#سلسلة_ياسمينة_الروح
#نهفات_عيلتنا_3
#مذكرات_عاطفية
#بقلم_وعد_السعيد

الحلقة الخامسة و العشرون :

 

التقدم ليس بمحاولة تحسين الماضي، بل بالعزيمة و الإصرار على التخلي عنه و التقدم نحو ما سيكون بكل طاقة و ايجابية ..

_______________
______________

آمال : مو على بعضك ، ليكون زعلت عشان هيثم ما اجا على طلبة عدي ؟
ماهر : لا بالعكس ، حكى معي و اعتذر ، بس في اشي ثاني في بالي
آمال : خير ؟!
ماهر : ليه بيان رافضة ابن خالها اللي متقدملها ؟ و بشدة
آمال : مهي بعدها سنة ثالثة بدها تصير
ماهر : لا لا اشي اقوى من هيك ، يعني احتمال انها تكون بدها واحد ثاني
آمال : شو قصدك ؟ البنت بتحب واحد و بتستناه
ماهر : هو اخوي ما رح يقبل هيك اشي ، بس انا ببالي انه هالبنت حلوة كثير و حرام تطلع لغريب وعندها ابن عم
آمال ( فتحت تمها ) : نعم ؟
ماهر : شو مالك ؟ مو شايفتيها كيف تعال يا عمر اخبزلنا و تعال خدني عالمشوار الفلاني ، و تعال و اعمل و من هالحكي ؟
آمال : معقول ؟ لا لا عمر دايما بحكيلها يختي و بعتبرها مثل غنى
ماهر : انتي ليه معترضة ، انا بحكي معه و بساله ، و بنشوف شو رح يحكي
آمال : هلا نايم الولد ، بس يصحى احكي معه

__________________________________

ابو قصي : بس تصحى ريم احكيلها تلبس ، عشان ارجعها على بيتها
سهى : طلعت من زمان ، ما نامت اصلا
ابو قصي : شو هاد ؟ كيف طلعت لحالها ؟ هاي بنتك العاقلة هيك بتعمل فينا
سهى : حكيت معها ، كان صوتها منيح ، ان شاءالله تكون منيحة
ابو قصي : الله يهديها ، و يهديه ، ما اختلفنا انه غلط ، بس الوحدة بدها تساير زوجها و تتحمله مثل ما بتحملها
سهى : الحياة اخد و عطاء غير هيك بطلت حياة اسمها

__________________________________

علاء : اهلين بالست ريم
ريم ( مو عاجبها ) : …
علاء : مالك القط اكل لسانك ليكون؟
ريم : …
علاء : طيب نامي ، فقستيلي نومتي عالفاضي
ريم : …

صحيح رجعت على البيت ، بس لسا الزعل باين عليها ..
حتى انا لما ما قبلت تروح معي مبارح ، اخدت على خاطري ..
حتى لو كنت انا الغلطان ، معلش تاخد على حالها شوي و تسايرني قدام اهلها ..
و لما نرجع عالبيت تكسر عيني ، و انا عمري ما تعمدت اهينها اصلا ..
المفروض تكون ضمنيا فاهمة ، اني ما بعمل هيك اشي متقصد ..

__________________________________

ام حمزة : خليني احكي مع البنت نشوف اذا في مجال نيجي اليوم
رانيا : احكيلها ساعة زمن انا و خواته
رزان : يا رب تقبل
ام حمزة : الو السلام عليكم .. ام علاء .. اهلين فيكي .. تذكرتيني .. تسلمي بخير الحمدلله .. مستحية منك يختي بس ابني مستعجل ههه ، في مجال نيجي انا و خواته التنتين ساعة زمن بعد الفطور .. الله يسعدك .. غلبناكم .. مع السلامة .. اه ابعتيلي اياه .. شكرا الك
رزان : شوو ؟
ام حمزة : وافقت الحمدلله
رانيا : و اخيرا ، بقلكم هالولد دعواته مستجابة هههه
ام حمزة : خليني اروح ابشره
رانيا : بس يصحى ، حرام تفقسي نومته هلا اتطيري النعس من عيونه على هالخبرية
رزان : هههههههه

__________________________________

سيرين : ماما ليه هيك عملتي ؟
نهى : و الله استحيت منها ، جايين ساعة زمن بعد الفطور هي و بناتها
سيرين : يعني العريس مو معهم ؟
نهى : لا
سيرين : مع انه منظري مو حضاري لاستقبال حدا ، بس بدبر حالي
نهى : يلا انا طالعة مع ابوكي بدي اخد ستك و نروح عند هيثم ، ديري بالك ، شوفي شو حابة نفطر و بلشي حضري و لا تنسي البيت
سيرين : حاضر ، يلا سلمي على خالو

