#حب_وحرب
#بقلم_ليان_الشامي

كانت ليلة صعبة كتير…أصوات عالية وناس متخبيه تحت سقوفت بيوتها عم تستنى أجلها مابتعرف بإي لحظة بدها تموت قلوب عم
ترجف وعيون سهرانة وخايفة ووجوه تعبها القلق كنا متجمعين حوالين بعض وكل واحد عم يطلع بالتاني يمكن كنا عم نودع بعض او عم نواسي بعض او عم نستجمع قوتنا من عيون بعض وبنفس كل حدا عم يدعي الله يستر
و الوقت كان عم يمشي ببطئ. .
بعد ساعات
هديت الأصوات وعم الصمت …كنا لسا عم ناخد نفس وقت اجت قذيفة ورا البيت مباشرة الكل صرخ ..بعد ثواني اطلعت حواليي كان الكل مبطوح على الأرض شفت لمى مقبالي حاطة ايدها على رأسها ..أطلعنا ببعض وصرنا نضحك …
بقيت امي ومحمد وسمر مستغربين كيف اجانا الضحك بهالموقف
سمر:مو طبيعين أنتي وياها !!
لمى:(وقفت ونفضت تيابها ) اي دخيلك على اساس يلي عم يصير فينا طبيعي بعدين إذا بدنا نموت خلينا نموت ونحنا مبتسمين
شام:(كنت بعدني على الأرض وعم أتأمل السقف ) الظاهر هديت
محمد:(كان ضامم ابنو لصدرو وعم يحاول يهدي ) نحنا لازم نلاقي طريقة نطلع فيها من هون
سمر:اااخ ياريت والله معد فيني حيل للرعبات أكتر
شام:(أطلعت بماما ولقيتها عم تبكي زحفت بأتجاها ) ماما شبك
أمي:انا السبب كلشي عم تدقو بسببي
محمد:يا امي انتي شو دخلك نصيبنا وبدنا ناكلو
امي:لو ماضليت مصرة نبقى بالبيت ماكان صار فيكن هيك
شام:خلص يا قلبي اهدي بلا مايرتفع عندك السكري بعدين نحنا مو لحالنا هون في كتير ناس متلنا
(قطع حديثنا دقت الباب بقوة …ركض محمد ليشوف مين مسكتو ماما من تيابو ووقفت بوشو
امي:لوين رايح …مالح تفتح
محمد:يا امي مشان الله خليني شوف مين بركي حدا بدو مساعدة
بهالوقت كان الباب لح يتكسر وصوات رجال جاية من وراه ..هم تنده ..
لمى:كأنو صوت غسان ..ماما خلينا نفتح
ضلت ماما ماسكة محمد وانا معد تحملت ورحت فتحت ..دخل غسان وأبو مرعوبين
غسان:شام ..تعي معنا على السريع
شام:شوفي
غسان:جابو ابن خالتي لعنا ومتصاوب وحالته خطيرة
شام:طيب سبقني لاحقتك
امي:لوين ..مالك طلعة من البيت
شام: امي ما سمعتي شو حكى غسان ..الزلمة لح يموت
امي:(وقفت بوشي ) مافي يعني مافي يروحو يشوفو دكتورة غيرك …
محمد:لا إله الا الله امي خليها تروح وانا بروح معها

(دخلت لجوا وجبت العدة وطلعت بسرعة بقيت ماما عم تنده علينا ..كان الطريق معتم ومافي غير صوت الكلاب عم تنبح …وصلنا لبيت غسان ..كانت الناس مجتمعة عند الباب
وأول ما دخلت مسكت فيني مرة وصارت تترجاني ساعد ابنها

فتت على الغرفة وشفتو …كانو حاطينو على تخت والدم معبي المكان ..أما هو كان عم يرجف ويأن من الوجع ..كشفت على الجرح كانت الرصاصة بعدها جوا…اطلعت بمحمد بقلق مسك أيدي ..وقلي انا معك ..

شام:يا شباب كل حدا معو ضو يقرب …طلعت إبرة بنج وعطيتو ياها وبلشت حاول طلع الرصاصة …
بعد ساعة ..
رجعت خطوتين لورا وبلعت ريقي ..الحمد الله قدرنا نتجاوز مرحلة الخطر

محمد:الحمد الله ..(حط ايدو على كتفي ) أنتي منيحة ..هزيت راسي اطلعت على أيدي وتيابي كان الدم مغطيهن
بس بدي غسل ..دخلت على الحمام سندت ضهري على الباب وبكيت ..بعد دقائق حاولت سيطر على حالي غسلت وشي وطلعت …

محمد:خلينا نرجع بتكون أمك فاير قلبها
شام:انا لح ابقى هون ..أنت روح طمن ماما وبكرا الصبح تعى خدني
محمد:طيب ..
رجعت على الغرفة ..سحبت كرسي وأعدت مقبالو. .
حسيت حدا لمس أيدي فقت متل المجنونة. ..اطلعت حواليي كانت الشمس طالعة فركت عيوني لشوف منيح …ولمحتو عم يشد الحرام من وجعو. .قربت منو ..أنت منيح ! رفع ايدو بأتجاهي ترددت كتير قبل ما أمسك ايدو …شد عليها بقوة وفتح عيونو ..ثواني او دقائق يلي مرت وانا صافنة فيه. ..لون عيونو متل لون عيوني أخضر فاتح عم يضو متل نيزك. .نازل من السما قطع شرودي دخلت غسان أنتفضت من مكاني
غسان:كيف صار ..
شام:……
شام:شام ….شام …
شام:ايه ..
غسان:وين شاردة عم قلك كيف صار
شام:احسن …
غسان:الحمد لله ..وشك أصفر لازم ترتاحي
شام:انا منيحة …كيف الوضع بره
غسان:تمام ..سمعت انوا لح يفتحو الطريق هاليومين
شام:طيب …انا لح أعطيك شوية أدوية مابعرف إذا بكفو بس بحاول أملو الباقي المسا
غسان:عذبناكي معنا
شام:ههههه على طول معذبني حضرتك ..انا لح روح ارتاح شوي والمسا بمر وبطمن عليه
غسان:لكن لح أجي وصلك
شام:والله مابقول لا حاكم لح دوخ من النعس

بالطريق …
غسان:كيفها
شام:مين هيه
غسان:لااا عنجد انتي مسطلة قصدي لمى
شام:ايوا …منيحة
غسان:أكيد كانت خايفة مبارح
شام:لا كانت مبسوطة وعم ترقص
غسان:انا نفسي اعرف كيف قلك قلب تنكتي وتضحكي
شام:شو بدك اعمل فرضا …يعني واقع ونفرض علينا وحياة بدنا نعيشها إذا ما عملت هيك بجوز جن
غسان :بهي صدقتي …
شام:ألما تفرج ..
غسان:بس بتعرفي تفاجأت فيكي تاريكي ام قلب قوي
شام:من يوم يومي هيك ولا نسيت كيف كنت اتخانق انا وياك وقت تسرقلي سندويشاتي بالمدرسة
غسان:ههههههه مانسيتي
شام:ولن انسى هههه
غسان:فوق ماكنت عم أعملك دايت طبيعي …حاكم كنتي شبه الطابة
شام:بتعرف لو كنت بدل ابن خالتك ..،كنت خليتك ليصفى دمك وتموت …مابعرف على شو أختي حاببتك
غسان:قصدك انا بحبها …والله مالي مصدق أيمت تفرج ونتزوج
شام:وهي وصلنا …لعيت قلبي يالله روح وميرسي على التوصيلة فيك ترجع
غسان:لااااا لازم شوفك دخلتي لجوه انتي أمانة برقبتي
شام:مالح تشوفها ماما لح تفتح الباب
غسان:بجرب مالي خسران يالله دقي

(دقيت الباب …وفتحت ماما ..وطبعا استلمتني وغسان هرب …دخلت لجوا بدون ما أنطق حرف مباشرة على التخت …وغفيت
بعد ساعتين صحيت وكانت ماما فوق راسي …عم تقرأ قرآن ..ابتسمتلا قامت زورتني جلست حالي

