالها انه كلامي وصللها ..

ما تخيلت اني بهون عليها لهالدرجة ؟ معقول ما بتحبني ؟ ..

 

قصي : كيفك ابو عمير شو اخبارك يا رجل ما حدا بشوفك

عمر : والله مشتاق، كيفك انت ؟ شو عامل اليوم بالخميس الونيس

قصي : امجد جاي عنا، انت رايح تسهر عند آيات اليوم ولا بنقدر نخطفك منها شوي ؟

عمر : لا بتقدروا طبعا، ولو انتوا عظام الرقبة

قصي : طيب شرف عالغدا، كم بدك ؟

عمر : نص ساعة منيح ؟

قصي : نص ساعة وخمس دقايق ما بنفتحلك هيهيهي

عمر : بوابة ابراج نيويورك مهو باب بيتكم، انقشع

قصي : هههههه يلا سلام

 

////

 

انس : مع مين كنتي تحكي ؟

منى : مع احمد، احطلك غدا ولا تستنى آيات

انس : بستناها اكيد، بكفي امجد مو موجود

منى : ليه ما رحت معه، بتتسلى معهم

انس : بدي اروح اكيد بس بالليل، مع اني خايف على حالي هههه

آيات ( اجت فجاة ) : السلام عليكم

منى / انس : وعليكم السلام

 

كل ما تيجي عيني بعين آيات بتضحك، وكانها بتزكرني انها كشفت السر، وانا لا شعوريا بضحك وامي مو فاهمة اشي علينا ..

 

_________

_______

 

الاحد الماضي <<

 

انس ( برعب ) : الو امجد وين انت طلعت من البيت ؟

امجد ( بقلق ) : اه طلعت، شو مالك مرعوب ؟ نسيت اشي

انس ( بياس ) : ياااااا الله على هالحظ

امجد : ولك احكي شو في ؟

انس : نسيت خاتم اسيل ببنطلوني اللي كنت لابسه مبارح، وحطيته بالغسيل اكيد امي اليوم رح تشوفه اذا فتشت فيه

امجد : ههههههههههه يحرق حريشك، طيب اهدى هسة بحللك هالمصيبة مع انه نفسي امي تعرف بس حرام مشانك

انس : كيف رح تساعدني ؟

امجد : بس اخلص برجعلك، يلا سلام

 

////

 

آيات ( عيوني مغمضة ) : نايمة طبعا

امجد : طيب قومي بسرعة عالحمام

آيات ( فتحت عيوني مستغربة ) : شو في بالحمام ؟

امجد : في بنطلون انس اللي كان لابسه مبارح، اتوقع جينز اسود، فتشي بجيابه بتلاقي شغلة خبيها عندك قبل ما امي توصلها قبلك

آيات : هيني وصلت وعم بفتش، شو هاد ( بنظرة تاملية ) خاتم مين ؟

امجد : خاتم اسيل، خبيه وادفني هالسر معك وارجعي كملي نومتك

آيات : ههههههه يمة ما اقواكم، والبنت ميتة لتلاقيه حرام عليكم

امجد : حلي عني انا شو دخلني ؟ يلا سلام خليني اطمنه قبل ما يصير فيه اشي من الخوف

 

ما عرفت افرح ولا ازعل على اخوي، وعلى حظه ..

المسكين عشقانها وما حدا حاسس فيه، والتاني امجد بساعده بدل ما يوعيه ..

 

////

 

كل اشي بقدر عليه عملته بس مشان خاطره ما ينكسر، لانه لو امي عرفت رح تمرض بزيادة وتتعذب لانها رح تكون سبب من اسباب عذاب ابنها ..

 

امجد : مشي الحال اتطمن، بس ترجع عالبيت بتاخده من آيات

انس ( تنهد بقوة ) : الحمدلله، يكثر خيرك ما بنسالك هالمساعدة بحياتي

امجد ( بوجع مخفي ) : الله يحقق اللي ببالك وما بدي اشي، دير بالك مرة ثانية اليوم عشان آيات معطلة قدرنا نلملم القصة

انس : بس وقعتني بلسانها، يا دوب خالص من لسانك ههههه

امجد : ههههه بتستاهل، يلا دير بالك سلام

انس : الله معك

 

على طول تغيرت نبرة صوته، وكانه رجعتله الحياة ..