__________________________________

هيثم : يا زينة الله يرضى عليكي امسكي هالولد ، رضعيه يمكن يسكت
زينة ( بعصبية ) : ما بدي اياه ، مو ابني هاد ، ما في حليب اصلا
هيثم : لا حول و لا قوة الا بالله ، كيف بدها تيجي امي تشوفك بهالحالة ، رح تجننيني انتي
زينة : اعطيهم اياه ، هاد ابنهم همة مو ابني

حملت ابني و طلعت فيه بكل بكاؤه عالصيدلية القريبة من بيتي ، جبت حليب مناسب ، و قنينة ..
رجعت عالبيت و كان نايم من كتر ما بكي ، بسرعة بسرعة كنت معقم القنينة ، و غليت مي لتحضير الحليب ..
زينة كانت بحالة صعبة ، و عالاغلب اللي بفكر فيه رح يصيبها ..

نهى : السلام عليكم ، يا روحي ليه هيك حالتك ؟
ام ماهر : يمة شو صاير معك ؟ وين الولد و امه ؟
هيثم ( بحسرة ) : تفضلوا ، غلبتكم معي ، آدم نام بس اكيد رح يصحى لانه جوعان ، و زينة لا تسألوا عنها انسوها
ام ماهر : بنحممه بسرعة و بنعطيها اياه ترضعه
هيثم : جبتله حليب من الصيدلية ، يلا هي اغراضه تفضلوا

اختي نهى اكثر وحدة فهمت عليي ، و اكيد عرفت شو اللي صاب زينة ..
اعتنت بإبني كانه قطعة منها ، و حتى هو لما كان معها هدي و حس بالحنان و الطمأنينة ..

ام ماهر : اليوم الاكل من نسوان اخوتك ، قالتلي ليلى العصر بكون جاهز
هيثم : يسلم ايديهم ، ضل اكل من مبارح ، هيني بحاول اطعميها
نهى : يمكن عليه بداية صفار ، افحصه و اعرف كم نسبته
هيثم : باخده عالمستشفى اليوم ، بس بدي اجيب دكتور يشوف حالة زينة
ام ماهر : يا حبيب قلبي ، شو اللي جرالها مرتك ، كانت كويسة و ما احلاها ، امها بعدها زعلانة ؟
هيثم : كل البلاوي من تحت راسها ، الله كبير بس
نهى : طول بالك ، المهم الولد ، بس تروح مكان او انشغلت جيبلي آدم و انا بحطه بعيوني
هيثم : يخليلي اياكي ، و الله لولاكم شو كان رح يصير فينا ، لو شفتي مبارح كيف كانت حالتنا
ام ماهر : لا حول و لا قوة الا بالله ، كال و ابوك بده يجي ياذنله
هيثم : اليوم بجيبله اياه ، بشوف شو بصير معي
نهى : ان شاءالله ، هي ابو علاء وصل ، سلام

__________________________________

مها : يلا يا بنات بكفي نوم ، اذن الظهر
حنين : خلينا كمان شوي ، كل جسمي متكسر مو قادرة اقوم
مها : طيب يلا عشر دقايق و بصحيكم
ياسمين ( من تحت الغطا ) : هههههههه
حنين : صاحية ؟!
ياسمين : من اصواتكم ، خلص قومي يلا انفقست النومة ، بدي اعمل شوي كعك بطحين لاحمد ، خالتو مو عاملة لانها و سالني ازا بعرف اعمله
حنين : و انتي طبعا تبرعتي على طول ، مو عارف حضرته انه كله بطلع من ظهري
ياسمين ( رمت بوسة ) : لا لازم اتعلم اليوم منيح ، يلا هيني سابقتك

اي طاقة ايجابية اللي ملازمتني اليوم ..
كل هاد لانه احمد طلب مني اعمله كعك ، و لاني كنت معه مبارح ، و لا لانه الاوضاع بيناتنا كتير حلوة و رايقة ..