شام: أمي مو لابقلك دور الأم القاسية
ماما:شايفة منظرك …عاجبتك حالتك
شام:هفف ليش شبني
ماما:فوق كلشي صاير فينا وحضرتك عاملة ملاك الرحمة عم تساعدي الناس وتشفقي عليهن ومالك ساأليه فيني وشو عم يصير فيني كل ماتطلعي من البيت
شام:طيب شو اعمل اترك الناس تموت
ماما:لا بس يشوفو غيرك …
شام:اي هنن هالمرتين وبعدين شفتي كيف كانت ليلة مبارح …وين بدهن ياخدو على المشفى والطرقات مسكرة
ماما:ماعرفو كيف تصاوب
شام:مابعرف وماسألت بس كان منظرو بقطع القلب.. لح أعمل قهوة ..بتشربي معي
ماما:انا بعملها ..قومي بدلي تيابك …
شام:يخليلي ياكي …

(اطلعت على حالي …كان شعري منكوش وبعدني بتياب مبارح …كان منظري متل يلي هربانة من فلم رعب …عملت دوش وغيرت تيابي وطلعت كانت ريحة القهوة معبية المكان ..
شام:امممم قهوة 😍
محمد:طمنيني كيف صار الشب
شام:والله ذكرتني لازم روح شوفو بس بدي تأمنلي هدول الأدوية إذا بتقدر
محمد(تنهد) المشكلة أغلب هدول الأدوية انفقدو
شام:بعرف بس شوف إذا عندك بالمخزن اي صح نسيت خبرك قلي غسان انوا لح يفتحو الطريق
محمد:معناها خلينا نجهز حالنا وأول مايفتحو منطلع
لمى:لوين بدنا نروح
محمد:اي مكان …غير هون
(قربت مني لمى وهمستلي …طيب وغسان
شام:لا تشغلي بالك هو اليوم قلي مالو مصدق أيمت يطلع
لمى:(ابتسمت ) كتير منيح

(اطلعت بساعتي كانت 3 وقفت لبست جاكيتي …
شام:انا رايحة شوف الشب
محمد:روح معك
شام:لا خلص بروح لحالي
امي:(كانت بالمطبخ وندهتلي ) استني جاية معك
شام:أمي شو رأيك تشتغلي معي حاكم كل مريض لازم تروحي معي
امي:اي لاتتهاضمي وامشي قدامي
(وقفت لمى عند الباب …
لمى:أمي وانا بدي روح …
ماما:لا خليكي بالبيت
لمى:(غمزتني ) الله يوفقك …أمانة
شام:ماما خليها تروح …شو خسرانة وإذا بدها سمر مناخدها معنا هههههههه
سمر:ههههه لا مابدي

(اطلعت بأمي كانت حاطة العقدة …
شام:خلص سكتت …هههه

(وصلنا لعندن …وفتح غسان الباب بابتسامة عريضة ههه
غسان:اهلينن تفضلو نورتو
شام:على فكرة كلمة نورتو مو حلوة …شو شايفنا قدامك لمبات
غسان:😑
(دخلنا لجوا وكانت خالة ام غسان وامو للشب قاعدين سلمنا عليهن …وأمي بلشت بحالة الأستجواب …أما انا صفنت بهديك المرة معالم وشه وعيونها لحالن عم يحكو وجع وقهر
شام:خليني شوف ال…
ام عابد :عابد هيك اسمو
شام:معناها حضرتك ام عابد
ام عابد:ايه صح…هو بالغرفة التانية

أخدت نفس ومشيت باتجاه الغرفة …وقفت عند الباب ولمحتو رافع راسو وشارد ..معالم رجولية دقن كثيفة وشعر اسود ..وفيه ضرب صغير جنب عينو
فيكي تتفضل …ابتسمت وقربت لعندو ….
كيف صرت ؟
مال براسو لعندي …منيح بصوت مبحوح
شام:بدي شوف مكان الجرح إذا ممكن
عابد:اي أكيد (حاول يجلس حالو بس ما قدر .)
شام:خليني ساعدك …
عابد:مابدي عزبك
شام:ولايهمك هي شغلتي. ..(مابعرف ليش وقتها تلبكت كان قلبي عم يخفق بسرعة واديي عم ترجف ..أطلعت عليه بطرف عيني ..كان شعري نازل على وشو) انا آسفة ما انتبهت كان المفروض اربطو
عابد:هه عادي ..
شام:الجرح وضعو ممتاز …بس لازم تاخد الأدوية على وقتها ولاتتحرك كتير وأهم شي تلبس شي يدفيك وووو بس
عابد؛ليش عم ترجفي
شام:(لفيت وشي وعملت حالي مشغولة ) ههه من هالجو الدنيا بره سقيع
عابد:ايه صح …وشعرك مبلول
شام:(بلعت ريقي ) اي شعري بدو سنة لينشف …صار لازم روح ..انا ببقى بمر وبطمن عليك …انتبه على حالك
عابد:شام …
شام:نعم
عابد:وانتي حطي طاقية على رأسك

(دخلت ماما ولمى وأم عابد على الغرفة خلاني اتلبك …
شام:ماما خلينا نمشي خلي عابد يرتاح
ماما:الحمد الله على سلامتك يا ابني
عابد:الله يسلمك خالة

(المسا بالبيت ..الكل نامو وبقيت انا ولمى سهرانين
لمى:قيمي هالكتاب من إيدك بكرا بيوجعوكي عيونك
شام:اول ما نطلع من هون لح ارجع سجل بالجامعة
لمى:بجوز تعيدي السنة كلها
شام:مو مشكلة اصلا ماصفي غير هالسنة وبتخرج
لمى:شامي …انتي لاحظتي شي اليوم
شام:شي متل شو
لمى:الشب يلي اسمو عابد
شام:شبو
لمى:هففف يالطيف انتي ما بتنتبهي لشئ
شام:انا هلق تأكدت انك انتي وغسان طنجرة ولقت غطاها
لمى:😕…كتر خيرك ..
شام:لح تقولي شبو عابد ولا لا

لمى:لك عيونو متل عيونك بالزبط نفس اللون وحتى النظرة
شام:هلق هي هية الشغلة …هفف بتعرفي احسن شي قوم نام
لمى:خليكي عم تدرسي على ضو الشموع شو بدك احسن من هالاجواء الرومنسية
شام:هههههه قومي اطفي الدفاية ماتدرى امك انوا مشغلينها لهوقت لتفضحنا
لمى:يالله طيب خليني نام جنبك والله عم خاف بالعتمة
شام:جبانة تعي خلصيني

(بعد دقائق لفت لمى وشها لعندي كنت مغمضة عيوني بس مالي نائمة
لمى:شام …شام نمتي
شام:تو لسا
لمى:بتعرفي بشو عم أحلم
شام :بشو
لمى:انوا نرجع متل قبل ويكون يلي صار فينا مجرد كابوس متمنية ارجع شوف رفقاتي ونرجع نطلع من البيت مندون مانخاف ليش هيك صار فينا وليش نحنا
شام:(فتحت عيوني واطلعت فيها ) لسبب مابيعلم فيه غير رب العالمين
لمى:برأيك ايمت لح نخلص وتهدى الأمور
شام:…..
لمى:ليش سكتي
شام:لسا الطريق طويل والجاية أعظم … (درت وشي ونمت
(صحيت تاني يوم …كان مافي حدا بالبيت غير انا ومحمد
شام:شو وينن
محمد:جارتنا عم ولدت وراحو يشوفوها
شام:لكن لح حضر الفطور لبين مايجو

(بعد ربع ساعة دخلو وكان وشن مابيتفسر وماما عم تبكي
شام:ماما شبك …شو صايرلكن …لمى سمر لك ماتحكو
سمر:مسكين هالولد
شام:الولد فيه شي
سمر:لا الولد وامو مناح
شام:طيب شبكن
سمر:أبو توفى اليوم
شام:كيف يعني
سمر:كان بالشغل ووقت خبرو انوا مرتو عم تولد وهو جاية على الطريق نازلة قذيفة على السيارة وتوفى