 

////

 

آيات ( نص ضحكة ) : والله بطلع منك انوووس

انس ( بخجل ) : ما خبرتي حدا صح ؟

آيات ( بمزح ) : بس صورته وبعتت اسال ياسمين عنه، حكتلها مع انس اتطمنوا ههههه

انس ( معصب ) : بتمزحي صح ؟

آيات : ههههههه طبعا بمزح، مع انه خطرتلي الفكرة بس بعدين تراجعت

انس ( برجاء ) : حلفتك بالله ما تخبري حدا عنه، انا بعطيها اياه بالوقت المناسب

آيات ( بحزن ) : شو مصيركم يا ترى ؟ انس حبيبي والله ما بدي اشوفك بتتعزب انت كمان متل اخوانك ومتلي، مع الايام اكيد رح تلتقي ببنت تنسيك اياها انت هلا حاول ما تفكر فيها كتير واعطيني ارجعلها الخاتم

انس ( برجف وشادد قبضة ايده عالخاتم ) : مستحيييل، لو بدي اموت من العذاب ما بتخلى عنها بعدين لا تستبقي الاحداث تفائلي

 

تركني قبل ما ارد عليه، رغم اني مو ملاقية كلام احكيه اكتر من اللي حكيته ..

واضح انه متمسك فيها وبحبها حب حقيقي، متل ما عمر بحبني وانا هلا واقفة ضده وعاملة مشكلة معه وبستنى يلين عقله شوي ونقدر نتفاهم ..

 

_________

_______

 

منى : متى رح يجي عمر ؟

آيات ( غصّت بالاكل ) : ما بعرف، بس احتمال ما يجي اليوم

انس : ليكون رايح مع امجد

آيات : ما بعرف

منى ( مستغربة ) : شو اللي ما بتعرفيه ؟ ليه اسمك خطيبته ؟ معقول ما حكالك ولا متفقين على سهرة ولا اشي

آيات ( حبست نفسها ورجعت تنهدت بقوة ) : … انا شبعت، يسلمو ايديكي

 

اتطلعت فيي امي هديك التطليعة اللي قصدها فيها شو مخبيين عني ؟ ..

 

انس ( بتهرب ) : ما تطلعي فيي، انا ما بعرف اشي ولا بدي اعرف

منى : طيب يا اولادي ضلوا خبوا عني

انس : استغفر الله، همة هيك اولادك بخبصوا وما بتموني الا عليي، احكيلك من الاخر

منى ( باهتمام ) : اه ؟

انس ( بدهاء ) : لا تركضي ورا حدا وتعرفي شو مخبي، اخرته كل اشي يبين انتي لا تشغلي بالك بس

منى ( مو عاجبها ) : اقنعتني صراحة، تصطفلوا حرين لما تحتاجوني رح تيجوا لعندي

انس : يا عيني عليكي

 

////

 

ابو حمزة : يا جماعة احنا جايين اليوم ومتأملين من ربنا انه يتم الصلح ويعمر بيتهم من جديد، وبالنسبة لبنتكم انا من لما عرفتها وانا بعتبرها وحدة من بناتي ويشهد الله على كلامي

ابو علاء : اذا كلامك صحيح كيف قدرتوا تعذبوها وتفتروا عليها كلام ما صار وتحكوا باطل على لسانها ؟؟!

