#انا_رائدة
#بقلم_ايمان_خليل

الجزء الثاني : 

 

ام رائدة : قومي يا بنتي طلعت الشمس واحنا نايمين بدنا نروح نبيع الثياب بالمدينة ونلحق نرجع بدري
رائدة:طيب يما يلا يلا بس امشي الاولاد ع المدرسة ، يا رب لطفك يا الله يلا يا اولاد قوموا هسا بتتأخروا 
سامي : حاضر يما
رائدة : هي جهزتلكوا اغراضكو بس تخلصوا بتسكروا الباب وبتخلوا المفتاح عند خالتك ام فتحي .. يلا يمة نلحق الباص

وطلعنا ركبنا الباص ، وكان ازمة بالزور رضوا الشباب يقوموا نقعد محلهم ..
نزلنا وشفنا محل بعناه الثياب ، والحمدلله جابن سعر كويس ..
اشترينا خضرة وشوية فواكه ، و روحنا بتكسي اسمه معنا مصاري ..
التطريز مهنة متعبة وبتكسر الظهر ، بس بتمشي الحال ..

رائدة : وين رايحة يما
ام رائدة : بدي اجيب المفتاح من عند ام فتحي خلينا نلحق نطبخ للاولاد حرام هسا بيجوا جعانين
رائدة : بالاول بدي فنجان قهوة يعدلني وبعدين بفكر بالطبيخ
ام رائدة : اااه والله بدها

عملت فنجانين قهوة وقعدنا انا وامي نشرب قهوة على رواق ، الا حدا بدق ع الباب ..

ام رائدة : يا ترى مين الي جاي عنا
رائدة : يمكن الاولاد روحوا من المدرسة .. مين ؟!
ام رائدة : افتحي الباب يا رائدة
رائدة ( من ورا الباب ) : مين ؟
حميد : انا جوزك حميد
ام رائدة : ابعدي عن الباب انا بفتحه ، شو بدك ؟ الله لا كان جابك يا حميد
حميد : خير ان شاء الله
ام رائدة : هو انتي بيجي من وراك خير
حميد : الله يسامحك يا عمتي
ام رائدة : عما الدبب ان شاء الله
حميد : جاي ارجع مرتي
ام رائدة : مرتك من وين وانتي طلقتها
حميد : لسا العدة ثلاث شهور ما خلصت
رائدة : انا ما بدي اياك حل عني
حميد : واذا ما بترجعي بطلبك ببيت الطاعة
ام رائدة / رائدة : اطلع برا برا الله يلعنك

دفشوا برا وسكروا الباب ..

رائدة : شايفة يما هذا مجنون بعملها بطلبني بالمحكمة او بوخذ الاولاد
ام رائدة : يما انتي لازم تكسري الشر يا رائدة
رائدة : شو بتحكي يما
ام رائدة : اذا راح لأعمامك ، ما رح يسكتوا برجعوكي اله او بزعلوا
رائدة : كيف يعني بدي ارجع اعيش مع هالواطي ؟
ام رائدة : انتي اهدي شوي وفكري باولادك ، برجعوا ا لدار ابوهم هم اولى فيها
رائدة : مش طايقيته مش طايقيته
ام رائدة : الله يريحنا منه ويوخذه عن قريب

ونامت رائدة ليلها الطويل ، وما بتعرف شو الوعد الي مخبالها ..
و مر كم يوم ما حدا طل ، و رائدة قلقانة ..
المسا اجوا اعمامها الستة ، عشان يحكوا بالموضوع .. و بلشوا كل واحد من جهته ، لازم ترجع لجوزها ودارها تعبت فيهن ..
والوحدة ملهاش غير جوزها ..