(أعدت بالأرض لأنوا اجريي معد حملوني خبيت وشي بإيديي
لمى:طلع كلامك صح عنجد يلي جاية أعظم
(بقينا كل النهار زعلانين وماحدا كان الو نفس يحكي ..المسا خبرني محمد انوا جبلي الأدوية ..وطلبت منو ياخدن
لعابد
مضى يومين ..ورجعت الحياة لطبيعتها يمكن لأنوا اعتدنا على سماع خبر الموت وكل وقتنا ونحنا مجهزين حالنا لنفقد شي ..من وقت مابلشت الحرب ماوقفت خسارتنا على الأنفس كنا كل يوم عم نخسر جزء من روحنا من رغبتنا بالحياة الفرح والبسمة والأمل الآمن والأمان …
الحرب بشعة كتير مظلمة وباردة متل ليالي كانون
ليلها طويل وممل وبخوف ونهارها مافي روح ولا لون وطعم

(عند باب البيت وقبل ما اطلع تذكرت كلمة عابد لاتنسي تحطي طاقية ضحكت بيني وبين حالي …عملت نظرة أخيرة على المراية وطلعت …
وأنا بالطريق لمحت ولاد عم تلعب في ولد لفتلي أنتباهي ماسك عصاية وعاملها متل سلاح وعم يقوص رفقاتو…قربت منو ونزلت لمستواه

شام:انت شو اسمك
الولد:وانتي شو دخلك روحي من هون احسن ماموتك
شام:ههههههههه ويعلا عيونك مو عيب تحكي هالحكي
الولد:تركيني بدي روح أقضي عليهن
شام:ياسلام …ماشاء الله وين صرنا …أي بلاها هاللعبة روحو لعبو طابة احسن
الولد:انتي شو دخلك (صرخ فيني …ودفشني على الأرض )

شام:(وقفت ونفضت تيابي وانا عم أضحك
غسان:بتستاهلي ها ههههههه
شام:انت هون …لك شفت كيف شحطني هههههه
غسان:اي شو متوقعة من جيل اول ما فتح عيونو وعي على صوت الرصاص
شام:والله شي بيقهر على القليلة نحنا عشنا طفولة حلوة بس هنن

(قبل ما ندخل لعندن كانت في ريحة طبخ بتشهي
شام:غسان أمك شو طابخة
غسان:ملوخية
شام:وليي قلبي الصغير لا يتحمل
غسان:يالطيف شو فجعانة
شام:ليكو مين عم يحكي اطرميز المخلل
غسان:ههههههه
شام:ههههه

(دخلت وكان الكل قاعد وعم يتغدو
شام:مسا الخير
الكل:مسا النور
ام غسان:حماتك بتحبك هلق حطينا الاكل تفضلي
شام:لا يسلمو خالتي شبعانة
غسان:كذابة …كان لح يغمى عليها عند الباب
ام غسان:ههههه اي لأنوا بتحب الملوخية يلي انا بعملها
غسان:تعي كلي وحاج دلل
شام:كيف صار عابد أن شاء عم ياخد الأدوية بأنتظام
ام عابد:عم ياخدن بس ماعم يقبل يأكل وكل وقتو عم يدخن
شام:كيف بتسمحولو يدخن …وعم ياخد الدوا على معدة فاضية ..لح ادخل شوفو
ام غسان:بس لسا ماتغديتي
شام:برجع بتغده
(نقرت الباب …ودخلت ..وانصدمت من منظر الغرفة كلها دخان والريحة بتخنق …

شام:أحم أحم أحم ..(فتحت الشباك وبلشت شوبر بأديي لتروح الدخنة ) كيف قدران تتنفس
عابد:متعود
شام:باين ماشاء الله احم احم احم
عابد:خدي نفس
شام:ليش قدرانة اتنفس جوا الغرفة بموت
عابد:وليش معصبة
شام:ممكن اعرف ليش مستهتر بحالك لا عم تأكل وفوقها عم تدخن
عابد:وانتي وين طاقيتك
شام:نسيتها بره وأنت شو بدك بطاقيتي
عابد:ممكن تنوصي صوتك
شام:(كنت عم صرخ ومالي منتبهة ) انا آسفة
عابد:غسان قلي انك قوية بس ماتوقعت لهدرجة
شام (عقدت حواجبي …غسان هالغبي بس شاطر يحكي عليي )
عابد:شو قلتي
شام:ولاشي …
عابد:لتكوني زعلتي
شام:تو ابدا …خليني غيرلك على الجرح
)وانا عم لف الشاش شديت عليه قصدا
عابد:شوي شوي …
شام:….
عابد:إذا كل مريض تدايقتي منو بتعذبي هيك معد بيصفى عندك زبائن
شام:ليش عندك ندب كتير بضهرك وبكتفك
عابد:كنت مشكلجي وانا وصغير
شام:(اطلعت عليه بحيرة بصراحة جوابو ما أقنعني) لح أعطيك إبرة مسكن
عابد:مافي داعي الها ..مالي موجوع كتير
شام:وكمان مالك جوعان

عابد:مالي نفس
شام:بس انا لو بدالك بغير رأيي الملوخية يلي بتعملها خالتي ام غسان مابتتكرر
عابد:ههه مو باين عليكي أنك محبة للأكل
شام:انا بالعكس حتى اني كنت طبوشة كتير بس فجأة نحفت بس طوالي هاد نفسو معلق من الابتدائية
عابد:ههههه نيالك على هالروح الحلوة
شام؛(هربت بعيوني من نظراتو ) شكرا الك

(تكررت زياراتي لعندن بحجة اني عم اطمن عليه …كان في شي غريب شي عم يجذبني ويشدني كل كلمة ينطق فيها تضل معلقة برأسي مع انوا كان كلامو قليل وشخصيته مو مفهومة ماكنت مدركة انوا اناا حبيتو وتعلقت فيه …
آخر مرة كنت عندن …وبعد ما كشفت على جرحو واطمنت عليه
شام:هلق فيني قلك الحمد الله على السلامة
عابد:(تنهد) الله يسلمك
شام:لح تطلعو معنا مو هيك
عابد:لا ..
شام:كيف لا
عابد:لا يعني لا
شام:بس هون خطر عليك
عابد:….
شام:إذا ماعم تفكر بحالك فكر بآمك
عابد:…’
شام: طيب شو السبب
عابد:(وقف واتجاه لعند الشباك طالع سيجارة وبلش يدخن ) لاتسألي
شام:طيب ممكن أسألك سؤال واحد وتجاوبني بصدق
عابد:(هز راسو ) أكيد
شام :كيف تصاوبت
عابد:رصاصة طائشة
شام:رصاصة صايشة؟ ؟
عابد:اي وليش مستغربة يعني به البلد عاد تكوني ماشية وتنزل عليكي شي قذيفة او تاكلي رصاصة
شام:(مشيت بأتجاهو ) ايه صح بس رصاصة عن رصاصة بتفرق وخاصة وقت بيكون القناص او الرامي عرفان وين يصيب
عابد:(رفع عيونو وابتسملي ) ماشاء الله الكل صاير محلل ومفسر ومحقق
شام:لا أبدأ كان مجرد سؤال وحبيت اعرف ….عن أذنك
عابد:ليش بدك تعرفي شو بهمك ؟
شام:سأل حالك بجوز تعرف …..