ام حمزة : الله يلعن الشيطان ويسامحني، هي القصة كلها داخلة ببعضها ويوم عن يوم كبرت

نهى : لاحظت، هاد اللي مستغربة منه حتى سيرين حاسة انه في اشي غلط بتقلي يا ماما خالتو ام حمزة ما في منها بتحبني وبتدعلينا بالخير دايما

ام حمزة ( بفرح ) : الله يرضى عليها، اه والله بحبها من كل قلبي

حمزة : طيب وينها سيرين، خليها تيجي حتى افهمها وجهة نظرنا من شروطها

علاء ( بنادي بسخرية ) : يا سيرين، تعالي اتحفي مسامعنا بشروطك اللي مغلبة الجماعة فيهم

هيثم ( من بين اسنانه ) : خليك عاقل مو ناقصهم اهلك

علاء ( مو عاجبه ) : توكل عالله انت بس وما بتكون الا راضي

سيرين ( بثقة ) : مسا الخير

الجميع : مسا النور

 

////

 

احمد : في اجتماع عند دار حماك، لحق حالك

عدي ( مستغرب ) : اجتماع شو ؟

احمد : عزومة واشياء زاكية وهيك قصص، ويمكن سهرة رومنسية برعاية الفنان الموهوب اخوك هيهيهي

عدي : اوف اوف كل هاد واحنا ما معنا خبر، هاي خيانة عظمى

احمد : منا حكيت بخبركم بلكي تلحقوا شوي من قاع الطنجرة

عدي : المشكلة علاء مشغول اليوم، ابصر يقدر يجي ولا لا مسكين

احمد : اكيد رح يجي، ما بفوت هيك سهرات عديلك

عدي : هههههه يلا انا سابقه، مع اني هسة تغديت بمطعم

احمد : صحتيييين ابو ماهر، يلا دير بالك خلي عيونك مفتوحة عليهم هههههع

 

ديمة : بدنا نروح عند اهلي يعني ؟

عدي : اه اليوم بنروح عندهم وبكرا عند اهلي صح ؟

ديمة : متل ما بدك المهم تكون انت راضي يا عمري وحياتي ريته ما يبلى المروق

عدي : هههههه يسعدك، شو هاليوم الحلو الله يتم علينا

ديمة : يارب ويهدي بال سيرين، عقلي عندها

عدي : مسكينة، الله يعوض عليها ويختارلها الافضل

 

////

 

سهى : اهلين بالشباب، نورتوا يا حبايبي

امجد : حبيبتي خالتو ما يحرمنا منك، ايوا هيك خلينا نشوفك برواق ونستمتع باطباقك الشهية

قصي : وتحلي عيونك بشوفتي هيهيهي

امجد ( بمسخرة ) : عيوني هلكوني وهمة يطلبوا شوفتك، اخر اشي حكتلهم الخميس بنشوفه ولا يهمكم

سهى : هههههه يسعد هالعيون ما احلاهم

قصي : ايوا كبري براسه، يلا هي اجا ابن اخوكي ديري بالك تستمري بالغزل

عمر : السلام عليكم، الحمدلله البوابة مفتوحة ربي بحبني يا جماعة

امجد / سهى : وعليكم السلام

قصي : يا حبيبي يا مرضي

 

////

 

مها : تعبت من المشي، خليني اشتري هالشغلة لخالتك وامرق اعطيها اياها ونضل مروحين عالدار

ياسمين : يلا، امير نعس اصلا شكله رح ينام بالسيارة

اسيل : ماما خلص مو ضروري نمرق عند خالتو اليوم

مها : لا حرام مستعجلة عليها

 

////

 

هيثم ( بقلق ) : شو ؟ متاكدة

رانيا ( بالم ) : كتييير موجوعة الحقني هيثم

هيثم : يلا هينا قربنا، معك شنتة المستشفى ؟

رانيا ( مو قادرة تحكي ) : لا

هيثم : بسيطة، بس اتطمن عليكي بالمستشفى بروح اجيبها، المهم خلي نفسك منتظم

رانيا ( بتهز راسها ) : …

 

نهى : يييي عنجد، هيك فجاة ؟

هيثم : شايفة، هيني بالطريق للمستشفى بس لا تخبري حدا لحد ما نتاكد اذا ولادة او لا

نهى : ولا يهمك، بس مو تنسى ترجع تحكي معي

هيثم : لا لا بحكي ان شاءالله، يلا دعواتكم

 

////

 

علاء : هيني قربت

عدي : صرتوا مخلصين ؟

علاء : هههههه لا تذكرني دخيل قلبك، بس اشوفك بحكيلك شو صار

عدي : الله يستر، بانتظاركم

 

