#سلسلة_ياسمينة_الروح
#نهفات_عيلتنا_3
#مذكرات_عاطفية
#بقلم_وعد_السعيد

الحلقة الثالثة و العشرون :

إن أحببت شخصاً بشدّة ، فاتركه لله ..
فإن عاد اليك ، فهو قدرك الذي قدّره الله لك ..
و إن لم يعد إليك هو لم يكن نصيبك من البداية ..
فانتظر العوض من الله ..

________________
______________

نهى : صباح الخير
هيثم : صباح النور ، صاحية اجيكي ؟
نهى : و الله نمنا عند دار علاء ، تعال بنقعد بغرفة الضيوف لحالنا
هيثم : … طيب ، لولاي بحاجتك ما ازعجتك هيك و الله
نهى : لا ، لا ازعاج و لا اشي بستناك يلا
ابو علاء : ماله هالزلمة ؟ بين يوم و ليلة انقلب
نهى : ما بعرف و الله تعبت من صوته ، اهم اشي ما تحكي قدام علاء
سيرين : ماما صحيتوا ؟
نهى : اه صحيوا دار اخوكي ؟
سيرين : ما بعرف ، بس انا انعزمت عند آيات اليوم
علاء : صباح الخير
ابو علاء : صباح النور ، ليه صحيتوا خليك مرتاح احنا بس بنقوم بدري
علاء : صحيت على تلفون عدي ، رايح يخطب ديمة اليوم
سيرين / نهى : بالله ! وافقت ؟
علاء : اه وافقت ، و عزمتهم خالتي عالفطور و اتصلت على ريم تساعدها بكم طبخة و انتو معزومين كمان
نهى : يلا التمام على خير
ابو علاء : الحمدلله ، خالك هيثم جاي شوي يشوف امك ، كان بده يجي على بيتنا بس حكتله احنا عندك
علاء : شو ماله على هالصبح ؟ كنا رايحين نباركله عاد ، و احمد من مبارح بخطط
نهى : …
سيرين : خليني احكي مع ديمة اباركلها و اعتزر
علاء : عشو تعتذري
سيرين : انعزمت عند دار خالتو منى اليوم
علاء : اه ضل همة ما قدستيهم لسا ، ضروري بركاتك بهالشر الفضيل
ابو علاء : هههههه
سيرين : مقهورين من الملكة ههههه
علاء : روحي رتبي الدار طيب قبل ما يجي خالك احسن من اكسرلك هالواجهة ، بتوافقوا عليه العريس خلص بكفيها دلال خليها تركز
سيرين : هئ بدي اضل قاعدة مدللة انت شو دخلك ؟ خليني اتهنى بحياتي بعد ما جوزتك و ارتحت منك
علاء : بفرجيكي ولي
نهى : الله يهديكم بس

_________________________________

آيات : ماما اليوم سيرين رح تفطر عنا ، عزمتها
منى : اهلا وسهلا ، عرفوا انه ريم حامل ؟
آيات : اه مبسوطين كتير ، بس تيجي بتحكيلنا التفاصيل ههه
منى : الله يهنيهم فرحتلهم ، ااخ عقبال ما اشوفلك انتي و اخوانك يا الله عن قريب
انس : اه و الله كنت دايما احلم اصير عم او خال ، رح نكيف صح آيات
آيات : ان شاءالله حبيبي ، ليه صاحي مالك ؟
انس : بدي اروح عالمركز في حصة اليوم ، و انا مروح بميل اجيب الدوسية من الست رنين بدل ما حاجزتها عالفاضي
منى : لو قلتنا كان جبناها مبارح
انس : مش مشكلة بالمرة بسلم على خالتي مها و ياسمين
آيات ( بتلمح ) : بس ياسمين ؟
انس : هيهيهي ما ازنخك ، قومي اطبخي للسوسة صاحبتك اللي جاية اليوم
احمد ( صحي من النوم هلا ) : صباح الخير ، اصطبحوا انت و اياها
منى : صباح النور ، مالك صحيت بدري
احمد : رن عليي عدي قال رايح يطلب ديمة اليوم
منى / آيات : ديمة وافقت ؟
احمد : اه ، و كنا بدنا نروح نبارك لهيثم بس شكله مشغول ، ببعثله ما برد
منى : اليوم رح يطلعوها من المستشفى بكونوا معجوقين ، خليها لما يروقوا
احمد : ماشي ، مالكم مين عازمين انتوا ؟
انس : سيرين معزومة عنا
احمد : اهلا و سهلا ، كان عزمتي ياسمين كمان
منى / آيات ( بتطلعوا ببعض ) : …
منى : يمكن مو مناسب ماما خلص خليها لما ابوها شوي يهدا
احمد ( تنهد ) : قصدك بس اسافر
منى ( بتغير الموضوع ) : صحي امجد و ابوكي عشان يستعدوا للصلاة
انس : انا طالع ، سلام

_________________________________

مها : الله يتمم على خير يا رب ، و يفرحنا فيهم جميعا
ابو عدي : الله يبارك فيكي ، عقبال بناتك ، بعد الفطور تعالوا عالتحلاية بنستناكم بدار العروس
مها : ان شاءالله بنيجي ، سلم على امال ، مع السلامة
ابو امير : مين صبح ران عليكي ، يا بي حتى يوم الجمعة صرت مشتهي انام فيه
مها ( بنبرة حادة ) : بكفيك نوم الك اسبوع بتنام براحتك اليوم بس اجيت صرت مشتهي تنام
ابو امير : اصطبحي مها
مها : … ، اليوم عدي رايح يطلب ديمة ، و في تحلاية بعد الفطور بدار العروس
ابو امير : اوف اوف شو هالتطورات ، لسا مبارح العروس و اهلها كانو عنا ما حدا جاب سيرة ، حتى العريس كان
مها : شو بعرفني ، يمكن ما كانوا مقررين انه اليوم
ابو امير : يلا التمام على خير ، لا تخبري البنات هسة بلاش ياسمين ترجع تنتكس
مها : على شو تنتكس ، هيها مكيفة احمد كان مبارح معها و جايبلها ورد كمان ، نامت و هية حاضنة الباقة
ابو امير : لا حول ولا قوة الا بالله ، شو بده يصير بهالبنت بعدين و الله كل ما اشوفها هيك بموت و برجع
مها ( بحزن ) : بعيد الشر عنك حبيبي ، الله بصبر عباده ، الحمدلله عكل حال ، يلا قوم قربت الصلاة

_________________________________

شو كانت حلوة هالليلة ، نمت و انا بتخيل احمد معي ..
متل كل يوم ، بس هالمرة قلبي كان حاسسني انه حلمي قرب يتحقق ..
كنا مبارح متل عصافير الحب ، و ارواحنا تعانقت من جديد ..
يا ربي ما تحرمني منه ، ما فيي اتخيل حياتي بلاه ..

حنين : صباحو
ياسمين : صباح الخير
حنين : مالك بتتبسمي ؟ شفتي الملائكة هههه
ياسمين : لا شفت وجهك حبيبتي ههههه ااخ قال ليه بتتبسمي ، بكفي نمت بعد ما شفت احمد
حنين : طب قومي عالتعزيل خلصيني ، امك جدولها طويل هالمرة
ياسمين : استغفر االله العظيم يا ربي ، و لكم خلوني شوي احلم
حنين : احنا ما بنحب الاوهام ، واقعيين يا حياتي

كان اليوم كله عجقة ، بين تعزيل و تحضير للكعك ، و تجهيزات للعيد ..
بس هالمرة يا حبيبي امير كبر ، و صار يمشي ، و غلبته كترت ..