(طلعت من عندن وانا عم حاول اخفي دموعي ..فكرة انوا لح نطلع من المنطقة ومعد شوفو تعبتني كتيرر. .
بعد شهرين كنت عم اطلعت بحيطان بيتنا الجديد وعم أتخيل ملامح وشو ..اطلعت بساعتي كانت 2 أنتفضت من مكاني غيرت تيابي ونزلت على الشغل ….
طبعا شغلي كان عبارة عن مساعدة دكتور بمشفى وهالدكتور كان بيدرس معي بنفس الجامعة ووقت طلبت منو مساعدة وشرحتلو ظروفي قبل يساعدني …
بس هالشغل كان مو سهل ابدا كل يوم كانت عم تجينا حالات بتبكي الحجر …

خلص دوامي على 8 طلعت ونطرت الباص …حسيت حدا مسك شنتايتي وشدها وانا من رعبتي لفيت وشي وبدي اضربو
شام: لك غسان ؟هاد انت
غسان:هههههه اي انا حبيت رعبك شوي
شام:اي لأنوا انا ناقصني مالك شايف جو الأكشن يلي عايشين فيه
غسان:هههههههه منظرك بضحك
شام:شو غليظ
غسان:هفف المهم جاية خبرك انوا لح نجي بكرا مشان نطلب لمى
شام:كتير منيح طيب لقيتو بيت
غسان:اي وقريب عليكن وخبرت محمد
شام :اي منيح
غسان:ليكي اجه الباص تعي نطلع ومنكمل حديثناعلى الطريق
شام:(بعد ربع ساعة وانا قاعدة عم اتسمع لحديث غسان خطرلي أسالو عن عابد ) غسان دخلك شو صار فيه ابن خالتك
غسان:قصدك عابد ….معد حكيت معو من وقت ماطلعنا
شام:هففف
غسان:ليش عم تسألي
شام:هيك خطر ببالي

(تاني يوم اجو بيت أهلو لغسان وطلبو لمى وأهلي وافقو كان الكل مبسوط بعد عشر ايام تحددت الخطبة وانا أنشغلت مع ماما ولمى بالتحضيرات

يوم الخطبة الصبح ..الساعة 8 فيقتنا ماما متل مكافحة الأرهاب
شام:امي مشان الله فينا اعرف ليش صواتك لأخر الحارة
امي:لأنوا ماحدا برد عليي فيني اعرف ليش مابدك تروحي مع أختك وتعملي شعرك
شام:هففف ياربي أختي العروس مو انا بعدين شغل الصالونات مابحبو بطلعو الوحدة متل الساحرة
امي:ااااااخ ياربي قلبي معد اقدر
شام:ركضت لعندها ) امي شبك
امي:انتي لح تموتيني ناقصني عمر
شام:بعيد الشر عنك …خلص يا روحي لا تعصبي
امي:يعني لح تروحي مع أختك
شام:يالله عرفت انك عاملة هيك قصدا (لح روح أمري لله )

(وقفت واطلعت على حالي بالمراية وانا عم أتأمل ملامحي يلي تبدلت وسمر ولمى واقفين فوق راسي
لمى:والله طالعة كتير حلوة
شام:اي بالفعل طالعة بشبه ستك لطيفة ووقت كانت تتمكيج لجدك
لمى:ههههههه
سمر:بصراحة وبدون زعل مو لابقلك
شام:بعرف ورايحة غسل وشي بلا ماحدا من المعزيم يرتعب من هالشوفة
لمى:وماما
شام:مالح تنتبه انتو طلعو وانا بدبر حالي

(بعد ماراحو فتحت الخزانة وطلعت فستان أسود ناعم بدل الفستان يلي لبستني ياه امي يلي طالعة فيه شبه المزهرية وغسلت وشي وحطيت مكياج خفيف وطلعت صح انوا امي وقت شافتني عملتي بإيدها الحركة المعهودة 👌 بس ماهمني رحت وأعدت جنب العروس لقيت لمى قاعدة وعم تدعي بصوت نايص
شام:ههه شبك لتكوني عم تدعي مايهرب العريس لا تخافي مالح يلاقي اهبل منك
لمى:لا عم أدعي مايقطعو الكهربا
شام:لا أن شاء بتمضى الخطبة ومابيقطعوها
لمى:هو وعدني مايقطعها
شام:مين هو
لمى:مابعرف بس انا اليوم دقيتلن وقلتلن اليوم خطبتي فل بترجاكن لاتقطعوها
شام:وهنن لح بردو عليكي
لمى:لك عم قلك وعدني

(تركتها عم تدعي ورحت ساعد سمر بالضيافة وبعد دقائق وصل غسان هو واهلو وهنن فايتين من باب البيت أنقطعت الكهربا …شهقت واطلعت بالمى يلي ماكانت باينةمن العتمة دخلت على المطبخ وانا مالي عرفانة أبكي ولا أضحك ….

إجت سمر راكضةلعندي …
سنر:شام في ناس لسا على الدرج خدي هاد الشاحن ووقفي عند الباب وضوي بلا ماحدا يوقع
شام:ماشي (وانا وقفة سمعت صوتو جاية من تحت قربت ووجهت الضو لوصل لعندي بقيت واقفة ومالي مصدقة …أما هو اطلع فيني غمزني ودخل بقيت عم راقبو بعيوني كان عم يسلم على محمد وماما رجع ميل راسو لعندي ورفعلي حواجبو مع ابتسامة انا هون فتت بالحيط …رجعت دخلت على المطبخ ..خبيت أديي بوشي وصرت أضحك

عابد:ممكن كاسة مي
شام:(من صوتو تلبكت ) ايه أكيد ثواني لشوف وين الكاسات (عبيت الكاسة وعطيتو ياها وكنت بعدني حاملة الشاحن وموجهتو عليه …مسك الشاحن وميلو بأتجاه وشي
عابد:يلي سماكي شام كان بيعرف انوا لح تكوني احلا من الشام
شام (قد ماحكيت عن هديك اللحظة مابقدر عبر كيف كنت عم حس صح أنها كانت ثواني قليلة بس انا وقتها حسيت الزمن توقف …
عابد:شكرا على المي .. (لف وشو ورجع أعد مع الضيوف )
سمر :شام …شام ..هييي …لك وين صافنة
شام:هون معك
سمر:يالله تعي بدن يلبسو المحابس
شام:يالله جاية

(مشيت مع سمر ووقفت جنب لمى يلي كانت طايرة من الفرحة ونسيانة الكهربا

لمى:يالله معقول ألبس المحابس هيك بدون اغاني
شام:معلش يا روحي مرقيها بكرا بالعرس حطي اغاني ورقصي قد مابدك
لمى:شام غني انتي والله صوتك حلو
شام (فتحت عيوني على الأخير ) شو غني هههه أكيد لا
لمى:الله يوفقك بس غنية وحدة
شام:لموش حياتي بلاها
غسان:شام كرمال لمى
شام:(هربت ورحت وقفت قدام امي ) ماما مشان الله انا مستحيل غني بموت ولابعملها
امي : يالطيف شو قليلة خير
شام:اي انا قليلة خير (رجعت وأعدت آخر شي مشان معد حدا يقلي غني وكل شوي أرفع عيوني وشوفو عم بطلع فيني ويضحك )

مرق يومين ورجعت الحياة لطبيعتها. ..وكالعادة كنت نازلة على المشفى ولمى كانت معي …كل الطريق وانا كنت حاسة في حدا عم يراقبنا بس ماخبرت لمى لأنها بتخاف. .
المشكلة انوا هالقصة تكررت معي كذا مرة وحتى انا صرت خاف ..يومها كنت مصرة اعرف مين …
دخلت على حارة وتخبيت ورا عامود …اول ماشفتو دخل منها طلعت و تفاجات

#حب_وحرب
#ليان_الشامي

شام:عابد !!
عابد:(تلبك ) شام …شو هالصدفة
شام:صدفة ولا حضرتك لاحقني
عابد:(هرب بعيونو ) وليش لحتى ألحقك
شام:لآخر مرة لح أسألك ليش عم تلحقني
عابد:شام ..ماعم افهم عليكي
شام:يااااربي لمرة وحدة كون صادق معي وجاوب بكل بساطة
عابد:هففف (رفعلي كتافو وتنهد ) مابعرف ولاتضلي عم تسألي لأني مابعرف ليش عم ألحقك
شام (اطلعت عليه بأستغراب) ماعم افهم عليك
عابد:فيني اعزمك على فنجان قهوة
شام:مابقدر ..الوقت اتأخر
عابد:مالح خليكي تتأخري
شام:طيب ماشي

