#سلسلة_ياسمينة_الروح
#نهفات_عيلتنا_3
#مذكرات_عاطفية
#بقلم_وعد_السعيد
 
الحلقة السادسة و العشرون :
 

سيرين : كيف منظري ؟
نهى ( شاردة الفكر ) : منيحة ، يلا لا اتطولي ما في وقت اصلا
سيرين : شو مالك ؟ حكوا اشي دايقك ؟ ازا ما ارتحتيلهم احكيلي
نهى : لا لا مناح ، يلا سابقتك
 
اخدت نفس ، و دخلت على غرفة الضيوف اللي قاعدين فيها ..
 
سيرين : مسا الخير
 
عيونهم تعلقت عليي ، و ردوا بصوت واحد : مسا النور
استقبلوني بابتسامة ، و انا بادلتهم نفس الابتسامة ..
 
ام حمزة : منورة يا سيرين ، كم عمرك حبيبتي ؟
سيرين : ٢٢
رانيا : درستي جامعة ؟
سيرين : اه الحمدلله ، الفصل هاد خلصت رياضيات
رزان : حلو ، معلمة رياضيات يعني ؟
نهى : اه ان شاءالله بس تاخد شهاداتها بتقدم
ام حمزة ( بنظرة تأملية و حاطة ايدها على فكها ) : انتي كم طولك بدون كعب ؟
نهى : يعني اقل من ١٦٠ بشوي
رانيا : ههههه ماما ، قصدها انه العريس طويل اسم الله بتبين جنبه قصيرة
نهى : لا عادي هي ابني نفس الاشي طويل و مرته اطول من سيرين بشوي
رزان : ههههههه
 
كان الحكي مو عاجبني ، بس مع هيك ضليت قاعدة ..
اكيد رح اضل بعد ما شفت اخته عيونها خضر و شقرا ، و اخته التانية بيضا و عيونها اسود ..
سميت بالله ، و تفائلت يطلع العريس حلو متل ما بحلم ..
 
سيرين ( بسبل بعيوني ) : كيف استعدادكم للعيد ؟
رزان : حلو ، مع انه رح نضل قاعدين بالبيت
سيرين : ههه متلنا
نهى : شو اسمه العريس ؟
رانيا : حمزة
نهى : عاشت الاسامي ، وين رح يسكن ؟
ام حمزة : اشترى شقة الحمدلله
رزان : بس بال…
نهى : اه حلوة ، الله يهينه ، يشوف على وجهها الخير
رانيا : تسلمي يارب ، يا الله خالتو شو وجهك مألوف ، و كلامك لطيف
ام حمزة : حاسة كاني شايفها من زمان ، كنتي تشتغلي ؟
نهى : اه و الله انا ممرضة ، بس من تمن سنوات قعدت
رزان : يا عيني انتي كمان ممرضة ، ليه ما درستي متل امك سيرين ؟
سيرين ( ما عرفت شو بدي ارد ) : …
نهى : و الله درست الي طلعلها ، ابوها من النوع اللي ما بحب يضغط على اولاده
ام حمزة : اه و الله الواحد يدرس رغبته ، اهم اشي انهم بدرسوا و يكونوا مثقفين و فهمانين
نهى : اكيد العلم سلاح سواء للشب او البنت
رانيا : شو بشتغل عمو ابو علاء ؟
سيرين : دكتور في جامعة … كلية التربية
ام حمزة و بناتها : ماشاءالله ، الله يخليلكم اياه
نهى : تسلموا
 
__________________________________
 
 
بعد ما افطرنا و قبل ما نروح على صلاة التراويح ..
 