ريم : الله يهديهم بس ليه هيك عملوا ؟

علاء : من كل عقلك في واحد بقبل اهله ما بفوتوا بيته ابدا ؟ يعني هية ما تروح عندهم مقبولة نوعا ما عادي هالايام

ريم : ما بعرف عنها، يعني هية لما اشترطت هيك بناءا على كلامهم عنها انه شايفة حالها وبتعاملهم بتكبر

علاء : هية منطقية بس حمزة مسكين من النوع القديم جدا

ريم : وخالتو انصدمت لما عرفت عن شرط الحمل

علاء : ههههههههههه ضحكتني، الله عليكي يا اختي اكيد ياسمين مساعدتيها بانتقاء الشروط ومو بعيدة ديمة كمان تكون معطية رايها

ريم ( بطرف عينها ) : والله ! كان سالتها عشان تقطع الشك باليقين حبيبي

علاء ( مسكت ايدها وبستها بنعومة ) : يسعدلي اياها حبيبتي العاقلة، حاولي تفكري بشروط ثانية وتحكيلها اياهم بلكي بزبطوا اكثر

ريم : يسعدلي الواثق بمرته، هلا بفكر بكم شغلة وبكتبهم بلكي بنروق على سهرة الشباب هههههه

علاء : ههههه الله عليك يا ابو حميد، يا ريتك معنا

ريم : هيو بشارك عن بعد ههههه

 

////

 

منى : رني على ياسمين وافتحي سبيكر خليني اسمع صوتها

آيات ( تنهدت ) : يلا، هي برن

انس ( قاطعنا ) : يمة انا طالع بدك اشي ؟

منى : سلم عليهم، وازا تاخرت نام عندهم

انس : لا ماخذ سيارة ابوي، بعدين بتعرفيني عندي جدول دراسة صعب اخربه

منى : ان شاءالله، دير بالك وانت تسوق

 

ياسمين ( معجوقة ) : الو

آيات ( عيوني على امي ) : اه ياسمين حبيبتي كيفك ؟

ياسمين : هلا يا عمري، مشتاقة

آيات : وانا اكتر، كانه صوتك مو بالبيت

ياسمين : اه والله نزلنا عالسوق شوي انا وماما واطفالها هههه واسيل طبعا وفرح مرافقين للاطفال

منى ( كاتمة ضحكتها ) : …

آيات : ههههههه موتيني، طيب منيح شو بدك احلى من هيك اجواء اكيد مشتاقة

ياسمين : اه طبعا مشتاقة، بكفي اني الشوفير الرسمي حاليا لمها خانوم، كيفكم انتوا كيف خالتو ؟

منى ( مبسوطة ) : …

آيات : الحمدلله كلنا بخير، هينا مكنكنين بهالبرد

ياسمين : اه والله كتير برد، بس كان لازمني شوية شغلات قبل الولادة بتعرفي وقلت بكسب الوقت من بكير

آيات : يلا ماشي ياسمينتي ازا بدك اشي احكيلي بجيبلك، غير عن اللي جبتهم طبعا

ياسمين : تسلمي ان شاءالله بخبرك، برجع احكي معك بعدين

آيات : اوك يلا سلام

 

منى : هههههههه ما بتتغير

آيات : ههههههه مها واطفالها، بتخيل شكلها بكرا هي وامها واولادهم هههههه

منى : على خير يارب، الله يقومها بالسلامة

آيات : امين، ويفرح قلبنا بشوفة الغالي احمد يا الله شو اشتقناله

منى : حبيبي الله يرضى عليه وعليكم جميعا، كل يوم بسالني شو نفسك اجيبلك، وشو ناقص آيات ومن هالحكي

آيات : مهو بسالني كمان، انا عارفة بجيب بدون ما نطلب بس حرام مو ناقصه تكاليف خليه يخلص بيته ويصيروا يقعدوا فيه باجازتهم

منى : اه الحمدلله مو ضايل اشي، اقنعته يفصل المطبخ لما يجي ومن هون للصيف بكون جهز وتركب وبنحطله في البيت كم قطعة اثاث على قدهم

آيات : على خير الله يهنيهم

 

////

 