(رحنا على أقرب كافيه واعدنا طلبنا 2 قهوة وبقي قاعد وساكت عم يتأمل فنجانو

شام:ايه …وبعدين
عابد:ههه مليتي
شام:يعني شوي
عابد:عنجد مابعرف شو بدي قلك ..
شام:خلصت فنجانك ..
عابد:اي ليش
شام:عطيني ياه
عابد:شو بدك فيه
شام:بدي طلع منو حكي يلي موقدران تحكي
عابد:ههههه تفضلي
شام:(أخدت الفنجان وقلبت فيه ) اممم كأنو في صورة بنت
عابد:بنت ؟هههه
شام:ايه خليني أحزر شو اول حرف من أسمها
عابد:تفضلي حزري
شام :اممم أ
عابد:رفعلي حواجبو ) تو
شام:طيب ب ت ث ج ح خ د ذ ر ز س ش
عابد:ليش وقفتي
شام:توقعت تقلي ستوب
عابد:وليش عند حرف الشين بالتحديد
شام:احم …عادي
عابد:عطيني فنجانك لشفلك انا
شام:ليش انت بتعرف بهيك شغلات
عابد:هاتي وحاج تسألي
شام:تفضل
عابد:قلب بالفنجان شوي ورجعلي ياه وسند ضهرو على الكرسي )
شام:شو شفت
عابد:شفت طريقين كل واحد بأتجاه ..تمام متل أقدارنا
شام:كيف يعني
عابد:انا وانتي أقدارنا مابتشبه بعض ومستحيل نلتقي بنفس الطريق مافي شي بيجمعنا
شام:لكن انا ليش هون
عابد:مابعرف
شام:عم تلعب معي شايفين بنت صغيرة
عابد:لا مو هيك
شام:لكن شووو
عابد:ليش بتعقدي الأمور وبتسألي كتير
شام:وقفت وطلعت بسرعة )
عابد:شام …لك شام استني
شام:نعم
عابد: فيني اعرف شو صار لحتى زعلتي يعني انا حبيت أشكرك على الشئ يلي عملتي معي ومشان هيك عزمتك على فنجان قهوة
شام:اه والله …على مين عم تضحك انت بس فهمني فجأة بتختفي وفجأة بتطلع وبتغزلني بنص بيتنا وبعدها بتلحقني وكل هالشي مشان تشكرني …كون صادق لمرة وحدة
عابد:ليش انا بشو كذبت عليكي
شام:هففف في وحدة تانية بحياتك صح
عابد:….
شام:شو لح تجاوب
عابد:ايه في
شام:وبتحبها
عابد:اي
شام:(أخدت نفس ) ها شفت كيف الأمور بسيطة …صار فيني قلك شكرا على فنجان القهوة
عابد :شام …انا آسف
شام:………تأخر الوقت ولازم ارجع

(بقيت يومين حابسة حالي بالبيت حسيت الدنيا تسكرت بوشي بهداك الوقت كنت حاسة حالي أغبى إنسانة على الأرض …

لمى:كمان اليوم مابدك تروحي على المشفى
شام:مالي نفس
لمى:حاسة شي عم يوجعك
شام:ايه معدتي عم توجعني وأغلب وقتي متوترة وقلبي عم يدق بسرعة وما عم أقدر نام
لمى’:(حطت ايدها على تمها وشهقت) اي لاااا
شام:شو صرلك
لمى:هدول أعراض الحب ياعزيزتي

شام:روحي من وشي حاج جنان
لمى:مين مين ….يالله احكيلي
شام:يالله مافي حدا ومشان هيك ماعندي شي أحكيلك ياه
لمى:هلق هيك …بتتذكري كيف حكيتلك اول ما حبيت غسان وحتى كنتي عراب هالقصة
شام:يلي بيسمعك عم تحكي بفكرك عم تحكي عن روميو وجوليت
لمى:ميرسي كتير …بس مالح حل عنك لحتى تحكي
شام:بتعرفي انا قايمة ساعد أمك بالمطبخ وانتي كملي حكي مع الحيطان

(فتت على المطبخ ..
شام:ماما بدك مساعدة
امي:اطلعت عليي من فوق لتحت ) من ايمت والله ماعرفتك
شام:الواحد مابيخلص معكن ..احسن شي أنزل بكرا على الشغل
امي:والله هالشغل لح يجبلي الجلطة وانتي خليكي معندة وراكبة رأسك
شام:طيب قليلي عندك حل شوفي محمد ماكان يلاقي شغل يعني لولا ها لكم قرش يلي عم اخدن كانت حالتنا بالويل
امي:ياربي دخيلك من وين عم تجينا هالمصايب وين كنا وين صرنا
شام:(قربت لعندها وحضنتها) ألما تفرج أهم الشئ انتي ماتزعلي ولا تنهمي
امي:الله يخليلي ياكن

تاني يوم جهزت حالي وبدي اطلع ..وقفتني امي عند الباب
امي:شام بلا ماتروحي اليوم قلبي ناقزني
شام:يا روحي والله مابقدر
امي:سمعت الأخبار والبلد كلها مكركبة
شام:لا تشغلي بالك هون مافي شي …صار لازم انزل اتأخرت
امي:الله يحميكي حاكيني كل شوي
شام: حاضر من عيوني

(دائما امي بتدعينا …من وقت مابلشنا نوعى ونروح على المدرسة ..وقبل ما أنام وكل مانسمع كلامها حتى وهي زعلانة كانت تقلنا الله يهديكن ..بحياتي ماحسيت بقيمة هالدعوات إلا هداك اليوم كلمة الله يحميني ..
كلشي بتذكرو وقتها اني نزلت من الباص ..وصوت قوي ومعد حسيت على شي ….
إلا والناس مجتمعين حواليي وكلام مو مفهوم …فتحت عيوني ..كان عابد فوق راسي عم يصحيني مابعرف كيف اجه وكيف كان جنبي لثواني كنت حاسة حالي عم أحلم …

عابد:شام …ردي عليي انتي منيحة ..
(هزيت برأسي وحاولت أجمع قوتي وقوم …
عابد:خليكي ..لاتقومي في جرح براسك
(لمست مكان الجرح واطلعت على اديي كانو كلن دم ….
شام:امي …بدي احكي مع امي
عابد:تعي معي ..خلينا نشوف جرحك وبعدها باخدك على البيت
(لف أيدي حوالين رقبتو وبأيد التانية على خصري. ..واطلع فيني وابتسم …
التفتت حواليي كان الأرض كلها دم وجثث وصريخ …وكأنوا أنتقلنا لعالم

بالمشفى …وبعد ماقطبو الجرح كنت اعدة على طرف السرير كنت لسا بحالة من الصدمة
عابد:شام …يالله خلينا نمشي
شام:(اطلعت بعيونو …وكنت مشتهية أبكي ..ماقدرت ..وكانوا في شي موقف بصدري كابت أنفاسي ) وبعدين ….قلي ..وفهمني وبعدين مع هالحالة

عابد:(سكت وما رد …طلعنا وأخذنا تكسي وكل الطريق ونحنا عم نتطلع ببعض وصلني لباب البناية وراح …امي اول ماشافتني معد حملوها اجريها مسكتها لمى وانا سمر ساعدتني لغير تيابي …أخدت الدوا وطلعت شوف ماما…كانت لمى عم تعطيها إبرة الأنسولين …أعدت حدها ومسكت ايدها

شام:ماما شوفي هي انا هون ومنيحة
امي:وهاد يلي براسك شووو …لو كان صايرلك شي انا شو بدي اعمل
شام:امي …مشااااان الله حاج تخافي حلك تتعودي …يعني خللللص شيلي هالخوف من قلبك مسحي ودوسي عليه
لمى:شام …؟
شام:شوووو عم احكي شي غلط
امي:نحنا لازم نترك البلد
شام:(وقفت ) انا مالي طالعة من هون …ويلي قلو عمر مابتقتلو شدة …وعلى فكرة انا شغلي مالح أتركه … (رحت على الغرفة وسكرت الباب …أخدت نفس مابعرف كيف حكيت هالحكي ..رغم يلي عشتو وشفتو بس ماكنت خايفة ..