امجد : خالي
ابو بيان : نعم ؟
امجد : حابب احكي بموضوع خاص ، في مجال نقعد شوي على انفراد
ابو بيان ( مستغرب ) : اكيد ، طمني خالي صاير معك اشي ؟ بدك اشي ؟
امجد : لا لا اتطمن انا بس بدي اصارحك بشغلة ، و بدي رايك بصراحة و خليك متطمن من ناحيتي لاني رح اكون متل ما بتؤمرني و اكثر
ابو بيان : ما يؤمر عليك ظالم ، انت مثل ابني و الله ، و كلكم اولادنا ، احكي
امجد : بصراحة يا خال انا من مبارح ما دقت الراحة ، و عقلي مشغول بالموضوع اللي انتشر على لسانات كل العيلة
ابو بيان : اي موضوع ؟
امجد : انه في واحد متقدم يخطب المحروسة بنتك ، و انتوا موافقين
ابو بيان ( بانت علامات الفرحة على وجهه ) : ااااه ؟؟
امجد ( بخجل ) : انا .. احم .. انا بدي اطلبها منك على سنة الله و رسوله ، بس ..
ابو بيان ( مبسوط بس بحاول ما يظهر ) : بس شو ؟
امجد : يعني بتعرف الوضع ، و اني لسا ما كونت حالي ولا امنت مستقبلي الا بهالشهادة اللي اخذتها السنة ، بس بوعدك احاول قد ما اقدر
ابو بيان : حكيت لاهلك ؟
امجد ( بثقة ) : صراحة اه ، بس ما بعرفوا اني رح احكيلك
ابو بيان ( ضرب على كتف امجد ) : انت كبرت بعيني كثير يا امجد ، اذا بيان وافقت عليك ما رح تكون الا الك باذن الله
امجد ( بلهفة ) : حبيبي يا خال و الله فضلت على راسي ، بستنى ردك باقرب وقت
ابو بيان : و لا يهمك هههه
 
ردة فعله كانت مثل ما توقعها عمر ، يا الله معروفه معي ما بنساله اياه ..
اعطاني الفكرة و شجعني عليها ، و كانت بمحلها ..
و انا ابدعت بترتيب كلامي ، يا سلام عليك يا امجد ..
المجد لك ، و العلياء ، لا البيان من وين اجت علياء ..
 
خليني ارن على سيرين اطمنها ، مالها ما بترد ؟ ..
خلص ببعتلها عالواتس ، و بتشوف لما تخلص جلي مسكينة هههه ..
 
احمد : بتحكي مع حالك وله ؟
امجد : لا مع التلفون ، يلا طالعين عالصلاة ؟
علاء : انا مروح على بيتي على طول بعد الصلاة
احمد : خليك بنشوف هيثم ، يمكن يجي هسة
علاء : لا تركت ريم لحالها ، لازم اروح
امجد : الله يعينها عليك يا زلمة
احمد : هششش وله
علاء : …
 
__________________________________
 
 
ابو علاء : مالك يا حج ، كانك بتستنى حدا ؟
ابو حمزة : و الله العيلة جايين ضيوف عند جماعة بهالشارع ، و النية بعد الصلاة يطلعوا ، تاخروا عليي ابصر مالهم ؟
ابو علاء : ههههه النسوان كلهم هيك ، تفضل خلينا نكسبك
ابو حمزة : تسلم ، لا الا ما يطلعوا هسة ، هاد البيت اللي فاتوا عليه
ابو علاء ( تفاجأ ) : انت ابو العريس يعني ؟
ابو حمزة : و كيف عرفتني ؟
ابو علاء : هههه هاد بيتي تفضل اهلا و سهلا
نهى : ابو علاء ، رجعت ؟
ابو علاء : اه سكروا الباب ، معي الرجال اللي جاي مع الجماعة اللي عندك
نهى : اهلا و سهلا ، يلا تفضل
 
ام حمزة : صارت مخلصة الصلاة ؟
نهى : اه هي ابو علاء لقى زوجك و اجا معه
رانيا : نسينا بابا يا حرام هههه بكون بستنى فينا
سيرين : خليني احطله ضيافة ، عن ازنكم
رزان : كلك زوء يا عسل
رانيا : اه و الله عسل الله يحميها ، كتير حبيناكم يا خالتو
نهى : حبيبتي و احنا كمان ، الله يجيب اللي فيه الخير
ام حمزة : بدك الصراحة يا ام علاء
نهى : تفضلي
ام حمزة : ابني شافها و الا بده اياها ، و ضل وراها لجاب رقمها ، بس من وين جابه ما بعرف
نهى ( مستغربة و مبسوطة ) : سبحان الله ، ياستي ان شاءالله بيجي بعد العيد و بشوفها و بقعدوا و بتفاهموا ، و احنا ما علينا الا ندعيلهم
رانيا : اه و الله كلامك درر ، الدنيا قسمة و نصيب ما حدا بعرف نصيبه وين
نهى ( عيونها على رانيا بحسرة ) : يا حبيبتي
ام حمزة : ازعجناكم و اخدنا من وقتك بهالايام
نهى ( بغصة و مترددة تحكي او لا ) : و الله انا ما عندي اشي ، لولا اخوي ان شاءالله يارب عقبال اولادك اجاه ولد اول مبارح ، و التهينا فيه و مرته تعبانة شوي
ام حمزة : يا ستي الف مبروك و الحمدلله عسلامتها
سيرين : عمو مستعجل ، بقلكم استعدوا
ام حمزة : يلا ، كل عام و انتوا بخير
رانيا : فرصة سعيدة ، ان شاءالله بناخد موعد احنا و العريس على فضاوتكم
نهى : بردلكم خبر بعد العيد على طول
 