رائدة : انا انظلمت وتعبت وكله راح ع الفاضي وتجوز عليه بشقاي وتعبي وانا ما برجع الا بشروط
عمها : و شو هالشروط ؟
رائدة : الدار تنكتب باسمي ، بدي اضمن حق اولادي بلا ما يكتبها باسم مرته الجديدة و ما تسكن عندي ولا بدي اشوفها
عمها : ماشي يا رائدة انا بنقله هالكلام وبنشوف
ام رائدة : الله يهديكي يا بنتي

و رائدة بتبكي وما الها حيلة ..
راح عمها ، و حكى لحميد الشروط و المفاجأة انه وافق .. و قال طلباتها اوامر ، و شوفوا الي بناسبكم وانا جاهز ..
وخلصت الاجراءات وبعد اسبوع بدها ترجع رائدة لحميد

رائدة ( حضنت امها و بتبكي ) : يما انا خايفة من حميد غدار خايفة يرجع يضربني
ام رائدة : لا يما ان شاء الله ايده تنكسر قبل ما يمدها عليكي ، وهي اعمامك موجودين ولا تخافي بالمرة

الصبح رائدة جهزت فطور ، و خلصت شغلها والغسيل ، وصحت امها من النوم ..

رائدة : يلا يما تعالي افطري ، يلا يا سامي يا حبيبي قوم افطر ، حسام ، كرم يلا قوموا الفطور جاهز يلا
ام رائدة : تسلم ايديكي يا حبيبتي كان صحيتيني اقوم اساعدك
رائدة : اخر فطور مع بعض وبعدين بنرجع للنكد والقرف
ام رائدة : يما لا تحكي هيك بظل ابو اولادك
سامي : خلص يما و لا يهمك و ابوي تغير بعد اللي صار معه
رائدة : الله يستر ويفرجها

طلعت رائدة ع الحوش تسقي الزريعة ، وتبكي وما نشفتلها دمعة ..
و اجا الموعد ، و وصل حميد معاه سيارة ..

حميد ( بلهفة ) : يلا يا اولاد جيت اخذكم بالسيارة هاي سيارة صاحبي جبتها عشان نروح فيها يلا جيبوا الاغراض وتعالوا ، ( عينه على رائدة ) كيف حالك يا رائدة ؟ انا جهزت كل اشي و الدار باسمك المهم تكوني راضية ومبسوطة
رائدة ( بنشافة ) : انا بطل اشي يبسطني انا ولا عمري بفرح
حميد : ان شاء الله كل اشي بتعوض ، و هي امي بتستناكي وطابختلنا دوالي عشان نتغدى مع بعض
يلا ع السيارة
رائدة ( في نفسها : ربي شو اللي صار الدنيا انقلبت معقول ، حميد صار يحبني وتغير يا رب يجبر بخاطري وخاطر هالاولاد ؟ )
ام رائدة : يلا يا رائدة جوزك بستناكي
رائدة ( صحيت من سرحانها ) : طيب يما هيني جاي

وركبوا السيارة ، و الاولاد فرحانين ..

سامي : يابا علمني سواقة
حميد : طيب يابا بعلمك بس هاي السيارة مش النا هاي لناس وبدي اروح ارجعها هاليومين

وصلوا الدار ، و نزلوا ..

رائدة : كل واحد يحمل شنتة يما
حميد : لا اتركيهن انا بحملهن انتي تفضلي ع بيتك ومطرحك
ام حميد : يا هلا يا هلا بالغالية يا هلا تفضلي والله اشتقنالك نورتي الدار
رائدة : اهلين يا عمتي و انا اشتقتلك و فكرت تيجي تزورينا ، الاولاد ضلوا يسألوا عنك
ام حميد : بعد الغدا بحكيلك كل شي صار يلا نجهز الغدا
رائدة : يلا جاية يا عمتي ، شو كل هالاكل تسلم ايديكي تعبناكي معنا
ام حميد : ولا يهمك المهم انك رجعتي الدار ما بتسوى اشي من دونك ، هاتي الخبزات والحقيني
رائدة : يلا ياسامي و حسام و كرم تعالوا تغدوا
ام حميد : تعالوا يا حبايبي ( حضنتهم و باستهم و طعمتهم بايدها )
حميد ( باكل و بطعمي باولاده ) : كلوا يابا ، يلا خذ هاللقمة مني
رائدة ( مصدومة و بتحكي في نفسها : شو اللي صاير بالدنيا ؟ )

بعد الغدا حميد طلع مشوار بالسيارة ، و انا استغليت الفرصة وسألت حماتي..