مها : شو بدك تعملي ؟
ياسمين : كعك بطحين ، عنا يانسون و شومر صح ؟
مها : ناقصني عجقة ، لما نكمل السميد اول ، الفستق الحلبي لسا ما عملناه
ياسمين : شوية لاحمد طلب مني
مها ( متفاجاة ) : احمد بده ؟ ما حكالي
ياسمين : حكالي انا ، اقتنعتي ولا احكي معه تسالي ؟
حنين : يلا خلصوني ما بدي اضل متل مبارح للمغرب و احنا بنشتغل
مها : يلا صلوا الظهر و بلشوا ماما

__________________________________

ديمة : صباحو
عدي : مساؤو ، الظهر اله ساعة ماذن حبيبتي
ديمة : اي انا هلا صحيت ، كيفك ؟
عدي : خطيبتي الكسولة ، مشتاقلك كتير ، شو رح نروح اليوم عالسوق ؟
ديمة : مو لنتفق متى الحفلة ؟
عدي : حكيت مع الصالة اليوم و رح اميل اشوفهم بس اخلص شغلي ، انتي اي يوم بناسبك اكتر ؟
ديمة : كمان شوي ببعتلك خبر عالاكيد ، المهم اني الاقي بدلة و توابعها
عدي : تمام ، بدي تكوني مبسوطة اي اشي نفسك فيه احكيلي دمودم بدي تكوني اسعد حدا بهالعالم
ديمة ( بخجل ) : يخليلي اياك ، انا معك و بس بكون مبسوطة
عدي : اااخ شو بحبك انا ، مو مصدق انه انا و اياكي لبعض صرنا ، كل شوي بقرص حالي حتى اصدق
ديمة : هههههه زكرني بس نكتب الكتاب اقرصك ، شاطرة كتير فيه انا
عدي : هههه و انا رح اعضك كتير

__________________________________

منى : كيفك ؟ طمنيني كيف هيثم ؟ .. حسبنا الله .. يا حبيبي .. و لا اشي قاعدة بكمل تعزيل .. يلا منيح ان شاءالله خير .. سلمي عليها
آيات : شو الاخبار ؟
منى : جايبله حليب صناعي مو قابلة ترضعه و لا تحمله
احمد : يا حرام ، شو ذنبه هالطفل ؟
منى : الله يهديها ، شكلها مكتأبة من اللي عملته امها فيها و انصدمت
امجد : طيب شو رح يعمل اخوكي هسة ؟ البيبي مين بده يدير باله عليه ؟
منى : و الله منا عارفة ، هينا بنعمل اللي علينا ، نهى قالتله جيبه عندي باي وقت ، و التانية مو فاضية
آيات : اكيد الكل معجوق بالعيد
منى : لا جاية ام العريس و خواته يشوفوا سيرين اليوم
احمد / ( بتطلعوا ببعض و بضحكوا ) : العب يا سمك ههههه
آيات : الله يجيبلها اللي فيه الخير ، كتير دعينالها
احمد : امين يا رب ، بتستاهل كل خير

__________________________________

الله يسامحك يا امجد ، شو بدي اعمل هلا انا بهالفلوس اللي اعطيتني اياهم ؟ ..
يا حبيبي لو بيان تعرف انه امجد مدخلني جاسوسة عليها ، و دافعلي رعبون كمان هههه ..

سيرين : كيفك يا حلوة ؟
بيان : اهلين سوسو ، الحمدلله ، شو عاملة ؟
سيرين : بالي عندك ، طمنيني شو صار مع اهلك لسا معندين ؟
بيان ( تنهدت ) : و الله ما بعرف ، لحد هلا الموضوع ما انفتح من مبارح ، يا رب يكونوا حسوا فيي و يخلوني انا اقرر
سيرين : ان شاءالله ، بالله اي اشي بصير معك خبريني فيه خلينا نشوف شو بنقدر نعمل ، احنا معك و جنبك بيان لا تخافي
بيان : تسلمولي يارب

افففت وينك يا ياسمين ، اتقاسم معك المبلغ مو مشكلة ..
المهم انه نلاقي وسيلة نقنع فيها دار خالك ، ما يجوزوا بنتهم ..
بدل ما انا حاطة عالخمسين دينار بجيبة بنطلوني ، و كل شوي اطولها و اتفقدها ، و ارجعها لمكانها ..