ابو علاء : مالك ؟
نهى : الحقني عالغرفة
ابو علاء : خير ؟ ليه بترجفي ؟
نهى ( قعدت على طرف التخت بتثاقل و شبكت ايديها ) : شفت البنت اللي كانت ماشية جنب امها ؟
ابو علاء : لا ما انتبهت كثير ، مالها طيب ؟
نهى : بدي احكيلك القصة لانه قلبي مو متحمل لحاله يحمل
ابو علاء : احكي لنشوف ، نشفتي ريقي
 
__________________________________
 
 
ياسمين : زاكي الكعك ؟
احمد : بششششهي ، طلعتي معدلة يا بنت
ياسمين ( بخجل ) : عشان تعرف ياسمينة روحك مو قليلة
احمد : انتي دقتيه ؟
ياسمين : اه بعد الادان على طول اكلت ، بدي اتطمن
احمد : اممم صايمة يعني ؟
ياسمين : نعم ؟ شو رايك ؟
احمد : عادي احتمال تكوني مفطرة مثلا
ياسمين : لا اتطمن صايمة ، شكلي حامل ههههه
احمد ( بغضب ) : ولي
ياسمين : ههههه بمزح مالك
احمد : ما بحب هالمزح انا ، لو حدا سمعك بصدق
ياسمين : طيب ، المهم بدي احدد موعد الفحص ، بس حابة تكون معي شو رايك ؟
احمد : اه انا اللي بكون ، حددي اي وقت عادي باجي
ياسمين : و شغلك ؟ كيف رح تطلع
احمد : انتي ما تهكلي هم ، ديبك انا
ياسمين : يا روحي ، كنت حابة انك تيجي اليوم و اشوفك ، بس ما الي نصيب
احمد : جهزي حالك للعيد ، محضرلك عيدية بتجنن
ياسمين : يا سلام ، مفاجأة يعني ؟
احمد : هيك اشي
 
__________________________________
 
 
ابو علاء : لا لا ما بصدق ، لهالدرجة الصدف قوية تجمعه فيها
نهى : شو رح تعمل بس تعرف انه اخوي ؟ من لما عرفتها و انا افكر بس بهيثم و ردة فعله لما يرجع يلتقي فيها من جديد ، في حال صار نصيب لسيرين
ابو علاء : خصوصا انه قاعد بدور عليها ، على حسب ما حكالك
نهى : بس هلا انشغل بزينة و اللي عملته بحالها
ابو علاء : يعني صايبها اكتئاب بعد الولادة
نهى : الله يسترها ، لو شفت ابنها بقطع القلب ، امي ما نشفت دمعتها
ابو علاء : قلبي تقطع عليهم ، و الله هيثم بعتبره مثل علاء
نهى : هالبنت ما احسنها ، شو كان صار لو كانت بدل زينة ؟ يا الله حظه
ابو علاء : ما بتعرفي ربك شو كاتب
نهى : اللي كاتبه الله بصير ، خليني اشوف سيرين ، شكلها عجبتهم و حكولي انه .. انه
ابو علاء : انه شو ؟
نهى ( متلبكة مع ضحكة تخفي توترها ) : ههه انهم حبونا كتير
ابو علاء : ان شاء بطلع ابن حلال و بنتطمن على هالبنت
 