مها : فرح امسكي امير بلاش يتزحلق من المي
فرح : و الله انهلكت وراه ، رح اتزحلق انا
رنين : ييي الباب بدق ، وين بابا ؟
مها : حطي على راسك يا اسيل و افتحي ، ابوكي ما رجع لسا

انس : مرحبا
اسيل ( بخجل ) : اهلين انس ، تفضل
انس ( مستغرب ) : انتي تحجبتي ؟
اسيل : اه ماشفتني كيف كنت البس بالعزايم
انس : بفكر بس بالطلعة ، يلا مبارك ، الله يثبتك
اسيل : شكرا ، شو جاي لحالك ؟
مها : انس ؟! اهلين خالتو تفضل

رنين : شكله جاي ياخد الدوسية ههههه
حنين : يعدمني اياكي ، انقلعي اعطيه اياها قبل ما يفوت يشوفنا بهالمناظر
ياسمين : هههههه تزكرت يوم ما اجا عليي احمد و انا بشتغل بالحمام
حنين : انطمي انتي مو وقت ذكرياتك
ياسمين : انطميت

مها : يا بنات وينكم ؟
رنين : هيني ماما ، اهلين انووس كيفك ؟
انس : اهلين انووس ، هيك الواحد بستعير ؟ الها شهر عندك منا حكتلك صوريها و رجعيها
رنين : و الله ما صحلي ، بس درست عنها شوي ، خلص بعدين ببقى اصورها
مها : دوسية شو ؟
اسيل : فيزياء صح ؟
انس : عليي الحلال اسيل درست منها اكثر منك
رنين ( بمسخرة ) : اه اكيد بتقربلك مهي
مها : الله يكبر عقولكم
انس : وين ياسمين سلامتها
رنين : ياااسمييين ، تعي شوفي انس بده يسلم عليكي

حنين : هههه كملت
ياسمين : عادي ولك ، استني شوي اغسل ايدي

مها : بعملوا بالكعك ، خليك افطر عنا خالتو
انس : يعطيكي العافية ، ان شاءالله بالافراح ، اشتقتلك و الله يا خالتي ليه هيك قطعتي فينا بطلتي تيجي عنا كتير ؟
اسيل : من ورا عمايل اخوك
انس ( زورها ) : انتي ما حدا حكى معك
مها : قومي من هون
انس : لا لا خليها ، انا بسكتها ما عليكي
ياسمين : اهلا وسهلا بانووس ، كيفك ؟
انس ( مبتسم ) : هلا هلا ياسمين ، سلامتك و الله ما عليكي شر
ياسمين : الله يسلمك ، كيفك انت و كيف دراستك ؟ طلعتك الست رنين بعز الشوب يا عليي
انس : الحمدلله ، لا عندي حصة بالمركز كان و مرقت عليكم ، اليوم سيرين جاي تفطر عنا تعالي انتي كمان
ياسمين ( فتحت عيوني ) : حكولك تعزمني يعني ؟
انس : صراحة احمد حابب انك تيجي ، تعالي مشانه ، يا خالتي خلي ياسمين تيجي و اذا بدك خلي وحدة من البنات يجوا معها
مها : وحدة متل مين يعني ؟
اسيل : انا بروح معك
انس : اه هي اسيل بتروح ، يلا امشوا باخدكم معي
رنين : ما شاءالله عليك ، انت التوجيهي و لا الصيام مأثر عليك ؟ ، استنى اناديلك حنين
انس : لا لا بدون حنين ، خلص مثل ما بدكم
ياسمين ( محششة ضحك ) : و الله انه كتير مشغولين اليوم ، مو شايفنا متل السرلنكيات منظرنا ، حتى امير مو ملحقين عليه
انس ( عيونه على اسيل ) : بالعكس حلوين ، انتو دايما حلوين ، امير تيجي معي ؟
مها ( انتبهت عليه ) : هههههه قوم خالتو عنا شغل ، او ساعدنا
انس ( نزل امير عالارض و زعل ) : خلص قايم يلا سلام

بعد ما طلع ، امي وقعت من الضحك ..
و عيونها عليي ، عارفة اني فاهمة عليها ..

ياسمين : هههههه وراكي وراكي
مها : منيح اللي ابوكي مو هون ، الله بحبني من عالي سماه
ياسمين : كان عيدتي عند دار اهلك السنة
مها : انا و اياكم ، و بجيب وحدة تانية بدالي
ياسمين : ههههه ما بعملها اتطمني
مها : ما احلاه و عاملها ، اي لما شفتوا بالمستشفى نشف دمي على منظره خفت يكون رايح يخطب
حنين : عن شو بتحكوا انتوا ؟ خلصوني يلا
رنين : يبي انس بخاف منك
ياسمين : كل العيلة بتخاف منها
حنين : بس مع ذلك صعبة المنال للجميع ، هه ناقصني
مها : الله يرضى عليكي ، ما بنخاف عليكي ابدا صراحة
ياسمين : مو طالعة هبلة لاختك الكبيرة
مها : ازا وقفت على اختها الكبيرة بسيطة ما تكون في حدا تاني متلها و بعمل نفس عمايلها فينا
رنين : باكدلك انه ما في متل ياسمين

_________________________________

علاء : اهلااا اهلاا ، يا مبروك احلى بابا هيثم بالعالم
هيثم ( بصوت مخنوق ) : الله يبارك فيك عقبالك حبيبي
علاء : عقبالك حبيبي ؟! مالك يا زلمة ؟ فوت امي بتستناك حسابك بعدين صاير تسِر لامي بدالي
هيثم : …
نهى : اهلين ، كيف حالك ؟
هيثم ( ضميت نهى بقوة ) : تعباااان
نهى : سلامة روحك ، اقعد اشوف ، احكيلي شو اللي متعبك هيك و الله كنت منيح مبارح
هيثم : انا من زمان ما كنت منيح ، من ست سنوات و انا بالعذاب يا نهى
نهى : يا لطيف ! عذاب شو ؟
هيثم : انا مشان هيك اجيت لعندك انتي بالذات ، لانك الوحيدة اللي بتعرفي قصتي كلها
نهى ( بلعت ريقها ) : …
هيثم : بتتذكريها ؟
نهى ( مصدومة ) : بعدك متزكرها ؟ شو جابها على بالك
هيثم : ما نسيتها و الله ، بحبها و كل يوم بدور عليها و ما يأست ، انا بكرهها لزينة خلص مو قادر اضل معها اكثر من هيك
نهى : بعد ما صار بينكم ولد جاي تحكي هالحكي ، حط عقلك براسك يخي ، هاي خيانة اسمها
هيثم : اااخ خيانة ؟ و عمايلها شو ؟ عينك عيني بتغازله قدامي و بتهتم فيه ، و فوق هيك بدها تجوزه وحدة على كيفها
نهى : استغفر الله العظيم ، لا تحكي هيك بتضل مرتك ، انت متوتر شوي من تصرفاتها بس بكرا بتروق ، انسالي الماضي من بالك البنت راحت بحال سبيلها و تركتك و ما قبلت تستناك سنة
هيثم : لا مو متوتر ، انا واعي منيح على كلامي ، خايف احمد يصير فيه مثل ما صار معي ، قلتله ما تسافر ما رد عليي
نهى : يوووه ، شو دخل احمد ؟
هيثم : ياسمين و احمد قصة حبهم مثلي انا و رانيا
نهى : انا لحد هلا مو فاهمة انت لما رجعت تسال عنها شو حكولك ؟
هيثم : الله لا يسامحهم بس ، ولا وحدة من صحباتها رضيت تعطيني رقمها الجديد ، و حكولي خطبت و نسيتك زمان
نهى : يعني خطبت ؟
هيثم : ما بعرف ! ، بس عندي احساس قوي انها لسا بتستناني
نهى : لا حول و لا قوة الا بالله ، من وين بدنا نجيبلك اياها ؟ ناقصهم اهلي هلا يسمعوا هيك اخبار ؟ ما صدقنا نجوزك و نفرح فيك
هيثم : فرحتوا فيي ؟ و انا نفسي مو مبسوط بهالجوازة

ضميت راسي بين ايدي ، و نزلت دموعي اللي حبستهم ..
قد ما امثل اني قوي ، بضل الحب نقطة ضعفي بهالحياة ..
جابتلي اختي فاين ، و مسحتلي دموعي ، و ضمتني كاني ابنها الصغير ..
تحركت حركة غلط ، و وقعت من جيبة بنطلوني صورة ..

نهى : شو اللي وقع ؟

تلبكت و ما عرفت كيف اطولها ..
سبقتني و مسكتها ، تاملتني انا و رانيا بالصورة ..
كنت لسا باواخر العشرينات ، و وجهي كله حياة و الحب مسيطر على نظرة عيوني ..

نهى : حلوة كتير ، معك حق تتعلق فيها
هيثم : كنت احب عيونها ، احكيلها بس اشوفك كاني بغابة كلها شجر اخضر
نهى : الله عالذكريات ، ان شاءالله بترجعوا تلتقوا شي يوم