بعد كذا مشكلة بيني وبين امي رضيت انزل على المشفى …

على الساعة 6 كنت وقفة ناطرة الباص …وقف حدي وكان مكتف أديه ..اطلعت عليه بطرف عيني ورجعت اطلعت بالسما

عابد:بتوعديني ..
شام:بشو
عابد:وعديني وبس
شام :(ميلت راسي لعندو ) هيك وعد على صفحة بيضا
عابد:….
شام:انتي كيف طلعتلي يوم الحادث
عابد:(التفت لعندي ) للمرة المليون لا تسألي
شام:اها ما أسأل شي وبالمقابل بدك ياني أوعدك
عابد:وعديني انك ماتتخلي عني لو شو ما صار
شام:والبنت. يلي بتحبها
عابد: كنت عم كذب
شام:……
عابد:(قرب خطوة مني ) ماعم أقدر بعد عنك …لهلق ريحة شعرك المبلول معلقة فيني
شام:(نزلت راسي وضحكت ) بفهم من كلامك انوا جاية تعترف بحبك ألي
عابد:تو …
شام:لكن ..
عابد:بتحبيني
شام:امممم لاتسأل
عابد:(رجع راسو وضحك بصوت عالي …كانت ضحكتو بتجنن بتخطف القلب ) هههههه من يوم ورايح لح تصيري شامي …شامي إلي وبس

(الحب …يلي بينخلق بظروف صعبة بضل محفور بالقلب ومستحيل ينمحى حبيت عابد بجنون …وتعلقت فيه وصرت خاف وقلبي يدق وقت مااطمن عليه نسيت كل الأحداث يلي مرقت وصرت حس الدنيا حلوة رغم انوا كان في مئة سؤال برأسي اتجاهو وخاصة انوا كان يغيب فترات طويلة وما أعرف هو وين بس وجودو بحياتي كان محسسني بالأمان

شام :كنت وافقة عند الكشك عم اخد كروسان ) بدي وحدة بجبنة ووحدة بشكولاة وحدة بزعتر
عابد:وتنين شاي
شام:(لفيت وشي كان واقف واريي عم يضحك ) نفسي اعرف كيف هيك بتطلع فجأة
عابد:ليش ماقلتلك

شام:لا ماقلتلي
عابد:انا بطل خارق
شام:ههههههه سوبر مان
عابد:لا يابنتي بات مان
شام:بنتك لكن
عابد:هههههه قصدي شاميتي بعدين لمين كل هالكروسان
شام:إلي والك
عابد:(قرصني من خدي ) امممم والله انا فارط من الجوع

اخدنا الكروسان والشاي ورحنا أعدنا بالحديقة يلي جنب المشفى )
عابد:شام
شام:ايه
عابد:أطلعي فيني
شام:(لفيت وشي لعندو ) وهي اطلعت
عابد:انتي بعدك عند وعدك إلي
شام:شو قصتك مع هالوعد صرلنا ست شهور مع بعض وكل مابتشوفني بتقلي نفس الجملة
عابد:لأنك لسا مابتعرفي مين انا
شام:(تنهدت )ولابدي أعرف منيح هيك …ليش مصر تخليني خاف منك
عابد:لأني انا هيك
شام:لا أنت مو هيك انا وقت بطلع بعيونك بضيع ووقت بكون حدك بنسى كل الدنيا
عابد:خدي شوفي هي (طالع من جاكيتو صورة)
شام:هاد انت
عابد:لا هاد أخي شق التوم
شام:ههههه يالطيف شو بيشبهك نسخة عنك
عابد:ايه صح كان نسخة عني نفس الشكل نفس التفكير ونفس الضحكة وحتى بنبرة الصوت
شام:شو قصدك بكلمة كان
عابد:أجتو رصاصة …..بس متل ما مرة قلتيلي رصاصة عن رصاصة بتفرق
شام:(كان عم يحكي وعيونو كلن دموع …أتأملت بملامحو وتذكرت ناس كتيررر كانو عم يحكو بنفس الوجع …فراق شخص غالي علينا صعب وبيقهر رجعت يومها على البيت وبالطريق صرت اطلع بعيون الناس ليلتها ماقدرت نام وانا عم فكر ياترى في بيت من هالبيوت ماداق العذاب ياترى كم مرة تهجرو وكم مرة فاقو وهنن مرعوبين من الأصوات وكم مرة نزلو دموعن من الحنين لحدا بعيد عنن …

بالمشفى )
كان بقيان ساعة ويخلص دوام …ماسكة كاسة قهوة وعم اشربها وأحكي مع الممرضات وقت سمعنا صوت سيارات وقفت ونزل منها شي عشرين شخص ومعهن حدا صوت صرخين عبى المشفى والكل ركض بأتجاهن. ..
ندهلي الدكتور سمير مشان الحقو على غرفة العمليات …بعد تلت ساعات اخد الدكتور نفس ومسح جبينو. ..نزف كتير لازم يضل 24 ساعة تحت المراقبة ..
طلعنا من الغرفة بدنا نروح على بيوتنا ….وقف واحد بوشن ورفع سلاحو بأتجاهنا

مجهول:لوين انت وياها
الدكتور سمير :العملية خلصت وهو تحت المراقبة ودوامنا خلص بدنا ناخد أذن مشان نروح على البيت
مجهول: اي نعم ..ماحدا لح يتحرك من مكانو لبين مايتحسن المعلم
شام:ويلي مابيقدر يبقى
مجهول:بالصرماية لح يبقى ..

(اطلعت بالدكتور سمير وكانت ملامح وشو مابتتفسر. ..
حسبنا الله ونعم الوكيل …شام خبري الكل يبقى وأتصلي بأهلك مشان ماينشغل بالن

بقي الكل قاعد على أعصابه وخاصة انوا في حدا واقف فوق رأسك ومعو سلاح …

شام:يا امي مابقدر اشرحلك شي على التليفون ….يارربي خلص بكرا راجعة ..ييي كل مرة نفس القصة مو حل اني أعد بالبيت ….طيب طيب ..ماينشغل بالك ..حاضر ..سلام

سكرت الخط ورجعت أعدت على الكرسي )
الدكتور سمير :قلب الأم
شام:ايه صح
الدكتور سمير : أن شاء بكرا منرجع على بيوتنا
شام:برأيك إذا مات لح يحطو الحق علينا
الدكتور سمير :أكيد لا بالنهاية نحنا عملنا يلي علينا
شام:حابة أسألك سؤال
الدكتور سمير :تفضلي
شام:هاد الشخص بيستحق ينعطى فرصة تانية للحياة
الدكتور سمير : ألتفتت حواليي ..واشرلي بإيدو اني نوص صوتي )هسسس مجنونة لحدا يسمعك
شام:اي بس مافي حدا غيرنا بالممر
الدكتور سمير :اي الحيطان الها أدان
شام:ههههههههههه
الدكتور سمير :ليش عم تضحكي
شام:لأنوا من انا وصغيرة بسمع هالجملة …وكل ماحدا يحكي حرف خارج الخط الأحمر يقلولو هسسس الحيطان الها أدان ..نحنا ربينا على الخوف ..وعشعش بقلوبنا منخاف من كلام الناس ومن كلمة عيب ..قبل حرام وحلال. .منخاف من العتمة ومنخاف من بكرا

الدكتور سميررفع راسو وضحك ) والله صايرة فيلسوفة
شام:هههههه

تاني يوم على الساعة 8 وبعد ما استقرت حالة المصاب …فرجو عنا طلعت من المشفى مو شايفة بعيوني من النعس ….
وقفت أكتر من نص ساعة وما كان حدا يوقفلي فقررت أمشي للموقف التاني …
اجاني صوت من ورايي ….أم خدود حمر …لفيت وشي وشفتو