سهى : يا ريتني حكيت لانس يجي، نسيته من لخمتي بمشوار ديمة

امجد : هاي ديمة لا متجوزة ولا عزابية خلصانين من غلبتها، مشااان الله حلي

سهى : شايف بالله

عمر / قصي : نعم ؟

قصي : بتشدي على ايده بدل ما تخرسيه بكلمتين، شو دخلك وله باختي ؟

امجد : لا اله الا الله، الحق عليي حاسس بامك مو مثلك مبلد

سهى : ههههه طولوا بالكم، شكله وصل انس دقيقة خالتو

عدي / ديمة : مرحباااا

امجد / عمر / قصي ( بصدمة ) : يخرب بيت اليهود شو جابهم ؟

عدي : ماشاءالله ما شاءالله جمعة طيبة يا حبايب قلبي، شو سيد عمر منيح اللي شفناك ؟ عاساس الخميس سهرتك مع الحب وما بتفضى

امجد : اه انت جاي مع سبق الاصرار والترصد يعني ؟

قصي : كمين لعمر بمعنى آخر

عمر ( بتباكي ) : اهئ اهئ

ديمة ( بنبرة حادة ) : ليه الجلي مكوم عالمجلى ؟ ما تقوم تجلي منك اله ولا مستنيين امي تجلي مثلا ؟

امجد : لا مستنيينك تيجي تردحيلنا اول، شو دخلك انتي اه ؟ ولا مقهورة عشان راح عليكي الاكل

عدي : ايوا تعالوا اضربوا بعض شو رايكم ؟

عمر : هدوا يا جماعة، ها هي الجرس برن

قصي ( بعيط ) : …

الجميع : ههههههه

سهى : يييي اهلا وسهلا شو هالمفاجاة

مها : حبيبتي اهلين فيكي

ياسمين / اسيل / فرح : مرحباااا

ديمة : هااااي

امجد / عمر / قصي : هااااي اهئ اهئ اهئ

مها : شكلنا قطعنا عليكم سهرتكم يا شباب سامحونا شوي وبنروح

عدي : لا الله يسامحك، حتى انا اجيت صدفة ( برقص بحواجبه ) ويا محااااسن الصدف

ديمة : رب صدفة خير من الف ميعاد حبيبي شو نسيت

عدي : لا ييي شو انسى

ياسمين : ههههههه

سهى : تفضلوا ليه واقفين ؟ زارتنا البركة شو هاليوم الحلو هاد

امجد : على مهلك خالتي عشان صحتك بس

عمر / قصي : هههههههه

مها : وين ابو قصي ؟

سهى : نزل عالقهوة يسهر قال خلي الشباب تاخد راحتها

مها : يعني اخد راحتي لاني انخنقت تقريبا

امجد : الف مرة حكينالكم يا نسوااان لما يطلع شعركم من الحجاب ورجليكم توجعكم

ياسمين ( مقاطعة ) : واولادكم تنكد عليكم

قصي : روحووووو من السوووق

مها : روحنا هينا

عدي ( بجكر ) : يا ريت خبرنا دار ابو سلمى

قصي : انا بقول نزل بوست عالفيس واللي بحب يتفضل مهي خربانة خربانة

ديمة : بدون ما ننزل هي ابصر مين اجا

سهى : افتحي ماما بكون انس وصل

مها : ييي وانس منضم للشلة كمان ؟

انس ( بصدمة ) : بسم الله

عدي : شايف جني وله

انس ( ضحكوا عيونه ) : قصدي السلام عليكم

عمر ( بغني ) : قلبي عشقها والعيون .. هويتا واهلا ما يرضون

امجد / قصي : وانا كل ما اشتقت ليها .. اروح واسال عليها عليها

عمر : تجاوبني عينيها .. تجاوبني عينيها

امجد / عمر / قصي : ارحل يا حبيبي حبيبي اهلي ما يرضووووون

انس ( زورنا بعيونه ) : …

مها : والله نورت، شو خالتو ليكون مخربين اخلاقك هدول ؟

عمر ( باستغباء ) : هدول ؟ تحولنا لنكرة يا شباب

امجد : هاي اخرة اللي بصاحب اشكالك ههههه

عمر : يا حوينة شهادة ميلادي المخبية بالشنتة السودا اللي اعطاها سيدي لابوي ومخبيها باخر رف بالخزانة من فوق ومحطوط عليها كومة اواعي عشان اذا دخل حرامي ما يشوفها