_________________________________

علاء : شغلتك و عملتك هاي
سيرين : ههههه انت شو دخلك
علاء : انصرفي ولي ، ما بتستحي
سيرين : عامل حالك مو نفسك تعرف شو بحكوا ؟
ريم : ههههههه يا ربي دخيلك
ابو علاء : لا اله الا الله ، يابا اعقلي شوي ، و لا تجسسوا
سيرين : ما سمعت اشي ئي
علاء ( بقهر ) : بس قدرتي تسمعي انه بدنا نروح عالعقبة !!
ريم : هههههههههههه موتوني
سيرين : هههههههههه يوم لا ينسى
نهى : خير ؟
علاء : ها و هي خلص الاجتماع ، يا زلمة تعال خلينا نقعد نشوفك ، هات فرجينا الصور شو رح تسميه ؟
هيثم : يلا
ريم : الباب عم يدق
علاء : هاد احمد ، فوتوا البسي انتي و اياها
سيرين : يلا منيح اللي اجا عشان اروح معه
علاء : هيهيهي فوتي خلصيني
نهى : اهلين خالتو كيفك ؟
احمد : الحمدلله ، شو بتعملوا هون ؟
علاء : ناموا عنا ، تعال هيثم لسا هون
احمد : منيح اللي لقطناك و الله
هيثم : شو فار عندك انت و اياه
سيرين : ههههه شايف بالله خالو
ريم : اهلا و سهلا احمد
احمد : اهلين فيكي ، مبروك الحمل عقبال سلامتك
ريم ( بخجل و استغراب ) : الله يبارك فيك
ابو علاء : كيف صحة الولد ؟
هيثم : تمام ، نشكر الله
ابو علاء : قال بدك تسميه احمد ؟
علاء ( عيونه على احمد و بغمزه ) : اذا سميته احمد معناها بتحبه اكثر منا
هيثم : لا ما بدي احمد ، احتمال يوسف
احمد ( مصدوم ) : شو يوسف ؟ لا لا انا و ياسمين متفقين نسمي يحيى و يوسف اولادنا
علاء : هههههه لا يا ، اولادكم ؟
نهى : ان شاءالله بنفرح فيكم و بنشوف اولادكم
ريم / سيرين : ههههههه
هيثم : طيب بلاش يوسف
علاء ( بطلع على هيثم بدهشة ) : يا شيخ !
احمد : اه شو مالك ؟ سمي اي اسم ثاني اذا بدك يمان مثلا
هيثم : لا بدي من اسماء الانبياء
نهى : محمد
علاء : آدم
ريم : حلو
علاء،( بحكي بمسخرة و بلف بعيونه عالجميع ) : يعني بضل بحرف الاف كمان و اهم اشي بنحطله مدة ، عشان لاسمح الله لو بيوم من الايام حدا عايره انت بحرف الالف و تعتبر لا من الحروف و لا من الارقام ، يسكته بالمدة
الجميع : هههههههه
نهى : يا بي ما احلى كلامها هالزعرة
هيثم : يلا انا لازم اروح
علاء : طيب متى بنقدر نشوفه ؟
احمد : خبرنا اول باول ، بتعرف ما ضل عندي وقت كثير
نهى : لسا مُصِر تسافر ؟
احمد : هههه خالتي ، خفوا عليي و الله مبارح ما كنت قادر اتطلع بعيون ياسمين
ابو علاء : هييي الله يصبرها
سيرين : احمد ازا راجع على بيتكم بدي اجي معك
احمد : يلا قومي
نهى : بكير لسا
سيرين : لا يا دوب نخلص حكي ههههه
علاء : احمد فتح عيونك منيح ، اي حركة هيك او هيك بس رن و افصل عليي
احمد : ههههه لا سيرين عاقلة ما بتعمل اشي
علاء : اه كثيييير
سيرين : انا جاهزة يلا
احمد : يلا سلام ، و باركوا لدار خالتي
نهى : لا الكل جاي بعد الفطور ، اهلك معهم خبر كمان

_________________________________

انبسطت كثير بشوفة هيثم ، كان وضعه صعب و مبين صاير معه اشي ، ما ارتحت لملامح وجهه ..
و علاء اخد مني رقم حمزة ، و حكالي بده يحكليه اشي مهم ..
منيح اللي سيرين اجت معي ، بتسلى معها بالحكي ..

احمد : كانها ريم زعلت لما باركتلها ؟
سيرين : لا هي هيك خجولة من كل كلمة ، هاي سيارة عمو ؟
احمد : اه ، مبسوط لعدي و ديمة كثير ، الله يهنيهم
سيرين : و اخيرا رح يخطبوا ، احمد دخيلك اخطبها لياسمين قبل ما تسافر ، و الله مبارح قطعت قلوبنا عليها
احمد ( بحسرة ) : و الله لو يطلع بايدي بتزوجها على طول بدون خطبة ، بس شايفة الوضع كيف
سيرين : عكل حال آيات سالتها ازا رح تستناك
احمد ( باهتمام ) : اه و شو قالت ؟
سيرين : عاساس مو عارف الجواب ، طبعا بتستناك لاخر عمرها
احمد : ما يحرمني منها و لا من طيبة قلبها
سيرين : معك حق ، بتصدق كل ما حدا يحكليها انه الك فلوس عند احمد كتير بتعصب و بتوصل للبكى ، بتقول حرام عليكم حسوا فيه ، انا مستحيل اخد منه اشي
احمد : و الله مو ناسي انا و حاطهم على جنب من حق السيارة ، اااخ يا سيرين لو تعرفي كم ندمان ، عمري ما كنت هيك بحياتي كلها
سيرين : …
احمد : صحيح بدي اسالك
سيرين : تفضل
احمد : انتي لما انعزمتي عند دار خالتي مها ، قابلتي حدا بطريقك او… ؟
سيرين ( في نفسها : شو هالسؤال هاد ليكون ياسمين حاكيتله اشي ) : … لا ليه بتسال
احمد ( مو مصدق ) : تذكري ، يعني يمكن تكوني لمحتي حدا ، او حدا لمحك هههه
سيرين ( متدايقة ) : احمد شو هالحكي مين بدي المح ، يا حسرة عليي جفاااف
احمد ( رفع حواجبه و بضحك ) : جفاف ! قصدك اني بلمح على شب ؟ انا ما كان قصدي شب ، يعني ما حددت مين شفتي
سيرين ( بنفسها : يمة ما اقواك ) : لا ما شفت حدا ، و انا قصدت جفاف لاني ما شفت اي حدا سواء شب او بنت
احمد : ههههه تمام هي وصلنا ، اسمعي بدي اوصيكي ما تبالغي بالشرح و التفاصيل عن علاء و ريم لانه امي وضعها تعبان من وراي مو ناقصها
سيرين : اكيد و لا يهمك مجبورين نتحملك و نرقع من ورا عمايلك
احمد : هههههه

_________________________________

حمزة : الو
علاء : الو حمزة ، كيف حالك ؟
حمزة : الحمدلله ، مين معي ؟
علاء : له له مبارح كنا سهرانين سوا ، انا علاء يا زلمة
حمزة : هههه اهلا اهلا صوتك متغير عالتلفون
علاء : تمويه هههه المهم ازعجتك او لا ؟ لاني بدي احكي معك ضروري
حمزة ( مستغرب ) : لا ولو ، خير شو الموضوع ؟
علاء : هو ما بنحكى عالتلفون ، في مجال اشوفك ؟
حمزة : اكيد تعال على بيتي ، اهلا وسهلا
علاء : بلاش بيوت استناني بالشارع
حمزة : طيب يلا هسة ببعتلك العنوان

كان لازم اقابل حمزة ، و اشرحله التفاصيل ..

علاء : حمزة انا بدي احكيلك شغلة مبارح ما كان عندي الجراة اني اخبرك اياها
حمزة : خير علاء ، عم بسمعك
علاء : بدي توعدني ما تزعل ، و تفهم تصرفي
حمزة : … ماشي
علاء : سيرين بتكون اختي
حمزة ( انصدم ) : اختك ؟!
علاء : اه ، و انا خبيت عنك لاني كنت بدي اوصل اذا هية عاملة اشي غلط او لا بس هالاشي أنبني ضميري عليه ، ما كان لازم اختبرها بهالاسلوب قدامك لانه بيوم من الايام رح تحكي عني اني ما كنت واثق فيها
حمزة ( تبسم ) : شكرا لانك خبرتني ، صراحة لو اكتشفت هالحكي بعدين كنت رح اخد موقف منك و من الشباب
علاء : بس ما تبين انك بتعرفنا لما تيجوا عنا
حمزة ( بياس ) : طيب خلونا نيجي عندكم اول ههه
علاء : و الله بعد ما عرفتك تمنيت لو امي قبلت تيجوا مبارح ، بس حتى اليوم خطبة عدي على اخت قصي ، و هيني رايح عندهم
حمزة : الف مبروك ، الله يهنيه مبين عليه شب ابضاي و معدل
علاء : تسلم ، بعض ما عندك ، و غير عن هم سفر احمد اللي لحد هسة ما حدا قادر يستوعبه
حمزة : اذا انا اللي بعرفه من يومين زعلت ، كيف انتوا الله يعين اهله
علاء : تسلم ، ان شاءالله باقرب فرصة بخلي امي تحدد موعد ، بس بدك الصراحة سيرين شوي رافضة عشان في فرق بينكم ٩ سنين
حمزة : ههههه لا اقنعها انت خلص انا معتمد عليك من هالناحية
علاء : ههههه و لا يهمك

بعد ما حكتلي ريم عن سر سيرين ، قلبي وجعني عليها ..
كمان هية بشر و حقها تحب و تنحب ، و حمزة شب مبين عليه انه ما بتعوض ..
ما نمت و انا افكر كيف رح اشرح لحمزة ، بس طلع الموضوع اسهل من ما توقعت ..
و حمزة اله دور كبير انه حسسني بالهدوء ، و قدرت اوصله المعلومة بشكل بسيط ..