سيرين : الو امجد
امجد : هلا بالعميلة السرية ، ام السووس
سيرين ( كاتمة ضحكتها ) : اهلين فيك ، بس حبيت اطمنك انه الوضع متل ما هو لا زيادة و لا نقصان
امجد : شو اللي بطمن بالموضوع ما فهمتو عفوا ؟
سيرين : كتير شاكر حضرتك ، فرجيني وجهك لو حكتلك انه اهلها اجبروها
امجد : لا يستر على عرضك ، الا هالخبر
سيرين : معناها اتطمن
امجد : الله يطمن بالك و يسعدك و يجوزك اللي بدك اياه يا قادر يا كريم
سيرين : تسلم تسلم ، يلا شريك عن ازنك بدي اكمل تعزيل

__________________________________

عمر ( بدهشة ) : انا ؟ لا لا مستحيل
ابو عدي : شو المستحيل ؟ ابن العم بنزل عن الفرس ، انت اولى الناس فيها
عمر : صلي عالنبي يابا ، و الله هالبنت ما بعتبرها الا اخت الي ، انت روق شوي ، و ما الك الا تطلع راضي ، اترك الموضوع عليي
ام عدي ( عيونها على ابو عدي ) : قلتلك ما رديت
عمر : اه صح هي امي اكتر وحدة بتعرف ، و الله بجيبلها حبة الشوكولا مثلها مثل غنى اختي ، لو عندي ادنى مشاعر تجاهها انا على طول بعترف ، بس صدقني انه ما في
ابو عدي ( بهز براسه و مستسلم لكلامه ) : ماشي ، لنشوف شو رح يطلع بايدك انا واثق انك مخبي اشي
عمر ( بحك بشعري و بعمل حالي عادي ) : اه ؟ لا شو بدي اكون مخبي يعني ، خلص انا بدي اروح اودي الاكل لعمي هيثم ، بلكي يصحلي اشوف آدم
ام عدي : الله يرضى عليك ، دير بالك

ما صدقت و اهرب من قدام ابوي ، انصدمت و ما عرفت شو احكي ، لما عرض عليي فكرة خطبة بيان ..
عليم الله امجد بعلق مشنقتي بدون رحمة ، و بفكرني بحبها من مية سنة و مخبي عليه ..

عمر : كيفك ؟
امجد : الحمدلله ، انت طالع ؟
عمر : رايح اودي الاكل لعمي هيثم ، بدي امرق اخدك بنتسلى مع بعض
امجد : تعال بستناك

اذا ضلينا متخبيين ورا الواقع الاليم ، ما حدا فينا بحقق حلمه ..
امجد لازم يواجه ، حتى يقدر يحصل عاللي بتمناه ..

امجد : هلا ابو عمير
عمر : هلا فيك ، منيح اللي اجيت
امجد : اه باجي ، و هي امي قلبها على اخوها ، حكتلي روح شوفه
عمر : في موضوع مهم بدي احكيلك اياه ، اسمعني للآخر
امجد : شو صار ؟
عمر : انت لازم تواجه عمي محمود بحبك لبيان ، خليه يحس انك زلمة و رايدها بالحلال ، و اطلب منه يصبر عليك لحد ما تتخرج بنته ، بتكون انت ان شاءالله خلصت ماستر و اكيد مامن شغل
امجد : اااخ قلبي مثل النار عليها ، يا ريت اقدر احكي اللي انت حكيته هسة
عمر : لازم تحكي ، كل ما تاخرت مو لصالحك الوضع ، عمي اكيد بحب يفرح ببنته الوحيدة ، و انا متاكد انه تفكيره مو مادي
امجد : قولتك بوافق عليي ؟
عمر : بده يلاقي احسن منك لبنته ؟ ، و الله ما اتوقع ، و التجربة ما رح تخسرك اشي ، انت حاولت مع اهلك و مو غلط تحاول مع اهلها ، خلي الكل يحس انك بتحب صح و ما بتلعب
امجد : خلص بحكيله ، لاني اذا شفتها تجوزت غيري بجوز ارتكب جريمة
عمر : من غير شر ، يلا هي وصلنا

__________________________________

زياد : مو حكيتي ما بدك تعملي كعك بطحين ؟
مها ( بهمس ) : ياسمين عملته لاحمد ، طلب منها
زياد ( فتح عيونه ) : يا سلام ، بشوفها صايرة مطيعة اكثر من امها ، انتحرت و انا احكيلك اعمليلي و ما قبلتي
مها ( مو عاجبها ) : هداك بده يسافر ، و بعدين بتدلل عليها خليه ، انت بعملك بعد العيد
زياد : لا شكرا ، بس خليني اسافر بلكي بتحني عليي
مها : استغفر الله العظيم
زياد : ههههه

ياسمين : امممم يا سلام ما احلى الريحة ، عالحظ و لا وحدة مفطرة اتدوق
حنين : بده يجي ياخدهم اليوم ؟
ياسمين : ما اتوقع ، للعيد يمكن باخدهم
حنين : لا احسن اليوم ، احسن ما ناكلهم احنا
رنين : اه و الله ، بابا بهجم عليهم ههههه
ياسمين : اوعوا تحكوا انه لاحمد
حنين : ولا وين راحوا ؟ اكلهم العو
رنين : ههههه
ياسمين : ناديلي ماما انبه عليها
حنين : يمكن صارت حاكية ، خصوصا انه بابا شم الريحة ههههه
ياسمين : ياااا ربي ، خليني ارن عليه يجي ، الو مرحبا