رائدة : عمتي كيف حميد خلص من الورطة وشو صار بلطيفة ؟
ام حميد : الله لا يذكرها بالخير لطيفة الساهية الداهية ما الها اثر ، حميد بعد ما انكسر من ورا السرقة ، و بلغنا الشرطة و كان عليه ديون و كان بده ينحبس ، لولا حماه ابو مرته الجديدة ساعده بمبلغ كبير ، فك الحجز عن الدار ، و هي رجعك و بده يعمل شغلة زغيرة يعيش منها ويسد حماه
رائدة : بس هيك بظل تحت رحمتهم
ام حميد : المهم يخلص من الديون وكل اشي اله حل ، انتي فوتي ارتاحي وضبي اغراض اولادك وبعدين بنحكي
رائدة : معك حق يا عمتي هيني رايحة

وغفيت و نمت نومي الطويل ، صحيت دورت على حميد لسا مو جاي ..
الساعة صارت عشرة بالليل ، اها رن الجرس اكيد اجا .. رحت افتح الباب لقيت حماتي نايمة في الصالون ، غطيتها و رحت فتحت الباب ..

رائدة : حميد ليش تأخرت ؟
حميد ( بتوتر ) : لا و لا اشي بس رحت رجعت السيارة لصاحبها و رجعت
رائدة : الله يعطيك العافية
حميد : تسلمي يلا خلينا نفوت ننام

الصبح صحيت ما لقيته، وين بروح هالزلمة ؟ ..
فتحت باب الغرفة الا هو صوته هو و امه بشربوا شاي ، و بحكوا ..

حميد : اتفقت مع التاجر وبكرا بده يجيب الحلال اعطيته عربون وبس يسلم بسلمه الباقيات
رائدة ( فجاة ) : حميد بدك ترجع تربي غنم ؟!
حميد : و الله يا رائدة هاي شغلتنا الي بنفهم فيها و اللي بتكسب ذهب هالايام و لا تنسي شو علينا بلاوي ومصاريف
رائدة : بس انا ما في حيل تعبت من هالقصة
حميد : يا رائدة هي امي وانا والاولاد بنساعدك

و رجعت ايام الشقى ، عشان هيك رجعني مين غيري بدها ترضى بالقرف ..
و ما استرجيت احكي و لا كلمة ، سكتت تنشوف اخرتها ..

رحت جهزت فطور اولادي نايمين ما راحوا يداوموا بالمدرسة قال تعبانين ..
الظهر وصل الحلال ، و استقبلهم حميد وفوتهم ..
ما كنت قادرة اطيقهم ، و رجعت انظف واكنس و احلب الغنمات ..
و عمتي بتعمل السمن و الجبن و الزبدة ، و كالعادة يروح حمبد يبيعهم ، و زباينا ما تغيروا لانه شغلنا نظيف ..

يوم ورا يوم الحال تحسن ، و معاملة حميد كثير تغيرت .. صار و لا احلى من هيك ، كم شهر بس و صرت اتعب و ادوخ شو القصة مش عارف ..

ام حميد : شكلك حامل
رائدة ( بقلق ) : حامل ! يا ويلي فوق التعب كمان تعب ، وين اروح بحالي

حميد طار عقله من الحمل ، و كل ما يشوفني تعبانة يحكيلي بلا دلع يلا يلا ما ظل اشي ..
و حتى مرته الثانية بعد ما نزلت حملها الاخير ، و بينهم مشاكل بطل يروح عندها كثير ..

قبل ما اولد بفترة قصيرة ، اجت عنا جارتنا ام صبحي ..