_________________________________

حنين : انا اعلنت عنوستي
ياسمين : هههههه تعلمي من اسيل بلكي تقدري تزبطي واحد
رنين : يحرء حريشها شو هاد ، ما قام عيونه عنها
حنين : و بكرا ازا درس طب ، بتصير مرت الدكتور ، راحت عليكي يا ياسمين
ياسمين : شو هالحكي ليه في طبقات بيناتنا ، بعدين احب ما على قلبي اجوزكم احسن جيزات يا خواتي
رنين : اااخ عقبال عندي ما يحس عليي عمر
حنين : لا تزكريني ، قال امجد بده يزبطلي اياه ، ناقصني زنخين
ياسمين : زنخين ؟ ، ههههههه حرام عليكي و الله دمه صبابا
رنين : انا بالغرام انا دايبة صبابا
حنين : الله يشفيكي ، شوفيلك واحد محرز اكتر ، بدل هاد شوفير فرشة
ياسمين : يا حرام اول مرة بقعد هيك بدون شغل ، بستنى بالشهادة تطلع
رنين : اكيد اجا الوقت اللي يشتغل بشهادته ، طيب انا شو اعمل حتى يحس فيي ؟
ياسمين : لا تعملي اشي ، اللي كاتبه الله بصير

_________________________________

آيات : اهلا و سهلا بالعمة سيرين
سيرين ( بسبل بعيوني ) : اهلين بالخالة آيات ههههه
منى : هاتي لنشوف احكيلنا شو عملت ريم مفاجاة ؟
سيرين : انتوا كنتوا عارفين ؟
آيات : لا عرفنا منك ، مو انتي حكتيلي الصبح انه ريم عمتلكم مفاجاة
سيرين ( بعدم اهتمام ) : اه صح تزكرت ، لا عادي شوية بالونات و هيك حكي فاضي ، المهم المضمون
منى : يلا الله يقومها بالسلامة
سيرين : امين ، هي امي بلشت توصيات و نصائح طبية عليها من مبارح
آيات : ههههه حبيبتي خالتو ، خليها تشتغل شغل حماوات
منى : ممرضات قصدك
سيرين : المهم شو طبختولي ؟

كان لسا عقلي بكلام احمد ، و اسئلته الغريبة ..
شو ممكن يكون بعرف ، انا ما حكيت الا لياسمين و ريم و ديمة ..
سمعت امجد بنادي على آيات اللي كانت معجوقة بتحضير الاكل ، رحت ارد عليه انا ..

امجد : يا آياااات
سيرين : نعم ؟
امجد ( قام عن تخته بخوف و لزق باحمد / حركة هبل ) : يمة مين انتي ؟ متى اجيتي ؟
احمد : هههههههه مين انتي ؟ هههههه
سيرين : ما ازنخك احكي شو بدك آيات مشغولة
امجد : لا ما بدي انتي شريرة ، خلص روحي
سيرين : افففففت ما ابيخك
امجد : اللهم اني صائم
احمد : ههههههه

رجعت لعند آيات و خالتي عالمطبخ ، و قعدت اساعدهم ..
شوي الا صوت امجد طالع بنادي عليي ..

امجد : سيريييين
سيرين : روحي ردي عليه ما بدي اشوفه
منى : ههههه بلشنا
آيات : هيني رايحة ، نعم
امجد ( عاد حركة الهبل اللي عملها اول مرة ) : يمة ، مين انتي ؟
احمد : بنادي على ايات بتطلع سيرين ، بنادي على سيرين بتطلع ايات مالكم ؟
آيات : احنا اللي مالنا و لا انتوا ؟ احكي شو بدك ؟
امجد : شو طابخين ؟
آيات ( بعصبية ) : اكل ، شو بدك كمان ؟
احمد : ههههه مالك معصبة ؟
سيرين : من بياخة السيد امجد ، مو شايفنا مشغولين
امجد ( عينه على احمد و بحرك بحواجبه ) : انتي ليش اجيتي عنا اليوم ؟ مطولة لتتجوزي و نخلص منك ؟
سيرين : مال الكل بده يخلص مني ؟ علاء من مبارح بوز باهلي يوافقوا عالعريس اللي بده يجي بعد العيد
امجد : الله اكبر ! في عريس كمان ؟ مشااان الله وافقي يا يا
آيات : ما حكتيلي عريس شو ؟
سيرين : ما بعرف رنت امه على رقمي و قالت ابنها ممرض و عمره ٣١ سنة و عنده بيت وسيارة
احمد : خلص ممتاز وافقي
سيرين : حاسسته كبير شو رايكم ؟
امجد : يا دوب يقدرلك ههههه
احمد : يمكن بس تشوفيه تغيري رايك
سيرين : ليه يعني ؟
امجد : تخيلي يطلع اشقر و عيونه خضر
احمد : و مفتول عضلات متلي ( نفخ عضلاته قدامها )
آيات : يا سلام ، لو اكبر منك بمية سنة وافقي
سيرين : قولتك !
احمد : اكيد طبعا لازم توافقي ، و يمكن يكون حبك من اول نظرة متل الافلام
سيرين : خبراء الحب و الغرام ، شو كمان اعمل ؟
امجد : حاليا هيك بكفي ، انتي وافقي و بعدين بنعلمك كيف تحتفظين بالعريس من الطفشان
آيات : ههههه عفكرة غلطانين انتوا سيرين كتير عاقلة وما عندها اي نوايا للتطفيش
امجد : اااه صح عاااقلة كثيييير
انس ( دخل فجاة عالغرفة ) : آيات ردي على امي بسرررعة
امجد / آيات / سيرين : خيييير ؟
انس : ما بعرف روحي شوفي

_________________________________

ابو احمد : سيرين لحالها جاي عنا ؟
منى : اه مين بده يجي كمان ؟
ابو احمد : ياسمين مثلا ! خلي هالولد يشوفها بكرا بسافر و بنحرموا من بعض
منى : خليها تتعود على غيابه ، بعدين مبارح شافها و بالعيد بشوفها كمان
ابو احمد ( طنشها و مسك تلفونه ) : لا لا انا بدبر الموضوع هسة ، الو السلام عليكم .. كيف حالك يا ابو امير اشتقنالكم يا زلمة .. بالله عليك تسامحنا على اللي صار و الله ما الي عين اشوفك
منى ( بتاشر بايدها ) : لا تحكيله عن قصة المول
ابو احمد ( بهزلها براسه ) : بدي اطلب منك طلب ، و الله خجلان منك بس بجوز عرفت انه احمد بده يسافر برا البلد ، و طلبي منك تسمح لياسمين تيجي تفطر عنا اليوم و هي بنت خالتهم سيرين موجودة و ياسمين و خواتها و انتوا تعالوا .. انا باجي اخذهم .. الله يجبر بخاطرك .. حبيبي يا زياد .. الله معك
منى : وافق ؟
ابو احمد : بقدر ما يوافق ؟ زياد اكثر واحد فاهمني ، المهم ياسمين و اختها جايات اليوم احسبي حسابهم
منى ( بفرح ) : الله يخليلنا اياك ، لا تحكي لاحمد خليها مفاجاة
ابو احمد : طيب ، براحتك
منى : يا انس نادي على آيات تيجي شوي
آيات : نعم ماما ؟
منى ( بهمس ) : ابوكي عزم ياسمين و بده يروح يجيبها لا تحكي لحدا مفاجاة بدي اعملها لاحمد
آيات : واااو ، طيب الحمدلله فرحتيني
منى : المهم وصي ياسمين ما تجيب سيرة المستشفى قدام ابوكي ، احكيلها انه ما بعرف شو صار معك
سيرين : شو القصة ؟
آيات ( بتضحك ) : مفاجأة

_________________________________

مها : مع مين كنت تحكي ؟
ابو امير ( تنهد ) : ابو احمد ، بده يعزمنا عنده عشان احمد يشوف ياسمين قبل ما يسافر
مها : قصده يشبع منها
ابو امير : هيك اشي
مها : و بدنا نروح ؟
ابو امير : بس ياسمين و خلي وحدة من خواتها تروح ، سيرين عندهم كمان
مها : اه بعرف ، ماشي هلا بخبرها ، الله يسعدك متل ما اسعدته
ابو امير : ليه شو طالع بايدي اعمل ، استحيت اكسفه ، حاسس بوجع قلبه على سفر احمد
مها : الله يعينا ، ازا احنا تاثرنا كيف اهله
ابو امير : ابوه متعلق كثير فيه ، عنده احمد فوق الكل ، من لما كان صغير دايما يحكيلي هالحكي
مها : الله يحميلهم اياه ، يلا خليني اخبرها ، رح اتطير هلا ههههه
ابو امير : ههههه ، جيبيلي امير لعندي

_________________________________

اليوم ما كنت حابة امرقه على خير مع امجد ، و تقلت العيار عليه كتير ..