__________________________________

ياسمينتي ، ما بعرف شو اللي خلاني اطلب منها تعمل الكعك ..
بس كانت كتير مهتمة فيي مبارح ، و حاسستها عايشة بالاحلام الوردية ..
اكثر اشي موجع قلبي ، اني مخبي عليها موضوع سفرتي ..
لما شفت كيف حالتها متحسنة ، بوجودي جنبها ، بتزيد رهبتي بالمواجهة ، و بخاف عليها لابعد الحدود ..

احمد : مرحبتين ، كيفك ؟
ياسمين : الحمدلله ، هي خلصت الكعك ، بتحب تيجي تاخدهم هلا ولا بعد الفطور ؟
احمد : يا سلام ، شو هالسرعة ؟ لحالك عملتيهم
ياسمين : يعني اهم اشي المكونات انا حطيتهم ، و الباقي اكيد مساعدة خصوصا ماما لما عرفت انهم الك اهتمت كتير بانهم يكونوا كويسين
احمد : يسلموا ايديكي حبيبتي ، غلبتك فيهم
ياسمين ( بدلع ) : و لو بدنا خدمة تحرز احموودتي
احمد : رح اوصي امجد يجيبهم ، لانه طالع
ياسمين ( مكسوفة ) : ماشي ، يلا سلام

كنت خجلان اروح ، اكثر من هيك ما عندي مبرر ..

امجد : الو
احمد : بس تروح من عند هيثم ، ميل عند خالتي مها ، في اشي بدها تعطيك اياه ياسمين الي
امجد : اشي مثل شو يعني ؟
احمد : عيديتي هههه
امجد : نيالك ، ماشي خبرها طيب
احمد : بتعرف ، يلا سلام

اما منظرهم مجرد ما اتخيله ، وقعت من ضحكي عليهم ..
امجد و عمر رح يجيبوا الكعك و همة صايمين ، يعني رح يفقدوا عقلهم من عملتي فيهم ..

__________________________________

عمر : يا روحي انا ، ولك طار عقلي عالولد الصغير ،النا زمان ما شفنا بيبيات
امجد : اه و الله ، من لما اجا امير
عمر : سبحان الله فعلا بشبه احمد ههههه
امجد : ههههه يقطع هبلك ، ولا اله دخل فيه بشبه هيثم
عمر : منا بتخوث ، انه جد هالمخلوقة شو اللي بتعمله بحالها و في زوجها ، معقول في نسوان هيك بفكروا ؟
امجد : اكيد في ، هيها زينة اكبر مثال قدامك ، امشي من طريق خالتي مها ، لا تنسى
عمر : لنشوف شو هالعيدية ، ما حدا قده اخوك العشقان
امجد : ااخ ، مسكين و الله بشفق عليهم
عمر : معك حق ، يلا انزل ، خدهم من الباب و ارجع بسرعة

امجد : يلا اطلع
عمر : شو هاد ؟
امجد : كعك يا حبيبي
عمر ( مصدوم ) : يخرب بيت اليهود ، ماشي يا احمد
امجد : مقصودة ، انا بفرجيك يا احمد ، هسة بسحب عليه فيلم ابن كلب اخليه يفقد عقله
عمر : هيهيهيهي شو رح تعمل ؟
امجد : ئي شو نسيت اني بدي اروح اخطب حبيبتي ، يلا بوجهك على بيتكم ، رايح افطر عند ستي حبيبتي عزمتني و حلفت يمين الا انام بحضنها اليوم ، يا حبيبتي يا ستي
عمر : هههههههه ، معلم من يومك
امجد : استنى ارن على امي هيهيهي

__________________________________

ياسمين : هههههه احمد
حنين : يمة ما اقواه هههههع بستاهلوا
مها : لو شفتي منظره بس فتح الكيس وشاف العلبة فيها كعك
رنين : شطت ريالته يا حرام
ياسمين : هههههه اكيد احمد رح يطعميهم
مها : الله اعلم ، هاد احمد ما بنحزر عليه طلع
حنين : اه و الله بطلع منه ههههه انبسطت فش غلي من عمر و امجد صراحة
ياسمين : يؤبر ألبي
مها ( عيونها عالبنات بحزن على ياسمين ) : …
حنين : …