ام صبحي : ليش ما تروحي ع الدكتور عندهم جهاز تلفزيون بتعرفي بطنك شو فيه
ام حميد : اه و الله يا رائدة ، روحي و اعرفي شو ك تجيبي

ترددت بالبداية ، بس لما لقيت تشجيع من حماتي ، رحنا ع الدكتور وفحصني ع الجهاز ..

الدكتور : مبروك فيكي توأم بنات
ام حميد ( مكشرة ) : توووم بنات الله يعينك يا حميد

المهم ما ظل اشي للولادة ، و ما حدا رحمني بحلب الغنمات ، و بكنس و شغلي مثل ما هو ، لحد ما اجت ساعة الولادة ..
صحيت من النوم مغص قوي ، صحّيت حميد ..

رائدة ( بوجع ) : حميييد ، الحقني انا بطلق
حميد ( بخوف ) : يلا يلا ( قام بسرعة ينادي ) يما تعالي شوفي رائدة بتتوجع
ام حميد : خير ان شاء الله ؟ ، شو مالك يا رائدة مش اول مرة بتولدي ما انتي عارفة الوجع هيني رايحة انادي الداية وجاية بسرعة بتأخرش لا تخافي وانت يا حميد روح جيب امها يلا تطولش
حميد : يلا يلا
رائدة ( بوجع شديد ) : يا رب يا رب سهل

اجوا النسوان و الداية ( بسالوني ) ؛ عندك اواعي للولد ؟
رائدة : اه جهزنا هذول توم يعني بنتين
الداية : طيب سخني مي يا ام حميد
ام حميد : يلا يا حبيبتي بتهون

و جابوا شقفة قماش وحطوها بثمي عشان ما اصرخ ، و سكروا الابواب ، و الشاطرة الي بتحكي شدي شدي و انا ما ظل في حيل ..
بس فجاة الداية تركتني و طلعت تشوف حميد : يا حميد شكلها ولادة متعسرة روح جيب الدكتور ، الله يستر
حميد : شو دكتور يكشف عليها ؟ بدناش انتي ولديها مهي شغلتك
الداية : انت ما بتفهم بحكيلك ولادة متعسرة

بس طلع صوت مولود بصرخ ..
النسوان : الحقي يا ام رأفت
الداية : ما شاء الله ربنا سهل قولي يارب وشدي كمان شدي لا نزل المولود الثاني ، الحمد لله ع سلامتك ، الف مبرووك بنتين زي القمر
رائدة : الحمد لله الحمد لله

الداية : يلا مبروك توم البنات يا حميد ، بعرف فش حلوان بس والله البنات حناين احن 100 مرة من الاولاد
حميد : ههههه الحمد لله والك حلوان انا ما بقبل بناتي يكون حظهن ناقص ، خذي هي خمس ليرات
الداية : تسلم تسلم يا ابو سامي يلا مع السلامة
ام رائدة : يلا يما يا رائدة قومي كلي شوربة الفريكة عملتلك اياها ترم عظمك
رائدة : تسلم ايديكي يما ، بدك تظلي عندي ولا بدك تروحي ؟
ام رائدة : بظل عندك ابكرى وبعدين بصير اجي كل يوم اطل عليكي وهي حماتك بتقصرش
رائدة : ااااخ يما
ام رائدة : سلامتك يما ارتاحي

مرت الايام ، و خلصوا الاربعين يوم ..