سيرين ( موجهة كلامي لآيات على سمع امجد ) : يييي دريتي انه بيان جاييها عريس غير شكل
آيات : مبروك
سيرين : الله يبارك فيكي ، اما شو عريس بقول للقمر زيح زيييح لاقعد مكانك ( بحرك بايدي و بمثل )
امجد ( حشر حاله على طول ) : و انتي ليه غيرانة منها ، مهي جايكي عريس
سيرين : مو غيرانة عادي ، بس هية عريسها مضمون ، و مبين عليها موافقة
امجد ( بذهول ) : موافقة ؟
آيات : انت شو دخلك ؟ روح من هون
امجد : اسكتي ، كملي سيرين شو بتعرفي كمان ؟

وصلت الكرة لملعبي ، و اخدت راحتي فيها ..

سيرين ( بسبل بعيوني ) : الصراحة ما حكتلي كتير معلومات ، انا عرفت عن طريق غنى انه شب ولا كل الشباب ، و فوق هيك ماشاءالله لا قوة الا بالله قل اعوذ برب الفلق
امجد : ماله ؟
سيرين : غني و اهله واصلين كتير يا امجد
امجد : احلفي ؟
سيرين ( بغرور ) : انا ما بحب احلف على امور تافهة ، بس على هوا ما سمعت الهدايا كانت تقالة كتير
امجد : اي هدايا ؟
آيات ( بتنادي بصوت عالي عشان تشوش ) : يا احمد احمد
سيرين ( فهمت عليها ) : هدايا الها و لاهلها ، تخيل قديه نفسهم بهيك عروس ، صراحة معهم حق ربنا الله انك يا بيان حلوة ،( غمضت عيوني و بحرك بايدي ) لو عندي اخ غير علاء مستحيييل اخليها تروح منا
احمد : الله ستر انه ما عندك اخ
سيرين ( فتحت عيوني لقيت قدامي احمد ، خفت منه ) : يا خسارة ، يا ريت عندي بدل الاخ عشرة ، بس هيك حظي شو اعمل
احمد : برجع احكيلك منيح ما عندك اخ
سيرين : شو مالكم ؟ عم نمزح شه
امجد : عم تمزحي ؟ بدي امسح فيكي الارض اذا بتمزحي مرة ثانية
سيرين : هههههه اعصابك لك يا خيي منّا مستاهلة
احمد : لا تحكي لبناني قدامي ، صراحة مو حلو عليكي
منى : مالكم بتتهاوشوا ؟
امجد : قيميلي هالسوسة من وجهي
منى : هههههه الله يهديكم

_________________________________

مها : ياسمين وينك
ياسمين : نعم ماما هيني بالمطبخ
مها : عمك ابو احمد عزمك عالفطور عندهم

كانت ايدي مشغولين بالكعك ، و عقلي بعالم آخر ، بفكر كيف رح تكون العزومة ، سيرين هناك و انا لا ..
بسمع امي بتحكيلي انه عمي عزمني شخصياً ، و قعت من ايدي الحبة اللي كنت اشتغل فيها ..

ياسمين ( بذهول ) : بتحكي جد ؟ و عادي اروح يعني ؟
مها : ابوكي وافق و خدي وحدة من خواتك
اسيل : انا طبعا عزمني انس لانه عيب لازم اروح
حنين / رنين : متى عزمك ؟
فرح : انا ياسمين خديني مشان الله كتير نفسي اروح
ياسمين : افت شو صارلكم ؟ حسستوني رايحة عالقصر الملكي ، خلص انا بروح لحالي
مها : ما حزرتي ، خدي حنين معك
حنين : اعوذ بالله ، خلص رنين روحي بلكي انس درسك كلمتين
رنين ( بتجاكر اسيل ) : اه و الله قولتك بروح و بستفيد و بالمرة بتسلى مع البنات
اسيل ( بحزن ) : الله يسامحك ياسمين ، مشان الله خديني
ياسمين : مالك قاتلة حالك عالروحة ؟ شو بدك تعملي ما حدا من جيلك هناك ، خلص رنين بتروح

غمزنا بعض انا و خواتي ، و جنناها لاسيل المسكينة ..
خلصت الشغل اللي بايدي بسرعة ، و رحت جهزت حالي ..
اكيد اكيد بدون مخالفات ، رايحين ننبسط احنا ئي ، يؤبر قلبي بكون بستناني على نار هلا ..

مها : رنين قومي البسي
رنين : لا ما الي نفس خلص ، خلي اسيل تروح على كل الاحوال مو مستفيدين منها باشي
حنين : ههههه خدوا امير معكم
مها : لا ما برضى ابوكي
رنين : ليه ما يرضى ، ياسمين بتدير بالها عليه منيح ، اصلا بسكت معها اكتر اشي
مها : طيب هلا بحكيلها

بعد ما انهيت لمساتي الاخيرة على رونق بشرتي ، و كويت لبستي ..
بتفاجا انه ماما بدها اياني اخد امير معي ، و رنين غيرت رأيها و بدها اسيل تيجي بدالها ..

ياسمين : ماما لا ما بدي ، خلي ابنك بحضنك احسن
مها : معلش خديه اليوم ، حتى نقدر نكمل الكعك و ننجز بسرعة قبل العشاء
ياسمين : امري لله ، حطي كل الاشياء اللازمة
اسيل : ماما شو البس ؟ بتحكيلي حنين هاي البلوزة قصيرة عالبنطلون ، ما عندي اشي البسه يا الله حجبتوني قبل ما تشترولي اواعي
ياسمين : خلص ماشي حالها اليوم ، يلا بسرعة قرب يوصل عمو

_________________________________

ابو ماهر : شو هاليوم الحلو هاد ، الله يفرحني فيكم يا سيدي
عمر : حبيب قلبي ، يلا يلا هي الكل جاهز
ام ماهر : اخوك اجا من شغله يا ستي ؟
عمر : شغل شو ؟ اخوي اليوم خارج التغطية ، من الصبح و هو يحلق و يكوي و يلبس و يشلح ، عرييييس
بيان : مرحبا ، جاهزين ؟
عمر : اوووه شوفوا مين عنا ؟ اكيد جاهزين المهم انتي جاهزة ؟
بيان : اه طبعا ، يلا هي اهلي نازلين كمان
ام ماهر : الله يحميكي ، حوطتك بالله يا حبيبتي عكبال ما افرح فيكي
بيان ( خجلانة ) : امين بوجودك يا ستي
عمر : العرسان طوابير عليها ، بس عاد هية توافق
بيان : لسا بكير ، تخصصي صعب خليني اتخرج اول
عمر :عمي هيثم رح يجي ؟
ابو ماهر : ما بنعرف اشي عنه ، الله يهدي باله
غنى : يلا جاهزين بحكيلكم بابا ؟ بيان شو هالحلاوة كتير بتجنني
بيان : تسلمي ، اه جاهزين ، هي اهلي نزلوا
ابو ماهر : يلا افتحولنا هالسيارة

_________________________________

بعد ما شكيت همومي لاختي نهى ، طلعت من عندها للمستشفى ..
تاخرت على زينة و ابني ، اللي ما لحقت افرح فيه و اتهنى بولادته ، بسبب عمايلها ..

هيثم : شو في هون ؟
ام زينة : سلامتك و الله ، بس اجينا ناخد بنتنا لعنا
هيثم : شو المناسبة ؟ عندها بيت بتتنفس فيه ، و انتي اهلا و سهلا فيكي البيت بيتك
ام زينة : بعد اللي عملته ببنتي ما بخليلك اياها دقيقة
هيثم : انا شو عملت ؟
زينة ( بتباكي ) : خلص ماما لا تحكي و لا عبالك ما رح يحس ، عديم احساس زوجي و ابو ابني
ام زينة : لو بعرفه هيك ما رميتك هالرمية
هيثم ( شبكت شعري باصابعي و كتير معصب ) : ممكن افهم شو الموضوع ؟ شو عم تحكي انتي و امك ؟
زينة : انا رايحة عند اهلي ، و لما بدك تشوف ابنك تعال هناك ، على بيتك ما الي رجعة الا لما ترد اعتباري
هيثم : اعتبار شو ست زينة ؟
ام زينة : عصبت عليها و رفعت صوتك بنص المستشفى ، و فوق هيك بتتركها لحالها بدون ما تسال ازا بدها اشي او صارلها اشي بعد عمايلك ؟
هيثم ( بلا مبالاة ) : يا حرام و شو صار فيكي ؟
زينة ( انقهرت ) : امشي ماما يلا انا ما بدي اضل مع هاد المخلوق اكتر من هيك
هيثم ( بغضب ) : زيييينة ، احترمي حالك و امشي معي عالبيت حتى نتفاهم ، من متى بتطلعي مشاكلنا للناس ؟
ام زينة : انا امها يا حضرة الدكتور ولا نسيت ؟ بنتي بدها تيجي معي يعني بدها تيجي ، خليك انت ببيتك و ارتاح منها
هيثم ( رفع اصبعه و بهدد ) : اذا بتروحي لمكان ما الك رجعة عندي ، فهمتي ؟

كانت امها كثير مصرة عليها انها تاخدها معها ، بس لما زينة سمعت كلامي ..
و لانها بتعرفني منيح ، و ما بتردد بتنفيذ كلامي اللي بحكيه ..
تراجعت و تركت ايد امها ، نزلت راسها ، و ما عرفت شو بدها تحكي ..