__________________________________

ابو علاء : شو عمل ابنك و مرته مبارح ؟
نهى : يييي و الله نسيتهم ، حتى ما حكيت مع سهى اتطمن
ابو علاء : ان شاءالله يكونوا مناح ، و ما بدنا اشي
سيرين : خلص لا توجعوا راسكم فيهم ، كل المتزوجين بتصير بينهم خلافات ، حرين يدبروا راسهم
نهى : قولتك و الله الهم راكبني لفوق راسي ، كيف بدي استقبل الجماعة هلا مو عارفة
ابو علاء : باينتهم بعرفوها لسيرين ، مستعجلين كثير
نهى ( صفنت في سيرين ) : من وين بدهم يعرفوها ؟
سيرين : …

__________________________________

منى : اه ماما ، تاخرتوا
امجد : مهو ابنك وداني على دار حماه السابقين ، و بعدين عمر حلف عليي يمين عظيم الا اروح افطر معهم ، و منه بندوق العيدية اللي بعتتله اياها خطيبته السابقة
منى : يحرم عليي فهمت اشي
امجد : هههههه اسمعي انا رايح افطر عند دار سيدي ، باجيكم بعد التراويح
منى : طيب ، سلم عليهم

احمد : مفكر حاله شاطر ، هسة بفرجيكي فيه
آيات / انس : ههههههه يا بتلحق يا ما بتلحق
احمد : رح الحق طبعا ، اما جوز فاضيين اشغال الله باليني فيهم
منى : هههههه حسبوها صح ، حكولك ودانا نجيب الكعكات و احنا صايمين
احمد : مهمة على اسمي انعملوا ، ما ابيخ وجوههم
آيات : طول بالك ، اكيد ما رح يخلصوهم كلهم
احمد : البنت و اهلها غلبوا حالهم عشاني ئي
منى : ههههه صحتين ، ياا رب العيد الجاي تكون انت و اياها و تعمل الك و توزعولنا
احمد : امين يمة ، بالله اتضلي تدعيلي ، قلبي تعب من هالفراق

__________________________________

ام ماهر : اهلا و سهلا ، خير ياستي مالك زعلان ؟
امجد ( متظاهر بالزعل ) : اااخ يا ستي ، خليها بالقلب تجرح و لا تطلع لبرا و تفضح
ابو ماهر : يا ستير ، خير ؟
امجد ( تنهد ) : امي قال زهقتها حكتلي روح من وجهي ( بتباكي ) و انا ما الي غيرك يا ستي اهئ اهئ
ام ماهر ( صدقت ) : يا حبيب ستك ، يكطع قلب اليهود يا منى كيف بتعملي هيك بابنك ؟
ابو ماهر : و انتي صدقتي على طول هال… شوفي هداك صاحبه كيف بضحك عليه
عمر : ههههههه انكشفنا ، طلعت فاشل بالتمثيل
امجد : انا و لا انت ؟ لا جد يا ستي انا اشتقتلك بدي اتطعميني بايديكي اليوم
عدي : بسم الله ، شو جابك انت ؟
عمر : هيهيهيهي
امجد : انت شو دخلك ؟ انا جاي عند الناس الرايقة اللي بتضحك على طول
عدي : بالله ، شو هاي العلبة ؟
عمر / امجد ( بنفس اللحظة ) : اوووعى تقرررب ، دونت تاتش
عدي ( مصدوم ) : كنز علاء الدين مثلا ؟
عمر : لا كنز ياسمين مثلا
امجد : و لا يقدر بثمن
احمد : خصوصا انه الي
عمر / امجد ( مو متوقعين ) : بسم الله ، دستوور
احمد : منكم يا مفاجيع ، يا سراقين يا حرامية
ابو ماهر : اوف اوف شو مسويين هالهمل ؟
احمد : سرقولي الكنز يا سيدي ، بدهم يستولوا عليه لحالهم ، بس على مين ؟
عدي : على احمد ، و ما ادراك ما احمد ههههه
احمد : يا عيني عليك ، منور يا عريس هات بوسة يسعد هالخلقة ما احلاها
عدي : حبيبي
عمر : اللي ما اله حظ لا يتعب و لا يشقى ، الحمدلله دائما ابدا
امجد : الله يسامحك يمة ، حرام تخبي اشي عليك يعني ، دايما متفقين عالبطل
احمد : حسابكم بعدين ، خليتوني اطلع و اجيب اكلنا معنا لانه جايين وقت الفطور فجاة ، يلا روحوا جيبوهم من السبارة
عمر : حبيبتي عمتي ، كم طنجرة جايب ههههه ؟
احمد : روح جيب و اعرف لحالك
عمر : من عيوني ،بس كان جبت ايات و انس معك ، عشان تخلوا الجو لاهلك
امجد : الف مرة حكتلك ما تجيب سيرة اهلي
عمر : ههههه كذاب مغرور