ام حميد : شو يا رائدة ما بدك تشوفي الغنمات انا هلكت لحالي
رائدة : ااخ لو يسمع مني و يبيعهن بطلت الحق مع التوم
ام حميد : طب والعمل ؟
رائدة : لازم نلاقي حل
حميد : انا عندي حل
ام حميد / رائدة : شو هو ؟
حميد : مرتي الثانية عرضت تساعدني و تيجي تقعد معنا وتساعدنا بشغل الدار
رائدة ( بصدمة ) : انت شو بتحكي على جثتي ما بعيش معها
حميد : و بعدين يا رائدة ما انتي شايفة الوضع
رائدة : بس هاذ شرطي من الاول
حميد : هي بدها تيجي كم يوم بس و نفسها تشوف توم البنات ، زيارة يعني بس ، وانتي قلبك طيب يا رائدة
رائدة : لا تحكي معي انا ما بدي اشوفها
حميد : طب عندك حل ثاني ؟ بكرا امي بتعلمها الشغل و بتصير تساعدنا و لا ابيع الحلال ونرجع نشحد ؟
ام حميد : خلص يا بنتي اسمعي كلام جوزك و خليها تيجي نشوف كم يوم واذا ما عجبك بترجع
رائدة : و الله قلبي مش مرتاح

حميد كان مصمم ، و انا ما رضيت احكي لاهلي ما بدي المشاكل ترجع ..
و بعد اسبوع شرفت الست ، جابها حميد و جايبة معها شنتات انا خايفة تبلط ..

سعاد : مرحبا كيف حالكم كيفك يا حبيبي انت سامي ؟ ، كيف حالك يا رائدة ومبروك ما اجاكي لو انها متأخرة ، شوفي شو جبت لبناتك كل وحدة حلق ذهب ان شاء الله يعجبوكي
رائدة ( ضحكة صفراء ) اهلين
و بوستني
اهلا وسهلا فيكي يا سعاد
حماتي حبيبتي شو طابخين اليوم لاني جعانة
ام حميد : هههه والله طبخنا منسف وانا شو جبتيلي معك ؟
سعاد : و انا بقدر انساكي احلى صفط بقلاوة يستاهلوا ثمك من اغلى نوع بتشهي
ام حميد : اممم يلا منيح خير وبركة يلا تفضوا ع الغدا

والتمينا كلنا و اكلنا ، الا هي السنيورة بتغمز لحميد و اخذته لغرفة الاولاد وسكروا الباب ..
يا حبيبي هاي بدها تساعدنا ، هاي جاية تجلطني ، الله يوخذها ويريحني منها قادر يا كريم
بعد نص ساعة طلع حميد ..

حميد : يما افرشي للاولاد بالصالون و افرشي لسعاد بغرفة الاولاد

بالسهرة قعدنا و عملنا قهوة ، و فتحوا البقلاوة الي جايبيتها ..
بناتي مو راضيات يسكتن ، رحت اشوفهن بدهن غيار ، غيرتلهن و نيمتهن ..
طولت لحد طلعت اشوف وين راحوا ، الا حميد و سعاد بغرفة الاولاد وصوت ضحكتها معبي الدار ، و انا سكين و غزت بقلبي ..

طلعت الصبح ، لقيتها قاعدة و مادة رجليها منكرات و بتتفرج ع التلفزيون وبتتمايص ..
رائدة : صباح الخير
سعاد : هلا صباح النور
رائدة : وين حميد ؟
سعاد : هيو بلبس بده يطلع ع المدينة يبيع السمن والجبن
رائدة : و انتي رايحة معه ؟
سعاد : شو زهقتي مني ؟
رائدة : لا شو زهقت منك
سعاد : انا لسا ضايلة كم يوم
رائدة : ااااه
صوت بناتي طلع الا هي قامت تركض ..

سعاد : حبيباتي انا بحملهن وبهزهن انتي شو في حميد كان بده اياكي
حميد : تعالي يا رائدة كيف شفتي سعاد ؟
رائدة ( باستياء ) :كويسة
حميد : شفتي حكتلك و بعدين بتحب البنات خليها عندك بتساعدك فيهن و انا رايح بدك اشي
رائدة : سلامتك
حميد : يلا مع السلامة

فتت ع الغرفة لقيتها بتهز بالبنات وهن ساكتات ..