هيثم : ارجعي لسريرك ، خليني اخلص اجراءات الخروج و برجعلك
زينة : …

طلعت من عندهم ، و ما التفتت لحدا ..
كانت الفرصة جاييتني على طبق من فضة ، حتى اخلص من زينة ..
بس قلبي ما طاوعني ، على البيبي اللي عمره اقل من ٢٤ ساعة ..

ام زينة : ما رح افوت بيتك ، فهمتي ؟
زينة ( بتبكي ) : مشان الله ماما بدك اياني اخرب بيتي ، خلص سوء تفاهم و انحل
ام زينة : تصطفلي ، خلي حماتك تقوم فيكي ، انا هيني مروحة مع ابوكي
زينة ( بتبكي ) : الله يخليكي ما تتركيني ، صدقيني هيثم منيح كتير نسيتي شو عمل اشياء مشانكم
ام زينة : … سلام

لمحت امها طالعة من الغرفة ، و راحت ، فكرتها بدها تجيبلها اشي ..
خلصت الاجراءات ، و رجعت لعندها ، كامت منهارة من البكى ، و الولد ببكي معها ..

هيثم : هاتيه عنك
زينة ( بتبكي ) : ماما راحت زعلانة ، ما رح تيجي عندي عالبيت
هيثم : … امشي معي يلا ، كل اشي بنحل لا تبكي ، شوفي كيف الولد حالته

نزلتها و ركبنا بسيارتي ، و رجعنا عالبيت ..
كنت ناوي اجهزلها اياه و ازينه ، بس نسيت ..
فاتت و كانت مصدومة انه حالته سيئة ، و مو متل ما كانت بدها ..

زينة : ليه هيك البيت ؟
هيثم : ما لحقت ، خلص اليوم بزبطه
زيمة : و من مبارح مختفي وين حضرتك ؟ في اكل ؟
هيثم : اه ؟ ما بعرف استني اشوف

تركتها ترتاح بغرفة النوم ، و مسكت التلفون و صرت متل المصروع احكي تلفونات مع خواتي ، و خبرت نهى بكل اشي صار ..

نهى : بسيطة هلا ببعتلك احسن اكل ، انت روق
هيثم : يا ريتني خليتها تروح و ارتحت منها
نهى : انت عملت باصلك ، و تصرفك هو الصح ، امها انا بتفاهم معها
هيثم : انسي لا توجعي قلبك معها ، يلا استعجلي بالاكل يختي الله يسعدك

_________________________________

سهى : طلعيلي طنجرة خليني اعمل لزينة
ديمة : خير ؟ شو جاب سيرتها
سهى : انا عارفة ، خلص هاتي اشوف كيس الفريكة ، انقعي هدول
ديمة : ناقصني عجقة ، لسا ما جهزت حالي عفكرة ماما
سهى : يلا بسرعة هلا بطنجرة الضغط بعملها ، طولي كيس لحمة سوحيه بالمايكرويف
ديمة : يا قصي .. قصي
قصي : صرعتيني مالك بتصرخي ؟
ديمة : تعال ضبضب المطبخ انا بدي اروح البس خلص ، مو ضايل وقت
قصي : طيب روحي ، مالك ماما ؟
سهى ( بتبكي ) : خليها عالله
قصي : يا ستير ، خير ؟ ديمة زعلتك
سهى ( بتبكي ) : لا ، خلص اسكت مو قادرة احكي

_________________________________

ابو احمد : اهلين عمو
ياسمين ( بخجل ) : يسملو كتير عمي ، ما يحرمني منك
اسيل : شكرا عمو عالعزومة
ابو احمد : العفو ، هي كمان امير بيك جاي لعنا ، شو هالحلاوة ؟ ما شاءالله اسم على مسمى
ياسمين : حبيبي يلا سلم على عمو ، احمد رجع من الشغل ؟
ابو احمد ( انصدم بس استدرك حاله ) : اه اه اجا طبعا ، قرب المغرب عمو شو مالك ؟
ياسمين : الله يعطيه العافية

كنت قاعدة و مبسوطة ، و بفكر شو رح نحكي انا و احمد اليوم ..
و شو رح نعمل اشياء ، انا وسيرين و آيات ..

_________________________________

احمد : وين راح ابوي ؟
منى ( مطنشة ) : انداري عنه ، بجوز راح يجيب اشي
احمد : هيثم كان عند دار علاء اليوم اجا يشوف خالتي نهى ، حكتلك سيرين ؟
منى : لا و الله ما حكت ، شو بده منها ؟
احمد : بدك الصراحة ما كان عاجبني منظره ، هيئته تعبان و الله يمة
منى : الله يكون بعونه
سيرين : وين رحتي خالتو ؟ ماما بترن عليكي ما بتردي
منى : وين تلفوني و الله ما شفته اليوم
سيرين : هيو ، اه ماما هي خالتو خدي
منى : الو .. طولي بالك .. استغفر الله العظيم .. طيب هلا بشوف شو في عندي و ببعتلهم .. يلا
احمد : مالنا ؟
سيرين : مالك خالتو ؟
منى ( حزينة ) : هيثم ( تنهدت ) بدنا نبعتله اكل ، تزاعل هو و حماته و حلفت ما تروح عند بنتها
احمد : الله اكبر ، شو هالناس هاي ، بقلك تعبان كان
سيرين : انا ما رضيت احكيلك خالتو حتى ما ازعلك ، بس من مبارح حكى مع امي و طلب منها ما تخبر حدا بحالته
احمد : شاطرة انتي ، بتخبي الاشي المهم
أنس : اجا ابوي
ياسمين : السلام عليكم
احمد ( وقف متفاجا و بضحك ) : و عليكم السلام
منى ( عيونها على احمد و بتضحك ) : اهلا و سهلا
سيرين / امجد : شو هالمفاجاة
امجد : امير امير يلا تعااال
احمد : لا رح يجي عليي انا ، تفضلوا
سيرين : ينعن امها مفاجآتك انتي ههههه
ياسمين : حبيبتي هاي مفاجآت عمو ، تفضلوا هاد كعك اليوم عملناه
انس : لما حكتلكم تعالوا معي ما قبلتوا ، امك قلعتني
احمد : شو قلعتك ؟ انت كاين عندهم
اسيل ( بدلع ) : حرام عليك ما كان قصدها ، كان عنا شغل بالبيت ، بس هلا لما قالت ماما لياسمين حكتلهم انا بدي اروح عشان انس عزمني
امجد ( عيونه على احمد و بغمزه ) : منيح اللي اجيتي و الله
ياسمين : كيفك خالتو ؟ مالك متدايقة ؟
منى : لا بالعكس انبسطت فيكي ، بس خالك هيثم تعبان
ابو احمد : ايوا ، اجا دوره يعني ؟
سيرين : الله يجبر عليه ، واحد مبلي بزينة اكيد بده يكون تعبان و عايف حاله
امجد : لنشوف شو رح يصير باللي بده ينبلي فيكي انتي

الجميع : ههههه
سيرين : ياسمين تعي شوي
احمد : لا تروحي ممنوع ( بمد لسانه و بضحك )

_________________________________

لسا ما لحقت اوصل ، و اتهنى بشوفة الغالي ..
سيرين سحبتني على جنب ، و سالتني ..

سيرين : انتي ما حكيتي عن هداك الشب لآيات او احمد ، صح ؟
ياسمين : انو شب ولي هبلة ؟ كيف احكي يعني
سيرين : ولك احمد بلمحلي طول اليوم انه مين شفتي و انتي رايحة عند دار خالتي مها ؟ ما قابلتي حدا او اشي متل هيك ، و فوق كل هاد بحكوا عن العريس اللي جايني اشقر و عيونه خضر
ياسمين ( رفعت حواجبي ) : اتصلوا ؟
سيرين : مين ؟
ياسمين : قصدي جاييكي عريس ؟ حدا متصل فيكي ؟
سيرين : اه مبارح بس اعتزرنا منهم
ياسمين : لييييش ؟
سيرين ( مصدومة ) : لبعد العيد مالك ؟
ياسمين ( تنهدت ) : ايوا منيح يلا ، لا اتطمني ما حكيت اشي لحدا انا

شلشتني سيرين بهالخبريات ، و احمد ماله بسأل هيك اسئلة ..
معقول رجع رن على حمزة ، و حكاله السر ؟ ..