__________________________________
 
 
ديمة : حلو هاد اللون عدي ؟
عدي : عليكي كل اشي بجنن ، المهم انتي تكوني مرتاحة بالموديل
سهى : هههههه لا رح نخلص اليوم
عدي : انا حابب تلبس اشي مميز ، يعني ما تكرري اللي لبسوه بنات العيلة من قبل
ديمة : اممم معك حق ، خليني اتزكر كيف كانت بدلاتهم
سهى : شوفي هاي ؟
عدي : لونها خرااافي ، جربيها حبيبتي
ديمة ( زورته و عضت على شفايفها ) : يلا يلا
سهى ( كاتمة ضحكتها ) : يا حبيبي يا عمتو سامحني لاني ظلمتك من قبل ، و الله كل يوم بدعي ربنا يسامحني لاني كسرت بخاطرك انت و اياها
عدي ( شدها بايده من كتفها و ضمها ) : شو هالحكي هاد ؟ انسي الماضي احنا اولاد اليوم و الله كاتب قدر و لازم يصير ، و هي الحمدلله كل اشي متل ما تمنينا و احلى
سهى : الله يرضى عليك ، و يخليكم لبعض
 
__________________________________
 
 
كل شوي اتطلع عالباب ، و اتخيل علاء رجع لعندي ..
بعد ما طلع ، و حكيت مع اهلي ، عاساس انه هو الغلطان ..
اجو عندي بعد الفطور ماما و بابا ، و عرفوني غلطي ..
و بنفس الوقت مو منكرين غلط علاء ، بس فرصتي بانه يكون معي الحق ضيعتها من ايدي ..
كان لازم اشغل عقلي خلال النقاش ، خصوصا انه كان على مستوى افراد كبيرة ..
يعني كلمتي محسوبة ، و بتعطي نظرة عني و عن تفكيري ..
 
علاء : السلام عليكم
ريم ( بلهفة ) : و عليكم السلام ، وين كنت قلقتني عليك كتير
 
ردة فعلي فاجأته ، لانه ما توقع اكون الا زعلانة ..
 
علاء ( بحب ) : سامحيني ، طلعت حتى ما اعصب اكثر و اغلط
ريم ( ببكي ) : و انت كمان سامحني
علاء ( مسح دموعها و ضمها ) : لا تبكي ، خلص اللي صار صار ، طمنيني كيفك ؟ افطرتي منيح
ريم ( بهز براسي ) : غصبن عني طعمتني ديمة ، ما كنت قادرة اكل
علاء : حكيتي لاهلك يعني ؟
ريم : حكيت مع قصي و ديمة يجوا يفطروا عندي ، كنت خايفة
علاء : تمام ، يلا تعال ارتاحي خلص انا معك حبيبتي
 
__________________________________
 
 
ياسمين : بدي ارن على سيرين اتطمن
حنين : عشان العريس
ياسمين : يس يس ، الو
سيرين : هلا ، كيفك ؟
ياسمين : الحمدلله ، انتي شو صار معك اجوا الجماعة ؟
سيرين : ولك اااخ شكله رح يكون حلو متل هداك الشب اللي شفته
ياسمين : شو عرفك ههههه
سيرين : اخته عيونها متل عيونه ، و شقرا كمان ، و اخته التانية كمان بيضا و حلوة
ياسمين : و انتي هبلة و بشعة هههه
سيرين : ههههه تضربي ، المهم احزري شو صار معي مبارح ؟
ياسمين : شو صار كمان ؟
 
حكتلي سيرين كل اللي صار بينها و بين امجد ..
 
ياسمين ( بدهشة ) : يمة عالنصب يمة ، و من مبارح كانّة على خمسين دينار لحالك و ما بتخبري
سيرين : هههههههه هاد اللي هامك انتي
ياسمين : المهم عملتيله حجاب بهالمبلغ ؟
سيرين : حجاب شو ولك هههه ، اسكتي راح طلبها من ابوها اليوم
ياسمين : امااانة ؟! و وافق خالو ؟
سيرين : حكاله ازا وافقت بيان ما رح تكون الا الك
ياسمين : يا حبيبي ، و الله و لعب معك الزهر يا امجد
سيرين : شفتي شفتي
ياسمين : انا اليوم عملت كعك بطحين لاحموودتي
سيرين : يا عيني ، يعطيكي العافية
ياسمين : و اجا امجد اخده هو وعمر كانوا عند خالو هيثم ، انهبل امجد بس شاف انه كعك ههههه
سيرين : ههههه يا حرام عشنهم صايمين رح يتشهونوا
ياسمين : المهم راح عند دار سيدي مع عمر عاساس ياخدوا الكعكات ، بس احمد لحقهم
سيرين : ههههه شرطة و حرامية
ياسمين : بالزبط هههه و اجا علاء كمان بس بدون ريم ، كانه بعدهم متزاعلين
سيرين : احلفي ؟ يييي و الله بابا طول اليوم بفكر فيهم كتير زعلان
ياسمين : طمنيني ازا عرفتي اخبار
 