__________________________________

علاء : بكفيكي زعل صح ؟ كانه من لما صحينا و انا براضي فيكي ، خفي علينا
ريم ( بثقة ) : ما بدي اخف ، خلص لا تراضي و لا عبالك ، انا ما بحب هالاسلوب اصلا ، حدا يضل يغلط فيي و يرجع يصالح و حالته حالة
علاء : يعني شو افهم من هالحكي ؟ نضل نراكم زعل بقلوبنا لمتى ؟ حكتلك ما كنت بوعيي ، فاقد صوابي ، منجن عالاخر انتي ليه ما بتفهميني ؟
ريم ( بمسخرة ) : لاني ما بفهم ، عقلي مادي يمكن
علاء : استغفر الله العظيم
ريم : احسن اشي ، عن ازنك بدي اجهز السفرة هلا بادن
علاء : كثير الي نفس اكل لانه
ريم ( بجكر ) : تصطفل ، انا حامل و لازمني تغذية
علاء : اه انا لستين داهية طبعا ، لاني غلطت غلطة عمري مبارح ، و ارتكبت جريمة بحق الانسانية
ريم ( مطنشة ) : …
علاء : خدي راحتك ، سلام

ما ضل الي نفس لاشي ، تركتلها البيت و طلعت ..
و لوين بدي اروح ، ما بعرف ..
ما استفدت من روحتي لعند هيثم مبارح ، الا هالمشكلة مع ريم ..

علاء : هاي سيارة امجد هون ، معقول جاي لحاله ؟ .. السلام عليكم
ام ماهر : و عليكم السلام ، فوتوا يا ستي اهلا و سهلا
علاء : لحالي جاي
ابو ماهر : مالك يا سيدي ، وين مرتك ؟
علاء : … شو مين في هون ؟
ام ماهر : احمد و امجد ، بس راحوا عالمسجد اقعد ياستي بلاش تطلع هلكيت
ابو ماهر : الله يهدي بالكم يا سيدي ، هيك الحياة بدها مسايرة ، الزعل و الحرد ما بعمل نتيجة
علاء : الله بعين يا سيدي
ام ماهر : بعدها زعلانة عاللي صار مبارح ؟ عهوى قصة بيان
علاء : اه و الله ، زعلانة و مو قابلة ترضى
ام ماهر : ميلة تميلها ، شو دخلكم فيهم انتوا ؟ ، فخار اللي يكسر بعضه
ابو ماهر : مال هالبنات كل وحدة بتعمل فصل شكل
ام ماهر : مش عارفات كيمة هالشباب اللي مثل الورد بين ايديهن ، خليهن بكرا بعضن اصابعهن ندم
علاء : ههههه و الله صحيح ، شو بدنا نعمل الحمدلله

__________________________________

ام حمزة : يلا خلينا نكون سريعين بعد الفطور ، و نطلع لانه بيتهم بعيد
رانيا : ماشاءالله ساكنين ب… ، ابصر شو بشتغل ابوها ؟
حسين : شو ما كان ، المهم البنت تكون ادمية
رانيا : قلبي كتير مرتاح ، بيتله استخارة عالفجر اليوم
ام حمزة : الله يسر اموره ، و يفرح قلبه

__________________________________

ديمة : خلص لا تبكي هي اجينا
قصي ( بغضب ) : بفرجيكي فيه ، كيف هيك بعمل فيكي ؟
ريم ( بتبكي ) : بدون ما يسال ، طلع و تركني لحالي
ديمة : طيب فهميني شو صار ؟ تفاهمتوا ؟
ريم : ما بدي اتفاهم معه ، مو بسهولة رح اسامحه
ديمة ( مصدومة ) : ليه هيك ؟ شو دخلك انتي و اياه لحتى تخسروا بعض كم يوم بسبب موضوع انتوا ما دخلكم فيه اصلا
قصي : معقول ريم هيك بتفكري ؟ الله يهديكي صدمتيني
ريم : خلص انتوا كمان ، جايين توقفوا معي او معه ؟
ديمة : اهدي طيب ، ماما قالت بالحمل ما بصير تعصبي كله باثر
ريم : يا ريتني مو حامل ، خسارة فيه
قصي : استغفري ربك طيب ، خلص يلا هي اذن ، قوموا ناكل اندبحنا من الجوع