شام:بتعرف لقب بات مان لابقلك كتيررر
عابد:(قرب مني ) أنا سيد الظلام هووووو
شام:انت كيف عرفت اني بعدني هون
عابد:مبارح كنت عند غسان وسمعت لمى عم تخبرو انوا أمك معصبة لأنك مو راجعة فاأنشغل بالي ..كنت بدي مر أخدك بس طلعتلي شغلة ولهلق لحتى خلصت
شام:منيح ماأجيت
عابد:ليش
شام:تلبكت ) لأنوا كان في حادث وجابو ناس كتير فاأنشغلنا
عابد:بس هيك
شام:اي …
عابد:ليش حاسس انك مخبيه عليي شي
شام:هههه من بات مان للمحقق كونان حياتي ثبات على شخصية
عابد:لا مو قصة تحقيق …بس عيونك مابيعرفو يكذبو …
شام:انا ما بكذب عليك …
عابد:(مسك أيدي ولبسني خاتم كان لابسو بإيدو ) بدي تكوني لإلي
شام:حطيت الخاتم بأصبعي وسكرت أيدي ) وانا بدي ههههه
عابد:يالله تعي وصلك …بلا ماحدا يسرقلي ياكي
شام:ييي ماحدا بيسترجي حتى سأل غسان كان على طول اضربو لأنوا يسرقلي السندويشات
عابد:هههههههه لكن انا ليش بحبك لأنك بطلة متلي
شام:وانا كتير بحبك

عابد:شامي …انا بدي غيب أسبوع بجوز أكتر بجوز أقل بس بوعدك ماأتأخر
شام:كل مرة بسمع منك هالكلام …وبتغيب أكتر
عابد:مجبور لولا هيك ماكانت بقدر أبعد عنك
شام:(وقفت واطلعت بعيونو )شو هو الشئ المجبور عليه …فهمني
عابد:شام …بوعدك بس اعمل الشئ يلي ببالي انوا ابقى حدك
شام:انت ليش مصر ماتخبرني وين بتختفي
عابد:…..
شام:كالعادة ماعندك جواب …متل مابدك …(تركتو واشرت للباص وطلعت …لحقني وطلع أعد حدي …

عابد:شام …شاميتي …خلص بقى بدك تضلي هيك ..بقيان شوي ومنوصل مابدك تتطلعي بعيوني وتقليلي لح أشتقلك
شام:كنت دايرة وشي بأتجاه الشباك بس ماقدرت ضل زعلانة ..) لح أشتقلك كتير
عابد:ههه دخيل هالعيون

قطع حديثنا صوت الشوفير
ياشباب الكل يطلع الهوايات لح نوصل على الحاجز

طلعت هويتي …وخليتها بإيدي …بعد دقائق …وقفنا انفتح الباب …وبلشو ياخدو الهوايات بس لفت أنتباهي شغلة …وقت العنصر اخد هوية عابد رجعلو ياها دغري بدون مايدقق فيها وحتى انوا أبتسملو ….
رجع مشي الباص …

شام:بتعرفو شي
عابد:لمين
شام:يلي شاف الهوايات
عابد:لا
شام:لكن ليش ابتسملك
عابد:خدي شوفي
شام:مسكت الهوية وفتحت عيوني على الأخير ..اطلعت فيه ورجعت أكدت فيها
عابد:ههه مو متل مو انتي مفكرة …بس هي (قرب وهمسلي ) مزورة
ولاتسالي شي تاني …لح تفهمي كلشي بوقتو

(نزلنا ..ووقفنا اول الحارة ..
شام:ماتتاخر عليي
عابد:شام خليكي واقفة معي كمان شوي
شام:اتأخر الوقت كتير وخايفة حدا من الجيران يشوفني
عابد:لاتروحي
شام:هههه شبك اليوم
عابد:مابعرف بس حاسس حالي معد شوفك
شام:ش وو هالحكي يالله منك …
عابد:والله مو قصدي خوفك بس ….هيك حاسس
شام:(مسكت ايدو ) اطلع فيني …نحنا في بينا وعد شو نسيت
عابد:….لا …بس
شام:بس شو
عابد:هففف ولاشي …. (شد على أيدي ) ديري بالك على حالك لبين ماأرجع
شام:وانت انتبه على حالك …صار فيني روح هلق
عابد:روحي …

(لفيت ضهري ومشيت ….وبكيت ماكنت قدرانة ارجع اطلع فيه

بعد أسبوع …كنت قاعد وعم فكر بعابد ..إجت وحدة من الممرضات وخبرتني انوا مريض رقم غرفة 21 بدو ياني
شام:يالله شو بدو كمان … من وقت ماجابو لهون ونحنا قاعدين على اعصابنا
الممرضة :مابعرف بس هو طالبك …
شام:ماشي لح اطلع شوف شو بدو
الممرضة :خدي هاد الدوا معك لأنوا صار وقتو
شام:هاتي لشوف شو أخرتها

(دخلت على الغرفة وانا معصبة …حطيت الدوا بالسيروم المعلق …وطالعت حبتين من العلبة مديت أيدي مشان ياخدن
شام:تفضل
سامر :وليش معصبة …هاد مو وش بتقابلي فيه مريض
شام:ونحنا لازم نتفتش كل مابدنا ندخل على الغرفة يعني صارت القصة مزعجة
سامر:له له له طولي بالك
شام:هون مشفى ..مو سجن او فرع أمني
سامر:ايه صح …على سيرة الأمن حابب اعرف عنك شوي فاجيبي هالكرسي وتعي خلينا أندردش شوي
شام:بلعت ريقي وتوترت ) ..
سامر:شبك أتبسمرتي بأرضك. .
شام:انت بتعرف شو أسمي ووين ساكنة وحتى عرفت كلشي عن اهلي شو لسا فيه
سامر:ليش كل ما اطلب منك نحكي بتتوتري وبتخافي شو كل هالقد بخوف ..ههههه
شام:…..فيني أفهم شو بدك مني
سامر: اممم بجوز معجب
شام:معجب ؟
سامر:ايه وليش أستغربتي …على حدا علمي مالك مرتبطة
شام:يلي وصلك المعلومة غلطان …
سامر:اها. ..ومين سعيد الحظ
شام:…..واحد
سامر:اسمو.. .شو اسمو
شام:….
سامر:شو ليكون مالو اسم …مجهول الهوية
شام:….
سامر:طيب لا تجاوبي …فيكي تروحي

طلعت من عندو وانا عم ارجف …وقلبي عم يدق بسرعة …شافني الدكتور سمير اخدني على غرفتو. .
الدكتور سمير :خدي شربي مي
شام:يسلمو…
الدكتور سمير : شو يلي صاير معك
شام :انا لازم أترك الشغل ضروري
الدكتور سمير :شو السبب
شام:قلتلو شو بدك مني ..قلي معجب ووقت قلتلو مرتبطة تغيرت ملامح وشو وسألني عن اسمو بس ماقدرت قلو
الدكتور سمير :الظاهر حاطك براسو وبدو يتسلى فيكي …
شام:وشو بدي اعمل هلق …
الدكتورسمير : رجعي مباشرة على البيت ولهون معد تجي …
شام:ماشي …
الدكتور سمير :انتبهي لحالك
شام:ماشي

(رجعت على البيت وخبرت امي اني تركت الشغل …مضى اول أسبوع والتاني ومافي اي خبر عن عابد حاولت اخد شي خبر من لمى وغسان بس ماحدا بيعرف او سمع عنو شي …
وبهدك اليوم وتحديدا الساعة 9 بالليل اندق الباب علينا بقوة …قلبي نقزني تذكرت ليلة يلي دقو علينا مشان عابد ….راح محمد وفتح الباب …وخلل ثواني كانو موقفينو جنب الحيط …دخل وفتشو البيت وقلبو قلب …بالبداية ماكنت منتبهة انوا هو معن …لوقت وقف جنبي …

سامر:يعني إذا تركتي الشغل …برأيك مابلاقي البيت

تحولت أنظار الكل عليي وبعيونن مية سؤال )
سامر:ليش واقفين …تفضلو البيت بيتكم ههههه بعدين شام بتعرفني كتير منيح
محمد:فيني نعرف شو القصة …
سامر:اي أكيد بالنهاية نحنا مامنحب نزعج حدا …. (طلع صورة عابد وحطها على الطاولة ) حدا بيعرف هاد الشخص