__________________________________
 

منى : احكيلي اجا هيثم ؟
احمد : للاسف ما قدر ، زينة حالتها صعبة ، و ما قدر يتركها ، و الولد حطه عند امها لحد ما ترتاح شوي ، مو قادرة تتقبله او تسمع صوته
منى ( بتضرب بكفوف ايديها ) : يا ربي دخيلك ، ارحم هالولد و ارعاه ، الله احسن من الكل
احمد : اه و الله و علاء كمان كان كثير متدايق
منى : يييي شو مالهم الله يهديهم ، التانية تكبر عقلها مو مستاهلة
آيات : ليه ما هو يحترمها قدام اهلها و قرايبهم ، عيب عليه
امجد ( اجا من مكان ثاني و فاجاهم ) : موضوع تافه ، ما كان في داعي ينفتح اصلا
منى : انت بتعرف ؟
امجد ( بثقة ) : اكيد بعرف ، ليه في اشي بيتخبى ، المهم انسوا القصة ما في اشي رح يصير
احمد : شو هالثقة ؟
امجد : طلبت ايدها من خالي اليوم وانبسط كثير ، كبرت بعينه
منى ( عيونها على احمد و آيات ) : بتحكي جد انت ؟
امجد : يا حبيبتي اكيد فرحتي لابنك انه كبر و رح تفرحي فيه و تشوفيه مع عروس مثل بيان
احمد : هيهيهي لا ما فرحت
امجد : انا ما حكيت بكرا العرس ، بس عملت اللي ما قدرتوا انتوا تعملوه ، يعني باختصار حجزتها
منى : يا رب تصبرني ، الله يعينك يا يحيى على هالخلفة اللي عندك
امجد : مالك عصبتي ؟ دوقي كعكات بنت اختك بتروقي
منى : الله يسلم ايديها ، اه و الله بشهوا
آيات : هههههه
امجد ( متجاكر من امه و آيات ) : … سوسة ولي ، ليه بتضحكي ؟
آيات ( بترفع حواجبها بجكر ) : سلامتك يا عريس هههههه

__________________________________
 
 
ابو بيان : مو قلتلك انه امجد بده اياها
ام بيان : يا الله ، و اخيرا رح اشوفها مع حدا رايدها
ابو بيان : الحمدلله ، المهم هسة نسالها و نشوف شو ردة فعلها ، حتى اعطيه جواب
ام بيان : انا بسالها احسن ، حتى ما تنحرج معك
 
بيان : نعم ماما ؟
ام بيان : ماما حبيبتي انا عارفة انك ماخدة على خاطرك شوي مني ، بس بوعدك كل اشي يكون متل ما بدك بتعرفي ما النا غيرك بهالدنيا
بيان : ماما شو هالحكي ، انتوا اهلي و بتعرفوا مصلحتي احسن مني
ام بيان : يا روحي ، صار اشي اليوم ما كنت متوقعته ، امجد ابن عمتك طلب ايدك من ابوكي
بيان ( مصدومة مع ابتسامة ) : امجد ؟
ام بيان : انبسطتي ؟
بيان ( خجلت ) : لا عادي بس انصدمت منه
ام بيان : ابوكي بده جوابك ، هو بكير عالموضوع بس حابب يحجزك يعني ، و مبين عليه رايدك
بيان : و انتي شو رح تحكي لدار خالي ؟
ام بيان : اساسا هلا ما رح يصير اشي رسمي بينك و بين امجد الا لما تتخرجي على خير ، ف بنحكيلهم انه ما بدي اغربك و لسا بدي تكملي دراستك
بيان : الله يخليلي اياكي يا ماما ، انا موافقة على امجد ازا انتوا موافقين
ام بيان : بهالسرعة ؟ طيب فكري
بيان ( صحيت على حالها شو حكت ) : قصدي رح استخير و افكر كتير ان شاءالله
 