رائدة : ما دامك حبيتيهن خليهن عندك انزل اشوف حماتي تحت عند الغنمات
سعاد : اه اه روحي بضل اهز فيهن واسكتهن واذا بعيطن بناديكي

وهاي البلوة الي بلاني اياها حميد ؛ ضرة و مش راضية تروح ، بس بدها رضاي ، و هي ما بتنزل ابدا عند الغنمات واحنا الي بننزل ..
و الله لو انها عسل ما اني طايقها ..
و ظلينا ع هالحال انا بشتغل ، و حماتي شغل الدار كله عليها ،و ضرتي بس تشوف حميد بتتقعد تتغنوج وتقله انكسر ظهري ..
من ايش انكسر ظهرك من قعدة التلفزيون ..

سعاد : شايف ياحميد حتى اولادها مش طايقيني وما بحترموني وانا طول نهاري ادير بالي ع الدار و الاولاد

قام حميد جمعنا كل الي في الدار ..

حميد ( بعصبية و صوت عالي ) : هاي مرتي احترامها من احترامي والكل بده يحترمها ويا ويله اللي بسمع انه بضايقها باشي

و اخذته و راحوا ع الغرفة ..
المرة اكلت عقل الزلمة ، و بطل يشوف غيرها من دلعها و لبسها ..
و شافت حالها علينا ..
هذا اللي كنت خايفة منه و عاملة حسابه ..
مش عارف احكي معه و لا كلمة ، قال بنام بغرفتها عشان ما ينزعج من صوت البنات في الليل ..
اولادي صاروا يكرهوها ، و يسمعوها كلام تروح تشكي لابوهم ، يضربهم و انا احكيله تضربش الاولاد اتركهم و صارت حالتنا بالويل ..
و هي متسلطة و متحكمة فينا ..
انا بدور على طريقة احسس حميد اني كمان مرته واللي تعبت معه و هو يتهرب مني باي طريقة ..
تعبت منهم لازم اثبتله اني هو زوجي وانا بحبه و بدي يهتم فيي شوي ..

_____________________
___________________

بيوم من الايام سمعنا صوت و دوشة ، طلع حميد و رجع ..

حميد : الله يستر في حظر تجول و البلد فش فيها حدا
ام حميد :طب ظبيت الغنمات ؟
حميد : اه وسكرت عليهن

سعاد : تعال اقعد لا تروح و لا تيجي و الله خايفة يصير فيك اشي
ام حميد : شو بده يصير اليهود بعاد ما بقربوا
حميد : طيب انا هيني جاي
رائدة : وين رايح
حميد : بدي اشتري اغراض ودخان
رائدة : شو بده يطلعك ، اقعد ، انا بشتري اكيد ما حدا بحكي مع نسوان هات المصاري
حميد :خذي جربي
رائدة : هات
ام حميد : رائدة اقعدي
رائدة : ما بصيرلي اشي

و طلعت ، ما في مسافة الا صوت اطلاق نار ..
ما حدا استرجى يطلع يشوف شو في الا بعد ما فك حظر التجول ..
راحوا يركضوا ، الا هي متمددة ع الارض و مصاوبة ..
طلع حميد يركض و يصرخ : قلتلك تطلعيش ما رديتي و ينادي وكل الناس فزعت بس شو الفايدة رائدة راحت ، استشهدت ..
الله يرحمها ، وتجمعوا الناس واولادها وبناتها التوم يا حرام ، ما فيه غير ببكوا ..
ومثل كل الناس ، بمرق كم يوم وبنسوا او بتناسوا ..

_______________________

بعد كم سنة >>

كبرن البنات والاولاد كبروا بسن 12 البنات والاولاد بسن المراهقة ..
و سعاد ( بتنادي بصوت عالي ) : وينهن شذى و ندى لسا ما طلعن من عند الغنمات وامتى بدهن بجهزن فطور ؟ و لسا تنظيف الدار
ام حميد : لسا ما طلعن بظلن لقبل الظهر بشوي
سعاد : ول لقبل الظهر هن شو بدهن يعملن بس بكنسن و بنظفن ، و بس انتي الي بتحلبيهن وبتسوي السمن البلدي والجبنة
ام حميد : و انتي شو بدك تسوي
سعاد : انا انا مانتي عارفة يا عمتي مليش في الشغل بعرفش فيه
شذى : ااااخ هينا خلصنا
سعاد : يلا على المطبخ بسرعة جهزن الفطور متنا من الجوع ، ابوكي بده يطلع ع شغله
ندى : يلا حاضر