(حاولت ما أطلع بالصورة واتمالك أعصابي …

بقي الكل ساكت وعم يتطلعو ببعض

سامر:شو ….ماحدا لح يرد … على فكرة انا كان فيني روح لعند بيت خالتو …وأسالهن بس بتوقع انوا شام بتعرف وين مكانو أكتر

شام:انااااا. ..
سامر:اي ..أنتي ….مو هو صاحب هالخاتم يلي لابستي

امي:أكيد شام مالهت علاقة فيه …يعني نحنا ماشفنا الشب غير مرتين
سامر: اوف ….معقول مخبيه عن اهلك تو تو برأيي كتير عيب
شام:(أخدت نفس لا قدر كون قوية ) متل ماخبرتك امي نحنا مالنا علاقة
سامر:(وقف واحتدت ملامحو ) ليكي انا هالشب بدي ياه بدك تقولي وتعترفي وينو ولا
شام:ولا شو
سامر:ههه وقتها يا انتي يا محمد اختاري بقى
امي:(ضربت على وشها وصارت تبكي ) الله يوفقك ولادي مو عاملين شي مشان الله
سامر:بنتك متسترة على مجرم …
شام:طيب فيني اعرف كيف عرفت انوا مجرم
محمد:شاااام (صرخ عليي )
سامر:عامل فيها بطل ووقف ضددنا مابكفي هالشي
شام:اها …واقف ضددكن …مانحنا هي مشكلتنا صارت إذا انت مع ولا ضد ..وإذا كنت معي بقلبي وبعيوني وإذا كنت ضددي بقبرك بأرضك مو صح
امي:(مسكتني من أيدي وصارت تهزني ) خلص سكتي معد تحكي
سامر:انتي شو بفهمك بهالقصص
شام؛والله كلشي بفهمو انوا ماحدا عرفان شو عم يصير كل واحد ربي أسألك نفسي ..ومو رايحة غير على هالناس. .
سامر:بنصحك انوا تسمعي كلام أمك وتسكتي (رفع أصبعو بتهديد ) يومين معك يومين بس …لتقولي وينو او خلي يجي لهون وانا بعرف شغلي معو

(بعد ما طلعو من عنا …رفعت ايدها امي وضربتني كف …

امي:مبسوطة حضرتك …..لك شو مخبصة انتي شو عاملة …انتي شو الك علاقة بهداك الشب …من ايمت
لمى:امي طولي بالك …
امي:ولا كلمة بدي اسمع ،..هلق بتدقي لغسان خلي يعرف وين مكانو
شام:(أنتفضت من مكاني ) بدك يانا نقول وينو لك اصلا ماحدا بيعرف هو وين
امي:عم قلك خرسي …لكن ياخدوكي الك احسن

محمد:(طلع من الغرفة وكان عم يحكي مع واحد ) تمام …لا خلص بإذن الله ماشي الله معك ) اطلعو فيني معكن ساعتين أتضبو كلشي غراض بدنا نمشي
امي:لوين ؟
محمد:مابعرف …،بس المهم نطلع بسرعة …وانتي شام حسابك معي بس مو هلق جاوبيني انتي بتعرفي وينو للشب
شام:هزيت راسي )
محمد:كتير منيح ….يالله لكن قومو جهزو حالكن
لمى:طيب وغسان
محمد:مابعرف …..انا خبرتو وليكو جايي

(نزلنا الشناتي …وكنا عم نرمي الغراض بقلبها بسرعة …أما انا كنت واقفة ودموعي عم ينزلو لحالن …
إجت السيارة واخدو الغراض والكل نزل …

محمد:يالله شام ….
شام:….
محمد:شااااام يالله نزلي
شام:مابدي ….والله انا ما عملت شي
محمد:(قرب ومسحلي دموعي ) ليش خبيتي القصة عنا إذا الشب صرلو شي بيكون بسببك
شام:مابدي روح ..مابدي
محمد:ما عنا حل تاني …شوفي اطلعي نحنا خسرنا كلشي بس مافي داعي نخسر بعض

(جنب السيارة كانت لمى عم تبكي وغسان عم يهديها …كانت لحظات صعبة على الكل …شعور بالذنب وتأنيب الضمير على شي مابعرف إذا كنت انا سببو ..كل الطريق وانا عم اسأل حالي هالسؤال. …وغير شعور انوا قلبي عم يحترق ..

وصلنا على الحدود ….فتحت باب السيارة ونزلت …مرقت نسمة هوا باردة …اطلعت على الطريق كانت كلشي اسود …

بعد دقائق لمحت سيارة جاية من بعيد ومسرعة. ..وقفت قبل منا بشوي ونزل منها 3 أشخاص ..لفيت وشي …ورجعت بدي اطلع بالسيارة وقت اجاني صوتو …

عابد؛شااااام. ..
شام:(غمضت عيوني …كنت حاسة حالي عم أحلم )
عابد:لوين رايحة ….اطلعي فيني وقولي
شام:(اطلعت فيه …كان شكلو مختلف …تيابو وشعرو وحتى ريحتو ….نزلت ماما ولمى من السيارة )
امي:شام رجعي على السيارة هلق بيرجع محمد حاجتنا مصايب
لمى:عابد انت شو جابك لهون …وكيف عرفت اصلا
عابد:غسان …خبر أمي وهي خبرتني
شام:عابد …انا
عابد:شووو …بدك تهربي هيك ببساطة
امي:نحنا عم نهرب بسببك
عابد:ليش خالتي انا شو عامل …
لمى:في ناس اجت وكانو بدون نقول وين مكانك …
عابد:اها ..يعني انتو خايفين عليي مشان هيك عم تهربو
شام:لااا مو هيك …
عابد:(قرب مني ) لكن شو …؟ وين راح وعدك إلي
امي:تروك بنتي وروح …هي مادخلها
عابد:مادخلها ….لللللك بعد شو …
شام:انااا آسفة
عابد:آسفة …لك شام انا كنت بدي خلص وأنزل اطلبك من اهلك ونتزوج وانتي عند اول مشكلة هربتي بتعرفي خلص روحي …انا معد بدي ياكي معد بدي وحدة جبانة

شام:انا مالي جبانة ….كلشي عملتو بسببك وكل مرة أسألك وقلك وين عم تروح وحضرتك ماترد …شوووو بدك اعمل ياخدوني انا لحتى اثبتلك اني مالي جبانة

عابد:بدك تعرفي شو بعمل خدي مسكي وشوفي (قام الطاقية او خوذة كان حاططها على راسو ).).عرفتي مين بكون انا من ألف شب عم اشتغل هالشغلة …كلشي عم اعملو اني عم ساعد ناس عم تندفن تحت بيوتها .كل ذنبي أني حكيت كلمة حق.
اطلعي وشوفي شو مكتوب جواتها. ..حفرت اسمك عليها تماما متل قلبي …

شام:(خبيت عيوني بإيديي وانفجرت بدموعي )
امي:يالله شام …طلعي بدنا نمشي
شام:مابدي …بدي ضل هون
امي:شاااام ….

عابد:ليش عم تبكي …اطلعي فيني …اطلعي (ارتفعت نبرة صوتو ) ياريتك تركتيني بهديك الليلة موت كان أهون عليي روحي وعيشي حياتك وانسي انك عرفتيني
شام:تعى روح معنا
عابد:لا مابدي انتي رايحة مع اهلك وانا مابترك. اهلي
شام:امي الله يوفقك خليني. هون
عابد: انتي مفكرة اذا بقيتي هون لح سامحك
….بحياتي كلها مالح انسى انك جبانة وخاينة خلي هي معك مشان تعرفي انوا الشخص يلي حبيتي كان من أصحاب القبعات البيضاء ….

أنتهت …

أصحاب القبعات البيضاء هنن شباب وبنات ضحو بحياتهم ومستقبلهم كرمال يساعدو الناس يلي أنهدمت بيوتهم فوق رؤوسهم