__________________________________
 
 
نهى : اتطلعي عليي ، انتي بتعرفيه للشب اللي اجوا اهله ؟
سيرين ( بدهشة ) : انا ؟ من وين بدي اعرف يا حسرة
نهى : ولا من وين جاب رقمك ؟ اشمعنى هالعريس بالزات رقمك انتي مو انا اللي حكوا علي
سيرين ( بلعت ريقي ) : و انا شو بعرفني ، يمكن وحدة من صحباتي اللي داليتهم
نهى : بتستهبلي ؟ امه حكتلي انه شافك و ضل وراكي لجاب رقمك
سيرين ( فتحت عيونها ) : الله اكبر ، معقول ؟ الحمدلله يا ربي في حدا شافني و ضل وراي لجاب رقمي لللووووييييششش هههه ماما اوعي تحكي هالحكي قدام علاء او بابا بلاش يصدقوا متلك
نهى : طيب ، اخرتنا نعرف من وين اجا
سيرين : سمعتي اخر الاخبار ؟
 
حكيت لماما كل اشي سمعته من ياسمين ..
 
نهى : ييييي لو يعرف ابوكي
سيرين : برايي بلا ما يعرف خلص ، انا هلا برن عليه و بحكيله عن الجماعة ، و بدقدقس عنه
نهى : و ياسمين المعدلة عاملة الكعك يا ويلي عليها ، السيد احمد بتشهون قبل ما يسافر و ينحرم
سيرين : يا حبيبتي ، على شحطة كنت رح احكيلها الله ستر
نهى : لا اوعي بلاش يزعل احمد ، رني على علاء و افتحي سبيكر خليني اسمع صوته
سيرين : يلا .. عم برن .. الو كيفك علووئتي
علاء : اهلين ، كيفك انتي ؟ طمنيني
سيرين : الحمدلله تمام ، اجو الجماعة و انبسطنا
علاء : انبسطتوا ؟!
سيرين : هههه لك ايييه يعني القعدة حلوة و مريحة
علاء : يعني رح نخلص منك ؟
سيرين : ان شاءالله ، ( نهى : بتاشر حتى ادخل بالموضوع ) ، المهم كيف ريم ؟ شو عم تعملوا ؟
علاء : الحمدلله هينا قاعدين عقلها بالكعك نفسها تعمل قال
سيرين ( نهى : بتحرك باصبعها لا لا ) ، لا شو بدها بالحكي هاد هي احنا عملنا النا و الكم و دارخالتو سهى كمان ، و بتجيوا جاهز
علاء : حكتلها ، خلص شكلي رح ضل فوق راسها لحد ما تبطل تنق لانها تعبانة شوي حاسسها احكي لامي انها بتحس بدوخة
سيرين ( نهى مبتسمة و بتهمس : عادي عادي ) ، يييي هاي الشغلات طبيعية بتحكيلك
علاء : الحمدلله ، يلا سلمي على الجميع
سيرين : الله يسلمك ، تصبحوا على خير
نهى : صوته منيح
سيرين : ههههه دخيلها اللي بتفهم عالصوت
نهى : هاد ابني و بعرفه ، اللله يهدي بالهم
 
__________________________________
 
 
ابو احمد : نفسي افهم مالكم زعلانين ؟ انا مو شايف انه عمل اشي خطا
منى : لا ابدا بس حطنا تحت الامر الواقع
ابو احمد : لا احنا كنا معارضين لانه كان بعده بدرس ، هسة تخرج و صار مسؤول من نفسه يدبر راسه
احمد : لا انا ما بدي بيان
ابو احمد : شو هالحكي ؟ انت بدك تتجوزها و لا هو ؟
احمد : هو ، يعني اخوي ، و مصلحة اخوي بتهمني ، يمكن تطلع ما بتخلف متل امها
منى ( مصدومة ) : مين قال انه امها ما بتخلف ؟
احمد : طول عمري بسمع انه من مرت خالي ليلى عندها مشاكل كانت
منى : لا يا حرام هية حكت هالحكي عشان بتحب خالك ، حطت العلة فيها ، المشكلة لا فيه و لا فيها بس نصيبهم هيك الحمدلله
احمد ( انصدم ) : …
آيات : يعني خلص موافقين عليها كلكم ؟
ابو احمد : اي هو بنلاقي احسن منها و من اهلها ، عال و الله
منى : … تسلم
احمد : تتهنوا
آيات : امجد وينه ؟
احمد : ما بعرف ، تصبحوا على خير رايح المسجد انا
 