احمد : وين سرحان الحلو ؟
ياسمين ( بسبل بعيوني ) : بجمالك حبيبي
احمد ( غمزني ) : تعالي معي
ياسمين : هههه يلا

يا ويلي انا ، بس ما ينسى حاله انه مو خاطبين ..

احمد : و الله اهلين بحبيبتي
ياسمين ( بخجل ) : اهلين بحبيبي
احمد : كيف سمحلك ابوكي ؟
ياسمين : عمو طلب منه ، و وافق
احمد : ابوي ؟ ما حدا حكالي غريب
ياسمين : لانك كنت بالشغل اكيد ، كيف شغلك برمضان ؟
احمد ( بلع ريقه ) : اه يمكن ، منيح ماشي حاله

كنا قاعدين كل واحد على كنباية ، و عيوننا بتحكي احلى غزل ..
دايبين ببعض ، و ناسيين العالم حوالينا ..
بعدين خطرلي اساله ، و تاكد ازا التقى بحمزة او لا ..

ياسمين : شو قصتك مع سيرين بتسالها اسئلة غريبة ؟
احمد : اسئلة متل شو ؟
ياسمين : انه شايفها حدا او شايفة حدا و مو عارفة شو
احمد : و يا ترى انتي كمان مو فاهمة عن شو بحكي ؟
ياسمين ( انصدمت ) : عن شو بتحكي ؟
احمد : عن الشب اللي حكيتي معي من تلفونه
ياسمين ( فقعت اصابعي و بان عليي التوتر ) : اي شب ؟
احمد : نفسه اللي اعطيتيه رقم سيرين لانه بدور عليها
ياسمين ( بصدمة ) : حمزة !
احمد : هو بعينه ، لحقتي تنسيه يا فاعلة الخير
ياسمين ( بخوف ) : ك ك كيف عرفت ؟
احمد ( بخبث ) : له نسيتي مين بكون احمد بهالسرعة ؟ ما حبيتها منك يا روحي
ياسمين : احمد .. اكيد ما زعلت مني صح ؟
احمد : لا ليه ازعل ، او اغار مثلا انه حبيبتي و خطيبتي السابقة بتحكي مع شب غريب و ماخدة راحتها معه
ياسمين ( بثقة ) : اه ليه تغار ، يعني و ازا اشقر و عيونه ملونيين ، و مفتول العضلات ( بتطلع على عضلاته و بسبل بعيوني )
احمد : اكيد مهو انا حمار ، يا اما بغار يا اما حمار
ياسمين : ههههه ليه هيك بتحكي عن حالك ؟ ولك انت بتعرف اني ما بشوف غيرك بالدنيا كلها ، بعدين انت حلو يعني مستقل بحالك ؟
احمد : لا مو مستقل بحالي ، انا بس بذكرك فيي لانه شكلك نسيتيني
ياسمين : بحبك انا
احمد ( رفع حواجبه و عيونه كلها حب ) : و انا بعشقك انتي و جنانك ، بس ما فهمت هي سيرين حكتلك عنه ؟
ياسمين : اه طبعا ، بس امانة ما تبين هالشي قدامها
احمد : بتعرفي انه انا و علاء و كل الشباب مبارح كنا معه قبل ما نيجي عندكم
ياسمين ( خبيت وجهي بايدي ) : احلف ؟ لا مستحيل لحقتوا ؟
احمد : طبعا ، اللي عليك عليك
ياسمين : طيب انت كيف قابلته ، رجعت رنيت على رقمه ؟
احمد ( بغرور ) : ما دخلك ههه
ياسمين ( عصبت ) : ماشي يا احمد ، اخدت مني كل المعلومات و بعدين بتقلي ما دخلك
احمد ( بغمزني ) : لانك هبولة ههههه

_________________________________

حنين : كيف وافق بابا ؟
مها : …
رنين : ماما بنحكي معك ، ليه بعتوا ياسمين لعند احمد ؟
مها ( بصوت مخنوق ) : بكرا بسافر و بتبطل تشوفه
حنين ( وقعت من ايدها معلقة ) : يسافر !
رنين ( مصدومة و صابتها غصة ) : شوو ؟ لوين رح يسافر ؟ يا ويلي
مها : شغل بالسعودية ، الله يوفقه
حنين : شغل ؟ ياسمين فكر فيها ؟ شو رح يصير ببنتك ؟ ردي عليي ؟
رنين : اكيد رح ترجع تنتكس
حنين ( بتبكي ) : ما رح اسامحك يا احمد ازا صار باختي اشي ، ما رح اسامحك

بناتي كلهم بعزوا احمد ، و بعتبروه اخ غالي عليهم ..
خبر سفره ما كان هين علينا كلنا ، و زاد حملنا قدام ياسمين ..
شو رح تعمل لما تعرف انه خبينا عليها ، الله يسترك يا بنتي ..

_________________________________

هيثم : شكرا الك
علاء : العفو ، طمني عنك ؟ انت منيح
هيثم ( بهز براسه و بتنهد ) : منيح منيح ، بحكي معكم بس اروق
علاء : احكي معي باي وقت ، دير بالك
هيثم : ان شاءالله ، تسلم

_________________________________

منى : يلا بسرعة خلونا نفطر و نجهز حالنا
ياسمين : ليه ؟
سيرين : ما بتعرفي ؟
آيات : معقول ما عزموكم ؟
منى : لا امبلا حكى للكل خالك
اسيل : فهمونا طيب
سيرين : ديمة و عدي طلبتهم اليوم
ياسمين ( مصدومة ) : معقول ؟ الف مبروك طيب مبارح ما حكوا
آيات : يمكن ما كانوا مقررين ، ابصر شو صار ؟

انصدمت كتير بس سمعت الخبر ، و رحت اسال احمد ..

احمد : اه مبارح ديمة ردتله خبر مع علاء ، بس ما قالوا في طلبة ، الصبح كان مقرر هو و اهله و خبرنا
ياسمين : طيب و احنا ليه ما حكولنا ؟
احمد : ما بعرف ، يمكن حكوا لامك و نسيت تخبركم
ياسمين : طيب انا و اسيل و امير كيف رح نروح ؟ بتوصلنا على بيتنا اول
احمد : اكيد لا ، كلنا مع بعض بنروح
ياسمين : بحكي مع ماما اسالها احسن اشي

رنيت لماما سالتها ، و حكتلي انها نسيت تخبرني ، و روحي مع دار خالتك ..

ياسمين : يعني انا شو استفدت اليوم ؟ تحولت القعدة لدار خالتو سهى
امجد : مالهم يعني مو عاجبينك ؟ الحق عليه قصي جابلك مبارح ورد
احمد ( زور امجد ) : …
ياسمين : ورد شو ؟ قصدك الباقة اللي من احمد ؟
امجد ( استدرك حاله ) : لا وحدة ثانية ، ما كان عارف انه احمد جايب ، ف ما حب يضارب عليه ، خلاها بالسيارة باقته
سيرين : يا حرام كتير خجول قصي ، عادي لو نزلها ما فيها اشي
آيات : ههههه بالمرة
اسيل : احمد كتير حلوة باقتك ، بس ليه ما جبتها احمر ؟
احمد ( بعد اهتمام ) : مو مناسب

_________________________________

ابو قصي : اهلا و سهلا ، شرفتونا
ابو ماهر : يا اهلا فيك ، غلبناكم اليوم
سهى : اهلا اهلا ، نورتوا ، فوتوا وينكم ؟
ام ماهر : بصفوا بالسيارة ، هي بيان اجت معنا
بيان : مرحبا عمتو ، يعطيكم العافية
قصي : اهلا ببنت عم العريس

ما في احلى من هاللمة ، و سفرة كلها حب و فرح ..
مع انه القلوب فيها غصات ، و العقول تعبانة من التفكير ..