في المطبخ >>

شذى : لا اله الا الله ، طب بدناش نرتاح شوي و ليش ما تجهز الفطور هي ؟
ندى : اسكتي لحدا يسمعك والله ابوكي بموتك من الكتل
سعاد : شذى ندى يلاااا

كبر سامي، و مو طايق الدار ، من يوم ما ماتت امه محدا قادر يحكي معاه ، و عنيد ..
ابوه ما في الا الضرب ، و ما هامه غير سعاد تكون رضيانة
لدرجة انه كان يهرب عند اخواله ..

سامي : ابوي بضلوا يضربني يا بربطني وانا بكرهه بديش اعيش معه
خال سامي : هاذ الزلمة انجن و ما حدا قادر يحكي معاه
بظل ابوك ولازم تصبر عليه
سامي : مش قادر يا خال ، بده كل الي في الدار خدامين لسعاد و شايفها ومش مصدق
خال سامي : الله يرحمها امك كيف كاينة متحملة ؟ تعال بتصير تشتغل معاي وبتحوش و بتجوز وهي دار خالك فاضية بعد ما رحل بتسكن فيها
سامي : طيب و خواتي بنزلن من الساعة خمسة الصبح يشتغلن عند الغنمات ، و بظلن للظهر وبعدين بطلعن يشتغلن كل شغل الدار ، مش حرام وهن لساتهن زغار ينذلن كل هاذ الذل ؟
خال سامي : وجعت قلبي بس يكبرن شوي و بخطبوهن الناس و بتجوزن وخلي يدبر راسه و انت لا تشيل هم يا خال
سامي : يلا يا خال انا مروح اطل عليهن

////

حميد : وين كاين يا هامل ؟
سامي : كنت عند خالي
حميد : اه مانت تعودت تروح تشكي زي النسوان وتطلع اسرار الدار برا
سامي : لا يابا انا رحت ادور شغل وخالي بده يشغلني عنده
حميد : كذاب عمرك ما تفلح باشي
سامي :والله ما بكذب

في عصاية طلعها ..
حميد : انت ما بربيك الا العصاية ، فضحتوني بالبلد يا كلب

و صار يضرب فيه ..

شذى وندى : يابا اتركه خلص اتركه
سامي : والله مانا راجع ع الدار
حميد : روح انقلع
شذى : وين رايح يا اخوي ؟
خلص بدي اعيش عند اخوالي
سامي : بديش اعيش هان خلص بدي اعيش عند اخوالي ديري بالك ع حالك وع اخوانك
ندى : يا حبيبي يا اخوي

وشاعت القصة عن حميد و ظلمه لاولاده ، و انه مرته حاكميته و عن الذهب الي مشنشلها اياه ..

الناس صارت تزعل ع البنات ، صاروا يخطبوهم عشان يطلعوهم من الظلم اللي هن فيه ..

و فعلا انخطبوا و تجوزوا ، و بعدوا عن الغنمات ..
حميد امه مرضت وتعبت و مرته ما بتقدر تعمل اشي ، راح باع الغنمات ، و اشترى عفش جديد ، و غرفة نوم جديدة و زبط داره ..

لما اجا سامي يطلب منه يساعده طرده و قله بديش اشوف وجهك ..
سامي كبر و تجوز ، زبط دار خاله ..
و حميد صابه مرض السكري ، و بعد معاناة مع هالمرض ، صار معه غرغرينا دخل المستشفى مخطر
و مات ..
و مرته بتعد شهور العدة و مجهزة حالها ، لانه كل اشي مكتوب باسمها ..
بتبيع كل اشي ، و بتروح عند دار ابوها بالمدينة ..

النهاية ..