عدي : ههههههههههه يقطع شرك

ريم ( فجاة ) : ليه متركين الباب مفتوح ؟

امجد / عمر / قصي ( باستياء ) : كممممممملت

علاء ( بخبث وعيونه على عدي ) : ماشاءالله مجتمعين عند النبي ياا رب .. بس شكلنا ازعجانكم

عدي : بالعكس اجيت والله جابك، لسا قاعد بحكي يا ريتك تيجي

علاء : بقول مال قلبي دق فجاة وحسيت انه من الضروري ان آتي الى هنا

سهى / مها : هههههههه

ياسمين : بس شكلها في اخبارية عليكم مبينة الشغلة

علاء : يسعدها سنفور مفكر، اعترفي انتي اللي حاكية لسيرين عن الشروط اللي حطتها لحمزة ؟

ديمة / ياسمين : صحيح شو صاااار ؟

علاء ( بسخرية ) : واحد صفق والثاني طاااار

الجميع : هههههه

سهى : لا جد خالتو طمنا

علاء : يا بنت الحلال هاي اشكال ناس بدها تتصالح ؟ اجا يعمل علينا زلمة واخر اشي سحب حاله هو واهله وطلعوا، وسيرين لسا صافنة فيهم

مها : لا ؟ شو هالهبل هاد

ريم : بس اللي فهمناه انها امه مو واعية على حالها كانت ومتل مو قايلتله سيرين يوم المشكلة انه في حدا وازز براسك عليي

علاء ( زورها بعيونه ) : …

مها : ايوااا، مع انه مو فاهمين شو المشكلة بس هي عرفنا طرف الخيط

امجد : هي جهزت البكرة خالتي انتي اسحبي خيوط وانا بلف وراكي

البنات : هههههههه

عمر : هيهيهي قومي اجلي انتي واياها يلا هي لقينالكم شغل

ياسمين ( بخبث ) : وين ختشيبتك عنك ؟ هيك بتسهر بدونها يا خاين ملكش امان فعلا

عمر : ختشيبتي ببيتها مو مثلك من لما وصلتي ما قعدتي ببيتك

ديمة ( شهقت ) : يمممممة، ما انتوا حسدوتنا هو احنا تهنينا عليها هي تاني مرة بشوفها انا اصلا من هداك اليوم

قصي : هو كان يوم مو معدي سبحان الله

عمر ( بغني ) : كل يوم بعدي بتزيد غلاوتك عندي واشتقلك واحبك تسوى ايه الدنيا مهما كانت حلوة في ثانية اعيشها جنبك

سيرين ( تسجيل صوتي ) : مو ناقصني ديمة لا تبعتيلي اشي

عمر : الله يسامحك بس

امجد ( بنبرة حادة ) : بعدين معك، يا زلمة خذ منها هالتلفون احسن ما اجي اكسره الف شقفة

عدي ( بسخرية ) : شو رايك تيجي تضربها بالمرة ؟

انس : له له من متى احنا بنمد ايدينا على بنات ؟

ياسمين : يسعد قلبه العاقل المؤدب، مو متل بعض ناس

ريم : قصي قاعد على الطاولة، لسا بتستنى بباقي الاشياء الزاكية ؟

قصي ( بلهجة مصرية ) : اخواني واخواتي بحييكوا وبحب اقلكوا اني جمعتكوا النهارده وكلي امل

ياسمين / ديمة : امل ماتت من زمااان

الجميع : هههههههه

قصي ( بضرب عالطاولة ) : محدش يقاطعني

عمر ( شهقة ) : يقطعني

امجد : انا لسا بستنى بالامل يجي

سيرين ( تسجيل صوتي ) : امل انتحرت من وراكم، اتركوها بحالها

ابو قصي ( اجا فجاة ) : السلام عليكم