ابو عدي : منورة يا عروس
ابو بيان : الله يسعدك يا خالي ، دمدومتنا المرحة البشوشة
عمر : صبرتي و نلتي ، الك نصيب اكون عم اولادك
قصي : هههههه يا رب تستر اولاد اختي من جيناتك
علاء : …
ابو قصي : الله يحميكم جميعا ، عقبال عندك يا عمر
عمر : بوجودك عمي ، و الله شايف هاليوم قريب باذن الله
قصي : اقرب من يوم العيد ؟
الجميع : ههههههه

عدي ( بهمس لعلاء ) : شو القصة ؟
علاء ( بهمس ) : بعدين بحكيلك

ابو عدي : شو وين الربع مطولين ؟
سهى : و الله ما بعرف ، مها حكتلي طلعوا يمكن على وصول
ابو بيان : هيثم وين اراضيه ، بلعب مع الببو
ام بيان : لسا ما سموه ؟
ابو علاء : النية آدم ، اقترحوا عليه علاء و احمد اليوم
ريم : كان بده يسمي يوسف ، بس احمد اعترض قال اسماء اولاده هو و ياسمين متفقين يحيى و يوسف
ابو ماهر : لا حول و لا قوة الا بالله ، كمان مسميين اولادهم
ام ماهر : لو ردوا علينا و تجوزوا و سكنوا ببيتنا كان احسنلهم ، بس الثنين اعند من بعض الله يهديهم
بيان : خلص ستي نصيبهم
قصي : عقبال عندك يا بيان
ابو بيان : لما تتخرج
ام عدي : مو قلتوا اجا ابن خالها و بده يخطبها ؟
ام بيان : ابوها مو موافق ، قال بس تتخرج و كبير عليها
نهى : مين ابن خالها ؟ اللي بالامارات ؟

عمر ( بهمس لقصي ) : الللعب ، وينك يا امجد ؟
قصي ( بهمس ) : اوعى تحكيله ، بقلبلنا القعدة هسة
عمر : هههههه

ابو بيان : بنتي الوحيدة و اغربها ، لو الملك ما بعطيها
ابو ماهر : شو هالحكي ، ان كان كل واحد بنته الوحيدة ما غربها ما حدا بتجوز
ابو علاء : مهي كل البلد متغربة يا ابن الحلال ، تقطع بنصيب البنت حرام عليك
ديمة : طيب لحظة البنت شو رايها ؟
ريم : و كم في فرق بينهم ؟ و شو مواصفات العريس ؟
علاء : بالله ؟
ريم : اه طبعا ، يعني متغربة و متغربة تكون لواحد محرز ، اله مستقبل
علاء ( بعصبية ) : ما تتدخلي ، الها اهل بجوزوها ، كلام فاضي ما بدها الشغلة ، النسوان عقلهم بالمصاري
ريم ( مخنوقة ) : انا ما حكيت مصاري
نهى : شو مالك ماما ؟ ما حكت اشي و كلامها صحيح مرتك ، يعني فوق الفقر ضمة قبر كمان ، متغربة و بعيدة عن اهلها ، و تعيش حياة الذل
بيان : تسمحولي احكي ؟
ابو عدي : احكي يا عمي
بيان : انا مو موافقة ، وبس ، خلص ما حدا يناقشني
ام بيان : و الله ! لا مو على كيفك لساتك صغيرة و مو عارفة مصلحتك منيح

سهى : خليها تخطبها لحدا من اهلها اريح
نهى : البنت مو موافقة شوفيها
سهى : ما دخلنا ، يصطفلوا

_________________________________

منى : معقول دار زياد وصلوا ؟
ابو احمد : يمكن ، يلا رنوا الجرس
انس ( حامل امير ) : يلا اسيل ، امير ما بدك تنام حبيبي
قصي : اهلا وسهلا
ابو احمد : السلام عليكم
الجميع : و عليكم السلام
منى : مباارك يارب ، التمام على خير
سهى : شو اسيل و امير معكم ، تعال خالتو
نهى : وين سيرين ؟
ابو ماهر : وين اولادك يابا ؟
انس : كلهم بسيارة امجد
قصي : مين و مين ؟
اسيل : احمد و امجد و ياسمين و سيرين و آيات
عمر : المقطورة الملكية
علاء / عدي : هههههههه
ديمة : احط الحلو هلا ؟ ولا نستنى
عمر : حطي طبعا ، الله اعلم هدول متى يجو
قصي : سكتيلي هاد
اسيل : قصي ، وين باقة الورد اللي جبتها لياسمين ؟
قصي : اي باقة
عمر ( بده ينقذ قصي ) : يا زلمة وين اللي حكتلي بدك تفرجيني اياه تعال يلا قبل ما يحطوا الحلو و نطلع من المولد بلا حمص اليوم
قصي : اه اه يلا اسبقني

_________________________________

اول ما اسيل سالت قصي ، عرفت انه حدا جايب سيرة اللي صار مبارح ..
اتداركت الموقف بسرعة ، لحد ما يجي امجد و افهم منه ..

عمر : بدي اسالك سؤال و جاوبني عليه بصراحة ، ترا انا طول الليل ما نمت
قصي : يا لطيف ، خير ؟
عمر : هسة بنشوف اذا خير او لا ، انت مرة حكيتلي انك بتحب بنت اكبر منك صح ؟
قصي : صح هههه بعدك متذكر
عمر : يناسني الموت اذا بنسى انا ، المهم هالبنت مو ياسمين صح ؟
قصي ( مصدوم ) : لا ؟ شو ياسمين يا زلمة حبيبتي اسمها سعاد
عمر ( بمسخرة ) : نفسها حبيبة كاظم الساهر ؟
قصي : هههه ما ازنخك ، لا معي بالجامعة اكبر مني بسنة
عمر : يخرب بيت اليهود ، ولك شو اكبر منك ؟ هبيلة انت
قصي : لا مو هبيلة عادي شو فيها ؟
عمر : طيب اغرب عن وجهي ، حسابك بعدين ، هي اجو البقية تعال
قصي : امشي

هيك بكون اتطمنت على قصي ، لانه هالولد دايما بفاجأني بعمايله ..
الله يستر مين تكون هاي سعاد ، بقصف عمرك يا قصي اذا طلعت مو حلوة ، قال اكبر منه بسنة كمان ..
يا فرحتها عمتي بابنها الوحداني ..

_________________________________

مها : يا عيني اجينا سوا
ابو امير : وين اخوكي يابا ؟
ياسمين : مع انس و اسيل بسيارة عمو سبقونا
احمد / امجد : كيف عمي ؟ كيفكم يا بنات
حنين / رنين / فرح : الحمدلله
ابو امير : اهلين عمي ، الحمدلله ، يلا تفضلو تاخرنا عالجماعة
سيرين : يسلمو عالكعكات خالتو بشهوو
مها : صحتن
آيات : كانه الصحن جاي النا ، يعني لازم انا اللي اشكرها
سيرين : مهو بدي ازكرها عشان تعطينا صحن كمان
امجد : استغفر الله ، ما في امل منها هاي
حنين : الله يشفيكي يا سيرين ههههه
ياسمين : هههههه و الله حكتلها لماما هاتي صحن لدار خالتو نهى اعطيه للمفجوعة سيرين ، بس حكتلي عيب لازم لبيتهم نوديه
آيات : يا ريتك جبتيلها و سكتيها
رنين : انا عملته
حنين : اه صح كله رنين ، ما قعدت عالتلفزيون و لا حضرت اي ملسلسل
ياسمين : ههههه بلشنا فضايح
آيات : انا ما حضرت اليوم اي اشي من ورا الست سيرين و طلباتها عالاكل
سيرين : ماشي انتي و اياها ، خلوني بس ابارك لديمة و انا مروقة بعدين بنتحاسب
احمد : ياسمين ، زبطي شالتك شعرك طالع من الجوانب
ياسمين ( بتزبط بالقمطة و الشال ) : يييي مو منتبهة
ابو امير ( بتطلع عليهم و ساكت ) : …
مها : يلا رنوا الجرس

_________________________________

سهى : هي وصلوا
قصي : انا بفتح خليكم ، اهلا و سهلا
امجد : اخو العريس المتحمس
ابو امير : السلام عليكم
الجميع : و عليكم السلام
مها : للللليييييششش
ابو امير ( منصدم ) : اسم الله عليكي
الجميع : هههههه
ابو قصي : تسلمي يختي ، عقبال عند الباقيين يارب
ابو امير : مبروك عمو ديمة ، مبروك يا عريس
احمد : العريس عاقل اليوم شو قصته ؟
عدي : بستنى فيك انفعل
امجد : ديمة واخيرا خلصنا منك ، عقبال اللي بعدك يارب
ديمة : يارب ، و عقبال ما نخلص منك
ابو قصي : ههههه
امجد : و الله يا عدي تتهنى بدمدوم ، و لسانها
عدي : و هي كمان تتهنى فيي
ديمة ( بخجل مصطنع ) : يخليلي اياك يا رب
عمر : ولك ما قدر يصبر لبعد العيد ، توقيتها مناسب عشان تكسب العيدية
حنين : انت تفكيرك على قدك ، خليك ساكت
قصي : ههههه بلشت حنين قصف
امجد : يمة ، اعطوني الخوذة
علاء : يلا يا عروس حطي هالحلوان خلينا نقوم عالصلاة
ريم ( متجاكرة من علاء ) : انا بحط ، خليكي
سهى : ارتاحي ماما هي البنات بساعدوها
مها : ريته الف مبروك حبيبتي ريم ، الله يتمملك
ام بيان : ريم حامل ؟
نهى ( مبتسمة ) : الحمدلله ، جديد لسا
ابو عدي : و الله الف مبروك ، يا عيني هي الاحفاد بلشوا
ابو علاء / ابو قصي : الله يبارك فيك
ابو احمد / منى : …
ابو امير / مها : …

يتبع ..