__________________________________
 
 
حسين : رقم عشرة يعني بطلعوا
رانيا : هههه امي نسيت حالها و سالتها كم طولك بدون كعب
حسين / رزان : هههههه
رزان : يا حرام امها جاوبت عنها
رانيا : بس حلوة كتير ها ، زوقه حلو هالحمزة
ام حمزة : بتشبه ياسمين ( صفنت شوي ) ايواااا بقول وين شايفين امها ، يا بي شو بتشبه ام امير جارة حمزة
رانيا : فعلا سبحان الله كأنهم خوات ، حتى ياسمين لما حكينا عنها لحمزة قال نفس المواصفات بس اقصر و املا شوي
رزان : شو املى متل العودة البنت ، كتير عجبوني كسماتها و شعر…
حسين : خلص انا قايم ، خدوا راحتكم
رانيا : يعدمني اياكي نازلة توصفي قدامه
رزان : نسيت هههه
 
__________________________________
 
 
مها : شو حكى احمد عالكعك ؟
ياسمين : كتير عجبه يا حبيبي ، بسلم عليكي و بتشكرك
مها : الله يسلمه ، ماما ما بصير اتضلي تحكي هالحكي شو حبيبي و حياتي ، نسيتي انه بطل خطيبك
ياسمين : بس لسا بنحب بعض
مها : حرام هالحكي يا امي ، انتي هيك صرتي متل باقي البنات اللي بعملوا علاقات قبل الزواج ، معقول احمد برضى هالكلام ؟
ياسمين : … عادي ماما لا اتضلي تكبري الاشياء انتي ، بحكيلك بنحب بعض افهميني
مها : ازا انتي هيك بتحكي ، شو خليتي للبنات اللي مو متلك ، زعلتيني منك
ياسمين : الله يوفقك لا تزعلي ، خلص ببطل احكي ، المهم حكتله يكون معي بفحص السواقة و وافق
مها : طيب بحكي لابوكي
ياسمين : اموووواه ، ما يحرمني منك يا نبع الحنان انتي

__________________________________

ام عدي : هات اشوف صورة الفستان
غنى : كتير حلو ، مبارك يارب
عدي : حبيبتي عقبال ما افرح فيكي ، يلا يا دوب تلحقي تجيبي اشي
غنى : مفكرة اجيب فستان يناسب حفلة نجاحي كمان
ابو عدي : جيبي اللي بدك اياه يابا انتي اخت العريس الوحيدة ، و احكوا لبيان كمان
ام عدي : و لا يهمك ، بدنا نفرح على وجه هالعيد بكفينا اللي مر علينا
ابو عدي : الذهب شريتوه ؟
ام عدي : لا لبكرا انا و اياهم رايحين ، سهى ما قبلت الا اكون موجودة و انا اليوم كنت مشغولة
ابو عدي : احسن اشي جيبليها ، ااخ بس نطمن على هيثم و كل اشي بهون
عدي : قال رح يجي اليوم عاد
ام عدي : زينة تعبانة و الولد عند اهلها
غنى : يا الله شو عم بصير معه عمو ، ليه هيك حظه معتر
ابو عدي : نصيبه يابا ، نصيبه ، الله يفرجها عليه بجاه هالليالي المباركة
عدي : ما بعد الديق الا الفرج باذن الله

__________________________________

نهى : ييي هيثم برن ، يا ستير ، الو
هيثم ( بصوت مخنوق ) : نهى ، سامحيني عالازعاج ، بس
نهى : ليه هيك صوتك ، صاير اشي ؟
هيثم : زينة حالتها سيئة كثير ، و ابني عند اهلها ، بس انا ما بدي اياه يضل عندهم ، كرهتهم كل اشي صار بسبب امها
نهى : يا حبيبي هالطفل من لما انولد و هو بالعذاب ، شو بدك تعمل ؟
هيثم : سامحيني بس بعد العيد رح اجيبلك اياه ، انا ما حكتلهم
نهى : كتير لبعد العيد جيبه بكرا
هيثم : لا لا انتي شو ذنبك ، ما بدي اثقل عليكم ، و بيت اهلها قريب علينا بمر بشوفه لاني
نهى : طيب شو صار ؟
هيثم : شافها الدكتور حكالي اكتئاب ، للاسف
نهى : لا حول و لا قوة الا بالله ، ربي يشفيها و يعينك ، احنا كلنا جاهزين هيثم ما تتردد و انا بحكي بلسان الكل
هيثم : ما يحرمني منكم احلى عيلة و الله ، لو تعرفوا شو مخففين عليي ، احكي لعلاء يسامحني لاني عصبت عليه و ما خليته يشوف آدم
نهى ( فهمت ) : لا لا مسامحك اكيد ، انت غالي عليه و العتب عقد المحبة بس مقدرين ظروفك ، طمني حبيبي
هيثم : ان شاءالله ، يلا سلمي و اسف عالازعاج