__________________________________

احمد : شوفوا مين هون ههههه
عدي : شو جابهم ؟
عمر : هي الكل مجتمع ، ( بهمس لامجد ) هي عمي لزق فيه ، و استغل اي فرصة و احكي معه
امجد ( بهز براسه ) : يلا الله يسهل ، بسم الله
عمر : ههههه

علاء : لا تسال
احمد : طيب ، بس وجهك لا يطمئن
علاء : لا تطلع عليه
احمد : يسلم ايديكم ، اسفين ازعجناكم اليوم
ام عدي : لا ولو ، و انتو جايبين اكل يا عيب الشوم
ام بيان : منى و بتعرفيها ، ما بتحب اتقل على حدا
ام ماهر : الله يرضى عليها و يفرحها باولادها
ابو عدي : كيف هيثم ؟ شفتوا الولد
عمر : اه حكالي رح يجيبه اليوم عنا ، و يودي مرته عند اهلها
ابو ماهر : قلبي بده يطير ليشوف هالولد
امجد : اما شو يا سيدي ، هيثم النسخة المصغرة
ام بيان : انت شفته ؟
امجد : اه رحت مع عمر ، ما بمشى خطوة بدوني
ابو بيان : احلى صحاب ، عقبال ما تشتغلوا بس
امجد ( متحمس ) : ان شاءالله رح اسجل ماستر بعد العيد ، و بقدم على شغل بالجامعة
بيان : عنا ؟
امجد ( بغمزها ) : بدك اسجل عندك ؟ بتوصى فيكي ها
بيان ( انحرجت ) : لا شو دخلني انا بالعمارة و انت ميكانيك
ابو بيان ( عيونوا بلمعوا ) : كلها كلية وحدة بابا شو مالك ؟
احمد : على مهلك ، عاساس انقبلت و لقيت شغل كمان ههههه
عمر : احنا بنتفائل بس
عدي : صحيح ، مو غلط يلا ان شاءالله بتتوفقوا
بيان : و انت عمر شو رح تعمل ؟
عمر : هيني بشتغل بالناس لحد ما الله يفرجها
غنى : هههههه ابدعت

__________________________________

نهى : يلا بسرعة ، البسي و اتركي انا بضب
سيرين : ماشي بخلص بسرعة و باجي
ابو علاء : يسلم ايديكي ، ربي يديمها من نعمة
نهى : صحتين و عوافي ، اكيد اللي رح يوصلهم رح يضل حوالين المكان
ابو علاء : اه اساليهم ، بنروح عالتراويح انا و اياه
نهى : بس مو العريس ، لانه ممرض و عنده دوام

__________________________________

ام حمزة : وين بدك تروح ؟
ابو حمزة : هيني بالمسجد ، احسن اشي
رانيا : يعني لبعد التراويح رح نضل ؟
رزان : شو مالك رح يادن هلا العشا ، يا دوب ساعة التراويح مهي ، يلا رني عليهم تاكدي من البيت
رانيا : ماشاءالله البيوت ما احلاهم
ام حمزة : يلا دقي .. السلام عليكم
نهى : و عليكم السلام ، يا اهلا وسهلا
رانيا : مسا الخير خالتو
نهى ( ايديها بايد رانيا و عيونها بتتأملها ) : م مسا الخير ، تفضلوا
ام حمزة : اسفين عالازعاج ، كيف حالكم ؟
نهى ( عيونها على رانيا ) : لا و لو ، الحمدلله ، ما تعرفنا عالصبايا ؟
ام حمزة : بناتي ، الكبيرة رانيا و هاي الصغير رزان اخر العنقود هههه
نهى : ماشاءالله عليهم ، العريس اكبر واحد ؟
رانيا : اه اكبر مني بسنتين ، و في واحد تاني اكبر من رزان بسنتين
نهى : الله يخليكم ، انتي يعني ٢٩ سنة
ام حمزة : اه
رزان : و انا ٢٤
نهى : العمر كله ، عندك اولاد ؟
رانيا ( بخجل ) : مو متزوجة
نهى ( ضحكت عيونها ) : بالله ؟ عاد سبحان الله ما احلاكي ، ان شاءالله ربنا ببعتلك اللي بيستاهلك
ام حمزة : لسا ما اجا نصيبهم ، الحمدلله
نهى : …
رانيا : شو وين سيرين ؟
نهى : اه يلا هلا بناديها

يتبع ..