ابو علاء : يا لطيف ! شو مال لونك انخطف ؟
نهى ( مصدومة ) : زينة مكتئبة و حالتها صعبة و بعد العيد بده يجيب ابنه عندي ما بده يخليه عند اهلها
ابو علاء : بعيوننا ، شو في كمان ؟
نهى : معصب على علاء و مو مخليه يشوف الولد و مزعله ، بحكيلي اعتذري منه عني
ابو علاء : استغفر الله ، و المسكينة ريم شو دخلها يصب غضبه عليها ؟
نهى : هاد اللي قهرني ، بس فهمت هلا شو ماله كان

__________________________________

ما صدقت على الله و ينتهي دوامي ، و ارجع اسال امي عن سيرين ..

حمزة : ايوا احكولي شو صار
رانيا ( بتتغامز مع رزان و عاملين حالهم زعلانين ) : صراحة ما توقعناك هيك يا حمزة
حمزة ( بخوف ) : شو ؟
رزان : ما بعرف اسال امي
حمزة : رانيا احكي مالكم ؟ ما عجبت امي ؟ الجماعة رفضوا ؟ احكوا مالكم ساكتين
رانيا ( كاتمة ضحكتها ) : الله اعلم ، من مبارح و هي ساكتة شكلها مصدومة
رزان : يا حرام ماما ، كل شوي تفوت عالحمام قد ما شربت مي و عصير
حمزة ( بحزن ) : يعني شو ؟
رانيا / رزان ( انفجروا من الضحك ) : ههههههههه مو معقول
حمزة : ما ازنخكم ئي
رانيا : انه على شو ما تعجبها ؟ انا متت عليها و على امها يا الله ما اطيبها و صاحبة دين بتجنن
رزان : اه و الله و ابوها لقى بابا بالجامع و دخله عالبيت
رانيا : اما شو بيت يا حمزة ، قل اعوذ برب الفلق ، تقول قصر
حمزة : ماشاءالله
رزان : صراحة منيح اللي شريت شقة بمنطقة راقية ، لانه لو بمكان تاني يمكن يرفضوك لانه امها سالت وين شقتك مكانها
حمزة : طيب يلا الحمدلله

بعد المقلب اللي اكلته من خواتي ، و الحكي اللي سمعته عن اهلها ، مسكت موبايلي و رنيت على رقم ..

حمزة : سلام عليكم ابو حميد
احمد : هلا حمزة وعليكم السلام ، يسعد هالصوت اشتقتلك
حمزة : حبيبي و انا اكثر ، كيف حالك ؟
احمد : تمام نحمد الله ، شو الاخبار ؟ راحوا اهلك مبارح صح ؟
حمزة : مين حكالك ؟
احمد : هيهييي كل العيلة مطبولة بالعريس السري ههههه
حمزة : اه و الله راحوا و انا قلت بحكي معك و بسالك عن كم شغلة
احمد : اه تفضل ولو بالخدمة انا
حمزة : تسلم ، حكولي اهلها ماشاءالله وضعهم منيح ، و بدققوا عالسكن عاد ما حسيت علاء من هديك الطبقة
احمد : ههههههه ضحكتني و الله ، لا يا زلمة دار خالتي ابدا ما بفكروا هيك ، بس الله منعم و مفضل عليهم و ما عندهم اولاد كثير ، ف قبل اكثر من عشر سنين شروا بيتهم
حمزة : ايوا ، يلا الله يديم عليهم و يطعمنا و اياهم
احمد : امين يارب ، متى رح تشوفها انت ؟
حمزة : عالاغلب بعد العيد ، بشوف اي يوم بكون معطل فيه و بناخد موعد
احمد : ان شاءالله بنفرح فيكم ، من هسة بدي اوصيك عليها سيرين غالية و مثل اختي يا حمزة دير بالك عليها و حطها بعيونك
حمزة : ههههه ان شاءالله ، حمستني اتعرف عليها عن قرب

يتبع ..